ܬܡܘܙ 5

ܩܖ̈ܝܐ ܩܕܝܫ̈ܐ (ܖ̈ܗ݉ܘܡܝܐ ܐ: 7)

ܥܒ̣ܘܿܕ ܒܵܘܵܪ ܟܹܐ ܚܵܝܪܲܚ ܐܲܚܢܲܢ ܠܫܠܝܼܚܹ̈ܐ ܐܲܝܟ̣ ܒܘܼܫ ܠܚܘܿܕܵܐܝܼܬ ܩܲܕܝܼܫܹ̈ܐ ܡ̣ܢ ܒܢܘܿܢܹ̈ܐ ܐ݉ܚܹܖ̈݉ܢܹܐ ܕܐܲܠܵܗܵܐ. ܟܠܵܝ ܐܵܢܝܼ ܕܐܲܠܵܗܵܐ ܩܸܪܝܵܝ ܝܠܹܗ ܒܫܵܦܵܩܲܬܘܼܗܝ ܘܩܘܼܕܫܵܝ ܒܪܘܼܚܘܼܗܝ: ܩܲܕܝܼܫܹ̈ܐ ܝܢܵܐ. ܐܝܼܢܵܐ ܐܲܚܢܲܢ ܪܵܒܵܐ ܓܵܗܹ̈ܐ ܟܹܐ ܚܵܝܪܲܚ ܠܫܠܝܼܚܹ̈ܐ ܐܲܝܟ̣ ܕܠܐ݉ܢܵܫܹ̈ܐ ܖ̈ܵܡܹܐ ܡ̣ܢ ܐ݉ܢܵܫܹ̈ܐ ܕܥܵܕܲܬ: ܠܵܐ ܢܦܝܼܠܹܐ ܬܚܘܿܬ ܙܲܒܘܼܢܘܼܝܵܬܹ̈ܐ ܘܓ̰ܘܼܖ̈ܵܒܹܐ ܐܲܝܟ̣ ܕܝܼܲܢ. ܐܝܼܢܵܐ ܟܲܕ ܗܲܕܟ̣ܵܐ ܚܵܫܒ̣ܲܚ: ܟܹܐ ܡܲܢܫܲܚ ܠܵܗ̇ ܣܲܪܲܣܬܘܼܬܵܐ: ܕܟܡܵܐ ܕܚܲܕ݉ ܐ݉ܢܵܫܵܐ ܩܘܼܪܒܵܐ ܚܲܝܹܐ ܠܐܲܠܵܗܵܐ: ܚܲܕ݉ ܗܲܕܟ̣ܵܐ ܙܵܘܕܵܐ ܠܵܙܸܡ ܝܼܠܵܗ̇ ܕܥܵܒ̣ܸܕ ܬܲܥܙܝܼ ܥܲܠ ܠܸܒܘܼܗܝ ܒܝܼܫܵܐ. ܘܟܡܵܐ ܕܐܵܓ̣ܵܝܘܼܗܝ ܡܝܵܩܸܪܹܗ ܙܵܘܕܵܐ ܒܚܸܠܡܲܬܘܼܗܝ: ܗܵܕܵܐ ܙܹܐ ܒܝܼܫܬܵܐ ܕܦܲܓ̣ܪܵܐ ܙܵܘܕܵܐ ܟܹܐ ܥܲܓ̰ܸܙܵܐ ܘܡܲܟܪܸܒܵܐ ܠܹܗ ܝܵܘܡܵܐ ܒܝܵܘܡܵܐ. ܚܸܠܵܨܵܐ ܗܲܕܟ̣ܵܐ ܝܠܵܗ̇: ܐܸܢ ܐܲܚܢܲܢ ܗܵܘܲܚ ܗ݉ܘܵܘ ܒܕܘܼܟܬܵܐ ܕܦܵܘܠܘܿܣ ܫܠܝܼܚܵܐ: ܒܸܬ ܚܵܫܒ̣ܲܚ ܗ݉ܘܵܘ ܠܵܗ̇ ܓܵܢܲܢ ܟ̰ܸܡ ܐܲܝܟ̣ ܐ݉ܚܸܖ̈݉ܢܹܐ ܕܡ̣ܢ ܟܸܠܦܲܬ ܓܘܼܒܝܼܬܵܐ: ܘܐܸܢ ܗܲܡܙܸܡܲܚ ܗ݉ܘܵܘ ܥܲܡܘܼܗܝ: ܒܸܬ ܐܵܡܪܲܚ ܗ݉ܘܵܘ: ܕܚܲܝܹ̈ܐ ܕܗ̇ܘ ܗܲܪ ܐܲܝܟ̣ ܚܲܝܹ̈ܐ ܕܝܼܲܢ ܝܼܢܵܐ ــ ܐܲܠܒܲܬ ܗ̇ܘ ܒܘܼܫ ܡܗܘܼܡܢܵܐ ܝܠܹܗ: ܘܩܲܕܝܼܫܵܐ: ܘܒܘܼܫ ܥܵܡܘܿܩܵܐ ܒܝܘܼܠܦܵܢܵܐ: ܐܝܼܢܵܐ ܓ̰ܘܼܖ̈ܵܒܹܐ ܕܗ̇ܘ ܟ̰ܸܡ ܒܵܪܵܒܵܪ ܝܼܗ݉ܘܵܘ ܥܲܡ ܓ̰ܘܼܖ̈ܵܒܹܐ ܕܝܼܲܢ: ܗܵܠܵܐ ܒܚܲܕ݉ܟܡܵܐ ܩܸܨܲܬܹ̈ܐ ܓ̰ܘܼܖ̈ܵܒܹܐ ܕܗ̇ܘ ܒܘܼܫ ܚܲܝܠܵܢܹ̈ܐ ܝܗ݉ܘܵܘ ܡ̣ܢ ܐܵܢܝܼ ܕܝܼܲܢ. ܒܲܣ ܠܵܐ ܓܲܫܩܸܬ ܥܲܠ ܩܲܕܝܼܫܹ̈ܐ ܕܕܵܘܖܹ̈ܐ ܩܲܕ݉ܡܵܝܹ̈ܐ ܐܲܝܟ̣ ܕܐܸܢ ܣܦܝܼܩܹ̈ܐ ܝܗ݉ܘܵܘ ܡ̣ܢ ܙܲܒܘܼܢܘܼܝܵܬܹ̈ܐ ܘܡ̣ܢ ܚܛܝܼܵܬܹ̈ܐ: ܘܠܵܐ ܡܝܵܩܸܪܗ݉ܘܿܢ ܐܘܼܚܟ̰ܵܐ ܒܥܘܼܓ̰ܵܒܵܐ ܗܲܠ ܩܲܪܒܸܢܸܬ ܠܣܓ̣ܵܕܬܵܐ. ܐܘܼܦ ܐܲܚܢܲܢ ܟܹܐ ܡܵܨܲܚ ܠܸܡܛܵܝܵܐ ܠܩܲܕܝܼܫܘܼܬܵܐ ܕܐܵܢܝܼ. ܐܲܚܢܲܢ ܦܝܵܫܵܐ ܝܘܲܚ ܩܸܪܝܹܐ ܠܹܗܘܵܝܵܐ ܩܲܕܝܼܫܹ̈ܐ ܗܲܪ ܒܗ̇ܘ ܩܵܠܵܐ ܕܩܪܹܐ ܠܹܗ ܠܐܵܢܝܼ ܠܕܲܪܓ̣ܵܝ ܪܵܡܵܐ. ܘܵܓ̰ܸܒܘܼܬܵܐ ܕܟܪܸܣܛܝܵܢܵܐ ܝܠܵܗ̇ ܕܡܲܦܠܸܚ ܟܠܵܗ̇ ܡܨܵܝܬܘܼܗܝ ܠܸܚܠܵܨܘܼܗ̇ ܓܵܢܘܼܗܝ ܓܵܘ ܕܵܐܝܼܪܵܐ ܓܵܘܵܝܵܐ ܕܩܲܕܝܼܫܘܼܬܵܐ: ܐܝܼܬܵܐ ܐܸܢ ܐܵܢܝܼ ܩܲܕܝܼܫܹ̈ܐ ܙܵܘܕܵܐ ܝܗ݉ܘܵܘ ܡܸܢܲܢ ܒܡܨܵܝܵܬܵܝ̈: ܐܲܝܟ̣ ܕܡܸܓ̰ܸܕ ܗܵܕܵܐ ܝܠܵܗ̇: ܓ̰ܲܪܒܲܚ ܠܸܡܛܵܝܵܐ ܐܸܠܵܝ. ܫܒ̣ܘܿܩ ܗܵܘܲܚ ܐܲܝܟ̣ ܕܝܼܵܝ ܒܩܲܝܪܲܬ ܘܒܩܲܕܝܼܫܘܼܬܵܐ. ܐܵܢܝܼ ܚܹܝܠܗ݉ܘܿܢ ܥܲܡ ܡܫܝܼܚܵܐ: ܘܩܵܐ ܡܫܝܼܚܵܐ: ܒܘܼܬ ܐܵܗܵܐ: ܗ݉ܘܹܐ ܠܗ݉ܘܿܢ ܐܲܝܟ̣ ܡܫܝܼܚܵܐ. ܫܒ̣ܘܿܩ ܐܘܼܦ ܐܲܚܢܲܢ ܚܲܝܲܚ ܗܲܪ ܒܗ̇ܝ ܪܘܼܚܵܐ ܕܐܵܢܝܼ ܚܹܝܠܗ݉ܘܿܢ: ܒܸܚܝܵܪܵܐ ܠܝܑܼܫܘܿܥ: ܗ̇ܝܓܵܗ ܩܲܕܝܼܫܘܼܬܲܢ ܓ̰ܲܠܕܹܐ ܒܸܬ ܗܵܘܝܵܐ ܡܲܥܠܘܼܡ.