ܒܪܡܫܐ ܦܐܫ ܒܟ̣ܝܐ: ܘܠܡܗܘܪܫܐ ܩܘܚܬܐ ܕܚܕܘܬܐ (ܡܙܡܘܪܐ ܠ: 6)

ܟܪܸܣܛܝܵܢܵܐ: ܐܸܢ ܓܵܘ ܠܲܝܠܹܐ ܕܝܲܠܨܘܼܝ ܝܼܘܸܬ: ܬܲܚܡܸܢ ܒܘܼܬ ܩܵܝܕܲܡܬܵܐ. ܡܲܚܕܝܼ ܠܸܒܘܼܟ̣ ܒܬܲܚܡܲܢܬܵܐ ܒܘܼܬ ܐ݉ܬܵܝܬܵܐ ܕܐܵܓ̣ܵܝܘܼܟ̣. ܗ݉ܘܝܼ ܚܵܡܠܵܢܵܐ: ܣܵܒܵܒ ܗܵܐ ܒܸܨܠܵܝܵܐ ܝܠܹܗ ܥܲܡ ܥܢܵܢܹ̈ܐ. ܐܵܟܵܪܵܕܵܪ ܟܹܐ ܚܵܡܸܠ ܗܲܠ ܚܸܨܕܵܐ. ܗ݉ܘܝܼ ܚܵܡܠܵܢܵܐ: ܣܵܒܵܒ ܕܟܹܐ ܝܲܕܥܸܬ ܡܵܢܝܼ ܐ݉ܡܝܼܪܵܐ ܝܠܹܗ ܗܵܐ ܒܹܐܬܵܝܵܐ ܝܘܸܢ ܓ̰ܲܠܕܹܐ: ܘܗܵܩܝܼ ܥܲܡܝܼ: ܠܸܦܪܵܥܵܐ ܠܟܠ ܚܲܕ݉ ܐܲܝܟ̣ ܕܗܵܘܹܐ ܦܘܼܠܚܵܢܹܗ. ܐܸܢ ܪܵܒܵܐ ܫܲܩܝܼ ܝܘܸܬ ܐܵܕܝܼܵܐ: ܕܟ̣ܘܿܪ ـ ܕ

ܒܵܬ݉ܪ ܚܲܕ݉ܟ̰ܵܐ ܒܘܼܖ̈ܵܢܹܐ

ܡܸܚܝܹܐ ܒܐܵܗܵܐ ܣܝܼܦܵܐ

ܘܐܲܚܢܲܢ ܥܵܒ̣ܪܲܚ ܡ̣ܢ ܒܵܐܕܓܝܼܖܹ̈ܐ

ܘܠܹܐ ܡܵܛܹܐ ܠܲܢ ܠܲܦܵܐ

ܪܹܫܘܼܟ̣ ܒܲܠܟܵܐ ܒܘܼܢܦܸܪܵܐ ܝܠܹܗ ܒܙܲܗܡܲܬܹ̈ܐ ܟܸܬܒ̣ܵܢܵܝܹ̈ܐ ܠܲܐܟ̣ܵܐ: ܒܵܬ݉ܪ ܚܲܕ݉ܟ̰ܵܐ ܒܸܬ ܡܲܬܒ̣ܸܬ ܥܲܠ ܪܹܫܘܼܟ̣ ܚܕܵܐ ܒܸܢܦܵܪ ܕܟܵܘܟ̣ܒ̣ܹ̈ܐ. ܠܲܐܟ̣ܵܐ ܐܝܼܕܘܼܟ̣ ܒܲܠܟܵܐ ܡܠܝܼܬܵܐ ܝܠܵܗ̇ ܡ̣ܢ ܓ̰ܵܦܵܐ: ܬܵܡܵܐ ܒܸܬ ܗܵܘܝܵܐ ܒܠܝܼܓܬܵܐ ܒܡܚܵܝܬܵܐ ܕܩܝܼܬܵܖܹ̈ܐ ܫܡܲܝܵܢܵܝܹ̈ܐ. ܠܒ̣ܘܼܫܘܼ̈ܟ̣ ܐܵܕܝܼܵܐ ܫܸܚܬܵܢܹ̈ܐ ܝܢܵܐ ܘܥܲܦܖ̈ܵܢܹܐ: ܒܵܬ݉ܪ ܚܵܕ݉ܟ̰ܵܐ ܒܸܬ ܗܵܘܝܼ ܚܘܵܖܹ̈ܐ ܐܲܝܟ̣ ܬܲܠܓܵܐ. ܚܲܕ݉ܟ̰ܵܐ ܐ݉ܚܹܪ݉ܢܵܐ ܚܡܘܿܠ: ܟܡܵܐ ܡܘܼܣܠܝܹ̈ܐ ܒܸܬ ܗܵܘܝܼ ܙܲܗܡܲܬ̈ܲܢ ܟܲܕ ܚܵܝܪܲܚ ܠܵܒܵܬ݉ܪܵܐ ܥܲܠܵܝ! ܟܲܕ ܒܸܚܝܵܪܵܐ ܝܘܲܚ ܥܲܠܵܝ ܠܲܐܟ̣ܵܐ: ܒܙܲܒ̣ܢܵܐ ܕܩܵܐܸܡ ܪܵܒܵܐ ܓܘܼܖܹ̈ܐ ܡܲܒܝܘܼܢܹܐ ܝܢܵܐ. ܐܝܼܢܵܐ ܐܝܼܡܵܐ ܕܡܵܛܲܚ ܠܫܡܲܝܵܐ: ܬܵܡܵܐ

ܒܚܵܕܘܼܬܵܐ ܓܘܼܪܬܵܐ ܒܸܬ ܗܵܩܲܚ

ܒܘܼܬ ܓ̰ܵܦ̈ܲܢ ܝܲܩܘܼܖܹ̈ܐ ܕܠܲܐܟ̣ܵܐ

ܓ̰ܘܼܖ̈ܵܒܲܢ ܗ̇ܝܓܵܗ ܒܸܬ ܡܲܒܝܸܢܝܼ ܙܥܘܿܖܹ̈ܐ ܘܩܵܠܘܿܠܹ̈ܐ. ܫܒ̣ܘܿܩ ܐܵܙܲܠ݉ܚ ܒܡܲܪܕܘܼܬܵܐ: ܐܸܢ ܠܲܝܠܲܢ ܟ̰ܸܡ ܚܘܼܒ̣ܝܵܢܵܐ ܗܵܘܹܐ ܡܸܢ݉ܕܪܸܫ݉ ܩܵܝܕܲܡܬܵܐ ܗܲܪ ܒܸܬ ܐܵܬܹܐ. ܗܸܟ̃ ܪܥܝܼܫܵܐ ܝܘܸܬ ܟܡܵܐ ܒܲܣܝܼܡܬܵܐ ܝܠܵܗ̇ ܠܹܚܵܝܵܐ ܒܗܹܒ̣ܝܼ ܘܒܣܦܵܪܬܵܐ ܠܙܲܒ̣ܢܵܐ ܕܲܥܬܝܼܕ؟ ܛܘܼܒ̣ܵܐ ܐܸܠܘܼܟ̣ ܗܲܡܸܢܵܢܵܐ: ܐܸܢ ܐܝܼܬ ܠܘܼܟ̣ ܚܕܵܐ ܗܹܒ̣ܝܼ ܐܘܼܚܟ̰ܵܐ ܩܘܝܼܬܵܐ ܘܐܘܼܚܟ̰ܵܐ ܝܲܗܒ̣ܵܢܬܵܐ ܕܠܸܢܵܐ. ܡܘܼܕܝܼ ܙܵܪܵܪ ܐܝܼܬ ܒܸܟ̣ܝܵܐ ܩܵܐ ܚܲܕ݉ ܠܲܝܠܹܐ: ܟܲܕ ܨܲܦܪܵܐ ܒܸܬ ܙܵܪܸܩ ܒܵܬ݉ܪܘܼܗܝ؟