ܘܥܒ̣ܘܕ ܒܘܣܡܐ ܒܡܪܝܐ: ܘܒܬ ܝܗܒ̣ܠ ܠܘܟ̣ ܡܛܠܒ̈ܐ ܕܠܒܘܟ̣ (ܡܙܡܘܪܐ ܠܙ: 4)

ܡܲܥܢܵܝܵܐ ܕܐܲܢܹܐ ܚܲܒܖܹ̈ܐ ܒܸܬ ܡܲܒܝܸܢ ܩܵܪܝܼܒܵܝܵܐ ܩܵܐ ܐܵܢܝܼ ܕܢܘܼܟ̣ܖ̈ܵܝܹܐ ܝܢܵܐ ܡ̣ܢ ܕܸܚܠܲܬ ܚܵܝܬܵܐ ܕܐܲܠܵܗܵܐ: ܐܝܼܢܵܐ ܩܵܐ ܗܲܡܸܢܵܢܵܐ ܫܲܪܝܼܪܵܐ: ܐܲܚܟ̰ܝܼ ܡܲܩܘܵܝܬܵܐ ܝܠܵܗ̇ ܕܚܕܵܐ ܣܲܪܲܣܬܘܼܬܵܐ ܕܝܠܝܼܦܘܼܗ̇ ܝܠܹܗ ܡ̣ܢ ܩܲܕ݉ܡܵܝܬܵܐ. ܠܲܐܟ̣ܵܐ ܚܲܝܹ̈ܐ ܕܗܲܡܸܢܵܢܵܐ ܦܝܵܫܵܐ ܝܢܵܐ ܡܘܼܕܸܥܹܐ ܐܲܝܟ̣ ܚܲܝܹ̈ܐ ܕܚܵܕܘܼܬܵܐ ܒܐܲܠܵܗܵܐ: ܘܗܲܕܟ̣ܵܐ ܟܹܐ ܩܲܒܠܲܚ ܚܵܛܸܪܓ̰ܲܡܥܘܼܬܵܐ ܡ̣ܢ ܗ̇ܝ ܣܲܪܲܣܬܘܼܬܵܐ ܓܘܼܪܬܵܐ: ܘܡܲܙܗܲܒ ܫܲܪܝܼܪܵܐ ܡܸܠܝܵܐ ܝܠܹܗ ܡ̣ܢ ܚܵܕܘܼܬܵܐ ܘܒܪܝܼܟ̣ܘܼܬܵܐ. ܐ݉ܢܵܫܹ̈ܐ ܠܵܐ ܙܵܕܥܵܢܹ̈ܐ ܡ̣ܢ ܐܲܠܵܗܵܐ: ܡܵܘܕܝܼܵܢܹ̈ܐ ܕܡ̣ܢ ܦܵܬܵܐ: ܗܸܟ̃ ܠܹܐ ܓܲܫܩܝܼ ܥܲܠ ܡܲܙܗܲܒ ܐܲܝܟ̣ ܚܲܕ݉ ܡܸܢܕܝܼ ܡܲܚܕܝܼܵܢܵܐ. ܩܵܐ ܐܵܢܝܼ ܫܘܼܚܪܵܐ ܝܠܹܗ: ܘܵܓ̰ܸܒܘܼܬܵܐ: ܝܲܢ ܠܵܙܸܡܘܼܬܵܐ: ܘܒܗܸܟ̃ ܥܕܵܢܵܐ ܠܹܐ ܝܠܹܗ ܒܲܣܝܼܡܘܼܬܵܐ ܝܲܢ ܚܵܕܘܼܬܵܐ. ܐܸܢ ܚܵܒ̣ܛܝܼ ܙܹܐ ܒܡܲܙܗܲܒ: ܗܲܕܟ̣ܵܐ ܟܹܐ ܥܵܒ̣ܕܝܼ ܣܵܒܵܒ ܐܝܼܬ ܠܗ݉ܘܿܢ ܚܕܵܐ ܩܵܙܲܢܓ̰ ܒܝܼܘܼܗܝ. ܝܲܢ ܣܵܒܵܒ ܒܸܙܕܵܥܵܐ ܝܢܵܐ ܡ̣ܢ ܠܵܘܡܵܐ ܕܐ݉ܢܵܫܹ̈ܐ. ܚܵܕܘܼܬܵܐ ܒܡܲܙܗܲܒ ܚܲܕ݉ ܡܸܢܕܝܼ ܐܘܼܚܟ̰ܵܐ ܩܵܪܝܼܒܵܝܵܐ ܝܠܹܗ ܩܵܐ ܣܵܡܵܐ ܓܘܼܪܵܐ ܕܐ݉ܢܵܫܹ̈ܐ: ܕܠܲܝܬ ܓܵܘ ܠܹܗܟܣܝܼܩܘܿܢܵܝ ܬܪܹܝ ܚܲܒܖܹ̈ܐ ܒܘܼܫ ܪܸܚܩܵܐ ܡܥܘܼܕܵܠܹܐ ܡ̣ܢ ܩܲܕܝܼܫܘܼܬܵܐ ܘܚܸܕܝܼܘܼܬܵܐ. ܐܝܼܢܵܐ ܗܲܡܸܢܵܢܹ̈ܐ ܕܟܹܐ ܝܲܕܥܝܼ ܠܡܫܝܼܚܵܐ: ܟܹܐ ܦܲܪܡܝܼ ܕܚܸܕܝܼܘܼܬܵܐ ܘܩܲܕܝܼܫܘܼܬܵܐ ܐܘܼܚܟ̰ܵܐ ܨܦܵܝܝܼ ܙܘܼܘܸܓܹܐ ܝܢܵܐ ܡܥܘܼܕܵܠܹܐ ܕܕܲܖ̈ܘܵܙܹܐ ܕܫܝܘܿܠ ܙܹܐ ܠܹܐ ܡܵܨܝܼ ܙܲܪܒܸܢܝܼ ܠܸܦܪܵܫܵܝ. ܐܵܢܝܼ ܕܟܹܐ ܡܲܚܸܒܝܼ ܠܐܲܠܵܗܵܐ ܒܟܠܹܗ ܠܸܒܵܝ ܟܹܐ ܡܵܫ݉ܟ̰ܚܝܼ ܠܗ݉ܘܿܢ ܐܘܼܖ̈ܚܵܬܘܼܗܝ ܐܘܼܖ̈ܚܵܬܹܐ ܕܒܲܣܝܼܡܘܼܬܵܐ: ܘܟܠܵܝ ܓ̰ܵܕܵܘܵܬܘܼ̈ܗܝ ܫܠܵܡܵܐ. ܩܲܕܝܼܫܹ̈ܐ ܒܐܵܓ̣ܵܝܵܝ ܟܹܐ ܡܵܫ݉ܟ̰ܚܝܼ ܚܵܕܘܼܝܵܬܹ̈ܐ ܘܦܨܵܚܹ̈ܐ ܐܘܼܚܟ̰ܵܐ ܡܸܠܝܹ̈ܐ ܘܒܘܼܖ̈ܟܵܬܹܐ ܐܘܼܚܟ̰ܵܐ ܫܦܝܼܟ̣ܹ̈ܐ: ܕܒܸܬ ܬܲܒܥܝܼ ܗ݉ܘܵܘ ܥܲܠܘܼܗܝ ܐܵܦܸܢ ܟܠܵܗ̇ ܕܘܼܢܝܹܐ ܩܵܠܒܵܐ ܗ݉ܘܵܐ ܡܸܢܘܼܗܝ. ܐܲܚܢܲܢ ܠܹܐ ܙܵܕܥܲܚ ܡ̣ܢ ܐܲܠܵܗܵܐ ܣܵܒܵܒ ܚܲܝܠܵܐ ܦܝܵܫܵܐ ܝܠܹܗ ܥܒ̣ܝܼܕܵܐ ܥܲܠܲܢ: ܗܲܝܡܵܢܘܼܬܲܢ ܠܹܐ ܝܠܵܗ̇ ܫܸܫܸܠܬܵܐ ܕܕܘܼܣܵܚܟ̰ܝܼܹ̈ܐ: ܬܵܘܕܝܼܬܲܢ ܠܹܐ ܝܠܵܗ̇ ܝܲܚܣܝܼܪܘܼܬܵܐ: ܠܵܐ: ܩܵܬܲܢ ܠܸܙܕܵܥܵܐ ܡ̣ܢ ܐܲܠܵܗܵܐ ܠܲܙܲܬ ܝܼܠܵܗ̇: ܗܹܒ̣ܝܼܲܢ ܒܪܝܼܟ̣ܘܼܬܵܐ ܝܠܵܗ̇: ܘܵܓ̰ܸܒܘܼܬܲܢ ܚܵܕܘܼܬܵܐ ܝܠܵܗ̇. ܚܸܕܝܼܘܼܬܵܐ ܘܬܵܘܕܝܼܬܵܐ ܫܲܪܝܼܪܬܵܐ ܗܲܕܟ̣ܵܐ ܒܩܘܼܪܒܘܼܢܝܼܘܼܬܵܐ ܙܘܼܘܸܓܹܐ ܝܢܵܐ ܡܥܘܼܕܵܠܹܐ ܐܲܝܟ̣ ܟ̰ܘܼܟ̰ܵܓܵܐ ܥܲܡ ܥܸܩܪܘܼܗܝ.

ܐܝܼܡܵܐ ܕܚܘܼܒܘܼܟ̣ ܛܵܥܡܲܚ: ܟܙܵܝܕܝܼ ܚܵܕܘܼ̈ܝܵܬܲܢ:

ܒܠܹܫܵܢܵܐ ܠܸܡܨܲܚ ܡܲܕܥܲܚ: ܟܡܵܐ ܓܘܼܪܬܵܐ ܒܪܝܼܟ̣ܘܼܬܲܢ.