ܐܕܪ 30
ܥܡ ܥܘܠ̈ܐ ܦܝܫ ܠܗ ܡܢܝܐ (ܐܫܥܝܐ ܢܓ: 12)
ܡܫܝܼܚܵܐ ܩܵܡܘܿܕܝܼ ܗ݉ܘܹܐ ܠܹܗ ܪܵܙܝܼ ܠܸܦܝܵܫܵܐ ܡܸܢܝܵܐ ܥܲܡ ܚܲܛܵܝܹ̈ܐ؟ ܐܵܗܵܐ ܡܲܟܲܦܬܵܐ ܕܓܵܢܵܐ ܡܵܪܹܐ ܥܵܓ̰ܸܒܘܼܬܵܐ ܦܝܵܫܵܐ ܝܠܵܗ̇ ܡܘܼܟܫܸܛܬܵܐ ܒܪܵܒܵܐ ܗܲܓ̰ܲܬܹ̈ܐ ܚܲܝܠܵܢܹ̈ܐ. ܒܟ̰ܫܢܝ ܕܚܛܝ̈ܐ ܒܘܫ ܒܬ ܦܐܫ ܗ݉ܘܐ ܡܘܡܨܝܐ ܠܗܘܝܐ ܘܟܝܠ ܕܚܛܝ̈ܐ. ܐܝܼܡܵܐ ܕܚܲܛܵܝܵܐ ܦܵܐܸܫ ܡܘܼܬ݉ܝܵܐ ܠܕܝܼܘܵܢ: ܡܫܝܼܚܵܐ ܒܓܵܢܘܼܗܝ ܬܵܡܵܐ ܝܠܹܗ: ܟܸܠܝܵܐ ܠܝܵܗܒ̣ܵܐ ܓ̰ܘܼܘܵܒ ܩܵܐ ܕܲܪܗܲܩ ܕܦܝܼܫܬܵܐ ܝܠܵܗ̇ ܡܚܝܼܬܵܐ ܥܲܠܘܼܗܝ. ܬܵܡܵܐ ܡܲܚܙܘܼܝܹܐ ܝܠܹܗ ܐܝܼܕܵܬܘܼ̈ܗܝ: ܐܲܩܠܵܬܘܼ̈ܗܝ: ܘܕܸܦܢܘܼܗܝ: ܘܒܲܩܘܿܪܹܐ ܝܠܹܗ ܡ̣ܢ ܗܲܩܘܼܬܵܐ ܐܸܢ ܐܝܼܬ ܠܵܗ̇ ܡܸܢܕܝܼ ܦܝܼܫܵܐ ܥܲܠ ܕܐܵܢܝܼ ܕܘܲܟܝܼܠܵܝ ܗ݉ܘܝܼܵܐ ܝܠܹܗ. ܒܹܥܒ̣ܵܕܵܐ ܝܠܹܗ ܢܵܘܸܢܓ̰ܝܼܘܼܬܵܐ ܒܓ̣ܵܠܸܒܘܼܬܵܐ ܗܲܕܟ̣ܵܐ ܕܕܲܝܵܢܵܐ ܡܲܩܘܘܼܚܹܐ ܝܠܹܗ: ܫܒ̣ܘܩܘܢ ܠܐܢܐ ܕܐܙܠ݉ܝ: ܦܪܩܘܢ ܠܗ݉ܘܢ ܡܢ ܠܨܠܝܐ ܠܓܘܒܐ: ܣܒܒ ܕܡܘܫ݉ܟ̰ܚܐ ܝܠܗ ܚܘܣܝܐ ܩܬܝ. ܡܵܪܲܢ ܦܝܼܫ ܠܹܗ ܡܸܢܝܵܐ ܥܲܡ ܥܵܘܵܠܹ̈ܐ ܙܹܐ: ܩܐ ܕܠܒܝ ܦܐܫ ܗ݉ܘܐ ܓܪܝܫܐ ܠܟܣܠܘܗܝ. ܡܵܢܝܼ ܒܸܬ ܙܵܕܸܥ ܡ̣ܢ ܗ̇ܘ ܕܦܝܼܫܵܐ ܝܠܹܗ ܚܘܼܫܒܸܢܵܐ ܗܲܪ ܓܵܘ ܣܸܕܪܵܐ ܕܝܼܲܢ؟ ܠܵܚܘܿܡܬܵܐ ܝܠܵܗ̇ ܕܐܵܬܲܚ ܠܟܸܣܠܘܼܗܝ ܒܒܸܣܬܵܝܘܼܬܵܐ ܘܡܵܘܕܲܚ ܓܢܵܗ̈ܲܢ. ܗ̇ܘ ܕܦܝܼܫܵܐ ܝܠܹܗ ܡܸܢܝܵܐ ܥܲܡܲܢ ܠܹܐ ܥܵܒ̣ܸܕ ܠܲܢ ܓܘܼܢܵܗܟܵܪ: ܐܵܚܸܪ ܦܝܼܫ ܠܹܗ ܚܘܼܫܒܸܢܵܐ ܥܲܡ ܚܲܛܵܝܹ̈ܐ ܩܵܐ ܕܐܲܚܢܲܢ ܦܝܫܚ ܗ݉ܘܐ ܚܘܫܒܢܐ ܓܘ ܣܕܪܐ ܕܩܕܝܫ̈ܐ. ܗ̇ܘ ܩܲܕܝܼܫܵܐ ܝܗ݉ܘܵܐ: ܟܬܝܼܒ̣ܵܐ ܓܵܘ ܣܸܕܪܵܐ ܕܩܲܕܝܼܫܹ̈ܐ: ܐܲܚܢܲܢ ܥܵܘܵܠܹ̈ܐ ܝܘܲܚ ܝܗ݉ܘܵܘ: ܡܸܢܝܹܐ ܥܲܡ ܥܵܘܵܠܹ̈ܐ. ܗ̇ܘ ܒܸܫܩܵܠܘܼܗܝ ܝܠܹܗ ܫܸܡܘܼܗܝ ܡ̣ܢ ܗ̇ܘ ܣܸܕܪܵܐ ܕܚܵܠܝܼܨܹ̈ܐ ܘܒܸܟܬܵܒ̣ܘܼܗܝ ܓܵܘ ܦܸܬܘܵܐ ܕܓܘܼܢܵܗܟܵܖܹ̈ܐ: ܗ̇ܝܓܵܗ ܫܸܡܵܢܲـ̈ܢ ܒܸܫܩܵܠܵܐ ܝܠܹܗ ܡ̣ܢ ܐܵܗܵܐ ܣܸܕܪܵܐ ܕܩܲܙܲܒ ܘܒܸܟܬܵܒ̣ܵܝ ܓܵܘ ܟܸܪܟ̣ܵܐ ܕܩܘܼܒܠܹ̈ܐ: ܗܲܕܟ̣ܵܐ ܒܹܥܒ̣ܵܕܵܐ ܚܕܵܐ ܫܲܚܠܵܦܬܵܐ ܬܲܡܵܡ ܕܕܘܼܟܬܵܐ ܕܡܫܝܼܚܵܐ ܘܕܛܵܝܸܦܘܼܗܝ. ܟܠܵܗ̇ ܝܵܪܬܘܼܬܲܢ ܕܫܲܩܝܼܘܼܬܵܐ ܘܕܚܛܝܼܬܵܐ ܡܫܝܼܚܵܐ ܩܲܒܘܼܠܘܼܗܝ ܝܠܹܗ ܩܵܐ ܓܵܢܘܼܗܝ: ܘܟܠ ܡܸܢܕܝܼ ܕܡܫܝܼܚܵܐ ܐܝܼܬ ܠܹܗ ܒܸܡܛܵܝܵܐ ܝܠܹܗ ܩܵܬܲܢ. ܙܲܕܝܼܩܘܼܬܘܼܗܝ ܘܕܸܡܘܼܗܝ: ܘܟܠ ܕܐܝܼܬ ܠܹܗ ܒܹܥܒ̣ܵܕܵܝ ܝܠܹܗ ܗܘܼܒܵܐ ܩܵܬܲܢ. ܦܨܘܿܚ ܝܵܐ ܗܲܡܸܢܵܢܵܐ: ܒܙܲܘܲܓܬܘܼܟ̣ ܥܲܡ ܗ̇ܘ ܕܦܝܼܫ ܠܹܗ ܡܸܢܝܵܐ ܥܲܡ ܥܵܘܵܠܹ̈ܐ: ܘܡܲܣܒܸܬ ܕܒܣܲܪܲܣܬܘܼܬܵܐ ܩܘܼܒܠܵܐ ܝܘܸܬ ܦܘܼܪܩܵܢܵܐ ܒܗ̇ܝ ܕܦܵܝܫܸܬ ܡܸܢܝܵܐ ܐܲܫܟܵܪܵܐ ܥܲܡ ܐܵܢܝܼ ܕܗ݉ܘܝܹܐ ܝܢܵܐ ܒܸܖ̈ܝܵܬܹܐ ܚܲܕܬܹ̈ܐ ܒܝܼܘܼܗܝ.