ܬܡܘܙ 16
ܘܟܐ ܓ̰ܡܥܝ ܗ݉ܘܘ ܠܗ (ܡܢܢܐ) ܨܦܪܐ ܒܨܦܪܐ (ܡܦܩܢܐ ܥܘ: 21)
ܡܚܝܼ ܚܲܝܠܵܐ ܠܸܩܢܵܝܵܐ ܚܕܵܐ ܦܲܪܡܵܝܬܵܐ ܨܦܵܝܝܼ ܒܘܼܬ ܣܢܝܼܩܘܼܬܘܼܟ̣ ܬܲܡܵܡ ܥܲܠ ܪܸܙܵܝܵܐ ܛܵܒ̣ܵܐ ܕܡܵܪܝܵܐ ܩܵܐ ܬܲܪܣܵܝܬܘܼܟ̣ ܒܒܘܼܖ̈ܟܵܬܹܐ ܟ̰ܸܡ ܖܹ̈ܫܵܝܹܐ. ܗܸܟ̃ ܠܵܐ ܓ̰ܲܪܒܸܬ ܠܹܐܟ̣ܵܠܵܐ ܡܲܢܢܵܐ ܥܲܬܝܼܩܵܐ: ܝܲܢ ܠܡܲܫ݉ܟ̰ܘܿܚܹܐ ܗܲܝܲܪܬܵܐ ܡ̣ܢ ܡܸܨܪܹܝܢ. ܐܸܢ ܡ̣ܢ ܡܫܝܼܚܵܐ ܠܵܐ ܩܲܒܠܸܬ ܟܠ ܡܸܢܕܝܼ: ܢܦܝܼܠܵܐ ܝܘܸܬ ܗܲܠ ܐܵܒܵܕ. ܡܫܵܚܝܵܬܹ̈ܐ ܥܲܬܝܼܩܹ̈ܐ ܠܹܐ ܡܵܠܝܼ ܠܝܼܵܗܒ̣ܵܐ ܪܹܝܚܵܐ ܒܲܣܝܼܡܵܐ ܠܪܘܼܚܘܼܟ̣. ܘܵܓ̰ܸܒ ܝܼܠܵܗ̇ ܕܡܸܫܚܵܐ ܬܵܙܵܐ ܦܵܐܸܫ ܨܘܼܢܨܸܠܵܐ ܥܲܠ ܪܹܫܘܼܟ̣ ܡ̣ܢ ܩܵܪ݉ܢܵܐ ܕܲܗܒ̣ܵܢܵܝܬܵܐ ܕܡܲܩܕܫܵܐ: ܐܸܠܵܐ ܒܸܬ ܒܲܛܸܠ ܚܸܩܪܘܼܗܝ. ܐܸܕܝܘܿܡ ܒܲܠܟܵܐ ܟܸܠܝܵܐ ܝܘܸܬ ܥܲܠ ܪܹܫܵܐ ܕܛܘܼܪܵܐ ܕܐܲܠܵܗܵܐ: ܐܝܼܢܵܐ ܗ̇ܘ ܕܩܵܡ ܡܲܐܣܸܩ ܠܘܼܟ̣ ܠܬܵܡܵܐ: ܗ̇ܘ ܓܵܪܵܓ ܕܚܵܡܹܐ ܠܘܼܟ̣: ܐܸܠܵܐ ܒܸܬ ܢܵܦܠܸܬ ܟ̰ܸܡ ܓ̰ܲܠܕܹܐ. ܛܘܼܪܘܼܟ̣ ܩܘܼܝܵܐ ܝܠܹܗ ܐܸܢ ܗ̇ܘ ܡܘܼܩܘܝܼܘܼܗܝ ܝܠܹܗ ܒܕܘܼܟܬܘܼܗܝ: ܐܸܢ ܛܲܫܹܐ ܦܵܬܘܼܗܝ: ܒܸܬ ܦܵܝܫܸܬ ܡܘܼܥܝܸܩܵܐ. ܦܵܪܘܿܩܘܼܟ̣ ܐܸܢ ܒܵܣܡܵܐ ܠܹܗ: ܒܚܲܕ݉ ܪܦܵܦܵܐ ܟܹܐ ܡܵܨܹܐ ܡܲܚܒ̣ܹܐ ܠܗ݉ܘܿܢ ܟܠܵܝ ܟܵܘܵܬܹ̈ܐ ܕܒܝܼܵܝ ܟܹܐ ܚܵܙܹܝܬ ܒܲܗܪܵܐ ܕܫܡܲܝܵܐ. ܝܼܫܘܿܥ ܒܲܪܢܘܿܢ ܡܘܼܟܠܹܐ ܠܹܗ ܠܫܸܡܫܵܐ ܓܵܘ ܪܩܝܼܥܵܐ: ܐܝܼܢܵܐ ܝܑܼܫܘܿܥ ܡܫܝܼܚܵܐ ܟܹܐ ܡܵܨܹܐ ܡܲܚܒ̣ܹܐ ܠܹܗ ܗܲܠ ܐܵܒܵܕ ܐܵܒܵܕܝܼܢ. ܐܝܼܬ ܠܹܗ ܡܨܵܝܬܵܐ ܠܒܲܛܘܿܠܘܼܗ̇ ܚܵܕܘܼܬܵܐ ܕܠܸܒܘܼܟ̣: ܘܠܒܲܗܪܵܐ ܕܥܲܝܢܘܼ̈ܟ̣: ܘܠܚܲܝܠܵܐ ܕܚܲܝܘܼ̈ܟ̣. ܒܐܝܼܕܘܼܗܝ ܝܠܹܗ ܗܘܼܟܡܵܐ ܕܚܵܕܘܼܝܵܬܘܼ̈ܟ̣: ܘܒܦܘܼܩܕܵܢܵܐ ܕܗ̇ܘ ܟܹܐ ܐܵܬܝܼ ܠܸܫܩܵܠܵܐ ܡܸܢܘܼܟ̣. ܢܝܼܲܬ ܩܘܝܼܬܵܐ ܕܦܵܪܘܿܩܲܢ ܝܼܠܵܗ̇ ܕܦܲܪܡܲܚ ܠܵܗ̇ ܟ̰ܸܡ ܬܲܡܵܡ ܐܵܗܵܐ ܣܢܵܕܬܵܐ ܥܲܠܘܼܗܝ ܒܟܠ ܣܵܥܲܬ ܘܕܵܩܝܼܩܵܐ: ܣܵܒܵܒ ܐܲܚܟ̰ܝܼ ܪܵܙܝܼ ܝܠܹܗ ܕܛܵܠܒܲܚ ܡܸܢܘܼܗܝ ܠܲܚܡܵܐ ܕܝܵܘܡܵܐ ܒܝܵܘܡܵܐ: ܘܩܵܘܠܘܼܗܝ ܝܼܠܹܗ: ܐܲܝܟ̣ ܝܵܘܡܵܢܘܼ̈ܟ̣ ܢܝܵܚܬܘܼܟ̣. ܠܹܐ ܝܠܵܗ̇ ܒܘܼܫ ܨܦܵܝܝܼ ܩܵܬܲܢ ܕܗܲܕܟ̣ܵܐ ܗܵܘܝܵܐ: ܩܵܐ ܕܪܵܒܵܐ ܓܵܗܹ̈ܐ ܩܲܪܒܸܢܲܚ ܠܬܪܘܿܢܘܿܣܘܼܗܝ ܘܦܵܝܫܲܚ ܡܘܼܕܟ̣ܸܪܹܐ ܒܘܼܬ ܚܘܼܒܘܼܗܝ؟ ܐܵܗ ܫܵܦܵܩܲܬ ܟܡܵܐ ܕܵܘܠܲܬܡܲܢܕ: ܕܟܹܐ ܬܲܪܣܝܼܵܐ ܠܲܢ ܒܕܵܝܸܡܘܼܬܵܐ ܘܠܹܐ ܚܵܣܟ̣ܵܐ ܓܵܢܘܼܗ̇ ܒܘܼܬ ܠܵܐ ܛܥܵܢܬܲܢ ܕܡܸܢܬܵܐ. ܬܲܢܬܲܣܝܵܬܘܼ̈ܗ̇ ܕܲܗܒ̣ܵܢܵܝܹ̈ܐ ܠܹܐ ܩܵܛܥܝܼ: ܥܲܝܒ̣ܵܐ ܕܒܘܼܖ̈ܟܵܬܹܐ ܗܲܡܵܫܵܐ ܥܲܠ ܡܲܣܟܵܢܲܢ ܥܲܪܩܘܼܠܹܐ ܝܠܵܗ̇. ܝܵܐ ܡܵܪܝܵܐ ܝܑܼܫܘܿܥ: ܩܲܕ݉ܡ ܐܲܩܠܵܬܘܼ̈ܟ̣ ܒܸܣܓ̣ܵܕܵܐ ܝܘܲܚ ܟܲܕ ܒܝܼܕܵܥܵܐ ܕܠܲܝܬ ܠܲܢ ܡܨܵܝܬܵܐ ܠܹܥܒ̣ܵܕܵܐ ܗܸܟ̃ ܡܸܢܕܝܼ ܕܠܵܐ ܕܝܼܘܼܟ̣: ܘܟܠ ܡܸܢܕܝܼ ܕܩܲܒܘܿܠܹܐ ܝܘܲܚ ܡܸܢܘܼܟ̣ ܒܸܬ ܚܵܩܪܲܚ ܠܫܸܡܘܼܟ̣ ܒܪܝܼܟ̣ܵܐ ܘܫܲܟܪܲܚ ܠܘܼܟ̣ ܒܘܼܬ ܚܘܼܒܘܼܟ̣ ܠܵܐ ܬܵܝܡܵܢܵܐ.