ܕܙܡܖ̈ܝܬܐ ܕܝܣܪܝܠ (ܒ. ܫܡܘܐܝܠ ܟܓ: 1)

ܡ̣ܢ ܟܠܵܝ ܩܲܕܝܼܫܹ̈ܐ ܕܦܝܼܫܵܐ ܝܢܵܐ ܡܘܼܕܟ̣ܸܪܹܐ ܓܵܐ ܟܬܵܒ̣ܹ̈ܐ ܩܲܕܝܼܫܹ̈ܐ: ܚܲܝܹ̈ܐ ܕܕܵܘܝܼܕ ܡܲܠܟܵܐ ܒܘܼܫ ܡܸܠܝܹܐ ܝܢܵܐ ܡ̣ܢ ܟܵܖܹ̈ܐ ܚܲܝܠܵܢܹ̈ܐ ܘܡܵܠܲܦܝܵܬܹ̈ܐ. ܒܬܵܪܝܼܚ ܕܚܲܝܹ̈ܐ ܕܗ̇ܘ ܒܸܚܙܵܝܵܐ ܝܘܲܚ ܓ̰ܘܼܖ̈ܵܒܹܐ ܘܙܲܗܡܲܬܹ̈ܐ ܕܒܓ̰ܲܡܥ ܠܹܐ ܐܵܬܝܼ ܠܡܲܫ݉ܟ̰ܘܿܚܹܐ ܒܚܲܝܹ̈ܐ ܕܩܲܕܝܼܫܹ̈ܐ ܐ݉ܚܹܖ̈݉ܢܹܐ ܩܵܕܝܼܡܝܼ. ܒܘܼܬ ܐܵܗܵܐ: ܗ̇ܘ ܝܼܠܹܗ ܛܘܼܦ̮ܣܵܐ ܒܘܼܫ ܨܦܵܝܝܼ ܕܦܵܪܘܿܩܲܢ. ܕܵܘܝܼܕ ܒܵܠܵܕ ܝܼܗ݉ܘܵܐ ܒܓ̰ܘܼܖ̈ܵܒܹܐ ܕܐ݉ܢܵܫܹ̈ܐ ܒܟܠܵܝ ܕܵܖ̈ܵܓ̰ܹܐ ܘܒܟܠܵܝ ܐܲܗܘܵܠܵܬܹ̈ܐ. ܟܹܐ ܝܲܕܸܥ ܗ݉ܘܵܐ ܙܲܗܡܲܬܹ̈ܐ ܕܡܲܠܟܹ̈ܐ ܣܵܒܵܒ ܒܓܵܢܘܼܗܝ ܡܲܠܟܵܐ ܝܗ݉ܘܵܐ: ܐܘܼܦ ܚܲܡܹ̈ܐ ܕܐ݉ܢܵܫܹ̈ܐ ܟܵܣܸܒ ܝܠܝܼܦܵܝ ܝܗ݉ܘܵܐ: ܣܵܒܵܒ ܒܓܵܢܘܼܗܝ ܪܵܥܝܘܼܬܵܐ ܥܒ̣ܝܼܕܵܐ ܝܗ݉ܘܵܐ. ܚܵܕܘܿܪܵܐ ܐܝܼܬ ܠܹܗ ܪܵܒܵܐ ܟ̰ܵܬܘܿܢܘܼܝܵܬܹ̈ܐ: ܘܐܘܼܦ ܕܵܘܝܼܕ ܫܪܹܐ ܠܹܗ ܓܵܘ ܓܸܦܝܼܵܬܹ̈ܐ ܕܥܹܝܢ ـ ܓܲܕܝܼ. ܨܘܼܠܛܵܢ ܐܝܼܬ ܠܹܗ ܙܲܗܡܲܬܹ̈ܐ ܕܓܵܢܘܼܗܝ: ܐܘܼܦ ܕܵܘܝܼܕ ܚܙܹܐ ܠܹܗ ܠܩܸܫܝܘܼܬܵܐ ܕܒܢܘܿܢܹ̈ܐ ܕܨܘܿܪܝܼܵܐ. ܕܵܘܝܼܕ ܩܘܼܒܸܠ ܠܹܗ ܙܲܗܡܲܬ ܐܘܼܦ ܡ̣ܢ ܕܵܘܣܬܘܼ̈ܗܝ: ܐܲܚܝܼܬܘܿܦܹܝܠ ܪܵܐܝܝܼܟܵܪܘܼܗܝ ܩܵܡ ܫܵܒ̣ܸܩ ܠܹܗ. ܐܵܟ̣ܠܵܢܵܐ ܕܠܲܚܡܝܼ ܡܘܼܪܸܡ ܠܹܗ ܥܲܠܝܼ ܥܸܩܒܵܐ. ܕܸܫ̃ܡܸܢܘܼ̈ܗܝ ܒܘܼܫ ܡܲܪܝܼܖܹ̈ܐ ܐ݉ܢܵܫܹ̈ܐ ܕܒܲܝܬܘܼܗܝ ܝܗ݉ܘܵܘ. ܒܢܘܿܢܘܼ̈ܗܝ ܝܗ݉ܘܵܘ ܒܵܥܸܣ ܕܝܲܠܨܘܼܝܘܼܗܝ ܟ̰ܸܡ ܓܘܼܪܬܵܐ. ܓ̰ܘܼܖ̈ܵܒܹܐ ܕܡܸܣܟܹܢܘܼܬܵܐ ܘܕܕܵܘܸܠܬܵܐ: ܕܐܝܼܩܵܪܵܐ ܘܕܠܵܘܡܵܐ: ܕܨܵܚܘܼܬܵܐ ܘܕܡܲܪܥܵܐ: ܟܠܵܝ ܓ̰ܘܼܪܸܒ ܠܗ݉ܘܿܢ ܚܲܝܠܵܝ ܒܝܼܘܼܗܝ. ܐܝܼܬ ܗ݉ܘܐ ܠܹܗ ܓ̰ܘܼܖ̈ܵܒܹܐ ܡ̣ܢ ܠܒ̣ܲܕܲܪ ܠܸܫܓ̣ܵܫܘܼܗܝ: ܘܡ̣ܢ ܓܵܘܵܝܝܼ ܠܡܲܚܪܘܼܒ̣ܹܐ ܚܵܕܘܼܬܘܼܗܝ. ܕܵܘܝܼܕ ܟܡܵܐ ܓ̰ܲܠܕܹܐ ܕܚܠܝܼܨ ܠܹܗ ܡ̣ܢ ܚܲܕ݉ ܓ̰ܘܼܪܵܒܵܐ: ܢܦܝܼܠ ܠܹܗ ܓܵܘ ܚܲܕ݉ ܐ݉ܚܹܪ݉ܢܵܐ. ܟܡܵܐ ܓ̰ܲܠܕܹܐ ܕܦܠܝܼܛ ܠܹܗ ܡ̣ܢ ܚܲܕ݉ ܙܲܒ̣ܢܵܐ ܕܒܹܐ ܗܹܒ̣ܝܼܘܼܬܵܐ ܘܕܙܕܘܼܥܬܵܐ: ܡܸܢ݉ܕܪܸܫ݉ ܦܝܼܫ ܠܹܗ ܡܘܼܟܸܦܵܐ ܠܥܘܼܡܩܹ̈ܐ ܬܲܚܬܲܝܹ̈ܐ: ܘܟܠܵܝ ܠܲܦܹ̈ܐ ܘܡܲܚܫܘܼܠܹ̈ܐ ܕܐܲܠܵܗܵܐ ܡܚܹܐ ܠܗ݉ܘܿܢ ܥܲܠܘܼܗܝ. ܥܒ̣ܘܿܕ ܒܵܘܵܪ ܐܵܗܵܐ ܝܠܵܗ̇ ܗܲܓ̰ܲܬ ܕܟܖܸ̈ܣܛܝܵܢܹܐ: ܟܠܵܝ ܟܹܐ ܡܲܚܸܒܝܼ ܠܡܲܙܡܘܿܖܹ̈ܐ ܕܕܵܘܝܼܕ. ܕܵܘܝܼܕ ܦܝܼܫܵܐ ܝܗ݉ܘܵܐ ܡܘܼܠܦܵܐ ܓܵܘ ܡܲܕܪܵܣܵܐ ܪܹܫܵܝܬܵܐ ܡ̣ܢ ܟܠܵܝ ܡܲܕܖ̈ܵܣܹܐ ــ ܡܲܕܪܵܣܵܐ ܕܠܸܒܵܐ ܡܘܼܪܥܸܫܵܐ: ܓ̰ܘܼܪܒܵܐ ܘܬܘܼܥܠܡܵܐ. ܟܲܕ ܐܲܚܢܲܢ ܦܵܝܫܲܚ ܡܘܼܠܦܹܐ ܗܲܪ ܓܵܘ ܗ̇ܝ ܡܲܕܪܵܣܵܐ: ܟܲܕ ܓܲܪܘܸܣܲܚ ܒܫܵܦܵܩܲܬ ܘܒܫܸܢܹ̈ܐ: ܡ̣ܢ ܥܕܵܢܵܐ ܠܥܕܵܢܵܐ ܒܘܼܫ ܟܹܐ ܪܵܥܫܲܚ ܠܩܲܕܪܵܐ ܕܡܲܙܡܘܿܖܹ̈ܐ ܕܕܵܘܝܼܕ ܘܒܘܼܫ ܟܹܐ ܡܲܫ݉ܟ̰ܚܲܚ ܠܗ݉ܘܿܢ ܕܟ̰ܝܼܡܵܢܹ̈ܐ ܡܝܼܠܹ̈ܐ ܝܢܵܐ.