ܚܙܝܪܢ 6
ܗܐ: ܒܨܘܪܐ ܝܘܢ (ܐܝܘܒ̣ ܡ: 4)
ܚܲܕ݉ ܚܲܒܪܵܐ ܡܲܚܕܝܼܵܢܵܐ ܩܵܬܘܼܟ̣: ܚܲܛܵܝܵܐ ܡܸܣܟܹܢܵܐ ܘܬܠܝܼܩܵܐ! ܐܲܢ݉ܬ ܒܸܚܫܵܒ̣ܵܐ ܝܘܸܬ ܕܠܹܐ ܝܘܸܬ ܚܫܝܼܚܵܐ ܠܟܸܣ ܐܲܠܵܗܵܐ ܣܵܒܵܒ ܒܵܨܘܿܪܵܐ ܝܘܸܬ. ܠܲܝܬ ܚܲܕ݉ ܩܲܕܝܼܫܵܐ ܓܵܘ ܕܘܼܢܝܹܐ ܕܠܹܐ ܝܠܹܗ ܪܥܝܼܫܵܐ ܒܚܕܵܐ ܥܕܵܢܵܐ ܕܒܵܨܘܿܪܵܐ ܝܗ݉ܘܵܐ ܘܚܲܛܵܝܵܐ. ܐܸܢ ܐܝܼܘܿܒ̣ ܘܐܹܫܲܥܝܵܐ: ܘܦܵܘܠܘܿܣ ܟܠܵܝ ܐ݉ܡܝܼܪܹܐ ܝܢܵܐ ܒܵܨܘܿܪܹܐ ܝܘܲܚ: ܚܲܛܵܝܵܐ ܡܸܣܟܹܢܵܐ: ܐܲܢ݉ܬ ܒܸܬ ܢܵܚܦܸܬ ܠܙܲܘܘܼܓܹܐ ܒܗ̇ܝ ܡܵܘܕܵܝܬܵܐ؟ ܐܸܢ ܫܵܦܵܩܲܬ ܐܲܠܵܗܵܝܬܵܐ ܠܵܐ ܓܵܪܕܵܐ ܠܟܠܵܗ̇ ܚܛܝܼܬܵܐ ܡ̣ܢ ܗܲܡܸܢܵܢܵܐ: ܐܲܢ݉ܬ ܕܵܐܟ̣ܝܼ ܒܗܹܒ̣ܝܼ ܝܘܸܬ ܕܥܵܒ̣ܕܸܬ ܠܵܗ̇ ܒܓܵܢܘܼܟ̣؟ ܘܐܸܢ ܐܲܠܵܗܵܐ ܟܹܐ ܡܲܚܸܒ ܠܛܵܝܸܦܘܼܗܝ ܟܲܕ ܒܵܨܘܿܪܵܐ ܝܠܹܗ: ܒܸܚܫܵܒ̣ܵܐ ܝܘܸܬ ܕܒܵܨܘܿܪܘܼܬܵܐ ܕܝܼܘܼܟ̣ ܒܸܬ ܡܲܟܠܝܼܵܐ ܠܐܲܠܵܗܵܐ ܡ̣ܢ ܠܡܲܚܘܼܒܘܼܟ̣؟ ܗܲܡܸܢ ܒܡܫܝܼܚܵܐ: ܝܵܐ ܢܘܼܟ̣ܪܵܝܵܐ ܡ̣ܢ ܫܵܘܬܵܦܘܼܬܵܐ ܕܘܼܢܝܵܢܵܝܬܵܐ! ܡܫܝܼܚܵܐ ܒܸܩܪܵܝܘܼܟ̣ ܝܠܹܗ: ܗܲܪ ܕܵܐܟ̣ܝܼ ܕܝܼܘܸܬ ـ
ܠܵܐ ܙܲܕܝܼܩܹ̈ܐ: ܠܵܐ ܙܲܕܝܼܩܹ̈ܐ
ܠܚܲܛܵܝܹ̈ܐ ܩܪܹܐ ܠܹܗ ܡܫܝܼܚܵܐ.
ܗܲܪ ܐܵܕܝܼܵܐ ܐ݉ܡܘܿܪ: ܐܲܢ݉ܬ ܡܝܼܬ ܠܘܼܟ̣ ܒܘܼܬ ܚܵܛܸܪ ܚܲܛܵܝܹ̈ܐ: ܐܵܢܵܐ ܚܲܕ݉ ܚܲܛܵܝܵܐ ܝܘܸܢ: ܡܲܪܝܸܣ ܕܸܡܘܼܟ̣ ܥܲܠܝܼ. ܐܸܢ ܡܵܘܕܸܬ ܚܛܝܼܬܘܼܟ̣: ܒܸܬ ܡܲܫ݉ܟ̰ܚܸܬ ܦܘܼܚܵܠܵܐ. ܐܸܢ ܐܵܕܝܼܵܐ ܒܟܠܹܗ ܠܸܒܘܼܟ̣ ܐܵܡܪܸܬ: ܚܲܛܵܝܵܐ ܝܘܸܢ، ܚܲܠܸܠ ܠܝܼ: ܗܲܪ ܐܵܕܝܼܵܐ ܒܸܬ ܦܲܝܫܸܬ ܚܘܼܠܸܠܵܐ ܘܕܘܼܟ̣ܝܵܐ ܡ̣ܢ ܚܛܝܼܬܘܼܟ̣. ܐܸܢ ܪܘܼܚܵܐ ܕܩܘܼܕܫܵܐ ܡܲܡܨܹܐ ܠܘܼܟ̣ ܠܹܐܡܵܪܵܐ ܡ̣ܢ ܟܠܹܗ ܠܸܒܘܼܟ̣ ــ
ܗܲܪ ܐܲܝܟ̣ ܕܝܼܘܸܢ: ܕܠܵܐ ܡܵܗܵܢܵܐ:
ܫܒ̣ܘܿܩ ܡ̣ܢ ܕܕܸܡܘܼܟ̣ ܩܵܬܝܼ ܬܘܼܦܟ̣ܵܐ:
ܘܕܐܵܬܹܝܢ ܠܟܸܣܠܘܼܟ̣ ܐܲܢ݉ܬ ܦܵܩܘܿܕܝܼ:
ܝܵܐ ܦܹܐܪܵܐ ܕܐܲܠܵܗܵܐ: ܐ݉ܬܹܐ ܠܝܼ
ܒܸܬ ܩܵܝܡܸܬ ܡ̣ܢ ܩܪܵܝܬܘܼܟ̣ ܕܐܵܗܵܐ ܩܵܝܕܲܡܬܵܐ: ܚܛܝܼܵܬܘܼ̈ܟ̣ ܟܠܵܝ ܫܒ̣ܝܼܩܹ̈ܐ. ܐܵܦܸܢ ܩܝܼܡ ܠܘܼܟ̣ ܒܐܵܗܵܐ ܩܵܝܕܲܡܬܵܐ ܡ̣ܢ ܫܘܝܼܬܘܼܟ̣ ܟܲܕ ܟܠܵܝ ܚܛܝܼܵܬܘܼ̈ܟ̣ ܥܲܡܘܼܟ̣: ܒܐܵܗܵܐ ܠܲܝܠܹܐ ܒܸܬ ܢܵܝܚܸܬ ܟܲܕ ܩܘܼܒܠܵܐ ܡ̣ܢ ܣܵܘܓܘܿܠܘܼܟ̣. ܐܵܦܸܢ ܕܦܝܼܫܵܐ ܝܘܸܬ ܗ݉ܘܵܐ ܡܘܼܣܠܝܼܵܐ ܒܟ̰ܸܢܟ̰ܸܖܹ̈ܐ ܕܚܛܝܼܬܵܐ: ܐܵܕܝܼܵܐ ܒܸܬ ܦܵܝܫܸܬ ܡܘܼܠܒ̣ܸܫܵܐ ܓ̰ܘܼܒܵܐ ܕܙܲܕܝܼܩܘܼܬܵܐ. ܐܸܢ ܐܵܕܝܼܵܐ ܗܲܡܸܢܸܬ ܒܗ̇ܘ ܕܟܹܐ ܡܲܟܫܸܛ ܠܚܲܛܵܝܹ̈ܐ: ܒܸܬ ܦܵܝܫܸܬ ܦܘܼܪܩܵܐ. ܪܘܼܚܵܐ ܕܩܘܼܕܫܵܐ ܝܲܗܒ̣ܸܠܘܼܟ̣ ܗܲܝܡܵܢܘܼܬܵܐ ܦܵܪܩܵܢܬܵܐ ܒܗ̇ܘ ܕܟܹܐ ܩܲܒܸܠ ܚܲܛܵܝܹ̈ܐ ܕܡ̣ܢ ܟܠܵܝ ܒܘܼܫ ܒܵܨܘܿܖܹ̈ܐ.