ܬܡܘܙ 29
ܘܐܢܐ ܒܕܝܡܘܬܐ ܥܡܘܟ̣ ܝܘܢ (ܡܙܡܘܪܐ ܥܓ: 23)
ܐܵܦܸܢ ܕܵܘܝܼܕ ܡܲܠܟܵܐ ܡܵܘܕܘܿܝܹܐ ܝܠܹܗ ܒܘܼܬ ܚܲܕ݉ ܐܘܼܚܟ̰ܵܐ ܐܲܗܡܲܩܘܼܬܵܐ ܘܢܲܙܵܢܘܼܬܵܐ: ܡܸܢ݉ܕܪܸܫ݉ ܟ̰ܸܡ ܒܝܵܩܝܼܢܘܼܬܵܐ ܗ̇ܘ ܦܪܝܼܩܵܐ ܝܗ݉ܘܵܐ ܘܡܩܘܼܒܠܵܐ: ܘܒܸܚܵܝܵܐ ܝܗ݉ܘܵܐ ܒܒܘܼܪܟܬܵܐ ܕܕܵܝܸܡܘܼܬܵܐ ܥܲܡ ܡܵܪܝܵܐ. ܟܲܕ ܟ̰ܸܡ ܪܥܝܼܫܵܐ ܝܠܹܗ ܠܐܲܗܘܵܠܘܼܗܝ ܬܠܝܼܩܬܵܐ: ܘܠܚܪܝܼܒ̣ܘܼܬܵܐ ܘܠܦܟ̰ܝܼܠܘܼܬܵܐ ܕܐܲܨܠܘܼܗܝ: ܡܸܢ݉ܕܪܸܫ݉ ܐܝܼܬ ܠܹܗ ܗܲܝܡܵܢܘܼܬܵܐ ܩܘܝܼܬܵܐ ܘܡܲܚܕܝܼܵܢܬܵܐ ܕܒܸܙܡܵܪܵܐ ܝܠܵܗ̇: ܘܐܵܢܵܐ ܒܕܵܝܸܡܘܼܬܵܐ ܥܲܡܘܼܟ̣ ܝܼܘܸܢ. ܗܲܡܸܢܵܢܵܐ: ܥܲܠ ܩܕܵܠܘܼܟ̣ ܝܼܠܵܗ̇ ܕܩܲܒܠܸܬ ܠܵܗ̇ ܐܵܗܵܐ ܡܵܘܕܵܝܬܵܐ ܕܐܵܣܵܦ: ܘܕܐܵܡܪܸܬ ܒܪܘܼܚܵܐ ܕܗ̇ܘ: ܟ̰ܘܼܢܟܹܐ ܡܫܝܼܚܵܐ ܝܠܹܗ ܡܵܪܝܼ: ܐܵܢܵܐ ܥܲܡ ܐܲܠܵܗܵܐ ܝܘܸܢ ܒܕܵܝܸܡܘܼܬܵܐ. ܐܵܗܵܐ ܡܲܥܢܵܝܘܼܗ̇ ܝܠܵܗ̇: ܕܐܵܢܵܐ ܗܲܡܵܫܵܐ ܩܲܕ݉ܡ ܒܵܠܘܼܗܝ ܝܘܸܢ: ܘܗ̇ܘ ܒܕܵܝܸܡܘܼܬܵܐ ܬܲܚܡܘܼܢܹܐ ܝܠܹܗ ܒܘܼܬ ܕܝܼܝܼ ܩܵܐ ܚܵܝܪܝܼ. ܒܕܵܝܸܡܘܼܬܵܐ ܙܹܐ ܩܲܕ݉ܡ ܥܲܝܢܘܼ̈ܗܝ. ܥܲܝܢܵܐ ܕܐܲܠܵܗܵܐ ܗܸܟ̃ ܠܹܐ ܢܵܝܡܵܐ ܐܸܠܵܐ ܗܲܡܵܫܵܐ ܪܥܝܼܫܬܵܐ ܝܠܵܗ̇ ܠܡܲܡܛܘܼܝܹܐ ܛܵܒ̣ܵܬܘܼ̈ܗܝ ܩܵܬܝܼ: ܒܕܵܝܸܡܘܼܬܵܐ ܙܹܐ ܓܵܘ ܐܝܼܕܘܼ̈ܗܝ: ܗܲܕܟ̣ܵܐ ܕܗܸܟ̃ ܚܲܕ݉ ܠܹܐ ܡܵܨܹܐ ܠܸܟ̰ܠܵܓ̰ܝܼ ܡ̣ܢ ܬܵܡܵܐ. ܒܕܵܝܸܡܘܼܬܵܐ ܥܲܠ ܨܲܕܪܘܼܗܝ: ܐܲܝܟ̣ ܚܲܕ݉ ܟܹܐܦܵܐ ܕܥܘܼܗܕܵܢܵܐ: ܗܲܪ ܐܲܝܟ̣ ܫܸܡܵܢܹ̈ܐ ܕܬܪܸܥܣܲܪ ܫܲܒ̣ܛܹ̈ܐ ܐ݉ܣܝܼܪܹܐ ܝܗ݉ܘܵܘ ܥܲܠ ܨܲܕܪܵܐ ܕܓܘܼܪܵܐ ܕܟܵܗܢܹ̈ܐ. ܝܵܐ ܐܲܠܵܗܵܐ: ܠܸܒܘܼܟ̣ ܗܲܡܵܫܵܐ ܪܲܚܪܘܼܚܹܐ ܝܠܹܗ ܠܟܸܣܠܝܼ. ܐܲܢ݉ܬ ܗܲܡܵܫܵܐ ܬܲܓܒܘܼܪܵܐ ܝܘܸܬ ܟܠܵܝ ܫܘܼܠܹ̈ܐ ܩܵܐ ܚܵܝܪ ܕܝܼܝܼ. ܙܲܪܒܵܢܬܵܐ ܝܠܵܗ̇ ܐܲܝܟ̣ ܡܵܘܬܵܐ ܡܲܚܲܒܬܵܐ: ܡ̈ܝܼܵܐ ܪܵܒܵܐ ܠܹܐ ܡܵܨܝܼ ܠܡܲܟ̰ܡܘܼܝܹܐ ܠܡܲܚܲܒܬܵܐ: ܘܢܲܗܖ̈ܵܘܵܬܹܐ ܠܹܐ ܓܵܪܦܝܼ ܠܵܗ̇. ܐܵܗ: ܫܵܦܵܩܲܬ ܥܓ̰ܝܼܒܬܵܐ. ܐܲܢ݉ܬ ܒܸܚܙܵܝܝܼ ܝܘܸܬ ܒܝܼܲܕ ܡܫܝܼܚܵܐ: ܒܸܚܙܵܝܝܼ ܝܘܸܬ ܠܒ̣ܝܼܫܵܐ ܓ̰ܘܼܠܹ̈ܐ ܕܡܫܝܼܚܵܐ: ܚܘܼܠܸܠܵܐ ܒܕܸܡܘܼܗܝ: ܘܗܲܕܟ̣ܵܐ ܟܸܠܝܵܐ ܡܩܘܼܒܠܵܐ ܩܲܕ݉ܡ ܗܸܙܘܼܪܘܼܟ̣. ܗܲܕܟ̣ܵܐ ܐܵܢܵܐ ܒܕܵܝܸܡܘܼܬܵܐ ܩܲܒܘܿܠܹܐ ܝܘܸܢ ܫܵܦܵܩܲܬܘܼܟ̣: ܒܕܵܝܸܡܘܼܬܵܐ ܥܲܡܘܼܟ̣. ܕܘܼ ܝܠܵܗ̇ ܝܲܗܒ̣ܵܠܬܵܐ ܕܠܸܒܵܐ ܩܵܐ ܓܵܢܵܐ ܓ̰ܘܼܪܸܒܬܵܐ ܘܡܘܼܠܝܸܨܬܵܐ: ܟܲܕ ܫܓ̣ܝܼܫܬܵܐ ܝܠܵܗ̇ ܒܒܘܼܪܵܢ ܕܠܓܵܘܵܝܵܐ: ܚܘܿܪ ܒܫܸܠܝܼܘܼܬܵܐ ܕܐܝܼܬ ܠܒ̣ܲܕܲܪ. ܐ݉ܡܘܿܪ ܐܵܗܵܐ ܚܲܒܪܵܐ ܒܠܸܒܘܼܟ̣: ܘܩܲܒܸܠ ܫܠܵܡܵܐ ܕܒܝܲܗܒ̣ܵܐ ܝܠܹܗ: ــ ܒܕܵܝܸܡܘܼܬܵܐ ܥܲܡܘܼܟ̣ ܝܼܘܸܢ.