ܕܠܒ̣ܢܢ ܕܢܨܝܒ̣ ܠܗ (ܡܙܡܘܪܐ ܩܕ: 16)

ܐܲܖ̈ܙܹܐ ܕܠܸܒ̣ܢܵܢ ܛܘܼܦ̮ܣܵܐ ܕܟܪܸܣܛܝܵܢܵܐ ܝܢܵܐ ܒܗ̇ܝ ܕܒܐܝܼܕܵܐ ܕܡܵܪܝܵܐ ܦܝܼܫܹܐ ܝܢܵܐ ܢܨܝܼܒ̣ܹܐ. ܟ̰ܸܡ ܗܲܕܟ̣ܵܐ ܝܠܵܗ̇ ܩܸܨܲܬ ܕܟܠ ܒܪܘܿܢܵܐ ܕܐܲܠܵܗܵܐ: ܕܠܹܐ ܝܠܹܗ ܢܨܝܼܒ̣ܵܐ ܡ̣ܢ ܒܲܪܢܵܫܵܐ: ܝܲܢ ܡ̣ܢ ܓܵܢܘܼܗܝ: ܐܝܼܢܵܐ ܒܐܝܼܕܵܐ ܕܐܲܠܵܗܵܐ. ܐܝܼܕܵܐ ܛܫܝܼܬܵܐ ܕܪܘܼܚܵܐ ܕܐܲܠܵܗܵܐ ܒܙܝܼܩ ܠܵܗ̇ ܒܲܪܙܲܪܥܵܐ ܚܵܝܵܐ ܓܵܘ ܚܲܕ݉ ܠܸܒܵܐ ــ ܚܲܕ݉ ܒܲܪܙܲܪܥܵܐ ܕܦܝܼܫܵܐ ܝܗ݉ܘܵܐ ܗܘܼܕܪܵܐ ܩܵܬܘܼܗܝ ܒܐܝܼܕܵܐ ܕܓܵܢܘܼܗܝ. ܟܠ ܝܵܪܘܿܬܵܐ ܫܲܪܝܼܪܵܐ ܕܫܡܲܝܵܐ ܟܹܐ ܩܲܒܸܠ ܠܹܗ ܗ̇ܘ ܒܵܓ̣ܒܵܢ ܓܘܼܪܵܐ ܐܲܝܟ̣ ܢܵܨܒ̣ܵܢܘܼܗܝ. ܡܸܢ݉ܕܪܸܫ݉: ܐܲܖ̈ܙܹܐ ܕܠܸܒ̣ܢܵܢ ܠܹܐ ܝܢܵܐ ܣܢܝܼܩܹܐ ܠܒܲܪܢܵܫܵܐ ܩܵܐ ܡܲܫܬܵܝܬܵܐ. ܟܸܠܝܹܐ ܝܢܵܐ ܥܲܠ ܩܵܝܹ̈ܐ ܖ̈ܵܡܹܐ: ܐܲܚܟ̰ܝܼ ܬܘܼܖ̈ܣܝܹܐ ܒܐܝܼܕܵܐ ܕܒܵܒܲܢ ܫܡܲܝܵܢܵܝܵܐ. ܗܲܕܟ̣ܵܐ ܝܠܹܗ ܗ̇ܘ ܟܪܸܣܛܝܵܢܵܐ ܕܝܠܝܼܦܵܐ ܝܠܹܗ ܠܹܚܵܝܵܐ ܒܗܲܝܡܵܢܘܼܬܵܐ. ܗ̇ܘ ܠܹܐ ܝܠܹܗ ܣܢܝܼܩܵܐ ܠܒܲܪܢܵܫܵܐ ܐܘܼܦ ܒܫܘܼܠܹ̈ܐ ܙܲܒ̣ܢܵܢܵܝܹ̈ܐ. ܩܵܐ ܬܘܼܪܣܵܝܘܼܗܝ ܟܹܐ ܚܵܝܸܪ ܠܡܵܪܝܵܐ: ܘܐܸܠܹܐ ܒܢܲܦ̮ܫܘܼܗܝ. ܛܠܘܼܠܵܐ ܕܫܡܲܝܵܐ ܝܠܹܗ ܣܵܡܘܼܗܝ: ܘܐܲܠܵܗܵܐ ܕܫܡܲܝܵܐ ܝܠܹܗ ܡܲܒܘܼܥܵܐ ܕܡ̈ܝܼܵܐ ܩܵܬܘܼܗܝ. ܡܸܢ݉ܕܪܸܫ݉: ܐܲܖ̈ܙܹܐ ܕܠܸܒ̣ܢܵܢ ܠܹܐ ܝܢܵܐ ܢܛܝܼܪܹܐ ܒܚܲܝܠܵܐ ܕܡܵܝܘܿܬܹ̈ܐ. ܠܹܐ ܝܢܵܐ ܕܲܝܢܵܢܹ̈ܐ ܩܵܐ ܒܲܪܢܵܫܵܐ ܒܘܼܬ ܢܛܵܪܬܵܝ ܡ̣ܢ ܙܵܪܵܪ ܕܦܵܘܚܹ̈ܐ ܘܕܒܘܼܖ̈ܵܢܹܐ. ܐܝܼܠܵܢܹ̈ܐ ܕܐܲܠܵܗܵܐ ܝܢܵܐ: ܚܘܼܡܝܹܐ ܘܢܛܝܼܪܹܐ ܒܐܝܼܕܘܼܗܝ. ܟܪܸܣܛܝܵܢܵܐ ܙܹܐ ܟ̰ܸܡ ܗܵܕܵܐ ܝܠܹܗ. ܠܹܐ ܝܠܹܗ ܟ̰ܘܼܟ̰ܵܓܵܐ ܕܓܵܘ ܐܵܘܬܵܓ̣ܹ̈ܐ: ܕܠܵܐ ܡܵܚܝܼ ܥܲܠܘܼܗܝ ܓ̰ܘܼܖ̈ܵܒܹܐ. ܓܸܠܝܵܐ ܝܠܹܗ ܩܲܕ݉ܡ ܟ̰ܵܬܘܿܢܘܼܝܵܬܹ̈ܐ ܕܠܵܐ ܕܲܠܕܵܐ ܘܕܠܵܐ ܢܛܵܪܬܵܐ: ܡܵܓܵܪ ܐܵܗܵܐ: ܕܓܘܼܠܦܵܢܹ̈ܐ ܕܐܲܠܵܗܵܐ ܐܵܒܵܕܝܼܢܵܝܵܐ ܒܕܵܝܸܡܘܼܬܵܐ ܦܪܝܼܣܹܐ ܝܢܵܐ ܥܲܠ ܐܲܖ̈ܙܹܐ ܕܒܓܵܢܘܼܗܝ ܢܨܝܼܒ̣ܵܝ ܝܠܹܗ. ܗܲܡܸܢܵܢܹ̈ܐ ܐܲܝܟ̣ ܐܲܖ̈ܙܹܐ: ܡܸܠܝܹܐ ܝܢܵܐ ܡ̣ܢ ܫܝܼܪܵܐ: ܘܐܝܼܬ ܠܗ݉ܘܿܢ ܒܲܣܵܐ ܚܲܝܘܼܬܵܐ ܕܗܵܘܝܼ ܗܲܡܵܫܵܐ ܩܝܼܢܹ̈ܐ ܐܘܼܦ ܒܬܲܠܓܵܐ ܕܣܸܬܘܵܐ. ܡܸܢܕܝܼ ܐ݉ܚܵܪܵܝܵܐ: ܐܲܗܘܵܠ ܡܲܢܬܝܼܵܢܬܵܐ ܘܙܲܪܝܼܦ ܕܐܲܪܙܵܐ ܐܲܚܟ̰ܝܼ ܩܵܐ ܚܸܩܪܵܐ ܕܐܲܠܵܗܵܐ ܝܠܵܗ̇. ܡܵܪܝܵܐ ܒܢܲܦ̮ܫܘܼܗܝ ܝܠܹܗ ܡܲܒܘܼܥܵܐ ܕܟܠ ܒܘܼܪܟܬܵܐ ܩܵܐ ܐܲܖ̈ܙܹܐ. ܒܗܲܡܸܢܵܢܵܐ ܠܲܝܬ ܗܸܟ̃ ܡܸܢܕܝܼ ܩܵܐ ܚܸܩܪܵܐ ܕܒܲܪܢܵܫܵܐ: ܣܵܒܵܒ ܦܝܼܫܵܐ ܝܠܹܗ ܢܨܝܼܒ̣ܵܐ ܘܬܘܼܪܣܝܼܵܐ ܘܢܛܝܼܪܵܐ ܐܲܚܟ̰ܝܼ ܒܐܝܼܕܵܐ ܕܡܵܪܝܵܐ: ܕܐܸܠܘܼܗܝ ܗܵܘܹܐ ܟܠܹܗ ܚܸܩܪܵܐ ܘܐܝܼܩܵܪܵܐ.