ܬܡܘܙ 20

ܓܪܘ ܕܡܝܪܬܓܪܘܬܢ (ܐܦܣܝ̈ܐ ܐ: 14)

ܐܵܗ! ܡܘܼܕܝܼ ܒܲܗܪܲܢܬܵܐ ܕܓܵܢܵܐ: ܡܘܼܕܝܼ ܚܵܕܘܼܝܵܬܹ̈ܐ: ܡܘܼܕܝܼ ܝܲܗܒ̣ܵܠܬܵܐ ܕܠܸܒܵܐ: ܡܘܼܕܝܼ ܚܵܕܘܼܬܵܐ ܕܠܸܒܵܐ ܟܹܐ ܩܲܒܸܠ ܗ̇ܘ ܐ݉ܢܵܫܵܐ ܕܝܠܝܼܦܵܐ ܝܠܹܗ ܠܹܐܟ̣ܵܠܵܐ ܡ̣ܢ ܡܫܝܼܚܵܐ: ܘܐܲܚܟ̰ܝܼ ܡܸܢܘܼܗܝ: ܐܝܼܢܵܐ ܡܸܢ݉ܕܪܸܫ݉: ܗ̇ܝ ܪܥܵܫܬܵܐ ܕܐܝܼܬ ܠܲܢ ܠܩܲܕܪܵܐ ܕܡܫܝܼܚܵܐ ܒܐܲܢܹܐ ܚܲܝܹ̈ܐ ܪܵܒܵܐ ܢܵܐܟܵܡܝܼܠ ܝܼܠܵܗ̇ . ܐܲܚܢܲܢ ܛܥܝܼܡܹܐ ܝܘܲܚ ܕܛܵܒ̣ܵܐ ܝܠܹܗ ܡܵܪܝܵܐ: ܐܝܼܢܵܐ ܗܵܠܵܐ ܠܹܐ ܝܲܕܥܲܚ ܕܟܡܵܐ ܛܵܒ̣ܵܐ ܡܪܲܚܡܵܢܵܐ ܝܠܹܗ: ܡܸܢ݉ܕܪܸܫ݉ ܗ̇ܘ ܩܲܕܪܵܐ ܙܥܘܿܪܵܐ ܕܪܥܝܼܫܵܐ ܝܘܲܚ ܠܛܲܥܡܘܼܗܝ ܒܹܥܒ̣ܵܕܲܢ ܝܼܠܹܗ ܕܫܲܗܘܸܬܲܚ ܠܙܵܘܕܵܐ. ܐ݉ܟ̣ܝܼܠܹܐ ܝܘܲܚ ܢܘܼܒܲܪܠܸܓ̣ ܕܪܘܼܚܵܐ: ܘܗܲܕܟ̣ܵܐ ܐܵܕܝܼܵܐ ܟܦܝܼܢܹ̈ܐ ܘܨܸܗܝܹ̈ܐ ܝܘܲܚ ܠܡܹܐܟ̣ܘܼܠܬܵܐ ܫܡܲܝܵܢܵܝܬܵܐ. ܬܲܢܘܼܚܹܐ ܝܘܲܚ ܒܓܵܢܲܢ: ܟܲܕ ܒܸܣܦܵܪܵܐ ܠܩܲܒܵܠܬܵܐ ܕܒܢܘܿܢܹ̈ܐ. ܒܐܵܗܵܐ ܒܸܕܡܵܝܵܐ ܝܘܲܚ ܠܒܢܲܝ̈ ܝܼܣܪܵܝܹܠ ܓܵܘ ܒܲܪܝܼܵܐ: ܐܵܢܝܼ ܕܐܝܼܬ ܗ݉ܘܵܐ ܠܗ݉ܘܿܢ ܐܲܚܟ̰ܝܼ ܚܲܕ݉ ܩܘܼܢܛܵܝܦܵܐ ܡ̣ܢ ܥܲܢܒ̣ܹ̈ܐ ܕܐܲܫܟܘܿܠ. ܬܵܡܵܐ ܒܸܬ ܗܵܘܲܚ ܓܵܘ ܟܲܪܡܵܐ. ܠܲܐܟ̣ܵܐ ܡܲܢܢܵܐ ܒܸܚܙܵܝܘܼܗܝ ܝܘܲܚ ܕܲܝܩܵܐ: ܐܲܝܟ̣ ܒܲܪܙܲܪܥܵܐ ܕܬܵܘܠܹ̈ܐ: ܐܝܼܢܵܐ ܬܵܡܵܐ ܒܸܬ ܐܵܟ̣ܠܲܚ ܠܲܚܡܵܐ ܕܫܡܲܝܵܐ ܘܕܲܚܠܵܐ ܥܲܬܝܼܩܵܐ ܕܐܲܪܥܵܐ. ܐܵܕܝܼܵܐ ܐܲܚܟ̰ܝܼ ܝܵܠܘܿܦܹ̈ܐ ܝܘܲܚ ܒܥܸܠܡ ܪܘܼܚܵܢܵܝܬܵܐ: ܣܵܒܵܒ ܐܵܦܸܢ ܕܐܵܬܘܵܬܹ̈ܐ ܩܲܕ݉ܡܵܝܹ̈ܐ ܕܐܵܠܲܦ ܘܒܹܝܬ ܝܠܝܼܦܵܝ ܝܘܲܚ: ܗܵܠܵܐ ܓܘܼܫܡܹ̈ܐ ܠܹܐ ܡܵܨܲܚ ܗܲܓܲܚ: ܘܐܸܠܵܐܟܹܐ ܡܹܐܡܖܹ̈ܐ: ܗܸܟ̃ ܠܹܐ ܡܵܨܲܚ ܠܡܲܠܚܘܼܡܵܝ. ܐܝܼܢܵܐ ܐܲܝܟ̣ ܚܲܕ݉ ܐ݉ܢܵܫܵܐ ܒܹܐܡܵܪܵܐ ܝܠܹܗ: ܗ̇ܘ ܕܡܘܼܥܒ̣ܸܪܵܐ ܝܠܹܗ ܚܲܡܫܵܐ ܕܲܩܝܼܩܹ̈ܐ ܓܵܘ ܫܡܲܝܵܐ ܝܠܝܼܦܵܐ ܝܠܹܗ ܙܵܘܕܵܐ ܡ̣ܢ ܟܠܵܝ ܪܵܐܝܝܼܟܵܖܹ̈ܐ ܕܐܲܪܥܵܐ. ܐܵܕܝܼܵܐ ܐܝܼܬ ܠܲܢ ܪܵܒܵܐ ܒܵܥܘܼܝܵܬܹ̈ܐ ܠܵܐ ܓ̰ܘܼܘܸܒܹ̈ܐ ܐܝܼܢܵܐ ܒܵܬ݉ܪ ܚܲܕ݉ܟ̰ܵܐ ܟܠܵܝ ܡܲܛܠܲܒ̈ܲܢ ܒܸܬ ܦܵܝܫܝܼ ܬܘܼܡܸܡܹܐ: ܘܟܠܵܝ ܡܨܵܝܵܬ̈ܲܢ ܒܸܬ ܡܲܫ݉ܟ̰ܚܝܼ ܒܘܼܠܓܵܢܵܐ ܗܲܢܝܼܵܐܐ ܓܵܘ ܗ̇ܘ ܥܵܠܡܵܐ ܐܵܒܵܕܝܼܢܵܝܵܐ ܕܚܵܕܘܼܬܵܐ. ܟܪܸܣܛܝܵܢܵܐ: ܒܵܬ݉ܪ ܚܲܕ݉ ܙܲܒ̣ܢܵܐ ܟ̰ܸܡ ܟܸܪܝܵܐ ܒܸܬ ܗܵܘܹܝܬ ܪܲܕ ܡ̣ܢ ܟܠܵܝ ܚܲܡܘܼ̈ܟ̣ ܘܓ̰ܘܼܖ̈ܵܒܘܼܟ̣. ܥܲܝܢܘܼ̈ܟ̣ ܕܐܵܕܝܼܵܐ ܦܝܵܫܵܐ ܝܢܵܐ ܡܘܼܣܚܝܹܐ ܒܕܸܡܥܹ̈ܐ ܒܵܬ݉ܪ ܚܲܕ݉ܟ̰ܵܐ ܠܹܐ ܒܵܟ̣ܝܼ ܐ݉ܚܸܪ݉ܢܵܐ. ܒܚܵܕܘܼܬܵܐ ܠܵܐ ܥܵܒ̣ܪܵܢܬܵܐ ܒܸܬ ܚܵܝܪܸܬ ܠܐܝܼܩܵܪܵܐ ܕܗ̇ܘ ܕܝܬܝܼܒ̣ܵܐ ܝܠܹܗ ܥܲܠ ܬܪܘܿܢܘܿܣ: ܘܗܵܠܵܐ ܙܵܘܕܵܐ ܡ̣ܢ ܐܵܗܵܐ ــ ܥܲܠ ܬܪܘܿܢܘܿܣܘܼܗܝ ܒܸܬ ܝܵܬܒ̣ܸܬ. ܒܟܠܵܝ ܚܵܕܘܼܝܵܬܘܼ̈ܗܝ ܒܸܬ ܫܲܪܸܟܸܬ: ܘܥܲܡܘܼܗܝ ܒܸܬ ܗܵܘܹܝܬ ܝܵܪܘܿܬܵܐ ܕܟܠܵܝ ܡܸܢܕܝܼܵܢܹ̈ܐ.