ܬܡܘܙ 14
ܣܒܒ ܐܣܒܒܘ̈ܟ̣ ܡܓ̰ܘܓ̰ܬ ܥܠܘܗ̇: ܘܟ̰ܘܦܠܢܘܗ̇ ܝܘܬ (ܡܦܩܢܐ ܟ: 25)
ܡܲܕܒܚܵܐ ܕܐܲܠܵܗܵܐ ܓܵܪܵܓ ܦܵܐܸܫ ܗ݉ܘܵܐ ܒܸܢܝܵܐ ܡ̣ܢ ܟܹܐܦܹ̈ܐ ܠܵܐ ܦܖ̈ܝܼܡܹܐ: ܩܵܐ ܕܗܸܟ̃ ܫܵܘܦܵܐ ܕܥܵܘܩܸܒ ܝܲܢ ܕܦܘܼܠܚܵܢܵܐ ܕܒܲܪܢܵܫܵܐ ܠܵܐ ܦܵܐܸܫ ܗ݉ܘܵܐ ܚܸܙܝܵܐ ܒܝܼܘܼܗܝ. ܥܵܩܸܠܕܵܪܘܼܬܵܐ ܐ݉ܢܵܫܵܝܬܵܐ ܟܹܐ ܒܵܥܝܵܐ ܕܦܲܪܡܵܐ ܘܟ̰ܵܥܕܵܐ ܠܝܘܼܠܦܵܢܹ̈ܐ ܕܙܩܝܼܦܵܐ ܩܵܐ ܕܥܵܒ̣ܕܵܐ ܠܗ݉ܘܿܢ ܒܘܼܫ ܠܚܝܼܡܹ̈ܐ ܠܐܲܗܘܵܠ ܫܲܩܝܼ ܕܐܲܨܠܵܐ ܚܪܝܼܒ̣ܵܐ: ܐܝܼܢܵܐ ܥܵܩܸܠܕܵܪܘܼܬܵܐ ܦܲܓ̣ܪܵܢܵܝܬܵܐ ܡ̣ܢ ܓܹܒܵܐ ܕܥܵܒ̣ܕܵܐ ܠܵܗ̇ ܡܲܫܚܲܕܬܵܐ ܒܘܼܫ ܨܦܵܝܝܼ: ܟ̰ܲܦܠܘܼܢܹܐ ܟܹܐ ܟ̰ܲܦܠܸܢܵܐ ܠܵܗ̇: ܘܟܹܐ ܫܲܚܠܸܦܵܐ ܠܵܗ̇ ܗܲܠ ܕܒܹܗܘܵܝܵܐ ܝܠܵܗ̇ ܚܕܵܐ ܡܲܫܚܲܕܬܵܐ ܟ̰ܸܡ ܦܪܝܼܫܬܵܐ ܡ̣ܢ ܣܲܪܲܣܬܘܼܬܵܐ ܕܐܲܠܵܗܵܐ. ܟܠܵܝ ܫܲܚܠܲܦܝܵܬܹ̈ܐ ܘܬܘܼܖ̈ܵܨܹܐ ܕܒܲܪܢܵܫܵܐ ܠܗܸܡܸܙܡܵܢ ܕܐܲܠܵܗܵܐ: ܛܲܡܐܘܼܝܵܬܹ̈ܐ ܘܟ̰ܲܦܠܲܢܝܵܬܹ̈ܐ ܝܢܵܐ. ܠܸܒܵܐ ܫܲܒ̣ܗܪܵܢܵܐ ܕܒܲܪܢܵܫܵܐ ܪܵܒܵܐ ܡܘܼܫܬܵܪܝܼ ܝܠܹܗ ܠܡܲܟܫܘܼܛܘܼܗ̇ ܓܵܢܘܼܗܝ ܩܲܕ݉ܡ ܐܲܠܵܗܵܐ. ܐ݉ܢܵܫܹ̈ܐ ܟܹܐ ܥܵܒ̣ܕܝܼ ܖ̈ܵܐܝܹܐ ܘܗܵܕܲܪܬܵܐ ܕܓܵܢܵܐ ܩܵܐ ܡܫܝܼܚܵܐ: ܗܹܒ̣ܝܼܵܝ ܟܹܐ ܡܲܬܒ̣ܝܼ ܒܡܲܟܝܼܟ̣ܘܼܬܵܐ ܘܒܬܵܘܒܵܟܵܪܘܼܬܵܐ: ܟܹܐ ܚܵܦܛܝܼ ܠܹܥܒ̣ܵܕܵܐ ܦܘܼܠܚܵܢܹ̈ܐ ܨܦܵܝܝܼ: ܟܹܐ ܚܵܬܪܝܼ ܪܵܒܵܐ ܒܡܨܵܝܵܬܵܝ̈ ܟܝܵܢܵܝܹ̈ܐ: ܘܒܟܠܵܝ ܐܘܼܖ̈ܚܵܬܹܐ ܟܹܐ ܡܵܚܝܼ ܚܲܝܠܵܐ ܠܡܲܪܘܿܡܹܐ ܐܲܣܒܵܒܹ̈ܐ ܕܒܲܪܢܵܫܵܐ ܥܲܠ ܡܲܕܒܚܵܐ ܕܐܲܠܵܗܵܐ. ܨܦܵܝܝܼ ܝܗ݉ܘܵܐ ܐܸܢ ܚܲܛܵܝܹ̈ܐ ܕܵܟ̣ܪܝܼ ܗ݉ܘܵܘ ܕܟܠܵܝ ܣܢܵܕܝܵܬܵܝ̈ ܒܸܣܖ̈ܵܢܵܝܹܐ ܠܹܐ ܡܵܨܝܼ ܡܲܟܡܸܠܝܼ ܐܸܠܵܐ ܐܲܚܟ̰ܝܼ ܟܹܐ ܡܲܒܨܸܪܝܼ ܠܫܘܼܠܵܐ ܕܦܵܪܘܿܩܵܝ. ܒܫܘܼܠܵܐ ܕܚܘܼܣܵܝܵܐ ܡܵܪܝܵܐ ܒܢܲܦ̮ܫܘܼܗܝ ܓܵܪܵܓ ܦܵܐܸܫ ܚܩܝܼܪܵܐ: ܘܠܲܝܬ ܪܘܼܚܨܲܬ ܩܵܐ ܗܸܟ̃ ܟ̰ܵܟܘܿܫ ܝܲܢ ܡܲܩܵܪ ܕܒܲܪܢܵܫܵܐ. ܐܝܼܬ ܚܲܕ݉ ܬܵܗܵܪ ܕܓܘܼܕܵܦܵܐ ܒܗ̇ܝ ܕܒܲܪܢܵܫܵܐ ܓ̰ܲܪܸܒ ܠܡܲܙܝܘܼܕܹܐ ܥܲܠ ܗ̇ܘ ܫܘܼܠܵܐ ܕܡܵܪܲܢ ܒܕܵܩܝܼܩܘܼ̈ܗܝ ܐ݉ܚܵܖ̈ܵܝܹܐ ܕܥܲܠ ܐܲܪܥܵܐ ܡܘܼܕܸܥ ܠܹܗ ܕܬܘܼܡܸܡܵܐ ܝܗ݉ܘܵܐ: ܘܒܓ̰ܵܪܲܒܬܵܐ ܠܹܥܒ̣ܵܕܵܐ ܒܘܼܫ ܨܦܵܝܝܼ ܠܚܲܕ݉ ܡܸܢܕܝܼ ܕܝܹܗܘܿܘܵܐ ܒܸܚܙܵܝܘܼܗܝ ܝܠܹܗ ܟܵܡܝܼܠ. ܝܵܐ ܚܲܛܵܝܵܐ ܪܵܓܕܵܢܵܐ: ܙܸܠ݉: ܠܲܒܸܠ ܐܲܣܒܵܒܘܼ̈ܟ̣: ܘܢܦܘܿܠ ܥܲܠ ܒܘܼܖ̈ܟܵܟܘܼܟ̣ ܒܢܵܘܢܵܝܬܵܐ ܕܡܲܟܝܼܟ̣ܘܼܬܵܐ: ܘܩܲܒܸܠ ܠܹܗ ܡܵܪܲܢ ܡܫܝܼܚܵܐ ܐܲܝܟ̣ ܡܲܕܒܚܵܐ ܟܵܡܝܼܠ ܕܚܘܼܣܵܝܘܼܟ̣: ܘܣܒܘܿܪ ܒܝܼܘܼܗܝ ܒܢܲܦ̮ܫܘܼܗܝ.
ܪܵܒܵܐ ܡܵܘܕܝܼܵܢܹ̈ܐ ܟܹܐ ܡܵܨܝܼ ܩܲܒܠܝܼ ܚܕܵܐ ܡܲܚܒܲܪܬܵܐ ܡ̣ܢ ܓ̰ܲܪܓܵܐ ܕܐܵܗܵܐ ܨܲܦܪܵܐ: ܒܘܼܬ ܝܘܼܠܦܵܢܹ̈ܐ ܕܐܵܢܝܼ ܩܘܼܒܠܹܐ ܝܢܵܐ. ܫܒ̣ܘܿܩ ܐܵܟ̣ܠܲܚ ܚܲܡ ܠܕܲܪܩܘܼܒ̣ܠ ܕܐܵܗܵܐ ܩܲܫܕܸܪܵܢܘܼܬܵܐ: ܘܩܲܒܠܲܚ ܠܵܗ̇ ܣܲܪܲܣܬܘܼܬܵܐ ܕܵܐܟ̣ܝܼ ܕܡܵܘܫ݉ܟ̰ܚܘܼܗ̇ ܝܘܲܚ: ܟܲܕ ܒܸܚܕܵܝܵܐ ܕܚܲܒܖܹ̈ܐ ܕܓܸܠܝܵܢܵܐ ܐܲܠܵܗܵܝܵܐ ܟܹܐܦܹ̈ܐ ܠܵܐ ܦܖ̈ܝܼܡܹܐ ܝܢܵܐ: ܘܗܲܕܟ̣ܵܐ ܒܘܼܫ ܠܚܝܼܡܹܐ ܝܢܵܐ ܩܵܐ ܒܢܵܝܬܵܐ ܕܡܲܕܒܚܵܐ ܕܡܵܪܝܵܐ.