ܬܡܘܙ 17
ܣܒܒ ܒܝܕܥܐ ܝܘܚ ܓܒܝܬܘܟ̣ܘܢ ܕܡܢ ܐܠܗܐ: ܐܚܘܢܘܬܝ̈ ܣܘܓܘܠ (ܐ ܬܣܠܘܢܩܝ̈ܐ ܐ: 4)
ܪܵܒܵܐ ܐ݉ܢܵܫܹ̈ܐ ܟܹܐ ܒܵܥܝܼ ܠܝܼܕܵܥܵܐ ܓܵܒܵܝܬܵܝ ܡ̣ܢ ܩܲܕ݉ܡ ܕܚܵܝܪܝܼ ܠܡܫܝܼܚܵܐ: ܐܝܼܢܵܐ ܠܹܐ ܡܵܨܝܼ ܠܝܼܕܵܥܘܼܗ̇ ܒܗ̇ܘ ܐܘܼܪܚܵܐ: ܐܲܚܟ̰ܝܼ ܒܸܬ ܝܵܠܦܝܼ ܠܵܗ̇ ܒܚܝܵܪܬܵܐ ܠܡܫܝܼܚܵܐ. ܐܸܢ ܐܲܢ݉ܬ ܒܵܥܹܝܬ ܝܲܕܥܸܬ ܓܵܒܵܝܬܵܐ ܕܓܵܢܘܼܟ̣: ܒܐܵܗܵܐ ܐܘܼܪܚܵܐ ܕܒܹܐܬܵܝܵܐ ܝܠܵܗ̇ ܒܸܬ ܡܲܫ݉ܟ̰ܚܸܬ ܚܵܛܸܪܓ̰ܲܡܥܘܼܬܵܐ ܩܵܐ ܠܸܒܘܼܟ̣ ܩܲܕ݉ܡ ܐܲܠܵܗܵܐ. ܪܥܝܼܫܵܐ ܝܘܸܬ ܕܐܲܢ݉ܬ ܚܲܕ݉ ܚܲܛܵܝܵܐ ܬܠܝܼܩܵܐ ܘܓܘܼܢܵܗܟܵܪ ܝܼܘܸܬ؟ ܓ̰ܲܠܕܹܐ ܙܹܠ݉ ܠܟܸܣ ܙܩܝܼܦܵܐ ܘܡܲܕܸܥ ܐܲܗܘܵܠܘܼܟ̣ ܩܵܐ ܡܫܝܼܚܵܐ: ܘܬܲܢܝܼ ܩܵܬܘܼܗܝ ܕܩܸܪܝܵܐ ܝܘܸܬ ܓܵܘ ܟܬܵܒ̣ܘܼܗܝ: ܗ̇ܘ ܕܠܟܸܣܠܘܼܗܝ ܐܵܬܹܐ: ܠܹܐ ܦܲܠܛܸܢܹܗ ܠܒ̣ܲܕܲܪ. ܬܲܢܝܼ ܠܹܗ ܙܹܐ ܕܒܓܵܢܹܗ ܐ݉ܡܝܼܪܵܐ ܝܠܹܗ: ܣܲܪܲܣܬ ܝܼܠܵܗ̇ ܗܸܡܸܙܡܵܢ: ܘܚܫܝܼܚܬܵܐ ܠܟܠܵܗ̇ ܩܲܒܵܠܬܵܐ: ܕܝܑܼܫܘܿܥ ܡܫܝܼܚܵܐ ܐ݉ܬܹܐ ܠܹܗ ܠܥܵܠܡܵܐ ܠܡܲܚܘܼܝܹܐ ܠܚܲܛܵܝܹ̈ܐ. ܚܘܿܪ ܠܝܑܼܫܘܿܥ: ܗܲܡܸܢ ܒܝܼܹܗ: ܘܕܲܪܣܵܥܲܬ ܒܸܬ ܡܲܫ݉ܟ̰ܚܸܬ ܣܵܒܸܬܘܼܬܵܐ ܕܓܵܒܵܝܬܘܼܟ̣: ܣܵܒܵܒ ܐܸܢ ܗܘܼܡܸܢܵܐ ܝܘܸܬ: ܓܘܼܒܝܵܐ ܝܘܸܬ. ܐܸܢ ܣܵܦܹܝܬ ܓܵܢܘܼܟ̣ ܬܲܡܵܡ ܒܡܫܝܼܚܵܐ ܘܣܵܒܪܸܬ ܒܝܼܹܗ: ܗ̇ܝܓܵܗ ܐܲܢ݉ܬ ܝܼܘܸܬ ܚܲܕ݉ ܡ̣ܢ ܓܘܼܒܝܹ̈ܐ ܕܐܲܠܵܗܵܐ. ܐܝܼܢܵܐ ܐܸܢ ܟܵܠܹܝܬ ܠܹܐܡܵܪܵܐ: ܩܲܕ݉ܡܵܝܬܵܐ ܒܵܥܹܝܢ ܝܲܕܥܸܢ ܐܸܢ ܓܘܼܒܝܵܐ ܝܘܸܢ: ܒܲܩܘܿܪܹܐ ܝܘܸܬ ܡܸܢܕܝܼ ܕܠܹܐ ܝܘܸܬ ܒܝܼܕܵܥܵܐ. ܙܵܪܵܪ ܠܲܝܬ ܟܡܵܐ ܓܘܼܢܵܗܟܵܪ ܝܼܘܸܬ: ܙܹܠ݉ ܠܟܸܣ ܡܫܝܼܚܵܐ ܗܲܪ ܐܲܝܟ̣ ܕܝܼܘܸܬ: ܘܪܲܦܝܼ ܐܝܼܕܵܐ ܡ̣ܢ ܟܠܵܝ ܒܵܩܲܖ̈ܝܵܬܹܐ ܒܹܐ ܘܲܓ̰ܗ ܒܘܼܬ ܓܵܒܵܝܬܵܐ. ܙܹܠ݉ ܕܘܼܙ ܠܟܸܣ ܡܫܝܼܚܵܐ: ܛܲܫܝܼ ܓܵܢܘܼܟ̣ ܒܕܲܖ̈ܒܵܬܘܼܗܝ: ܗ̇ܝܓܵܗ ܒܸܬ ܝܲܕܥܸܬ ܓܵܒܵܝܬܘܼܟ̣. ܚܵܛܸܪܓ̰ܲܡܥܘܼܬܵܐ ܕܪܘܼܚܵܐ ܕܩܘܼܕܫܵܐ ܒܸܬ ܦܵܝܫܵܐ ܝܘܼܗܒ̣ܸܠܬܵܐ ܩܵܬܘܼܟ̣: ܗܲܕܟ̣ܵܐ ܕܒܸܬ ܡܵܨܹܝܬ ܠܹܐܡܵܪܵܐ: ܐܵܢܵܐ ܒܝܼܕܵܥܵܐ ܝܘܸܢ ܒܡܵܢܝܼ ܗܘܼܡܸܢܵܐ ܝܘܸܢ: ܘܚܵܛܸܪܓ̰ܲܡܥ ܝܼܘܸܢ ܕܟܹܐ ܡܵܨܹܐ ܠܸܢܛܵܪܵܐ ܩܵܬܝܼ ܗܵܝܡܲܢܬܝܼ. ܙܹܠ݉: ܡܲܬܸܒ̣ ܗܹܒ̣ܝܼܘܼܟ̣ ܒܡܫܝܼܚܵܐ: ܘܓ̰ܘܼܘܵܒ ܒܸܬ ܩܲܒܠܸܬ: ــ ܡܲܚܲܒܬܵܐ ܕܥܵܠܲܡ ܩܵܡ ܡܲܚܸܒܸܢܘܼܟ̣: ܒܘܼܬ ܐܵܗܵܐ ܩܵܡ ܡܲܚܸܒܸܢܘܼܟ̣: ܒܘܼܬ ܐܵܗܵܐ ܩܵܡ ܓܵܪܫܸܢܘܼܟ̣ ܒܫܵܦܵܩܲܬ. ܡ̣ܢ ܒܵܬ݉ܪ ܕܐܲܢ݉ܬ ܓܘܼܒܝܵܐ ܝܘܸܬ ܠܗ̇ܘ: ܠܹܐ ܦܵܝܫܵܐ ܫܸܟ ܒܘܼܬ ܓܵܒܵܝܬܵܐ ܕܗ̇ܘ ܐܸܠܘܼܟ̣.