ܬܡܘܙ 25

ܘܫܒ̣ܝܩ ܠܗ ܓ̰ܘܠܘܗܝ ܒܐܝܼܕܘܗ̇: ܘܥܪܝܼܩ ܠܗ: ܘܦܠܝܼܛ ܠܗ ܠܒ̣ܕܪ (ܒܪܝܬܐ ܠܛ: 12)

ܒܦܠܵܫܵܐ ܕܥܲܡ ܚܲܕ݉ܟܡܵܐ ܚܛܝܼܵܬܹ̈ܐ ܠܲܝܬ ܗܸܟ̃ ܐܘܼܪܚܵܐ ܕܓ̣ܠܵܒܬܵܐ ܡܵܓܵܪ ܥܪܵܩܬܵܐ. ܐܝܼܬ ܚܲܕ݉ ܗܲܝܘܵܢ ܕܟܹܐ ܚܵܪܸܫ ܠܹܗ ܨܲܝܕܘܼܗܝ ܒܓܵܫܲܩܬܵܐ ܕܥܲܝܢܘܼ̈ܗܝ: ܗܲܪ ܗܵܕܵܐ: ܓܵܫܲܩܬܵܐ ܠܚܛܝܼܬܵܐ ܟܹܐ ܕܵܪܝܵܐ ܠܲܢ ܓܵܘ ܩܹܘܲܢܕܹܢܘܿܣ. ܗ̇ܘ ܕܒܵܥܹܐ ܪܵܚܸܩ ܡ̣ܢ ܒܝܼܫܬܵܐ: ܓܵܪܵܓ ܪܵܚܸܩ ܡ̣ܢ ܣܵܒܵܒܹ̈ܐ ܕܟܹܐ ܡܲܩܘܝܼ ܠܵܗ̇. ܘܵܓ̰ܸܒ ܝܼܠܵܗ̇ ܕܩܵܛܥܲܚ ܩܵܘܠܵܐ ܥܲܡ ܥܲܝܢ̈ܲܢ ܕܠܵܐ ܚܵܝܪܲܚ ܐܘܼܦ ܥܲܠ ܡܲܒܘܼܥܹ̈ܐ ܕܓ̰ܘܼܪܵܒܵܐ: ܣܵܒܵܒ ܚܛܝܼܵܬܹ̈ܐ ܕܐܵܗܵܐ ܬܵܗܵܪ ܐܲܚܟ̰ܝܼ ܚܲܕ݉ ܒܲܠܒܵܛܵܐ ܠܵܙܸܡ ܝܼܠܵܗ̇ ܩܵܬܵܝ: ܘܐܲܠܒܵܐܲܠ ܒܸܬ ܠܵܒ̣ܟ̣ܝܼ ܒܠܵܗܵܐ ܓܘܼܪܵܐ. ܡܵܢܝܼ ܒܸܬ ܐܵܙܸܠ ܒܪܸܙܵܝܘܼܗܝ ܓܵܘ ܒܲܝܬܵܐ ܕܓܸܖ̈ܘܵܢܹܐ ܘܕܵܡܸܟ̣ ܬܵܡܵܐ ܓܵܘ ܚܪܵܒ̣ܘܼܗܝ ܨܵܘܵܢܵܐ؟ ܐܲܚܟ̰ܝܼ ܗ̇ܘ ܕܒܓܵܢܘܼܗܝ ܒܵܥܹܐ ܕܗܵܘܹܐ ܓܸܪܒ̣ܵܢܵܐ. ܣܘܼܠܛܵܢ ܕܓܵܡܝܼ ܠܹܐ ܕܵܪܹܐ ܠܵܗ̇ ܓܵܡܝܼܘܼܗܝ ܓܵܘ ܒܸܪܠܘܼܓ̣ܵܢ ܒܪܸܙܵܝܘܼܗܝ: ܐܸܠܵܐ ܟܹܐ ܓ̰ܲܪܸܒ ܒܟܠܹܗ ܚܲܝܠܘܼܗܝ ܠܸܛܪܵܝܘܼܗ̇ ܓܵܡܝܼܘܼܗܝ ܒܕܘܼܟܬܵܐ ܥܵܡܘܿܩܬܵܐ ܘܣܵܠܵܡܲܬ.

ܐܸܕܝܘܿܡ ܟܹܐ ܗܵܘܝܵܐ ܕܢܵܦܠܸܢ ܓܵܘ ܩܹܘܲܢܕܹܢܘܿܣ ܓܘܼܪܬܵܐ: ܫܒ̣ܘܿ ܕܗܵܘܝܵܐ ܠܝܼ ܥܵܩܸܠܕܵܪܘܼܬܵܐ ܕܚܘܼܘܹܐ ܠܹܥܪܵܩܵܐ ܘܠܦܲܪܬܘܼܟܹܐ ܡܸܢܘܼܗ̇. ܐܸܕܝܘܿܡ ܟܹܐ ܗܵܘܝܵܐ ܕܓܘܼܠܦܵܢܹ̈ܐ ܕܝܵܘܢܵܐ ܗܵܘܝܼ ܩܵܬܝܼ ܒܘܼܫ ܡܵܪܹܐ ܦܵܝܕܵܐ ܡ̣ܢ ܠܵܥܘܿܣܵܐ ܕܐܲܪܝܵܐ. ܡܸܓ̰ܸܕ ܟܹܐ ܗܵܘܝܵܐ ܕܩܲܕ݉ܡ ܥܲܝܢܹ̈ܐ ܕܚܲܕ݉ܟܡܵܐ ܡܲܒܝܸܢܸܢ ܒܵܨܘܿܪܵܐ ܒܦܪܵܫܬܝܼ ܡ̣ܢ ܚܲܒ̣ܖ̈ܵܘܵܬܹܐ ܒܝܼܫܹ̈ܐ: ܐܝܼܢܵܐ ܒܘܼܫ ܨܦܵܝܝܼ ܝܠܵܗ̇ ܕܬܵܠܩܸܢ ܓ̰ܘܼܠܝܼ ܡ̣ܢ ܕܡܲܚܪܸܒ̣ܸܢ ܚܲܨܝܲܬܝܼ. ܠܹܐ ܝܠܵܗ̇ ܠܵܙܸܡ ܕܗܵܘܹܝܢ ܕܵܘܠܲܬܡܲܢܕ: ܐܝܼܢܵܐ ܟ̰ܸܡ ܠܵܙܸܡ ܝܼܠܵܗ̇ ܕܗܵܘܹܝܢ ܕܸܟ̣ܝܼܵܐ. ܝܸܣܘܼܖܹ̈ܐ ܕܕܵܘܣܬܘܼܬܵܐ: ܚܵܖ̈ܲܫܝܵܬܹܐ ܕܫܘܼܦܪܵܐ: ܠܵܘܓ̰ܵܐ ܕܚܲܠܥܲܬܹ̈ܐ: ܓܹܐܖܹ̈ܐ ܕܡܲܣܚܵܪܘܼܬܵܐ: ܗܸܟ̃ ܚܲܕ݉ ܡܸܢܵܝ ܓܵܪܵܓ ܕܠܵܐ ܡܵܨܹܐ ܠܡܲܕܘܼܪܝܼ ܡ̣ܢ ܩܛܵܥܬܝܼ ܠܹܥܪܵܩܵܐ ܡ̣ܢ ܚܛܝܼܬܵܐ. ܣܵܛܵܢܵܐ ܓܵܪܵܓ ܕܦܵܠܫܸܢ ܥܲܡܘܼܗܝ: ܘܗ̇ܘ ܒܸܬ ܥܵܪܸܩ ܡ̣ܢ ܩܲܕ݉ܡܝܼ: ܐܝܼܢܵܐ ܫܲܗܘܲܬܝܵܬܹ̈ܐ ܕܒܸܣܪܵܐ ܐܵܢܵܐ ܓܵܪܵܓ ܥܵܪܩܸܢ ܡܸܢܵܝ: ܐܸܠܵܐ ܒܚܵܛܸܪܓ̰ܲܡܥܘܼܬܵܐ ܒܸܬ ܓ̣ܵܠܒܝܼ ܠܝܼ. ܝܵܐ ܐܲܠܵܗܵܐ ܕܩܲܕܝܼܫܘܼܬܵܐ: ܢܛܘܿܪ ܠܝܵܘܣܝܼܦܘܼ̈ܟ̣: ܘܫܲܗܘܲܬܬܵܐ ܕܥܵܠܡܵܐ ܠܵܐ ܚܵܪܫܵܐ ܠܗ݉ܘܿܢ ܒܝܼܲܕ ܫܵܕܲܠܝܵܬܘܼ̈ܗ̇ ܒܝܼܫܹ̈ܐ. ܠܵܐ ܗܵܘܝܵܐ ܕܦܵܝܫܲܚ ܓ̣ܠܝܼܒܹܐ ܡ̣ܢ ܬܠܝܼܬܵܝܘܼܬܵܐ ܕܥܵܠܡܵܐ: ܕܒܸܣܪܵܐ ܘܣܵܛܵܢܵܐ.