ܕܐܨܠܐ ܐܠܗܝܐ (ܒ. ܦܛܪܘܣ ܐ: 4)

ܠܹܗܘܵܝܵܐ ܫܲܖ̈ܝܼܟܹܐ ܒܐܲܨܠܵܐ ܐܲܠܵܗܵܝܵܐ ܐܲܠܒܲܬ ܠܹܐ ܝܠܵܗ̇ ܠܹܗܘܵܝܵܐ ܐܲܠܵܗܹ̈ܐ: ܐܵܗܵܐ ܒܹܐ ܡܘܼܡܟܸܢ ܝܼܠܵܗ̇. ܒܸܪܝܵܐ ܠܹܐ ܡܵܨܹܐ ܠܸܚܒ̣ܵܛܵܐ ܒܟܝܵܢܵܐ ܕܐܲܠܵܗܵܐ. ܒܹܝܠ ܒܵܪܘܿܝܵܐ ܠܒܸܪܝܵܐ ܗܲܡܵܫܵܐ ܓܵܪܵܓ ܗܵܘܝܵܐ ܚܕܵܐ ܗܵܘܬܵܐ ܒܢܸܣܒܲܬ ܠܟܝܵܢܵܐ: ܐܝܼܢܵܐ ܕܵܐܟ̣ܝܼ ܕܐܵܕܵܡ ܐ݉ܢܵܫܵܐ ܩܲܕ݉ܡܵܝܵܐ ܦܝܼܫ ܠܹܗ ܒܸܪܝܵܐ ܒܨܲܠܡܵܐ ܕܐܲܠܵܗܵܐ: ܗܲܕܟ̣ܵܐ ܐܲܚܢܲܢ ܒܚܘܼܕܵܬܵܐ ܕܪܘܼܚܵܐ ܕܩܘܼܕܫܵܐ: ܒܚܲܕ݉ ܬܵܗܵܪ ܗܵܠܵܐ ܒܘܼܫ ܪܵܡܵܐ ܦܝܵܫܵܐ ܝܘܲܚ ܥܒ̣ܝܼܕܹܐ ܠܕܵܡܵܝܬܵܐ ܕܥܸܠܵܝܵܐ: ܘܒܹܗܘܵܝܵܐ ܝܘܲܚ ܫܲܖ̈ܝܼܟܹܐ ܒܐܲܨܠܵܐ ܐܲܠܵܗܵܝܵܐ. ܐܲܚܢܲܢ ܒܫܵܦܵܩܲܬ ܦܝܼܫܹܐ ܝܘܲܚ ܡܘܼܕܡܝܼܹܐ ܠܐܲܠܵܗܵܐ. ܐܲܠܵܗܵܐ ܚܘܼܒܵܐ ܝܠܹܗ: ܐܘܼܦ ܐܲܚܢܲܢ ܟܹܐ ܗܵܘܲܚ ܚܘܼܒܵܐ ــ ܟܠ ܡ̇ܢ ܕܡܲܚܸܒ ܡ̣ܢ ܐܲܠܵܗܵܐ ܗ݉ܘܝܼܵܐ ܝܠܹܗ. ܐܲܠܵܗܵܐ ܣܲܪܲܣܬܘܼܬܵܐ ܝܠܹܗ: ܐܘܼܦ ܐܲܚܢܲܢ ܟܹܐ ܗܵܘܲܚ ܣܲܪܲܣܬ: ܘܟܹܐ ܡܲܚܸܒܲܚ ܠܡܸܢܕܝܼ ܕܝܼܠܹܗ ܣܲܪܲܣܬ. ܐܲܠܵܗܵܐ ܛܵܒ̣ܵܐ ܝܠܹܗ: ܐܘܼܦ ܐܲܚܢܲܢ ܟܹܐ ܥܵܒ̣ܸܕ ܠܲܢ ܛܵܒ̣ܹ̈ܐ ܒܫܵܦܵܩܲܬܘܼܗܝ: ܗܲܕܟ̣ܵܐ ܕܟܹܐ ܗܵܘܲܚ ܕܸܟ̣ܝܹ̈ܐ ܒܠܸܒܵܐ ܘܒܸܬ ܚܵܙܲܚ ܠܐܲܠܵܗܵܐ. ܡܸܢ݉ܕܪܸܫ݉: ܐܲܚܢܲܢ ܒܹܗܘܵܝܵܐ ܝܘܲܚ ܫܲܖ̈ܝܼܟܹܐ ܒܐܲܨܠܵܐ ܐܲܠܵܗܵܝܵܐ ܒܚܲܕ݉ ܬܵܗܵܪ ܒܘܼܫ ܪܵܡܵܐ ܡ̣ܢ ܐܵܗܵܐ ــ ܒܹܗܘܵܝܵܐ ܝܘܲܚ ܗܲܕܵܡܹ̈ܐ ܕܦܲܪܨܘܿܦܵܐ ܐܲܠܵܗܵܝܵܐ ܕܡܫܝܼܚܵܐ: ܗܹܐ: ܗܲܪ ܗ̇ܘ ܕܸܡܵܐ ܕܒܸܓ̰ܪܵܝܵܐ ܝܠܹܗ ܓܵܘ ܪܹܫܵܐ: ܗܲܪ ܗ̇ܘ ܟܹܐ ܐܵܙܹܠ ܐܘܼܦ ܠܐܝܼܕܵܬܹ̈ܐ: ܘܗܲܪ ܚܲܝܹ̈ܐ ܕܡܫܝܼܚܵܐ ܚܲܝܹ̈ܐ ܕܛܵܝܸܦܘܼܗܝ ܝܢܵܐ ــ ܣܵܒܵܒ ܡܝܼܬ ܠܵܘܟ̣ܘܿܢ: ܘܚܲܝܵܘ̈ܟ̣ܘܿܢ ܛܸܫܝܹܐ ܝܢܵܐ ܥܲܡ ܡܫܝܼܚܵܐ ܒܐܲܠܵܗܵܐ. ܗܵܠܵܐ ܐܲܝܟ̣ ܐܸܢ ܐܵܗܵܐ ܠܹܐ ܝܗ݉ܘܵܐ ܒܲܣܵܐ: ܐܲܚܢܲܢ ܦܝܼܫܹܐ ܝܘܲܚ ܛܠܝܼܒܹܐ ܩܵܐ ܡܫܝܼܚܵܐ ܒܙܲܕܝܼܩܘܼܬܵܐ ܘܒܡܗܘܼܡܢܘܼܬܵܐ: ܘܡ̇ܢ ܕܙܘܼܘܸܓܵܐ ܝܠܹܗ ܥܲܡ ܡܵܪܝܵܐ ܪܘܼܚܘܼܗܝ ܚܲܕ݉ ܝܼܠܵܗ̇ ܥܲܡܘܼܗܝ. ܡܘܼܕܝܼ ܣܸܪ ܥܓ̰ܝܼܒܬܵܐ! ܟܡܵܐ ܕܟܵܦܪܲܚ ܠܐܵܗܵܐ ܣܸܪ: ܪܸܚܩܵܐ ܝܘܲܚ ܡ̣ܢ ܦܲܪܡܵܝܬܘܼܗ̇. ܚܲܕ݉ ܥܲܡ ܝܑܼܫܘܿܥ ــ ܗܲܕܟ̣ܵܐ ܕܨܸܒܥܵܐ ܠܹܐ ܡܵܨܝܵܐ ܕܗܵܘܝܵܐ ܚܲܕ݉ ܥܲܡ ܓܸܦܬܵܐ ܒܘܼܫ ܒܬܲܡܵܡܲܬܘܼܬܵܐ ܡ̣ܢ ܕܐܲܚܢܲܢ ܚܲܕ݉ ܝܼܘܲܚ ܥܲܡ ܡܵܪܲܢ ܘܥܲܡ ܦܵܪܘܿܩܲܢ! ܒܲܣ ܐܲܚܢܲܢ ܕܐܝܼܬ ܠܲܢ ܫܲܪܝܼܟܘܼܬܵܐ ܒܐܲܨܠܵܐ ܐܲܠܵܗܵܝܵܐ: ܚܘܿܫ ܡܲܚܙܲܚ ܚܸܙܡܵܝܘܼܬܲܢ ܪܵܡܬܵܐ ܘܩܲܕܝܼܫܬܵܐ ܒܚܕܵܖ̈ܲܢ ܘܒܨܵܘܗܒܲܬ̈ܲܢ ܕܥܲܡ ܐ݉ܚܹܖ̈݉ܢܹܐ: ܘܡܲܚܙܲܚ ܕܦܝܼܫܵܐ ܝܘܲܚ ܦܘܼܪܩܹܐ ܡ̣ܢ ܚܪܵܒ̣ܵܐ ܕܥܵܠܡܵܐ.