ܬܡܘܙ 26
ܟܕ ܟܠܗ̇ ܡܣܡܬܐ ܕܒܠܐ ܒܥܒ̣ܕܐ ܝܬܘܢ: ܡܙܝܕܘܢ ܥܠ ܗܝܡܢܘܬܘܟ̣ܘܢ ܛܒ̣ܬܐ: ܘܥܠ ܛܒ̣ܬܐ ܝܕܥܬܐ: ܘܫܪ. (ܒ ܦܛܪܘܣ ܐ: 5ـ6)
ܐܸܢ ܒܵܥܹܝܬ ܩܲܒܠܸܬ ܫܵܦܵܩܲܬ ܪܹܫܵܝܬܵܐ ܕܚܵܛܸܪܓ̰ܲܡܥܘܼܬܵܐ ܩܘܝܼܬܵܐ ܕܗܲܝܡܵܢܘܼܬܵܐ ܬܚܘܿܬ ܗܲܝܲܪܬܵܐ ܘܟܵܪ ܕܪܘܼܚܵܐ ܩܲܕܝܼܫܵܐ: ܥܒ̣ܘܿܕ ܕܵܐܟ̣ܝܼ ܕܟܬܵܒ̣ܹ̈ܐ ܩܲܕܝܼܫܹ̈ܐ ܬܵܢܘܿܝܘܼܟ̣ ܝܼܢܵܐ ــ ܥܒ̣ܘܿܕ ܡܲܣܲܡܬܵܐ ܕܒܵܠܵܐ. ܗ݉ܘܝܼ ܗܸܫܝܵܪ ܕܗܲܝܡܵܢܘܼܬܘܼܟ̣ ܗܵܘܝܵܐ ܨܵܚ ــ ܠܵܐ ܐܲܚܟ̰ܝܼ ܚܕܵܐ ܗܲܝܡܵܢܘܼܬܵܐ ܒܝܘܼܠܦܵܢܹ̈ܐ: ܐܝܼܢܵܐ ܚܕܵܐ ܗܲܝܡܵܢܘܼܬܵܐ ܦܫܝܼܛܬܵܐ: ܬܠܝܼܬܵܐ ܒܡܫܝܼܚܵܐ ܒܢܲܦ̮ܫܘܼܗܝ. ܥܒ̣ܘܿܕ ܡܲܣܲܡܬܵܐ ܕܒܵܠܵܐ ܒܘܼܬ ܓ̰ܘܼܪܐܲܬܘܼܟ̣. ܦܲܪܦܸܠ ܒܐܲܠܵܗܵܐ ܕܝܲܗܒ̣ܸܠܘܼܟ̣ ܦܵܬܵܐ ܕܐܵܪܝܼܵܐ: ܕܐܵܙܸܠ݉ܬ ܠܵܩܲܕ݉ܡܵܐ ܒܡܲܪܕܘܼܬܵܐ. ܗܲܓܝܼ ܨܦܵܝܝܼ ܒܟܬܵܒ̣ܹ̈ܐ ܩܲܕܝܼܫܹ̈ܐ ܩܵܐ ܕܩܵܢܹܝܬ ܝܕܲܥܬܵܐ: ܣܵܒܵܒ ܝܕܲܥܬܵܐ ܕܝܘܼܠܦܵܢܹ̈ܐ ܪܵܒܵܐ ܟܹܐ ܗܲܝܸܪܵܐ ܒܡܲܩܘܵܝܬܵܐ ܕܗܲܝܡܵܢܘܼܬܵܐ. ܓ̰ܲܪܸܒ ܠܦܲܪܡܘܼܝܹܐ ܗܸܡܸܙܡܵܢ ܕܐܲܠܵܗܵܐ: ܫܒ̣ܘܿܩ ܕܥܵܡܪܵܐ ܒܠܸܒܘܼܟ̣ ܒܕܵܘܠܲܬܡܲܢܕܘܼܬܵܐ.
ܟܲܕ ܐܵܗܵܐ ܥܒ̣ܝܼܕܵܐ ܝܘܸܬ: ܡܲܙܝܸܕ ܥܲܠ ܝܕܲܥܬܘܼܟ̣ ܕܒ̣ܵܩܬܵܐ ܕܓܵܢܵܐ. ܗ݉ܘܝܼ ܗܸܫܝܵܪ ܒܘܼܬ ܦܲܓ̣ܪܘܼܟ̣: ܗ݉ܘܝܼ ܕܵܒ̣ܩܵܢܵܐ ܕܓܵܢܵܐ ܒܲܪܵܐܝܼܬ. ܐܘܼܦ ܗ݉ܘܝܼ ܗܸܫܝܵܪ ܒܘܼܬ ܓܵܢܘܼܟ̣ ܠܵܐ ܡܵܝܘܿܬܬܵܐ ܓܵܘܵܐܝܼܬ: ܗ݉ܘܝܼ ܕܵܒ̣ܩܵܢܵܐ ܕܓܵܢܵܐ ܓܵܘܵܐܝܼܬ. ܗ݉ܘܝܼ ܕܵܒ̣ܩܵܢܵܐ ܕܓܵܢܵܐ ܒܦܘܼܡܵܐ: ܒܕܘܼܒܵܖܹ̈ܐ: ܒܠܸܒܵܐ ܘܒܚܘܼܫܵܒ̣. ܥܲܠ ܐܵܗܵܐ ܡܲܙܝܸܕ: ܒܪܘܼܚܵܐ ܩܲܕܝܼܫܵܐ ܕܐܲܠܵܗܵܐ: ܚܡܵܠܬܵܐ. ܛܠܘܿܒ ܡܸܢܘܼܗܝ ܕܝܲܗܒ̣ܸܠܘܼܟ̣ ܗ̇ܝ ܚܡܵܠܬܵܐ ܕܟܹܐ ܟܵܠܝܵܐ ܩܲܕ݉ܡ ܝܲܠܨܘܼܝ: ܘܗ̇ܝ ܕܟܲܕ ܦܵܝܫܵܐ ܨܘܼܪܸܦܬܵܐ ܒܸܬ ܦܵܠܛܵܐ ܐܲܝܟ̣ ܕܲܗܒ̣ܵܐ. ܟ̰ܲܟܒܸܢ ܓܵܢܘܼܟ̣ ܒܚܡܵܠܬܵܐ ܕܠܵܐ ܛܲܪܛܸܡܸܬ ܘܕܠܵܐ ܦܵܝܫܸܬ ܒܹܐ ܗܹܒ̣ܝܼ ܒܝܲܠܨܘܼܝܘܼ̈ܟ̣. ܡ̣ܢ ܒܵܬ݉ܪ ܩܸܢܝܘܼܗ̇ ܝܘܸܬ ܐܵܗܵܐ ܫܵܦܵܩܲܬ: ܣܦܘܿܪ ܠܙܕܘܼܥܬܵܐ ܕܐܲܠܵܗܵܐ. ܙܕܘܼܥܬܵܐ ܕܐܲܠܵܗܵܐ ܒܘܼܫ ܓܘܼܪܬܵܐ ܝܠܵܗ̇ ܡ̣ܢ ܡܲܙܗܲܒ. ܚܩܵܪܬܵܐ ܕܐܲܠܵܗܵܐ ܥܒ̣ܘܿܕ ܠܵܗ̇ ܢܝܼܲܬ ܪܹܫܵܝܬܵܐ ܕܚܲܝܘܼ̈ܟ̣: ܚܝܝܼ ܩܲܕ݉ܡ ܥܲܝܢܘܼ̈ܗܝ: ܩܘܼܪܒܵܐ ܐܸܠܘܼܗܝ: ܥܒ̣ܘܿܕ ܚܲܒ̣ܪܵܘܵܝܘܼܬܵܐ ܥܲܡܘܼܗܝ: ܗ̇ܝܓܵܗ ܩܸܢܝܵܐ ܝܘܸܬ ܙܕܘܼܥܬܵܐ ܕܐܲܠܵܗܵܐ. ܥܲܠ ܐܲܢܹܐ ܡܲܙܝܸܕ ܚܘܼܒܵܐ ܕܐܲܚܘܿܢܘܼܬܵܐ. ܗܵܘܹܐ ܠܘܼܟ̣ ܚܘܼܒܵܐ ܠܟܸܣ ܟܠܵܝ ܩܲܕܝܼܫܹ̈ܐ: ܗ̇ܝܓܵܗ ܡܲܙܝܸܕ ܚܘܼܒܵܐ: ܕܝܼܠܹܗ ܚܘܼܒܵܐ ܠܟܸܣ ܟܠܵܝ ܐ݉ܢܵܫܹ̈ܐ: ܚܘܼܒܵܐ ܩܵܐ ܓܵܢܵܬܹ̈ܐ. ܟܲܕ ܦܝܼܫܵܐ ܝܘܸܬ ܣܘܼܩܠܵܐ ܒܐܲܢܹܐ ܓ̰ܲܘܵܗܝܼܖܹ̈ܐ: ܘܟܲܕ ܡܲܦܠܘܼܚܹܐ ܝܘܸܬ ܐܲܢܹܐ ܚܲܨܝܲܬܹ̈ܐ ܫܡܲܝܵܢܵܝܹ̈ܐ: ܒܸܬ ܦܲܪܡܸܬ ܠܩܪܵܝܬܘܼܟ̣ ܘܠܓܵܒܵܝܬܘܼܟ̣.