ܐܝܠܘܠ 15

ܡܢ ܒܗܣ ܕܒܝܫܬܐ ܠܐ ܙܕܥ (ܡܙܡܘܪܐ ܩܝܒ: 7)

ܟܪܸܣܛܝܵܢܵܐ: ܘܵܓ̰ܸܒ ܝܼܠܵܗ̇ ܕܠܵܐ ܙܵܕܥܸܬ ܡ̣ܢ ܚܲܒܖܹ̈ܐ ܡܲܙܕܸܥܵܢܹ̈ܐ ܝܲܢ ܡܲܦܫܸܡܵܢܹ̈ܐ: ܣܵܒܵܒ ܐܸܢ ܦܵܝܫܸܬ ܡܘܼܠܝܸܨܵܐ ܒܗܲܕܟ̣ܵܐ ܚܲܒܖܹ̈ܐ: ܒܡܘܼܕܝܼ ܙܵܘܕܵܐ ܝܘܸܬ ܡ̣ܢ ܐ݉ܚܹܖ̈݉ܢܹܐ؟ ܐ݉ܚܹܖ̈݉ܢܹܐ ܠܲܝܬ ܠܗ݉ܘܿܢ ܚܲܕ݉ ܐܲܠܵܗܵܐ ܕܥܵܪܩܝܼ ܠܟܸܣܠܘܼܗܝ: ܐܵܢܝܼ ܗܸܟ̃ ܠܹܐ ܝܢܵܐ ܩܘܼܒܠܹܐ ܣܵܒܸܬܘܼܬܵܐ ܕܡܗܘܼܡܢܘܼܬܘܼܗܝ ܐܲܝܟ̣ ܕܐܲܢ݉ܬ ܩܘܼܒܠܵܐ ܝܘܸܬ: ܘܠܹܐ ܝܠܵܗ̇ ܥܵܓ̰ܸܒܘܼܬܵܐ ܐܸܢ ܐܵܢܝܼ ܦܵܝܫܝܼ ܡܘܼܟܸܦܹܐ ܒܨܵܘ ܘܡܘܼܒܪܸܙܹܐ ܡ̣ܢ ܙܕܘܼܥܬܵܐ. ܐܲܢ݉ܬ ܦܝܼܫܵܐ ܝܘܸܬ ܗܘܼܨܠܵܐ ܡ̣ܢ ܕܪܹܫ ܠܗܹܒ̣ܝܼ ܚܵܝܬܵܐ: ܘܠܸܒܘܼܟ̣ ܟܹܐ ܚܲܝܹܐ ܒܫܡܲܝܵܐ: ܘܠܵܐ ܒܡܸܢܕܝܼܵܢܹ̈ܐ ܐܲܖ̈ܥܵܢܵܝܹܐ. ܐܝܼܬܵܐ ܐܸܢ ܐܲܢ݉ܬ ܙܵܕܥܸܬ ܐܲܝܟ̣ ܐ݉ܢܵܫܹ̈ܐ ܐ݉ܚܹܖ̈݉ܢܹܐ: ܡܘܼܕܝܼ ܝܠܹܗ ܦܵܝܕܵܐ ܕܗ̇ܝ ܫܵܦܵܩܲܬ ܕܩܘܼܒܠܵܐ ܝܘܸܬ؟

ܡܸܢ݉ܕܪܸܫ݉: ܐܸܢ ܐܲܢ݉ܬ ܦܵܝܫܸܬ ܡܸܠܝܵܐ ܡ̣ܢ ܙܕܘܼܥܬܵܐ: ܐܲܠܒܲܬ ܒܸܬ ܢܵܦܠܸܬ ܩܲܕ݉ܡ ܐܵܢܝܼ ܓ̰ܘܼܖ̈ܵܒܹܐ ܚܲܝܠܵܢܹ̈ܐ ܕܐ݉ܚܹܖ̈݉ܢܹܐ ܟܹܐ ܢܵܦܠܝܼ ܒܝܼܵܝ. ܐܝܼܡܵܐ ܕܥܵܘܵܠܹ̈ܐ ܫܵܡܥܝܼ ܚܲܒܖܹ̈ܐ ܕܣܪܝܼܬܵܐ: ܟܹܐ ܛܲܪܛܸܡܝܼ ܘܚܵܫܒ̣ܝܼ ܕܐܲܠܵܗܵܐ ܒܸܙܠܵܡܵܐ ܝܠܹܗ ܐܸܠܵܝ. ܐܘܼܦ ܐܲܢ݉ܬ ܒܸܬ ܢܵܦܠܸܬ ܒܗ̇ܝ ܚܛܝܼܬܵܐ؟ ܐܘܼܦ ܐܲܢ݉ܬ ܐܲܝܟ̣ ܐܵܢܝܼ ܒܸܬ ܡܵܟܪܸܒܸܬ ܠܐܲܠܵܗܘܼܟ̣؟

ܡܸܢ݉ܕܪܸܫ݉: ܠܵܐ ܝܲܕܥܵܢܹ̈ܐ ܠܐܲܠܵܗܵܐ ܟܹܐ ܡܲܠܝܸܙܝܼ ܠܡܲܦܠܘܼܚܹܐ ܣܵܒܵܒܹ̈ܐ ܕܒܝܼܫܬܵܐ ܩܵܐ ܕܦܲܪܬܸܟܝܼ ܡ̣ܢ ܟ̰ܵܬܘܿܢܘܼܝܵܬܹ̈ܐ. ܒܲܣ ܐܘܼܦ ܐܲܢ݉ܬ ܗܵܕܵܐ ܒܸܬ ܥܵܒ̣ܕܸܬ ܐܝܼܡܵܐ ܕܦܵܝܫܸܬ ܚܠܝܼܨܵܐ ܒܟ̰ܵܬܘܿܢܘܼܬܵܐ؟ ܣܒܘܿܪ ܒܡܵܪܝܵܐ ܘܣܦܘܿܪ ܐܸܠܹܗ ܒܚܡܵܠܬܵܐ. ܡ̣ܢ ܟܠܵܝ ܒܘܼܫ ܨܦܵܝܝܼ ܝܠܵܗ̇ ܕܥܵܒ̣ܕܸܬ ܕܵܐܟ̣ܝܼ ܕܡܘܼܫܹܐ ܥܒ̣ܝܼܕ ܠܹܗ ܒܝܵܡܵܐ ܕܣܘܿܦ ــ ܟܠܹܝܡܘܿܢ ܘܚܙܹܝܡܘܿܢ ܦܘܼܪܩܵܢܵܐ ܕܡܵܪܝܵܐ. ܣܵܒܵܒ ܐܸܢ ܦܵܝܫܸܬ ܓ̣ܠܝܼܒܵܐ ܡ̣ܢ ܙܕܘܼܥܬܵܐ ܟܲܕ ܫܵܡܥܸܬ ܒܵܗܣ ܒܝܼܫܬܵܐ: ܠܹܐ ܡܵܨܹܝܬ ܠܸܟܠܵܝܵܐ ܩܲܕ݉ܡ ܓ̰ܘܼܖ̈ܵܒܹܐ ܒܗ̇ܝ ܚܵܛܸܪܓ̰ܲܡܥܘܼܬܵܐ ܩܘܝܼܬܵܐ ܕܟܹܐ ܚܵܠܨܵܐ ܠܹܗ ܐ݉ܢܵܫܵܐ ܩܵܐ ܘܵܓ̰ܸܒܘܼܝܵܬܘܼ̈ܗܝ ܘܕܟܹܐ ܣܵܢܕܵܐ ܠܹܗ ܒܥܕܵܢܵܐ ܕܥܹܩܘܼܝ. ܕܵܐܟ̣ܝܼ ܒܸܬ ܡܵܨܹܝܬ ܚܵܩܪܸܬ ܠܡܵܪܝܵܐ ܐܸܢ ܗܵܘܹܝܬ ܙܵܕܘܿܥܵܐ؟ ܩܲܕܝܼܫܹ̈ܐ ܪܵܒܵܐ ܓܵܗܹ̈ܐ ܙܡܝܼܪܹܐ ܝܢܵܐ ܫܘܼܒ̣ܚܹ̈ܐ ܕܡܵܪܝܵܐ ܓܵܘ ܢܘܼܪܵܐ. ܒܲܣ ܐܘܼܦ ܐܲܢ݉ܬ ܫܩܘܿܠ ܓ̰ܘܼܪܐܲܬ ܘܣܢܘܿܕ ܥܲܠ ܡܗܘܼܡܢܘܼܬܵܐ ܕܐܲܠܵܗܵܐ ܕܩܵܘܠܵܐ. ܠܵܐ ܦܵܐܸܫ ܫܓ̣ܝܼܫܵܐ ܠܸܒܵܘܟ̣ܘܿܢ ܘܠܵܐ ܙܵܕܸܥ.