ܐܠܗܐ ܩܝܪܬܟܫ ܝܠܗ (ܢܚܘܡ ܐ: 2)

ܐܲܠܵܗܵܐ ܪܵܒܵܐ ܩܲܝܪܲܬܟܲܫ ܝܼܠܹܗ ܒܘܼܬ ܚܘܼܒܘܼܟ̣: ܝܵܐ ܗܲܡܸܢܵܢܵܐ. ܐܸܢ ܐܸܠܘܼܟ̣ ܓܘܼܒܝܵܐ ܝܠܹܗ: ܗ̇ܘ ܠܹܐ ܗܵܘܹܐ ܪܵܙܝܼ ܕܐܲܢ݉ܬ ܬܲܒܥܸܬ ܠܚܲܕ݉ ܐ݉ܚܹܪ݉ܢܵܐ. ܐܸܢ ܩܵܡ ܙܵܒ̣ܸܢܘܼܟ̣ ܒܕܸܡܵܐ ܕܓܵܢܘܼܗܝ: ܠܹܐ ܩܲܒܸܠ ܕܚܵܫܒ̣ܸܬ ܐܲܢ݉ܬ ܡܵܪܵܐ ܝܘܸܬ ܥܲܠ ܓܵܢܘܼܟ̣: ܝܲܢ ܕܥܵܠܡܵܐ ܡܵܪܵܐ ܝܠܹܗ ܥܲܠܘܼܟ̣. ܩܵܡ ܡܲܚܸܒܠܘܼܟ̣ ܒܚܲܕ݉ ܗܲܕܟ̣ܵܐ ܚܘܼܒܵܐ ܕܠܵܐ ܡܨܹܐ ܠܹܗ ܠܸܟܠܵܝܵܐ ܓܵܘ ܫܡܲܝܵܐ ܒܹܐ ܕܝܼܘܼܟ̣: ܒܘܼܫ ܪܵܙܝܼ ܗ݉ܘܹܐ ܠܹܗ ܠܸܡܝܵܬܵܐ ܡ̣ܢ ܕܐܲܢ݉ܬ ܬܵܠܩܸܬ ܗ݉ܘܵܐ: ܒܘܼܬ ܐܵܗܵܐ: ܗ̇ܘ ܠܹܐ ܩܲܒܸܠ ܕܗܸܟ̃ ܡܸܢܕܝܼ ܟܵܠܹܐ ܒܐܵܪܵܠܸܓ̣ ܕܚܘܼܒܵܐ ܕܠܸܒܘܼܟ̣ ܘܕܗ̇ܘ. ܪܵܒܵܐ ܩܲܝܪܲܬܟܲܫ ܝܼܠܹܗ ܙܹܐ ܒܘܼܬ ܣܒܵܪܬܘܼܟ̣. ܠܹܐ ܝܠܹܗ ܪܵܙܝܼ ܕܣܵܒܪܸܬ ܒܕܪܲܥܢܵܐ ܕܒܸܣܪܵܐ. ܠܹܐ ܝܠܹܗ ܪܵܙܝܼ ܕܫܵܬܹܝܬ ܡ̣ܢ ܬܲܠܡܹ̈ܐ ܬܒ̣ܝܼܖܹ̈ܐ ܟܲܕ ܡ̈ܝܼܵܐ ܕܡܲܒܘܼܥܵܐ ܫܵܦܟ̣ܵܢܵܐ ܚܘܼܪܵܝܝܼ ܦܝܵܫܵܐ ܝܢܵܐ ܝܘܼܗܒ̣ܹܐ ܩܵܬܘܼܟ̣ ܒܕܵܝܸܡܘܼܬܵܐ. ܐܝܼܡܵܐ ܕܥܲܠܘܼܗܝ ܣܵܢܕܲܚ: ܟܹܐ ܚܵܕܹܐ. ܐܝܼܢܵܐ ܟܲܕ ܣܵܢܕܲܚ ܠܚܲܕ݉ ܐ݉ܚܹܪ݉ܢܵܐ: ܥܲܠ ܥܵܩܸܠܕܵܪܘܼܬܵܐ ܕܓܵܢܲܢ: ܝܲܢ ܕܕܵܘܣܬ̈ܲܢ ــ ܙܵܘܕܵܐ ܡ̣ܢ ܟܠ: ܐܝܼܡܵܐ ܕܣܵܢܕܲܚ ܥܲܠ ܦܘܼܠܚܵܢܹ̈ܐ ܕܓܵܢܲܢ: ܗ̇ܘ ܟܹܐ ܟܵܪܸܒ: ܘܒܸܬ ܬܲܥܠܸܡ ܠܲܢ ܩܵܐ ܕܡܲܕܸܪܲܢ ܠܟܸܣ ܓܵܢܘܼܗܝ. ܐܘܼܦ ܪܵܒܵܐ ܩܲܝܪܲܬܟܲܫ ܝܼܠܹܗ ܒܘܼܬ ܫܵܘܬܵܦܘܼܬܲܢ. ܘܵܓ̰ܸܒ ܝܼܠܵܗ̇ ܨܵܘܗܒܲܬܲܢ ܥܲܡ ܡܫܝܼܚܵܐ ܗܵܘܝܵܐ ܙܵܘܕܵܐ ܡ̣ܢ ܕܥܲܡ ܟܠ ܐ݉ܢܵܫܵܐ ܐ݉ܚܹܪ݉ܢܵܐ. ܠܹܥܡܵܪܵܐ ܒܝܼܘܼܗܝ ܒܢܲܦ̮ܫܘܼܗܝ ܝܼܠܵܗ̇ ܚܘܼܒܵܐ ܫܲܪܝܼܪܵܐ. ܠܸܚܒ̣ܵܛܵܐ ܒܫܵܘܬܵܦܘܼܬܵܐ ܕܥܵܠܡܵܐ: ܠܡܲܫܟ̰ܘܿܚܹܐ ܚܵܕܘܼܬܲܢ ܪܹܫܵܝܬܵܐ ܒܒܘܼܣܵܡܹ̈ܐ ܦܲܓ̣ܖ̈ܵܢܵܝܹܐ: ܐܘܼܦ ܡܲܚܲܒܬܵܐ ܕܫܵܘܬܵܦܘܼܬܵܐ ܕܚܲܒ̣ܖ̈ܵܘܵܬܲܢ ܟܖܸ̈ܣܛܝܵܢܹܐ ܒܘܼܫ ܙܵܘܕܵܐ ܡ̣ܢ ܠܨܵܘܗܒܲܬܲܢ ܥܲܡܘܼܗܝ ܕܒܛܸܫܘܵܐ: ܐܲܢܹܐ ܡܲܦܫܸܡܵܢܹ̈ܐ ܝܢܵܐ ܩܵܐ ܐܲܠܵܗܲܢ ܩܲܝܪܲܬܟܲܫ. ܗ̇ܘ ܡܘܼܫܬܵܪܝܼ ܝܠܹܗ ܕܐܲܚܢܲܢ ܥܵܡܪܲܚ ܒܝܼܘܼܗܝ ܘܕܗܵܘܲܚ ܒܸܚܕܵܝܵܐ ܒܫܵܘܬܵܦܘܼܬܲܢ ܥܲܡܘܼܗܝ. ܪܵܒܵܐ ܡ̣ܢ ܓ̰ܘܼܖ̈ܵܒܹܐ ܕܟܹܐ ܫܲܕܸܪ ܩܵܬܲܢ ܢܝܼܲܬܘܼܗܝ ܝܠܵܗ̇ ܕܒܝܼܵܝ ܓܵܪܸܫ ܠܗ݉ܘܿܢ ܠܸܒܵܘܵܬ̈ܲܢ ܒܘܼܫ ܪܸܚܩܵܐ ܡ̣ܢ ܒܸܖ̈ܝܵܬܹܐ ܘܡܲܩܘܹܐ ܠܗ݉ܘܿܢ ܥܲܠ ܓܵܢܘܼܗܝ. ܐܸܢ ܐܲܠܵܗܵܐ ܩܲܝܪܲܬܟܲܫ ܝܼܠܹܗ ܒܘܼܬ ܚܘܼܒܵܐ ܕܝܲܢ: ܡܸܓ̰ܸܕ ܚܘܼܒܵܐ ܕܗ̇ܘ ܓܘܼܪܵܐ ܝܠܹܗ ܠܟܸܣܠܲܢ. ܬܲܟܠܵܐ ܕܒܐܵܗܵܐ ܝܵܘܡܵܐ ܩܲܒܠܲܚ ܫܵܦܵܩܲܬ ܠܸܢܛܵܪܵܝ ܠܸܒܵܘܵܬ̈ܲܢ ܒܕܸܟ̣ܝܘܼܬܵܐ ܩܲܕܝܼܫܬܵܐ ܩܵܐ ܡܘܼܚܸܒܲܢ ܒܢܲܦ̮ܫܘܼܗܝ: ܘܒܩܲܝܪܲܬ ܩܲܕܝܼܫܬܵܐ ܥܵܟ̰ܡܲܚ ܥܲܝܢ̈ܲܢ ܡ̣ܢ ܟܠܵܝ ܫܵܕܲܠܝܵܬܹ̈ܐ ܕܕܘܼܢܝܹܐ!