ܬܡܘܙ 10

ܒܢܝ̈ ܡܕܝܢ݉ܬܐ ܕܩܕܝܫ̈ܐ (ܐܦܣܝ̈ܐ ܒ: 19)

ܡܘܼܕܝܼ ܝܠܵܗ̇ ܡܲܥܢܵܝܵܐ ܕܐܵܗܵܐ: ܕܐܲܚܢܲܢ ܗܵܘܲܚ ܒܢܲܝ̈ ܡܕܝܼܢ݉ܬܵܐ ܕܫܡܲܝܵܐ؟ ܡܲܥܢܵܝܘܼܗ̇ ܝܠܵܗ̇: ܕܐܲܚܢܲܢ ܬܚܘܿܬ ܗܵܟܲܡܬܵܐ ܕܫܡܲܝܵܐ ܝܘܲܚ. ܡܫܝܼܚܵܐ: ܡܲܠܟܵܐ ܕܫܡܲܝܵܐ: ܟܹܐ ܗܲܟܸܡ ܓܵܘ ܠܸܒ̈ܲܢ: ܨܠܘܿܬܲܢ ܕܝܵܘܡܵܐ ܒܝܵܘܡܵܐ ܐܵܗܵܐ ܝܠܵܗ̇: ܗܵܘܹܐ ܪܸܙܵܝܘܼܟ̣ ܕܵܐܟ̣ܝܼ ܕܝܼܠܹܗ ܒܫܡܲܝܵܐ: ܐܘܼܦ ܒܐܲܪܥܵܐ. ܦܲܖ̈ܡܵܢܹܐ ܕܒܸܦܠܵܛܵܐ ܝܢܵܐ ܡ̣ܢ ܬܪܘܿܢܘܿܣ ܕܚܸܩܪܵܐ: ܩܲܒܘܿܠܵܝ ܝܘܲܚ ܒܦܸܪܝܘܼܬܵܐ: ܘܠܦܘܼܩܕܵܢܹ̈ܐ ܓܘܼܖܹ̈ܐ ܕܡܲܠܟܵܐ ܟܹܐ ܡܲܨܝܸܬܲܚ ܒܚܵܕܘܼܬܵܐ. ܐܘܼܦ: ܐܲܝܟ̣ ܒܢܲܝ̈ ܡܕܝܼܢ݉ܬܵܐ ܕܐܘܿܪܸܫܠܸܡ ܚܲܕܬܵܐ: ܫܲܖ̈ܝܼܟܹܐ ܝܘܲܚ ܒܐܝܼܩܵܖܹ̈ܐ ܕܗ̇ܝ ܡܕܝܼܢ݉ܬܵܐ. ܗ̇ܘ ܐܝܼܩܵܪܵܐ ܕܐܝܼܬ ܠܗ݉ܘܿܢ ܡܲܠܲܐܟ̣ܹ̈ܐ ܩܲܕܝܼܫܹ̈ܐ: ܐܘܼܦ ܐܲܚܢܲܢ ܐܝܼܬ ܠܲܢ: ܣܵܒܵܒ ܐܲܚܢܲܢ ܗܲܪ ܐܵܕܝܼܵܐ ܒܢܘܿܢܹ̈ܐ ܕܐܲܠܵܗܵܐ ܝܘܲܚ: ܘܗܲܪ ܐܵܕܝܼܵܐ ܫܵܗܙܵܕܹ̈ܐ ܝܘܲܚ ܓܵܘ ܟܸܠܦܲܬ ܡܲܠܟܵܝܬܵܐ. ܠܒ̣ܝܼܫܹܐ ܝܘܲܚ ܐܸܣܛܠܵܐ ܒܹܐ ܠܲܟܵܐ ܕܙܲܕܝܼܩܘܼܬܵܐ ܕܡܫܝܼܚܵܐ: ܡܲܠܲܐܟ̣ܹ̈ܐ ܟܹܐ ܥܵܒ̣ܕܝܼ ܠܲܢ ܚܸܠܡܲܬ: ܩܲܕܝܼܫܹ̈ܐ ܝܢܵܐ ܚܲܒ̣ܖ̈ܵܘܵܬܲܢ: ܡܫܝܼܚܵܐ ܝܠܹܗ ܐܲܚܘܿܢܲܢ: ܐܲܠܵܗܵܐ ܒܵܒܲܢ: ܘܒܸܢܦܵܪ ܕܠܵܐ ܡܵܝܘܿܬܘܼܬܵܐ ܦܪܵܥܲܢ. ܫܲܖ̈ܝܼܟܹܐ ܝܘܲܚ ܒܐܝܼܩܵܖܹ̈ܐ ܕܒܢܲܝ̈ ܡܕܝܼܢ݉ܬܵܐ: ܣܵܒܵܒ ܥܒ̣ܝܼܪܹܐ ܝܘܲܚ ܓܵܘ ܓ̰ܵܡܵܥܲܬ ܘܥܹܕܬܵܐ ܕܒܘܼܟ̣ܖܹ̈ܐ ܕܫܸܡܵܢܵܝ ܟܬܝܼܒ̣ܹܐ ܝܢܵܐ ܒܫܡܲܝܵܐ. ܐܲܝܟ̣ ܒܢܲܝ̈ ܡܕܝܼܢ݉ܬܵܐ ܕܫܡܲܝܵܐ: ܐܝܼܬ ܠܲܢ ܗܲܩ ܕܡܵܪܘܼܬܵܐ ܓܵܘܵܢܵܝܬܵܐ ܥܲܠ ܟܠܵܗ̇ ܕܵܘܸܠܬܘܼܗ̇. ܕܝܼܲܢ ܝܼܢܵܐ ܕܲܖ̈ܘܲܙܘܼܗ̇ ܕܡܲܪܓܵܢܝܼܬܵܐ ܘܒܵܕܵܢܘܼ̈ܗ̇ ܕܥܲܩܝܼܩ: ܕܝܼܲܢ ܝܠܹܗ ܗ̇ܘ ܒܲܗܪܵܐ ܨܸܦܝܵܐ ܕܗ̇ܝ ܡܕܝܼܢ݉ܬܵܐ ܕܠܹܐ ܝܠܵܗ̇ ܣܢܝܼܩܬܵܐ ܠܫܪܵܥܵܐ ܘܠܵܐ ܠܒܲܗܪܵܐ ܕܫܸܡܫܵܐ: ܕܝܼܲܢ ܝܼܢܵܐ ܢܲܗܪܵܐ ܕܡ̈ܝܼܵܐ ܚܵܝܹ̈ܐ ܘܐܘܼܦ ܬܪܸܥܣܲܪ ܬܵܗܵܖܹ̈ܐ ܕܛܥܘܼܢܝܵܬܹ̈ܐ ܕܟܹܐ ܡܲܝܬ݉ܝܼ ܐܝܼܠܵܢܹ̈ܐ ܕܥܲܠ ܡܲܖ̈ܙܵܢܘܼܗܝ. ܠܲܝܬ ܡܸܕܢܝܼ ܓܵܘ ܫܡܲܝܵܐ ܕܠܹܐ ܝܠܹܗ ܕܝܼܲܢ. ܡܸܢܕܝܼܵܢܹ̈ܐ ܕܝܼܢܵܐ ܘܐܘܼܦ ܐܵܢܝܼ ܕܒܸܬ ܗܵܘܝܼ: ܟܠܵܝ ܕܝܼܲܢ ܝܼܢܵܐ: ܡܸܢ݉ܕܪܸܫ݉: ܐܲܝܟ̣ ܒܢܲܝ̈ ܡܕܝܼܢ݉ܬܵܐ ܕܫܡܲܝܵܐ: ܫܲܖ̈ܝܼܟܹܐ ܝܘܲܚ ܒܚܵܕܘܼܝܵܬܘܼ̈ܗ̇. ܐܵܢܝܼ ܬܵܡܵܐ ܟܹܐ ܚܵܕܝܼ ܒܘܼܬ ܚܲܛܵܝܹ̈ܐ ܬܲܘܸܒܵܢܹ̈ܐ ــ ܐܵܣܘܿܛܹ̈ܐ ܕܝܼܖܹ̈ܐ ܗܲܕܟ̣ܵܐ ܐܘܼܦ ܐܲܚܢܲܢ. ܐܵܢܝܼ ܟܹܐ ܙܵܡܪܝܼ ܗܲܠܸܠܘܼܝܹ̈ܐ ܕܫܵܦܵܩܲܬ ܓ̣ܵܠܒܵܢܬܵܐ: ܗܵܕܵܐ ܙܹܐ ܐܲܚܢܲܢ. ܐܸܢ ܐܵܢܝܼ ܟܹܐ ܣܵܦܪܝܼ ܠܐ݉ܬܵܝܬܘܼܗܝ ܓܵܗܵܐ ܕܬܲܪܬܹܝ: ܐܘܼܦ ܐܲܚܢܲܢ ܒܸܣܦܵܪܵܐ ܝܘܲܚ. ܒܲܣ ܐܸܢ ܐܲܚܢܲܢ ܗܲܕܟ̣ܵܐ ܒܢܲܝ̈ ܡܕܝܼܢ݉ܬܵܐ ܕܫܡܲܝܵܐ ܝܘܲܚ: ܫܒ̣ܘܿܩ ܚܕܵܖ̈ܲܢ ܘܥܵܡܵܠ̈ܲܢ ܕܵܒ̣ܩܝܼ ܥܲܡ ܐܝܼܩܵܪܲܢ.