ܦܘܫܘܢ ܦܪܝܫܐ ܡܢܝ (ܒ. ܩܘܖ̈ܢܬܝܐ ܘ: 17)

ܟܪܸܣܛܝܵܢܵܐ ܟܲܕ ܓܵܘ ܥܵܠܡܵܐ ܒܹܚܵܝܵܐ ܝܠܹܗ: ܘܵܓ̰ܸܒ ܝܼܠܵܗ̇ ܕܠܵܐ ܗܵܘܹܐ ܡ̣ܢ ܥܵܠܡܵܐ. ܘܵܓ̰ܸܒ ܝܼܠܵܗ̇ ܕܗܵܘܹܐ ܦܪܝܼܫܵܐ ܡܸܢܘܼܗܝ. ܩܵܬܘܼܗܝ ܘܵܓ̰ܸܒ ܝܼܠܵܗ̇ ܠܹܚܵܝܵܐ ܡܫܝܼܚܵܐ. ܐܸܢ ܐܵܟ̣ܸܠ ܘܐܸܢ ܫܵܬܹܐ: ܘܟܠ ܡܸܢܕܝܼ ܕܥܵܒ̣ܸܕ: ܘܵܓ̰ܸܒ ܝܼܠܵܗ̇ ܕܥܵܒ̣ܸܕ ܠܹܗ ܠܚܸܩܪܵܐ ܕܐܲܠܵܗܵܐ. ܐܸܢ ܒܵܥܹܝܬ: ܓ̰ܲܡܸܥ ܕܵܘܸܠܬܵܐ: ܐܝܼܢܵܐ ܡܲܬܸܒ̣ ܠܵܗ̇ ܒܫܡܲܝܵܐ: ܐܲܝܟܵܐ ܕܠܵܐ ܓ̰ܲܢܓ ܘܠܵܐ ܐܸܟ̣ܠܵܐ ܡܲܚܪܸܒ̣ܝܼ: ܘܐܲܝܟܵܐ ܕܓܹܢܵܒ̣ܹ̈ܐ ܠܹܐ ܓܵܢܒ̣ܝܼ ܘܠܹܐ ܒܲܙܥܝܼ. ܐܸܢ ܒܵܥܹܝܬ: ܗ݉ܘܝܼ ܕܵܘܠܲܬܡܲܢܕ: ܐܝܼܢܵܐ ܫܲܗܘܲܬܬܘܼܟ̣ ܪܹܫܵܝܬܵܐ ܗܵܘܝܵܐ ܠܹܗܘܵܝܵܐ ܕܵܘܠܲܬܡܲܢܕ ܒܗܲܝܡܵܢܘܼܬܵܐ ܘܒܦܘܼܠܚܵܢܹ̈ܐ ܛܵܒ̣ܹ̈ܐ. ܩܢܝܼ ܚܵܕܘܼܬܵܐ ܘܒܲܣܝܼܡܘܼܬܵܐ: ܐܝܼܢܵܐ ܒܚܵܕܘܼܬܘܼܟ̣ ܗܵܘܹܝܬ ܒܸܙܡܵܪܵܐ ܡܲܙܡܘܿܖܹ̈ܐ ܘܗܵܘܵܙܹ̈ܐ ܚܸܠܝܹ̈ܐ ܠܡܵܪܝܵܐ. ܠܵܐ ܐܲܚܟ̰ܝܼ ܒܢܝܼܲܬ ܪܹܫܵܝܬܵܐ ܕܚܵܝܘܼ̈ܟ̣: ܐܸܠܵܐ ܐܘܼܦ ܒܪܘܼܚܘܼܟ̣ ܘܵܓ̰ܸܒ ܝܼܠܵܗ̇ ܕܗܵܘܹܝܬ ܦܪܝܼܫܵܐ ܡ̣ܢ ܥܵܠܡܵܐ. ܒܟܘܼܦܘܼܬܵܐ ܒܸܣܦܵܪܵܐ ܠܐܲܠܵܗܵܐ: ܕܵܝܸܡ ܪܥܝܼܫܵܐ ܠܗܸܙܘܼܪܘܼܗܝ: ܒܸܚܕܵܝܵܐ ܒܫܲܪܝܼܟܘܼܬܘܼܟ̣ ܥܲܡܘܼܗܝ: ܘܒܸܒܥܵܝܵܐ ܠܝܼܕܵܥܵܐ ܪܸܙܵܝܘܼܗܝ: ܒܸܬ ܡܲܚܙܹܝܬ ܣܵܒܸܬܘܼܬܵܐ ܕܡ̣ܢ ܓܸܢܣܵܐ ܫܡܲܝܵܢܵܝܵܐ ܝܘܸܬ. ܐܘܼܦ ܒܦܘܼܠܚܵܢܘܼ̈ܟ̣ ܘܵܓ̰ܸܒ ܝܼܠܵܗ̇ ܕܗܵܘܹܝܬ ܦܪܝܼܫܵܐ ܡ̣ܢ ܥܵܠܡܵܐ. ܐܸܢ ܚܲܕ݉ ܫܘܼܠܵܐ ܗܲܩ ܝܼܠܹܗ: ܐܘܼܦ ܐܸܢ ܡܵܪܹܐ ܙܵܪܵܪ ܝܼܠܹܗ ܩܵܬܘܼܟ̣: ܓܵܪܵܓ ܥܵܒ̣ܕܸܬ ܠܹܗ: ܘܐܸܢ ܢܵܐܗܲܩ ܝܼܠܹܗ: ܐܵܦܸܢ ܕܥܵܒ̣ܕܸܬ ܗ݉ܘܵܐ ܩܵܙܲܢܓ̰ ܒܥܒ̣ܵܕܬܘܼܗܝ: ܘܵܓ̰ܸܒ ܝܼܠܵܗ̇ ܕܓܲܢܓܸܨܸܬ ܡܸܢܘܼܗܝ ܒܘܼܬ ܚܵܛܸܪ ܕܐܵܓ̣ܵܝܼܘܼܟ̣. ܠܵܐ ܗܵܘܝܵܐ ܠܘܼܟ̣ ܫܲܪܝܼܟܘܼܬܵܐ ܒܦܘܼܠܚܵܢܹ̈ܐ ܚܲܖ̈ܫܹܐ ܕܚܘܼܒ̣ܝܵܐ: ܐܸܠܵܐ ܗܵܘܹܝܬ ܟܸܠܝܵܐ ܠܕܲܪܩܘܼܒ̣ܠܵܝ. ܚܕܘܿܪ ܒܚܫܝܼܚܘܼܬܵܐ ܠܩܪܵܝܬܘܼܟ̣ ܪܵܡܬܵܐ ܘܠܡܝܘܼܩܪܘܼܬܘܼܟ̣. ܕܟ̣ܘܿܪ: ܟܪܸܣܛܝܵܢܵܐ: ܕܐܲܢ݉ܬ ܝܼܘܸܬ ܒܪܘܿܢܵܐ ܕܡܲܠܟܵܐ ܕܡܲܠܟܹ̈ܐ: ܒܘܼܬ ܐܵܗܵܐ: ܗ݉ܘܝܼ ܪܲܕ ܡ̣ܢ ܠܲܟܹ̈ܐ ܕܥܵܠܡܵܐ. ܠܵܐ ܫܲܚܬܸܢܸܬ ܠܨܸܒܥܵܬܘܼ̈ܟ̣ ܕܒܵܬ݉ܪ ܚܲܕ݉ܟ̰ܵܐ ܒܸܬ ܡܵܚܝܼ ܒܩܝܼܬܵܪܵܐ ܕܕܲܗܒ̣ܵܐ. ܥܲܝܢܘܼ̈ܟ̣ ܠܵܐ ܫܵܒ̣ܩܸܬ ܕܗܵܘܝܼ ܟܵܘܵܬܹ̈ܐ ܕܫܲܗܘܲܬܬܵܐ: ܣܵܒܵܒ ܕܗܕܝܼܪܹܐ ܝܢܵܐ ܠܸܚܝܵܪܵܐ ܠܡܲܠܟܵܐ ܕܐܝܼܩܵܪܵܐ. ܐܲܩܠܵܬܘܼ̈ܟ̣ ܠܵܐ ܦܵܝܫܝܼ ܟ̰ܘܼܪܟ̰ܝܹܐ ܒܛܝܼܢܵܐ ܕܕܘܼܢܝܹܐ: ܣܵܒܵܒ ܒܝܼܵܝ ܒܸܬ ܚܵܕܪܸܬ ܓܵܘ ܥܵܠܘܿܠܵܢܹ̈ܐ ܕܕܲܗܒ̣ܵܐ. ܠܵܐ ܫܵܒ̣ܩܸܬ ܕܠܸܒܘܼܟ̣ ܡܵܠܹܐ ܒܫܘܼܒ̣ܗܵܪܵܐ ܘܒܡܲܪܝܼܪܘܼܬܵܐ: ܣܵܒܵܒ ܕܒܵܬ݉ܪ ܚܲܕ݉ܟ̰ܵܐ ܠܵܙܸܡ ܝܼܠܵܗ̇ ܕܡܵܠܹܐ ܡ̣ܢ ܫܡܲܝܵܐ ܘܕܗܵܘܹܐ ܒܸܫܦܵܟ̣ܵܐ ܒܦܨܵܚܵܐ ܕܠܹܐ ܐܵܬܹܐ ܠܡܲܕܘܼܥܹܐ.