ܬܡܘܙ 30
ܘܕܟ̣ܝܼܪܗ ܫܡܥܘܢ … ܘܫܘܪܐ ܠܗ ܠܒܟ̣ܝܐ (ܡܪܩܘܣ ܝܕ: 72)
ܚܲܕ݉ܟܡܵܐ ܟܹܐ ܚܵܫܒ̣ܝܼ ܕܒܟܠܵܝ ܚܲܝܹ̈ܐ ܕܫܸܡܥܘܿܢ: ܟܠ ܥܕܵܢܵܐ ܕܟܹܐ ܕܵܟ̣ܸܪ ܗ݉ܘܵܐ ܣܪܵܒ̣ܬܘܼܗܝ ܠܡܵܪܝܵܐ: ܕܸܡܥܘܼ̈ܗܝ ܟܹܐ ܓ̰ܵܪܝܼ ܗ݉ܘܵܘ. ܟܹܐ ܗܵܘܝܵܐ ܕܗܲܕܟ̣ܵܐ ܝܗ݉ܘܵܐ: ܣܵܒܵܒ ܚܛܝܼܬܘܼܗܝ ܪܵܒܵܐ ܓܘܼܪܬܵܐ ܝܗ݉ܘܵܐ: ܘܫܵܦܵܩܲܬ ܒܵܬ݉ܪ ܗܵܕܵܐ ܦܠܝܼܚܬܵܐ ܝܗ݉ܘܵܐ ܒܝܼܘܼܗܝ ܒܟܵܡܝܼܠܘܼܬܵܐ. ܗܲܪ ܗܲܕܟ̣ܵܐ ܝܢܵܐ ܙܹܐ ܟܠܵܝ ܒܢܘܿܢܹ̈ܐ ܕܟܵܠܦܲܬ ܦܘܼܚܸܠܬܵܐ: ܒܩܲܕܪܵܐ ܕܦܘܼܠܚܵܢܵܐ ܕܪܘܼܚܵܐ ܕܐܲܠܵܗܵܐ ܒܝܼܵܝ ܒܫܲܚܠܲܦܬܵܐ ܕܠܸܒܵܝ ܟܝܵܢܵܝܵܐ ܕܟܹܐܦܵܐ. ܐܘܼܦ ܐܲܚܢܲܢ ܐܲܝܟ̣ ܟܹܐܦܵܐ ܟܹܐ ܕܵܟ̣ܪܲܚ ܩܵܘܠܲܢ: ܕܐܸܢ ܟܠܵܝ ܐ݉ܢܵܫܹ̈ܐ ܫܵܒ̣ܩܝܼ ܠܘܼܟ̣: ܐܵܢܵܐ ܠܹܐ ܫܵܒ̣ܩܸܢܘܼܟ̣. ܚܲܒܖܹ̈ܐ ܕܓܵܢܲܢ ܟܹܐ ܐܵܟ̣ܠܲܚ ܠܗ݉ܘܿܢ ܒܝܲܖ̈ܩܹܐ ܡܲܪܝܼܖܹ̈ܐ ܕܬܵܘܒܵܟܵܪܘܼܬܵܐ. ܟܲܕ ܕܵܟ̣ܪܲܚ ܡܘܼܕܝܼ ܩܘܼܘܸܠܹܐ ܝܘܲܚ ܗ݉ܘܵܘ ܠܹܥܒ̣ܵܕܵܐ: ܘܡܘܼܕܝܼ ܥܒ̣ܝܼܕܹܐ ܝܘܲܚ: ܠܵܚܘܿܡܬܵܐ ܝܠܵܗ̇ ܕܐܵܬܝܼ ܣܵܝܠܵܒܹ̈ܐ ܕܕܸܡܥܹ̈ܐ ܕܦܵܫܲܡܬܲܢ. ܗ̇ܘ ܒܸܕܟ̣ܵܪܵܐ ܝܗ݉ܘܵܐ ܠܟܦܵܪܬܘܼܗܝ ܒܐܵܓ̣ܵܝܘܼܗܝ: ܕܘܼܟܬܵܐ ܕܟܦܵܪܬܘܼܗܝ: ܘܗ̇ܘ ܣܵܒܵܒ ܙܥܘܿܪܵܐ ܕܡܘܼܩܸܡܵܐ ܠܹܗ ܐܵܗܵܐ ܚܛܝܼܬܵܐ ܨܵܘܵܢܬܵܐ: ܐܵܢܝܼ ܡܵܘܡܵܬܹ̈ܐ ܘܟܦܘܼܖ̈ܝܹܐ ܕܥܒ̣ܝܼܕ ܠܹܗ ܩܵܐ ܕܡܲܩܘܹܐ ܗ݉ܘܵܐ ܠܹܗ ܕܘܼܓܠܘܼܗܝ: ܘܩܸܫܝܘܼܬܵܐ ܓܘܼܪܬܵܐ ܕܠܸܒܘܼܗܝ ܕܥܒ̣ܝܼܕ ܠܵܗ̇ ܕܬܲܢܹܐ ܗ݉ܘܵܐ ܠܵܗ̇ ܐܵܗܵܐ ܚܛܝܼܬܵܐ: ܟܠܵܝ ܕܟ̣ܝܼܪܵܝ ܠܹܗ. ܒܲܣ ܐܲܚܢܲܢ: ܐܝܼܡܵܐ ܕܦܵܝܫܲܚ ܡܘܼܕܟ̣ܸܪܹܐ ܒܘܼܬ ܚܛܝܼܵܬ̈ܲܢ ܘܒܘܼܬ ܣܸܢܝܘܼܬܵܝ: ܟܵܠܲܚ ܕܠܵܐ ܪܥܵܫܬܵܐ ܘܕܠܵܐ ܦܵܫܲܡܬܵܐ؟ ܠܵܐ ܥܵܒ̣ܕܲܚ ܠܹܗ ܒܲܝܬܲܢ ܒܲܝܬܵܐ ܕܒܵܟ̣ܝܼܡ ܘܢܵܘܢܲܚ ܒܡܵܪܝܵܐ ܕܡܲܚܙܹܐ ܠܲܢ ܫܒ̣ܵܩܵܐ ܘܚܘܼܒܵܐ؟ ܫܡܥܘܿܢ ܐܘܼܦ ܕܟ̣ܝܼܪܹܗ ܠܓܵܫܲܩܬܵܐ ܚܘܼܒܵܢܬܵܐ ܕܐܵܓ̣ܵܝܘܼܗܝ. ܡ̣ܢ ܒܵܬ݉ܪ ܕܩܵܪܘܿܝܵܐ ܩܪܹܐ ܠܹܗ: ܡܵܪܲܢ ܚܝܼܪܹܗ ܠܟܹܐܦܵܐ ܒܚܕܵܐ ܥܲܝܢܵܐ ܕܦܵܫܲܡܬܵܐ ܘܝܩܝܵܕܬܵܐ ܕܠܸܒܵܐ ܘܕܚܘܼܒܵܐ. ܗ̇ܝ ܓܵܫܲܩܬܵܐ ܗܸܟ̃ ܠܵܐ ܡܘܼܢܫܝܼܵܐ ܠܹܗ ܫܸܡܥܘܿܢ ܟܡܵܐ ܕܐܝܼܬ ܗ݉ܘܵܐ ܠܹܗ ܚܲܝܹ̈ܐ ܓܵܘ ܐܵܗܵܐ ܕܘܼܢܝܹܐ. ܗ̇ܝ ܪܵܒܵܐ ܒܘܼܫ ܡܵܪܹܐ ܟܵܪ ܝܼܗ݉ܘܵܐ ܡ̣ܢ ܥܸܣܪܵܐ ܐܲܠܦܹ̈ܐ ܟܵܖ̈ܘܿܙܘܼܝܵܬܹܐ ܕܠܵܐ ܪܘܼܚܵܐ ܩܲܕܝܼܫܵܐ. ܗ̇ܘ ܫܠܝܼܚܵܐ ܬܵܘܒܵܟܵܪ ܡܸܢ݉ܕܪܸܫ݉ ܗܲܪ ܒܸܬ ܒܵܟ̣ܹܐ ܗ݉ܘܵܐ ܟܲܕ ܕܵܟ̣ܸܪ ܗ݉ܘܵܐ ܫܒ̣ܵܩܵܐ ܬܲܡܵܡ ܕܡܵܪܲܢ ܕܩܵܡ ܡܲܕܸܪܹܗ ܠܕܘܼܟܬܘܼܗܝ ܩܲܕ݉ܡܵܝܬܵܐ. ܐܸܢ ܡܘܼܒܟ̣ܝܼܹܐ ܝܘܲܚ ܠܐܵܓ̣ܵܝܲܢ ܐܘܼܚܟ̰ܵܐ ܛܵܒ̣ܵܐ ܘܡܪܲܚܡܵܢܵܐ: ܗܲܪ ܐܵܗܵܐ ܚܕܵܐ ܗܲܓ̰ܲܬ ܝܼܠܵܗ̇ ܕܗܵܘܲܚ ܒܵܟ̣ܝܵܢܹ̈ܐ ܕܵܝܸܡ. ܡܵܪܲܢ: ܡܲܦܫܸܪ ܠܠܸܒܵܘܵܬ̈ܲܢ ܩܲܝܖܹ̈ܐ.