ܗ̇ܘ ܕܒܣܡܐ ܠܗ ܫܩܠ ܡ̈ܝܐ ܚܝ̈ܐ ܚܘܪܝܝ (ܓܠܝܢܐ ܟܒ: 17)

ܡܫܝܼܚܵܐ ܒܹܐܡܵܪܵܐ ܝܠܹܗ: ܫܩܘܿܠ ܠܗ݉ܘܿܢ ܚܘܼܪܵܝܝܼ. ܠܹܐ ܒܵܥܹܐ ܛܝܼܡܵܐ: ܐܘܼܦ ܠܵܐ ܗܵܕܲܪܬܵܐ. ܠܹܐ ܝܠܹܗ ܒܸܛܠܵܒܵܐ ܛܵܒ̣ܘܼܬܵܐ ܡܸܢܲܢ ܡ̣ܢ ܩܲܕ݉ܡ ܕܛܵܠܒܲܚ ܖ̈ܲܚܡܹܐ ܡ̣ܢ ܗ̇ܘ. ܐܵܦܸܢ ܕܠܲܝܬ ܠܘܼܟ̣ ܙܵܘܥܹ̈ܐ ܛܵܒ̣ܹ̈ܐ: ܐܸܢ ܐܲܚܟ̰ܝܼ ܒܵܣܡܵܐ ܠܘܼܟ̣: ܦܝܵܫܵܐ ܝܘܸܬ ܟ̰ܝܼܕܵܐ: ܒܘܼܬ ܐܵܗܵܐ: ܬܵܐ! ܐܸܢ ܠܲܝܬ ܠܘܼܟ̣ ܬܵܘܒܵܟܵܪܘܼܬܵܐ ܘܠܵܐ ܗܲܝܡܵܢܘܼܬܵܐ: ܬܵܐ ܠܟܸܣܠܘܼܗܝ ܘܗ̇ܘ ܒܸܬ ܝܲܗܒ̣ܸܠ ܠܗ݉ܘܿܢ ܩܵܬܘܼܟ̣. ܬܵܐ ܗܲܪ ܐܲܝܟ̣ ܕܝܼܘܸܬ: ܘܫܩܘܿܠ ܚܘܼܪܵܝܝܼ: ܕܠܵܐ ܙܘܼܙܹ̈ܐ ܘܕܠܵܐ ܛܝܼܡܵܐ. ܓܵܢܘܼܗܝ ܒܝܲܗܒ̣ܘܼܗ̇ ܝܠܹܗ ܩܵܐ ܣܢܝܼܩܹ̈ܐ. ܥܲܝܢܵܬܹ̈ܐ ܕܡ̈ܝܼܵܐ ܪܵܒܵܐ ܡܵܪܹܐ ܛܝܼܡܵܐ ܝܢܵܐ: ܐܝܼܢܵܐ ܠܲܝܬ ܚܲܕ݉ ܐ݉ܢܵܫܵܐ ܐܘܼܚܟ̰ܵܐ ܢܲܙܵܢ ܕܟܵܠܹܐ ܠܟܸܣ ܚܕܵܐ ܥܲܝܢܵܐ ܘܡܲܩܘܸܚ: ܐܵܢܵܐ ܠܹܐ ܡܵܨܹܝܢ ܠܹܫܬܵܝܵܐ: ܣܵܒܵܒ ܠܲܝܬ ܠܝܼ ܙܘܼܙܹ̈ܐ: ܙܵܪܵܪ ܠܲܝܬ ܟܡܵܐ ܡܸܣܟܹܢܵܐ ܝܠܹܗ ܗ̇ܘ ܐ݉ܢܵܫܵܐ: ܬܵܡܵܐ ܝܠܵܗ̇ ܥܲܝܢܵܐ: ܘܟܹܐ ܡܵܨܹܐ ܠܸܫܬܵܝܵܐ ܡܸܢܘܼܗ̇ ܗܲܪ ܐܲܝܟ̣ ܕܝܼܠܹܗ. ܣܵܦܵܖ̈ܟ̰ܝܼܹܐ ܨܹܗܝܹ̈ܐ ܐܝܼܡܵܐ ܕܬܵܦܩܝܼ ܒܗ̇ܝ ܥܲܝܢܵܐ: ܐܸܢ ܗܵܘܝܼ ܠܒ̣ܝܼܫܹܐ ܡܵܗܘܿܬ ܝܲܢ ܓܪܹܒ̣ܵܐ: ܕܠܵܐ ܬܵܦܵܘܘܿܬ ܟܹܐ ܫܵܬܝܼ ܡ̣ܢ ܡ̈ܝܼܘܼܗ̇: ܣܵܒܵܒ ܡ̣ܢ ܡܪܲܚܡܵܢܘܼܬܵܐ ܕܐܲܠܵܗܵܐ ܒܹܐܬܵܝܵܐ ܝܢܵܐ ܐܵܢܝܼ ܡ̈ܝܼܵܐ: ܘܟܹܐ ܡܵܨܲܚ ܫܵܬܲܚ ܕܠܵܐ ܒܵܩܲܪܬܵܐ. ܥܒ̣ܘܿܕ ܒܵܘܵܪ ܕܐܲܚܟ̰ܝܼ ܐܵܢܝܼ ܟܹܐ ܥܵܒ̣ܪܝܼ ܡ̣ܢ ܡܲܒܘܼܥܵܐ ܕܡ̈ܝܼܵܐ ܕܠܵܐ ܫܬܵܝܬܵܐ ܟܲܕ ܨܸܗܝܹ̈ܐ ܝܢܵܐ: ܐܵܢܝܼ ܕܝܼܢܵܐ ܢܵܓ̰ܝܼܒܹ̈ܐ: ܖ̈ܟܝܼܒ̣ܹܐ ܓܵܘ ܟܵܠܸܣܟܹ̈ܐ. ܒܲܠܟܵܐ ܪܵܒܵܐ ܨܸܗܝܹ̈ܐ ܝܢܵܐ: ܐܝܼܢܵܐ ܠܹܐ ܒܵܥܝܼ ܡܲܡܟܸܟ̣ܝܼ ܓܵܢܵܝ ܗܲܠ ܬܵܡܵܐ ܕܨܵܠܝܼ ܡ̣ܢ ܓܵܘ ܟܵܠܸܣܟܵܝ ܠܸܫܬܵܝܵܐ ܡ̈ܝܼܵܐ. ܟܹܐ ܚܵܫܒ̣ܝܼ ܠܹܗ ܚܲܕ݉ ܡܸܢܕܝܼ ܡܘܼܣܠܝܼܵܐ ܠܸܨܠܵܝܵܐ ܘܠܸܫܬܵܝܵܐ ܡ̈ܝܼܵܐ ܠܟܸܣ ܐ݉ܢܵܫܹ̈ܐ ܕܥܵܕܲܬ: ܒܘܼܬ ܐܵܗܵܐ ܟܹܐ ܥܵܒ̣ܪܝܼ ܡ̣ܢ ܐܲܢܹܐ ܡ̈ܝܼܵܐ ܣܵܦܘܵܬܵܝ̈ ܟܲܬܟܘܼܬܹܐ. ܐܵܘܚ: ܟܡܵܐ ܐ݉ܢܵܫܹ̈ܐ ܐܝܼܬ ܕܕܵܘܠܲܬܡܵܢܕܹ̈ܐ ܝܢܵܐ ܒܦܘܼܠܚܵܢܹ̈ܐ ܛܵܒ̣ܹ̈ܐ ܕܓܵܢܵܝ: ܗܲܕܟ̣ܵܐ ܕܠܹܐ ܡܵܨܝܼ ܠܹܐܬܵܝܵܐ ܠܟܸܣ ܡܫܝܼܚܵܐ! ܟܹܐ ܐܵܡܪܝܼ: ܐܵܢܵܐ ܠܹܐ ܒܵܥܹܝܢ ܕܦܵܝܫܸܢ ܦܘܼܪܩܵܐ ܐܲܝܟ̣ ܚܲܕ݉ ܓܹܢܵܒ̣ܵܐ ܝܲܢ ܩܵܛܘܿܠܵܐ: ܕܵܐܟ̣ܝܼ ܐܵܙܸܠ݉ܢ ܠܫܡܲܝܵܐ ܗܲܪ ܒܗ̇ܝ ܐܘܼܪܚܵܐ ܕܚܲܕ݉ ܒܸܩܪܵܟ̰ܝܼ ܟܹܐ ܐܵܙܸܠ؟ ܩܵܡܘܿ: ܠܲܝܬ ܐܘܼܪܚܵܐ ܠܲܒܠܵܢܬܵܐ ܠܚܸܩܪܵܐ ܓ̰ܸܕ ܡ̣ܢ ܗ̇ܝ ܕܓ̰ܵܠܵܠܝܼ ܐ݉ܙܝܼܠ ܠܹܗ ܒܝܼܘܼܗ̇؟ ܐܵܢܵܐ ܠܹܐ ܒܵܥܹܝܢ ܦܵܝܫܸܢ ܦܘܼܪܩܵܐ ܒܗ̇ܝ ܐܘܼܪܚܵܐ. ܙܵܝܵܖܹ̈ܐ ܫܲܒ̣ܗܸܖ̈ܵܢܹܐ ܐܲܝܟ̣ ܐܲܢܹܐ ܫܒ̣ܘܿܩ ܦܵܝܫܝܼ ܨܸܗܝܹ̈ܐ. ܐܝܼܢܐ ܗ̇ܘ ܕܒܣܡܐ ܠܗ ܫܩܠ ܡ̈ܝܐ ܚܝ̈ܐ ܚܘܪܝܝ.