ܬܡܘܙ 28
ܘܐܢܐ ܐܗܡܩ ܝܘܢ ܗܘܐ ܘܠܐ ܝܕܥܠܝ: ܗܝܘܢ ܗܘܐ ܠܝ ܠܟܣܠܘܟ̣ (ܡܙܡܘܪܐ ܥܓ: 22)
ܕܟ̣ܘܿܪ ܕܐܵܗܵܐ ܝܠܵܗ̇ ܡܵܘܕܵܝܬܵܐ ܕܗ̇ܘ ܕܝܼܗ݉ܘܵܐ ܐܲܝܟ̣ ܠܸܒܵܐ ܕܡܵܪܝܵܐ: ܗܲܕܟ̣ܵܐ ܡܲܕܘܼܥܲܢ ܝܼܠܹܗ ܒܘܼܬ ܚܲܝܘܼ̈ܗܝ ܓܵܘܵܝܹ̈ܐ: ܐܲܗܡܲܩ ܝܼܘܸܢ ܗ݉ܘܵܐ. ܪܥܝܼܫܵܐ ܝܗ݉ܘܵܐ ܠܐܲܗܡܲܩܘܼܬܵܐ ܕܚܛܝܼܬܵܐ: ܚܕܵܐ ܐܲܗܡܲܩܘܼܬܵܐ ܕܠܹܐ ܐܵܬܝܼܵܐ ܗ݉ܘܵܐ ܠܡܲܚܠܘܼܥܹܐ ܒܡܵܗܵܢܵܐ ܕܙܲܒܘܼܢܘܼܬܵܐ: ܐܝܼܢܵܐ ܕܓܘܼܢܵܗܟܵܪ ܝܼܗ݉ܘܵܐ ܒܘܼܬ ܦܟ̰ܝܼܠܘܼܬܘܼܗ̇ ܘܢܲܙܵܢܘܼܬܘܼܗ̇: ܣܵܒܵܒ ܕܒܘܼܚܸܠܵܐ ܝܗ݉ܘܵܐ ܒܡܲܢܬܵܝܬܵܐ ܙܲܒ̣ܢܵܢܵܝܬܵܐ ܕܒܝܼܫܹ̈ܐ ܟܲܕ ܡܲܢܫܘܼܝܹܐ ܝܗ݉ܘܵܐ ܠܦܸܬܘܵܐ ܣܲܗܡܵܢܵܐ ܕܗܕܝܼܪܵܐ ܝܠܹܗ ܩܵܐ ܟܠܵܝ ܕܗܲܕܟ̣ܵܐ ܝܢܵܐ. ܐܝܼܬܵܐ ܐܲܚܢܲܢ ܚܘܼ ܠܹܐ ܝܘܲܚ ܒܘܼܫ ܨܦܵܝܝܼ ܡ̣ܢ ܕܵܘܝܼܕ ܕܚܵܫܒ̣ܲܚ ܠܵܗ̇ ܓܵܢܲܢ ܗܵܘܢܵܢܹ̈ܐ؟ ܩܵܡܘܿ ܡܸܛܝܹܐ ܝܘܲܚ ܐܲܚܢܲܢ ܠܟܵܡܝܼܠܘܼܬܵܐ؟ ܝܲܢ ܩܘܼܒܠܹܐ ܝܘܲܚ ܬܲܥܠܲܡܬܵܐ ܗܲܠ ܗ݉ܘܝܼܹܐ ܝܘܲܚ ܪܲܕ ܡ̣ܢ ܟܠܵܗ̇ ܥܵܨܝܼܘܼܬܵܐ؟ ܐܸܢ ܕܵܘܝܼܕ ܐܲܗܡܲܩ ܝܼܗ݉ܘܵܐ: ܒܲܣ ܐܲܚܢܲܢ ܟܡܵܐ ܐܲܗܡܲܩ ܒܸܬ ܡܲܒܝܸܢܲܚ ܗ݉ܘܵܘ ܩܲܕ݉ܡ ܥܲܝܢܹ̈ܐ ܕܓܵܢܲܢ ܐܸܢ ܡܵܨܲܚ ܗ݉ܘܵܘ ܠܸܚܙܵܝܘܼܗ̇ ܓܵܢܲܢ ܕܵܐܟ̣ܝܼ ܕܝܼܘܲܚ؟ ܚܘܿܪ ܠܵܒܵܬ݉ܪܘܼܟ̣: ܗܲܡܸܢܵܢܵܐ: ܕܟ̣ܘܿܪ ܕܲܒܠܲܒܬܘܼܟ̣ ܠܟܸܣ ܐܲܠܵܗܵܐ ܟܲܕ ܗ̇ܘ ܐܘܼܚܟ̰ܵܐ ܡܗܘܼܡܢܵܐ ܗ݉ܘܝܼܹܐ ܝܠܹܗ ܠܟܸܣܠܘܼܟ̣. ܕܟ̣ܘܿܪ ܠܢܵܐܪܵܙܝܼܘܼܬܘܼܟ̣ ܒܩܲܒܵܠܬܵܐ ܕܬܲܥܠܲܡܬܵܐ ܡ̣ܢ ܐܝܼܕܵܐ ܕܐܲܠܵܗܵܐ ܟܲܕ ܒܗ̇ܝ ܬܲܥܠܲܡܬܵܐ ܒܸܬ ܩܵܢܹܝܬ ܗ݉ܘܵܐ ܚܕܵܐ ܒܘܼܪܟܬܵܐ ܓܘܼܪܬܵܐ. ܕܟ̣ܘܿܪ ܬܲܓܒܲܖ̈ܝܵܬܘܼܗܝ ܟܡܵܐ ܓܵܗܹ̈ܐ ܒܚܘܼܒ̣ܝܵܐ ܩܸܪܝܵܝ ܠܘܼܟ̣: ܦܘܼܩܕܵܢܘܼ̈ܗܝ ܒܚܸܠܛܵܐ ܦܘܼܫܩܵܝ ܠܘܼܟ̣: ܘܛܘܼܪܛܸܡ ܠܘܼܟ̣: ܒܹܐܡܵܪܵܐ: ܟܠܵܝ ܐܲܢܹܐ ܡܸܢܕܝܼܵܢܹ̈ܐ ܠܕܲܪܩܘܼܒ̣ܠܝܼ ܝܢܵܐ: ܟܲܕ ܟܠܵܝ ܡܥܘܼܕܵܠܹܐ ܩܵܐ ܚܵܝܪܘܼܟ̣ ܒܸܦܠܵܚܵܐ ܝܗ݉ܘܵܘ: ܕܟ̣ܘܼܪ ܟܡܵܐ ܓܘܼܒܹܐ ܠܘܼܟ̣ ܠܚܛܝܼܬܵܐ ܣܵܒܵܒ ܐܝܼܬ ܗ݉ܘܵܐ ܒܘܼܣܵܡܵܐ ܒܝܼܘܼܗ̇: ܟܲܕ ܗܲܪ ܗ̇ܘ ܒܘܼܣܵܡܵܐ ܥܸܩܪܵܐ ܕܡܪܵܖܹ̈ܐ ܝܗ݉ܘܵܐ ܩܵܬܘܼܟ̣! ܡܸܓ̰ܸܕ ܐܲܗܡܲܩܹ̈ܐ ܘܓܘܼܢܵܗܟܵܖܹ̈ܐ ܝܘܲܚ: ܘܠܵܙܸܡ ܝܼܠܵܗ̇ ܕܐܲܝܟ̣ ܕܵܘܝܼܕ ܡܲܠܟܵܐ ܐܵܡܪܲܚ: ܒܪܵܐܝܘܼܟ̣ ܒܸܬ ܬܲܓܒܸܪܸܬ ܠܝܼ.