ܬܡܘܙ 27

ܩܘܠ̈ܐ ܓܘܖ̈ܐ ܡܪܐ ܛܝܡܐ (ܒ ܦܛܪܘܣ ܐ: 4)

ܐܸܢ ܒܵܥܹܝܬ ܪܵܥܫܸܬ ܟ̰ܸܡ ܨܦܵܝܝܼ ܥܲܠ ܛܝܼܡܵܐ ܕܐܲܢܹܐ ܩܵܘܠܹ̈ܐ: ܘܩܲܒܠܸܬ ܦܵܝܕܵܝ ܓܵܘ ܠܸܒܵܐ ܕܓܵܢܘܼܟ̣: ܬܲܚܡܸܢ ܪܵܒܵܐ ܥܲܠܵܝ. ܐܝܼܬ ܩܵܘܠܹ̈ܐ ܕܝܼܢܵܐ ܐܲܝܟ̣ ܥܲܢܒ̣ܹ̈ܐ ܓܵܘ ܟ̰ܵܪܵܣ: ܐܸܢ ܚܵܠܨܸܬ ܠܗ݉ܘܿܢ: ܫܝܼܪܵܐ ܒܸܬ ܦܵܠܸܛ ܡܸܢܵܝ. ܟܲܕ ܗܵܘܹܝܬ ܬܲܚܡܘܼܢܵܐ ܥܲܠ ܐܲܢܹܐ ܩܵܘܠܹ̈ܐ ܩܲܕܝܼܫܹ̈ܐ: ܗܲܪ ܗ̇ܝ ܒܘܼܪܟܬܵܐ ܕܒܵܬ݉ܪܘܼܗ̇ ܒܸܛܥܵܝܵܐ ܝܘܸܬ: ܕܠܵܐ ܣܦܵܪܬܘܼܟ̣ ܒܸܬ ܩܲܒܠܸܬ ܠܵܗ̇. ܪܵܒܵܐ ܟܖܸ̈ܣܛܝܵܢܹܐ ܨܗܹܝܠܘܿܢ ܒܘܼܬ ܚܲܕ݉ ܩܵܘܠܵܐ: ܡܘܼܫ݉ܟ̰ܸܚ ܠܗ݉ܘܿܢ ܓ̰ܘܘܵܒܘܼܗܝ ܢܝܼܚܵܐ ܒܢܝܼܚܵܐ ܒܹܥܒ̣ܵܪܵܐ ܓܵܘ ܓܵܢܵܝ ܗܲܪ ܒܗ̇ܝ ܥܕܵܢܵܐ ܕܗܲܓܘܿܝܵܐ ܝܗ݉ܘܵܘ ܥܲܠܘܼܗܝ: ܘܚܸܕܝܹܐ ܝܢܵܐ ܕܦܝܼܫ ܠܗ݉ܘܿܢ ܬܘܼܓܒܸܪܹܐ ܠܩܲܪܒܘܼܢܘܼܗܝ ܗ̇ܘ ܩܵܘܠܵܐ ܠܠܸܒܵܝ. ܐܝܼܢܵܐ ܫܒ̣ܘܿܩ ܡ̣ܢ ܬܲܚܡܲܢܬܵܐ ܥܲܠ ܩܵܘܠܹ̈ܐ: ܓ̰ܲܪܸܒ ܕܓܵܘ ܓܵܢܘܼܟ̣ ܡܲܚܹܝܬ ܠܗ݉ܘܿܢ ܗܲܪ ܐܲܝܟ̣ ܚܲܒܖܹ̈ܐ ܕܐܲܠܵܗܵܐ. ܗܲܡܙܸܡ ܥܲܡ ܓܵܢܘܼܟ̣ ܗܲܕܟ̣ܵܐ: ܐܸܢ ܐܵܗܵܐ ܗܵܘܝܼ ܗ݉ܘܵܐ ܩܵܘܠܵܐ ܕܚܲܕ݉ ܒܲܪܢܵܫܵܐ: ܒܸܬ ܗܵܘܝܵܐ ܗ݉ܘܵܐ ܠܵܙܸܡ ܕܡܲܦܠܸܚܸܢ ܗ݉ܘܵܐ ܪܵܒܵܐ ܗܸܫܝܵܪܘܼܬܵܐ ܗܲܠ ܕܗܵܘܹܝܢ ܗ݉ܘܵܐ ܚܵܛܸܪܓ̰ܲܡܥ ܒܘܼܬ ܡܨܵܝܬܵܐ ܘܚܲܨܝܲܬ ܕܗ̇ܘ ܐ݉ܢܵܫܵܐ ܕܩܘܼܘܸܠܵܐ ܝܗ݉ܘܵܐ ܩܵܬܝܼ. ܗܲܕܟ̣ܵܐ ܙܹܐ ܒܘܼܬ ܩܵܘܠܵܐ ܕܐܲܠܵܗܵܐ: ܥܲܝܢܝܼ ܓܵܪܵܓ ܠܵܐ ܬܵܝܟܸܢܵܗ̇ ܐܘܼܚܟ̰ܵܐ ܥܲܠ ܓܘܼܪܘܼܬܵܐ ܕܩܵܘܠܵܐ ܐܲܝܟ̣ ܥܲܠ ܓܘܼܪܘܼܬܵܐ ܕܩܲܘܸܠܵܢܵܐ ــ ܒܐܵܗܵܐ ܒܸܬ ܦܵܝܫܸܢ ܡܘܼܚܕܝܼܵܐ. ܝܵܐ ܓܵܢܝܼ: ܐܲܠܵܗܵܐ ܝܠܹܗ ܐܲܠܵܗܵܐ ܕܝܼܵܟ̣ܝ: ܗ̇ܘ ܕܠܹܐ ܡܵܨܝܵܐ ܕܕܲܓܸܠ: ܗ̇ܘ ܗܲܡܙܘܼܡܹܐ ܝܠܹܗ ܥܲܡܵܟ̣ܝ. ܐܵܗܵܐ ܚܲܒܪܘܼܗܝ ܕܐܵܕܝܼܵܐ ܒܸܩܪܵܝܘܼܗܝ ܝܘܲܬܝ ܫܲܪܝܼܪܵܐ ܝܠܹܗ ܗܲܪ ܐܲܝܟ̣ ܕܒܓܵܢܘܼܗܝ ܫܲܪܝܼܪܵܐ ܝܠܹܗ. ܗ̇ܘ ܝܼܠܹܗ ܐܲܠܵܗܵܐ ܠܵܐ ܡܸܫܬܲܚܠܦܵܢܵܐ. ܗ̇ܘ ܠܹܐ ܝܠܹܗ ܫܘܼܚܠܸܦܵܐ ܠܡܸܢܕܝܼ ܕܦܠܝܼܛܵܐ ܝܠܹܗ ܡ̣ܢ ܦܘܼܡܘܼܗܝ: ܘܠܹܐ ܝܠܹܗ ܡܘܼܕܸܪܵܐ ܠܒܵܬ݉ܪܘܼܗܝ ܐܘܼܦ ܚܲܕ݉ ܡܹܐܡܪܵܐ ܬܲܟ. ܐܘܼܦ ܠܹܐ ܝܠܹܗ ܒܵܨܘܿܪܵܐ ܒܗܸܟ̃ ܡܨܵܝܬܵܐ. ܗ̇ܘ ܐܲܠܵܗܵܐ ܕܒܪܹܐ ܠܹܗ ܠܫܡܲܝܵܐ ܘܠܐܲܪܥܵܐ: ܗ̇ܘ ܗܲܡܙܘܼܡܹܐ ܝܠܹܗ ܗܲܕܟ̣ܵܐ. ܐܘܼܦ ܠܹܐ ܡܵܨܝܵܐ ܕܚܵܠܸܛ ܒܘܼܬ ܙܲܒ̣ܢܵܐ ܕܬܲܡܲܡܬܵܐ ܕܩܵܘܠܘܼ̈ܗܝ: ܣܵܒܵܒ ܟܹܐ ܝܲܕܸܥ ܐܝܼܡܲܐ ܘܵܓ̰ܸܒ ܝܼܠܵܗ̇ ܠܝܲܗܒ̣ܵܐ ܘܐܝܼܡܵܐ ܠܸܚܣܵܟ̣ܵܐ. ܐܸܢ ܒܐܵܗܵܐ ܬܵܗܵܪ ܬܲܚܡܸܢܲܚ ܥܲܠ ܩܵܘܠܹ̈ܐ ܟܲܕ ܕܵܟ̣ܪܲܚ ܠܩܲܘܸܠܵܢܵܐ ܒܸܬ ܪܵܥܫܲܚ ܠܚܸܠܘܼܬܵܝ ܘܒܸܬ ܦܵܝܫܝܼ ܬܘܼܡܸܡܹܐ ܩܵܬܲܢ.