ܐܝܠܘܠ 13
ܥܒ̣ܕܝ ܠܗ: ܐܘܦ ܒܘܖ̈ܟܬܐ ܟܐ ܩܛܘ ܡܠܦܢܐ (ܡܙܡܘܪܐ ܦܕ: 6)
ܡ̣ܢ ܐܵܗܵܐ ܒܹܝܠܵܦܵܐ ܝܘܲܚ ܕܪܵܒܵܐ ܓܵܗܹ̈ܐ ܚܲܕ݉ ܐ݉ܢܵܫܵܐ ܟܹܐ ܩܵܢܹܐ ܚܕܵܐ ܒܘܼܪܟܬܵܐ ܕܟܹܐ ܗܵܘܝܵܐ ܡܵܪܹܐ ܡܲܨܪܵܦ ܐܘܼܦ ܩܵܐ ܐ݉ܚܹܖ̈݉ܢܹܐ: ܗܲܪ ܐܲܝܟ̣ ܕܥܲܝܢܵܐ ܒܸܬ ܦܵܝܫܵܐ ܗ݉ܘܵܐ ܡܘܼܦܠܸܚܬܵܐ ܠܵܐ ܐܲܚܟ̰ܝܼ ܡ̣ܢ ܬܵܪܨܵܢܘܼܗ̇ ܐܝܼܢܵܐ ܐܘܼܦ ܡ̣ܢ ܕܐܵܢܝܼ ܕܐܵܬܝܼ ܒܵܬ݉ܪܘܼܗܝ. ܪܵܒܵܐ ܓܵܗܹ̈ܐ ܟܹܐ ܩܵܪܲܚ ܚܲܕ݉ ܟܬܵܒ̣ܵܐ ܕܝܼܠܹܗ ܡܸܠܝܵܐ ܡ̣ܢ ܝܵܗܒ̣ܲܠܬܵܐ ܕܠܸܒܵܐ: ܗܲܪ ܐܲܝܟ̣ ܚܘܼܛܪܵܐ ܕܝܘܿܢܵܬܵܢ ܡܲܢܛܸܦܵܢܬܵܐ ܕܕܸܒ̣ܫܵܐ. ܗ̇ܝܓܵܗ ܟܹܐ ܝܲܕܥܲܚ ܕܚܲܕ݉ ܐܲܚܘܿܢܵܐ ܥܒ̣ܝܼܪܵܐ ܝܠܹܗ ܓܵܘ ܗ̇ܘ ܪܵܘܘܿܠܵܐ: ܘܦܘܼܠܛܘܼܗ̇ ܝܠܹܗ ܗ̇ܝ ܥܲܝܢܵܐ ܠܵܐ ܐܲܚܟ̰ܝܼ ܩܵܐ ܓܵܢܘܼܗܝ: ܐܸܠܵܐ ܐܘܼܦ ܩܵܬܲܢ. ܪܵܒܵܐ ܐ݉ܢܵܫܹ̈ܐ ܡܘܼܠܚܸܡܸܐ ܝܢܵܐ ܟܬܵܒ̣ܹ̈ܐ ܩܵܐ ܝܵܗܒ̣ܲܠܬܵܐ ܕܠܸܒܵܐ ܕܓܵܢܵܝ: ܕܗ݉ܘܝܼܹܐ ܝܢܵܐ ܪܵܒܵܐ ܡܵܪܹܐ ܦܵܝܕܵܐ ܐܘܼܦ ܩܵܐ ܩܵܖ̈ܝܵܢܵܝ. ܐܸܠܵܐ ܟܹܐ ܗܲܕܟ̣ܵܐ ܝܠܵܗ̇ ܩܸܨܲܬ ܕܡܲܙܡܘܿܖܹ̈ܐ: ܡܵܣܵܠܵܢ ܐܲܝܟ̣ ܗ̇ܘ ܕܫܲܪܘܿܝܹܐ ܝܠܹܗ ܒܐܲܢܹܐ ܚܲܒܖܹ̈ܐ: ــ ܩܵܡܘܿܕܝܼ ܡܘܼܨܠܝܼܬܵܐ ܝܘܵܬܝ: ܓܵܢܝܼ؟ ܣܵܦܵܖ̈ܟ̰ܝܹܐ ܟܹܐ ܚܵܕܝܼ ܒܚܙܵܝܬܵܐ ܕܐܝܼܙ ܕܒܲܪܢܵܫܵܐ ܓܵܘ ܣܹܠܵܐ ܕܒܲܪܝܼܵܐ: ܐܘܼܦ ܐܲܚܢܲܢ ܟܹܐ ܚܵܕܲܚ ܠܸܚܙܵܝܵܐ ܫܵܘܦܵܦܹ̈ܐ ܕܐܲܩܠܹ̈ܐ ܕܡܘܼܩܕܘܼܣܝܹ̈ܐ ܟܲܕ ܒܹܥܒ̣ܵܪܵܐ ܝܘܲܚ ܒܪܵܘܘܿܠܵܐ ܕܕܸܡܥܹ̈ܐ.
ܣܵܦܵܖ̈ܟ̰ܝܹܐ ܟܹܐ ܚܵܦܪܝܼ ܩܘܼܢܝܵܐ: ܝܲܢ ܥܲܝܢܵܐ: ܐܝܼܢܵܐ ܥܵܓ̰ܸܒܘܼܬܵܐ ܝܠܵܗ̇ ܕܗ̇ܝ ܥܲܝܢܵܐ ܟܹܐ ܡܵܠܝܵܐ ܡ̣ܢ ܥܸܠܸܠ ܡ̣ܢ ܓܸܒܵܐ ܕܡ̣ܢ ܐܸܠܬܸܚ. ܐܲܚܢܲܢ ܟܹܐ ܡܲܦܠܸܚܲܚ ܣܵܒܵܒܹ̈ܐ: ܐܝܼܢܵܐ ܒܘܼܪܟܬܵܐ ܠܹܐ ܩܵܝܡܵܐ ܡ̣ܢ ܣܵܒܵܒܹ̈ܐ. ܐܲܚܢܲܢ ܟܹܐ ܚܵܦܪܲܚ ܩܘܼܢܝܵܐ: ܐܝܼܢܵܐ ܡ̣ܢ ܡܸܛܪܵܐ ܕܫܡܲܝܵܐ ܟܹܐ ܦܵܐܸܫ ܡܸܠܝܵܐ. ܣܘܼܣܹܐ ܗܘܼܕܪܵܐ ܝܠܹܗ ܩܵܐ ܝܵܘܡܵܐ ܕܕܲܥܘܝܼ: ܐܝܼܢܵܐ ܣܵܠܵܡܲܬܘܼܬܘܼܟ̣ ܡ̣ܢ ܡܵܪܝܵܐ ܝܠܵܗ̇. ܣܵܒܵܒ ܐܣܝܼܪܵܐ ܝܠܹܗ ܒܦܠܵܛܵܐ: ܐܝܼܢܵܐ ܦܠܵܛܵܐ ܠܹܐ ܝܠܹܗ ܒܸܩܝܵܡܵܐ ܡ̣ܢ ܣܵܒܵܒ. ܩܘܼܢܝܹ̈ܐ ܟܹܐ ܦܵܝܫܝܼ ܡܸܠܝܹܐ ܡ̣ܢ ܡܸܛܪܵܐ: ܘܟܹܐ ܗܵܘܝܼ ܡܵܪܹܐ ܡܲܨܪܵܦ ܩܵܐ ܕܒ̣ܵܩܬܵܐ ܕܡ̈ܝܼܵܐ. ܗ̇ܘ ܓ̰ܵܦܵܐ ܠܹܐ ܝܠܹܗ ܗܵܒܵܣ: ܐܝܼܢܵܐ ܡܸܢ݉ܕܪܸܫ݉ ܠܹܐ ܕܵܒ̣ܸܩ ܕܘܼܟܬܵܐ ܕܗܲܝܲܪܬܵܐ ܐܲܠܵܗܵܝܬܵܐ.
ܫܵܦܵܩܲܬ ܟܹܐ ܡܵܨܲܚ ܡܲܕܡܲܚ ܠܵܗ̇ ܠܡܸܛܪܵܐ ܒܘܼܬ ܨܸܦܝܘܼܬܘܼܗ̇: ܒܘܼܬ ܟܵܪܘܼܗ̇ ܡܲܚܝܼܵܢܵܐ ܘܒܲܪܛܸܢܵܢܵܐ: ܘܣܵܒܵܒ ܕܐܲܚܟ̰ܝܼ ܡ̣ܢ ܪܵܘܡܵܐ ܟܹܐ ܨܵܠܝܵܐ: ܘܒܘܼܬ ܗ̇ܘ ܗܘܼܟܡܵܐ ܥܸܠܵܝܵܐ ܕܒܝܼܘܼܗܝ ܦܝܼܫܬܵܐ ܝܠܵܗ̇ ܡܘܼܚܠܸܥܬܵܐ ܘܡܘܼܟܠܝܼܬܵܐ. ܐܲܠܵܗܵܐ ܝܲܗܒ̣ܸܠ ܩܵܐ ܩܵܖ̈ܝܵܢܲܢ ܫܦܵܟ̣ܝܵܬܹ̈ܐ ܕܒܘܼܪܟܬܵܐ: ܘܩܘܼܢܝܹ̈ܐ ܕܚܦܝܼܪܵܝ ܝܢܵܐ ܦܵܝܫܝܼ ܡܸܠܝܹܐ ܡ̣ܢ ܡ̈ܝܼܵܐ! ܐܵܗ: ܡܘܼܕܝܼ ܝܢܵܐ ܣܵܒܵܒܹ̈ܐ ܘܦܘܼܠܚܵܢܹ̈ܐ ܕܠܵܐ ܒܘܼܪܟܬܵܐ ܕܫܡܲܝܵܐ! ܐܲܝܟ̣ ܥܲܝܒ̣ܵܬܹ̈ܐ ܕܠܵܐ ܡܸܛܪܵܐ ܝܢܵܐ: ܘܐܲܝܟ̣ ܥܲܝܢܵܬܹ̈ܐ ܕܠܵܐ ܡ̈ܝܼܵܐ. ܝܵܐ ܐܲܠܵܗܵܐ ܕܚܘܼܒܵܐ: ܦܬܘܿܚ ܟܵܘܵܬܹ̈ܐ ܕܫܡܲܝܵܐ ܘܡܲܥܪܝܼ ܒܘܼܪܟܬܘܼܟ̣ ܥܲܠܲܢ!