ܫܘܠ̈ܐ ܓܘܖ̈ܐ ܘܫܘܠ̈ܐ ܩܛܝܥ̈ܐ: ܕܠܐ ܝܕܥܝ ܠܘܟ̣ (ܐܪܡܝܐ ܠܓ: 3)

ܐܵܗܵܐ ܚܲܒܪܵܐ ܦܝܼܫܵܐ ܝܠܹܗ ܟܬܝܼܒ̣ܵܐ ܒܬܵܗܵܖܹ̈ܐ ܦܖ̈ܝܼܫܹܐ. ܓܵܘ ܚܕܵܐ ܐܲܨܲܚܬܵܐ ܟܬܝܼܒ̣ܵܐ ܝܠܹܗ: ܫܘܼܠܹ̈ܐ ܓܘܼܖܹ̈ܐ ܘܥܲܣܩܹ̈ܐ. ܓܵܘ ܚܕܵܐ ܐ݉ܚܹܪ݉ܬܵܐ: ܫܘܼܠܹ̈ܐ ܓܘܼܖܹ̈ܐ ܘܙܲܖ̈ܒܵܢܹܐ. ܠܲܐܟ̣ܵܐ ܟܬܝܼܒ̣ܵܐ ܝܠܹܗ: ܫܘܼܠܹ̈ܐ ܓܘܼܖܹ̈ܐ ܘܩܛܝܼܥܹ̈ܐ: ܝܲܥܢܹܐ: ܫܘܼܠܹ̈ܐ ܕܝܼܢܵܐ ܦܖ̈ܝܼܫܹܐ ܝܲܢ ܚܒ̣ܝܼܫܹ̈ܐ: ܕܠܹܐ ܝܢܵܐ ܓܸܠܝܹܐ ܩܵܐ ܟܠ ܐ݉ܢܵܫܵܐ. ܐܝܼܬ ܫܘܼܠܹ̈ܐ ܦܖ̈ܝܼܫܹܐ ܘܥܲܠܗܲܕܵܐ ܓܵܘ ܚܲܝܹ̈ܐ ܟܖܸ̈ܣܛܝܵܢܵܝܹܐ. ܠܹܐ ܝܠܵܗ̇ ܗܵܣܵܢܵܝܝܼ ܠܸܡܛܵܝܵܐ ܠܟܠܵܝ ܟܵܡܝܼܠܘܼܝܵܬܹ̈ܐ ܕܚܲܝܹ̈ܐ ܖ̈ܘܼܚܵܢܵܝܹܐ. ܐܝܼܬ ܚܲܕ݉ܟܡܵܐ ܐܲܗܘܵܠܹ̈ܐ ܕܝܼܢܵܐ ܓܵܘܵܢܵܝܹ̈ܐ ܩܵܐ ܟܠܵܝ ܗܲܕܵܡܹ̈ܐ ܕܟܸܠܦܲܬ ܕܡܫܝܼܚܵܐ ܐܲܝܟ̣ ܗܲܝܡܵܢܘܼܬܵܐ: ܘܚܵܕܘܼܬܵܐ: ܘܗܹܒ̣ܝܼ: ܐܝܼܢܵܐ ܓ̰ܸܕ ܡ̣ܢ ܐܲܢܹܐ: ܐܝܼܬ ܚܕܵܐ ܐܲܗܘܵܠ ܥܸܠܵܝܬܵܐ ܕܦܨܝܼܚܘܼܬܵܐ: ܘܕܫܲܪܝܼܟܘܼܬܵܐ ܘܚܲܒ̣ܪܵܘܵܝܘܼܬܵܐ ܚܠܘܼܨܬܵܐ ܥܲܡ ܡܫܝܼܚܵܐ: ܗ̇ܝ ܕܠܹܐ ܡܵܛܝܼ ܥܲܠܘܼܗ̇ ܟܠܵܝ ܗܲܡܸܢܵܢܹ̈ܐ. ܟܠܵܝ ܐ݉ܢܵܫܹ̈ܐ ܠܹܐ ܡܵܛܝܼ ܠܐܲܗܘܵܠ ܕܝܘܿܚܲܢܵܢ: ܠܸܓܢܵܝܵܐ ܥܲܠ ܨܲܕܪܵܐ ܕܡܵܪܲܢ: ܐܘܼܦܠܵܐ ܕܦܵܘܠܘܿܣ: ܠܸܡܛܵܝܵܐ ܠܫܡܲܝܵܐ ܕܬܠܵܬ݉. ܒܝܕܲܥܬܵܐ ܕܫܘܼܠܹ̈ܐ ܕܐܲܠܵܗܵܐ ܐܝܼܬ ܖ̈ܵܘܡܹܐ ܐܲܝܢܝܼ ܕܥܲܝܢܵܐ ܢܸܫܪܵܢܵܝܬܵܐ ܕܦܲܪܡܵܝܬܵܐ ܘܕܗܵܘܢܵܐ ܕܦܝܼܠܵܣܘܿܦܘܼܬܵܐ ܠܹܐ ܝܢܵܐ ܡܸܛܝܹܐ ܥܲܠܵܝ. ܐܲܠܵܗܵܐ ܒܢܲܦ̮ܫܘܼܗܝ ܟܹܐ ܡܵܨܹܐ ܠܡܵܐܣܘܿܩܲܢ ܠܬܵܡܵܐ: ܒܟܵܠܸܣܟܵܐ ܕܨܠܘܿܬܵܐ ܚܲܝܠܵܢܬܵܐ. ܨܠܘܿܬܵܐ ܚܲܝܠܵܢܬܵܐ ܡܵܪܹܐ ܟܵܪ ܝܼܠܵܗ̇ ܩܲܕ݉ܡ ܐܲܠܵܗܵܐ ܕܖ̈ܲܚܡܹܐ. ܒܙܲܪܒܘܼܗܝ ܥܒ̣ܝܼܕ ܠܹܗ ܕܲܥܘܝܼ ܥܲܡ ܐܲܠܵܗܵܐ: ܘܥܒ̣ܝܼܕ ܠܹܗ ܕܲܥܘܝܼ ܥܲܡ ܡܲܠܲܐܟ̣ܵܐ: ܘܡܨܹܐ ܠܹܗ: ܒܟ̣ܹܐ ܠܹܗ: ܘܢܘܼܢܹܐ ܠܹܗ ܒܝܼܘܼܗܝ. ܓܵܘ ܒܹܝܬ ܐܹܝܠ ܡܘܼܫ݉ܟ̰ܸܚ ܠܹܗ: ܘܬܵܡܵܐ ܟܹܐ ܗܲܡܙܸܡ ܥܲܡܲܢ. ܨܠܘܿܬܵܐ ܚܲܝܠܵܢܬܵܐ ܟܹܐ ܡܵܐܣܩܵܐ ܠܹܗ ܗܲܡܸܢܵܢܵܐ ܠܟܲܪܡܠܵܐ: ܘܟܹܐ ܡܲܡܨܝܼܵܐ ܠܹܗ ܠܡܲܟܘܿܣܹܐ ܠܦܵܬܵܐ ܕܫܡܲܝܵܐ ܒܥܲܝܼܒ̣ܵܬܹ̈ܐ ܕܒܘܼܪܟܬܵܐ: ܘܠܦܵܬܵܐ ܕܐܲܪܥܵܐ ܒܛܵܘܦܵܢܹ̈ܐ ܕܖ̈ܲܚܡܹܐ. ܨܠܘܿܬܵܐ ܚܲܝܠܵܢܬܵܐ ܟܹܐ ܡܵܐܣܩܵܐ ܠܹܗ ܗܲܡܸܢܵܢܵܐ ܠܦܸܣܓܵܐ: ܘܟܹܐ ܡܲܚܙܝܼܵܐ ܩܵܬܘܼܗܝ ܝܵܪܬܘܼܬܵܐ ܗܕܝܼܪܬܵܐ. ܟܹܐ ܡܲܪܡܵܐ ܠܲܢ ܥܲܠ ܪܹܫܵܐ ܕܬܵܒ̣ܘܿܪ: ܘܬܵܡܵܐ ܟܹܐ ܫܲܚܠܸܦܵܐ ܠܲܢ: ܗܲܠ ܕܗܵܘܲܚ ܒܕܵܡܵܝܬܵܐ ܕܗ̇ܘ ܐܘܼܦ ܐܲܚܢܲܢ ܓܵܘ ܐܵܗܵܐ ܥܵܠܡܵܐ. ܚܘܿܪ ܒܩܵܝܵܐ ܕܒܘܼܫ ܪܵܡܵܐ ܡܸܢܘܼܟ̣: ܘܓܲܫܸܩ ܒܥܲܝܢܵܐ ܕܗܲܝܡܵܢܘܼܬܵܐ ܒܦܲܢܓ̰ܲܪܵܐ ܕܨܠܘܿܬܵܐ ܒܡܲܩܘܵܝܬܵܐ ܕܦܵܬܵܐ.