ܬܡܘܙ 9

ܠܐ ܡܢܫܝܬܝ ܟܠܝ ܦܖ̈ܥܝܬܘܗܝ (ܡܙܡܘܪܐ ܩܓ: 2)

ܚܲܕ݉ ܒܘܼܠܓܵܢܵܐ ܡܵܪܹܐ ܚܵܕܘܼܬܵܐ ܘܡܵܪܹܐ ܡܲܣܪܵܦ ܝܼܠܹܗ ܠܸܚܝܵܪܵܐ ܠܐܝܼܕܵܐ ܕܐܲܠܵܗܵܐ ܒܚܲܝܹ̈ܐ ܕܩܲܕܝܼܫܹ̈ܐ ܩܲܕ݉ܡܵܝܹܐ: ܘܠܦܲܟܘܿܪܹܐ ܠܛܵܒ̣ܬܘܼܗܝ ܒܦܵܨܵܝܬܵܝ: ܘܠܖ̈ܲܚܡܘܼܗܝ ܒܦܲܚܵܠܬܵܝ: ܘܠܡܗܘܼܡܢܘܼܬܘܼܗܝ ܒܢܛܵܪܬܵܐ ܕܩܵܘܠܘܼܗܝ ܥܲܡܵܝ. ܐܝܼܢܵܐ ܠܹܐ ܝܠܵܗ̇ ܒܘܼܫ ܒܲܣܝܼܡܬܵܐ ܘܐܘܼܦ ܒܘܼܫ ܡܵܪܹܐ ܦܵܝܕܵܐ ܠܦܲܟܘܿܪܹܐ ܠܬܲܓܒܲܪܬܘܼܗܝ ܒܚܲܝܹ̈ܐ ܕܓܵܢܲܢ؟ ܠܹܐ ܝܠܵܗ̇ ܘܵܓ̰ܸܒ ܕܚܵܝܪܲܚ ܥܲܠ ܬܵܪܝܼܚ ܕܚܲܝܹ̈ܐ ܕܓܵܢܲܢ ܒܗ̇ܝ ܕܗ݉ܘܝܼܹܐ ܝܢܵܐ ܡܸܠܝܹܐ ܡ̣ܢ ܬܲܓܒܲܖ̈ܝܵܬܹܐ ܕܐܲܠܵܗܵܐ: ܡܸܠܝܹܐ ܡ̣ܢ ܛܵܒ̣ܬܘܼܗܝ ܘܡ̣ܢ ܫܲܪܝܼܪܘܼܬܘܼܗܝ ܗܲܪ ܐܲܝܟ̣ ܚܲܝܹ̈ܐ ܕܐܵܢܝܼ ܩܲܕܝܼܫܹ̈ܐ ܕܪ݉ܚܝܼܫܹܐ ܝܢܵܐ ܡ̣ܢ ܩܲܕ݉ܡ ܕܝܼܲܢ؟ ܠܹܐ ܝܠܵܗ̇ ܗܲܩ ܕܚܵܫܒ̣ܲܚ ܕܡܵܪܲܢ ܥܒ̣ܝܼܕ ܠܹܗ ܚܲܝܠܹ̈ܐ ܘܥܵܓ̰ܸܒܘܼܝܵܬܹ̈ܐ ܘܗܘܼܝܸܪܹܗ ܐܲܚܟ̰ܝܼ ܩܵܐ ܐ݉ܢܵܫܹ̈ܐ ܒܙܲܒ̣ܢܹ̈ܐ ܩܵܕܝܼܡܝܼ: ܘܕܩܵܐ ܥܵܡܖ̈ܵܢܹܐ ܕܐܲܪܥܵܐ ܒܐܵܗܵܐ ܙܲܒ̣ܢܵܐ ܠܹܐ ܥܵܒ̣ܸܕ ܥܵܓ̰ܸܒܘܼܝܵܬܹ̈ܐ ܘܠܹܐ ܦܲܫܸܛ ܕܪܲܥܢܘܼܗܝ ܙܲܪܒܵܢܵܐ. ܓܲܫܩܲܚ ܠܵܒܵܬ݉ܪܵܐ ܥܲܠ ܚܲܝܹ̈ܐ ܥܒ̣ܝܼܪܹܐ ܕܓܵܢܲܢ. ܡܸܓ̰ܸܕ ܒܝܼܵܝ ܟܹܐ ܡܵܨܲܚ ܡܲܫ݉ܟ̰ܚܲܚ ܚܲܕ݉ܟܡܵܐ ܩܸܨܲܬܹ̈ܐ ܡܲܚܕܝܼܵܢܹ̈ܐ ܘܝܲܗܒ̣ܵܢܹ̈ܐ ܕܠܸܒܵܐ ܩܵܐ ܓܵܢܲܢ ܘܕܐܝܼܩܵܪܵܐ ܩܵܐ ܐܲܠܵܗܲܢ. ܗܸܟ̃ ܠܵܐ ܦܝܼܫ ܠܘܼܟ̣ ܦܘܼܨܝܵܐ ܒܐܝܼܕܵܐ ܕܡܵܪܝܵܐ؟ ܗܸܟ̃ ܠܵܐ ܥܒ̣ܝܼܪܘܼܟ̣ ܒܢܲܗܖ̈ܵܘܵܬܹܐ ܥܵܡܘܿܩܹ̈ܐ ܟܲܕ ܣܢܝܼܕܵܐ ܒܗܸܙܘܼܪ ܐܲܠܵܗܵܝܬܵܐ؟ ܠܵܐ ܥܒ̣ܝܼܪܘܼܟ̣ ܓܵܘ ܢܘܼܖܹ̈ܐ ܡܲܩܕܵܢܹ̈ܐ ܕܠܵܐ ܩܲܒܵܠܬܵܐ ܕܚܘܼܙܕܵܓܵܐ؟ ܗܸܟ̃ ܠܵܐ ܩܘܼܒܸܠܘܼܟ̣ ܓܸܠܝܵܢܹ̈ܐ ܕܦܵܪܘܿܩܘܼܟ̣؟ ܠܵܐ ܩܘܼܒܸܠܘܼܟ̣ ܡܸܢܲܬܹ̈ܐ ܥܲܠܗܲܕܵܐ؟ ܗ̇ܘ ܐܲܠܵܗܵܐ ܕܡܘܼܚܠܹܥ ܠܹܗ ܩܵܐ ܫܠܹܝܡܘܿܢ ܡܲܛܠܲܒ ܕܠܸܒܘܼܗܝ: ܗ̇ܘ ܠܵܐ ܕܒ̣ܝܼܩ ܠܹܗ ܢܵܬܵܐ ܠܒܵܥܘܼܬܘܼܟ̣ ܘܓ̰ܘܼܘܸܒܵܐ ܠܹܗ؟ ܗ̇ܘ ܐܲܠܵܗܵܐ ܕܵܘܸܠܬܘܼܗܝ ܓܘܼܪܬܵܐ: ܗܸܟ̃ ܠܵܐ ܡܘܼܣܒ̣ܸܥ ܠܹܗ ܐܸܠܘܼܟ̣ ܒܡܸܠܝܘܼܬܵܐ؟ ܗܸܟ̃ ܠܹܐ ܝܠܹܗ ܡܘܼܕܡܸܟ̣ܘܼܟ̣ ܥܲܠ ܟ̰ܝܼܡܵܢܹ̈ܐ ܡܝܼܠܹ̈ܐ؟ ܗܸܟ̃ ܠܹܐ ܝܠܹܗ ܗ̇ܘ ܬܘܼܓܒܸܪܘܼܟ̣ ܥܲܠ ܡ̈ܝܼܵܐ ܢܝܼܚܹ̈ܐ؟ ܛܵܒ̣ܬܵܐ ܕܐܲܠܵܗܵܐ ܠܟܸܣܠܲܢ ܒܵܪܵܒܵܪ ܗ݉ܘܝܼܬܵܐ ܝܠܵܗ̇ ܥܲܡ ܗ̇ܝ ܕܠܟܸܣ ܩܲܕܝܼܫܹ̈ܐ ܩܵܕܝܼܡܝܼ. ܒܲܣ: ܫܒ̣ܘܿܩ ܙܵܡܪܲܚ ܚܕܵܐ ܙܡܵܪܬܵܐ ܒܘܼܬ ܖ̈ܲܚܡܘܼܗܝ. ܫܵܩܠܲܚ ܕܲܗܒ̣ܵܐ ܨܸܦܝܵܐ ܕܡܸܢܲܬܟܵܪܘܼܬܵܐ: ܘܓ̰ܲܘܵܗܝܼܖܹ̈ܐ ܕܬܸܫܒܘܿܚܬܵܐ: ܘܡܸܢܵܝ ܬܲܪܨܲܚ ܚܲܕ݉ ܬܵܐܓ̰ ܩܵܐ ܪܹܫܵܐ ܕܡܵܪܲܢ: ܘܙܵܡܪܲܚ ܫܘܼܒ̣ܚܹ̈ܐ ܕܐܲܠܵܗܲܢ ܕܖ̈ܲܚܡܘܼܗܝ ܩܲܝܵܡ ܝܼܢܵܐ ܠܐܵܒܵܕ.