ܬܡܘܙ 18

ܒܐܚܪܝܬܐ ܟܘܟ̰ܝ: ܠܒܝܕܓ̣ܝ̈ (ܡܢܝܢ̈ܐ ܒ: 31)

ܥܲܣܟܵܖ̈ܘܵܬܹܐ ܕܝܼܣܪܵܝܹܠ ܟܲܕ ܒܹܥܒ̣ܵܕܵܐ ܝܗ݉ܘܵܘ ܣܵܦܵܪ: ܐܘܼܪܕܘܼܝ ܕܕܵܢ ܝܼܗ݉ܘܵܐ ܗ̇ܘ ܐ݉ܚܵܪܵܝܬܵܐ. ܕܘܼܟܬܵܐ ܟ̰ܸܡ ܠܵܒܵܬ݉ܪܵܝܼ ܕܘܼܟܬܵܐ ܕܕܵܢܵܝܹ̈ܐ ܝܗ݉ܘܵܐ: ܐܝܼܢܵܐ ܕܘܼܟܬܵܐ ܡܘܼܕܝܼ ܬܵܦܵܘܘܿܬ ܐܝܼܬ ܗ݉ܘܵܐ ܠܵܗ̇ ܩܵܬܵܝ ܟܲܕ ܐܵܢܝܼ ܡܸܓ̰ܸܕ ܚܲܕ݉ ܣܵܡܵܐ ܕܥܲܣܟܵܪ ܝܼܗ݉ܘܵܘ: ܠܵܐ ܒܵܨܘܿܖܹ̈ܐ ܡ̣ܢ ܐܵܢܝܼ ܟ̰ܸܡ ܩܲܕ݉ܡܵܝܹ̈ܐ؟ ܟܠܵܝ ܒܵܬ݉ܪ ܚܲܕ݉ ܣܛܘܼܢܵܐ ܕܥܢܵܢܵܐ ܘܕܢܘܼܪܵܐ ܒܹܐܙܵܠܵܐ ܝܗ݉ܘܵܘ: ܟܠܵܝ ܡ̣ܢ ܚܲܕ݉ ܡܲܢܢܵܐ ܒܹܐܟ̣ܵܠܵܐ ܝܗ݉ܘܵܘ: ܡ̣ܢ ܚܲܕ݉ ܩܵܝܵܐ ܕܪܘܼܚܵܐ ܟܹܐ ܫܵܬܝܼ ܗ݉ܘܵܘ. ܒܲܣ ܪܥܘܿܫ ܠܸܒܝܼ: ܚܕܝܼ: ܐܵܦܸܢ ܗܵܘܹܝܬ ܒܵܨܘܿܪܵܐ: ܩܵܬܘܼܟ̣ ܦܝܼܫܬܵܐ ܝܠܵܗ̇ ܝܘܼܗܒ̣ܸܠܬܵܐ ܠܹܗܘܵܝܵܐ ܓܵܘ ܥܲܣܟܵܪ: ܘܠܹܗܘܵܝܵܐ ܫܲܪܝܼܟܵܐ ܥܲܡ ܩܲܕ݉ܡܵܝܘܼ̈ܗ̇. ܚܲܕ݉ ܗܲܪ ܓܵܪܵܓ ܗܵܘܹܐ ܐ݉ܚܵܪܵܝܵܐ ܒܚܸܩܪܵܐ ܘܐܝܼܩܵܪܵܐ: ܚܲܕ݉ ܗܲܪ ܓܵܪܵܓ ܗܵܘܹܐ ܥܵܒ̣ܕܵܢܵܐ ܕܫܘܼܠܵܐ ܟ̰ܸܡ ܟܘܼܦܵܐ ܩܵܐ ܡܫܝܼܚܵܐ. ܩܵܡܘܿܕܝܼ ܐܵܢܵܐ ܠܵܐ ܗܵܘܹܝܢ ܗ̇ܘ ܚܲܕ݉؟ ܓܵܘ ܚܕܵܐ ܡܵܬܵܐ ܡܸܣܟܹܢܬܵܐ: ܒܓܵܘܵܐ ܕܐ݉ܢܵܫܹ̈ܐ ܟܵܣܸܒ ܘܢܲܙܵܢ: ܝܲܢ ܓܵܘ ܚܕܵܐ ܟܘܼܠܘܼܚܬܵܐ ܙܥܘܿܪܬܵܐ: ܒܓܵܘܵܐ ܕܚܲܛܵܝܹ̈ܐ ܟܘܼܦܹ̈ܐ: ܗܲܪ ܒܸܬ ܦܵܠܚܸܢ ܘܛܵܥܢܸܢ ܒܲܝܕܵܓ̣ܝܼ: ܫܒ̣ܘܿܩ ܗܵܘܹܝܢ ܒܣܵܡܵܐ ܐ݉ܚܵܪܵܝܵܐ.

ܕܵܢܵܝܹ̈ܐ ܕܒ̣ܝܼܩܹܐ ܝܗ݉ܘܵܘ ܚܕܵܐ ܕܘܼܟܬܵܐ ܪܵܒܵܐ ܡܵܪܹܐ ܘܲܓ̰ܗ. ܢܦܝܼܠܹ̈ܐ ܕܥܲܣܟܵܪ ܓܵܪܵܓ ܦܵܝܫܝܼ ܫܩܝܼܠܹܐ ܘܠܘܼܒܠܹܐ ܠܵܩܲܕ݉ܡܵܐ: ܡܸܢܕܝܼ ܬܠܝܼܩܵܐ ܕܐܘܼܪܕܘܼܝ ܓܵܪܵܓ ܦܵܐܸܫ ܓ̰ܘܼܡܥܵܐ. ܖ̈ܘܼܚܵܬܹܐ ܢܘܼܖ̈ܵܢܵܝܹܐ ܟܹܐ ܗܵܘܝܵܐ ܕܬܲܪܥܝܼ ܠܵܩܲܕ݉ܡܵܐ ܒܐܘܼܖ̈ܚܵܬܹܐ ܠܵܐ ܡܘܼܦܠܸܚܹ̈ܐ ܠܹܝܠܵܦܵܐ ܣܲܖ̈ܲܣܬܘܼܝܵܬܹܐ ܚܵܕ݉ܬܹ̈ܐ ܘܠܸܩܢܵܝܵܐ ܓܵܢܵܬܹ̈ܐ ܙܵܘܕܵܐ ܩܵܐ ܡܫܝܼܚܵܐ: ܐܝܼܢܵܐ ܒܸܬ ܗܵܘܝܼ ܚܲܕ݉ܟܡܵܐ ܕܪܘܼܚܵܝ ܒܘܼܫ ܠܵܒܵܬ݉ܪܵܐ ܢܦܝܼܠܬܵܐ ܝܠܵܗ̇: ܐܵܢܝܼ ܕܒܸܬ ܡܲܒܠܸܓܝܼ ܓܵܢܵܝ ܒܫܘܼܠܵܐ ܨܦܵܝܝܼ ܕܡܲܕܟ̣ܲܪܬܵܐ ܩܵܐ ܥܹܕܬܵܐ ܗܲܝܡܵܢܘܼܬܘܼܗ̇ ܩܵܕܝܼܡܝܼ ܘܚܵܠܵܢܬܵܐ ܕܒܢܘܿܢܘܼ̈ܗ̇ ܫܘܼܢܫܸܠܹ̈ܐ. ܟܠ ܕܘܼܟܬܵܐ ܐܝܼܬ ܠܵܗ̇ ܘܵܓ̰ܸܒܘܼܝܵܬܹ̈ܐ ܕܓܵܢܘܼܗ̇: ܘܒܢܘܿܢܹ̈ܐ ܕܐܲܠܵܗܵܐ ܓ̰ܵܘܓ̰ܵܢܹ̈ܐ ܒܢܝܼܚܘܼܬܵܐ ܒܸܬ ܡܲܫ݉ܟ̰ܚܝܼ ܠܵܗ̇ ܐܲܗܘܵܠܵܝ ܚܕܵܐ ܐܲܗܘܵܠ ܕܒܝܼܘܼܗ̇ ܟܹܐ ܡܵܨܝܼ ܠܹܗܘܵܝܵܐ ܚܕܵܐ ܒܘܼܪܟܬܵܐ ܥܲܠܗܲܕܵܐ ܩܵܐ ܟܠܵܗ̇ ܐܘܼܪܕܘܼܝ.

ܕܘܼܟܬܵܐ ܕܕܵܢܵܝܹ̈ܐ ܕܘܼܟܬܵܐ ܕܩܹܘܲܢܕܹܢܘܿܣ ܝܼܗ݉ܘܵܐ. ܕܸܫ̃ܡܸܢܹ̈ܐ ܠܵܐ ܐܲܚܟ̰ܝܼ ܠܵܩܲܕ݉ܡܵܐ ܐܝܼܬ ܠܲܢ: ܐܸܠܵܐ ܐܘܼܦ ܠܵܒܵܬ݉ܪܵܐ: ܘܠܵܙܸܡ ܝܼܠܵܗ̇ ܕܗܵܘܲܚ ܒܸܣܦܵܪܵܐ ܠܗܸܓ̰ܘܼܡܹ̈ܐ ܡ̣ܢ ܟܠܵܝ ܓܹܒܵܢܹ̈ܐ. ܟܪܸܣܛܝܵܢܵܐ ܒܵܠܵܕ ܫܒ̣ܘܿܩ ܕܡܲܦܠܸܚ ܟ̰ܲܟܘܼ̈ܗܝ ܠܗܲܝܘܼܪܹܐ ܠܐܵܢܝܼ ܕܝܼܢܵܐ ܙܲܒܘܼܢ ܘܫܵܥܫܵܢܹ̈ܐ: ܠܐܵܢܝܼ ܕܢܦܝܼܠܹܐ ܝܢܵܐ ܠܵܒܵܬ݉ܪܵܐ ܒܗܲܝܡܵܢܘܼܬܵܐ: ܒܝܕܲܥܬܵܐ ܘܒܚܵܕܘܼܬܵܐ. ܐܲܢܹܐ ܓܵܪܵܓ ܠܵܐ ܦܵܝܫܝܼ ܒܹܐ ܗܲܝܲܪܬܵܐ: ܒܘܼܬ ܐܵܗܵܐ: ܘܵܓ̰ܸܒܘܼܬܵܐ ܕܩܲܕܝܼܫܹ̈ܐ ܝܠܝܼܦܹ̈ܐ ܝܼܠܵܗ̇ ܠܸܛܥܵܢܵܐ ܒܲܝܕܵܓ̣ܵܝ̈ ܒܐܵܪܵܠܸܓ̣ ܕܐ݉ܚܵܖ̈ܵܝܹܐ.