ܡܝܬ݉ܡܘܢ ܠܗ ܠܟܣܠܝ (ܡܪܩܘܣ ܛ: 19)

ܒܩܛܵܥܬܵܐ ܕܗܹܒ̣ܝܼ ܗ̇ܘ ܒܵܒܵܐ ܦܫܝܼܡܵܐ ܕܝܼܪܹܗ ܡ̣ܢ ܠܟܸܣ ܬܲܠܡܝܼܕܹ̈ܐ ܠܹܐܙܵܠܵܐ ܠܟܸܣ ܐܵܓ̣ܵܝܵܝ. ܒܪܘܿܢܘܼܗܝ ܢܦܝܼܠܵܐ ܝܗ݉ܘܵܐ ܒܚܕܵܐ ܐܲܗܘܵܠ ܟ̰ܸܡ ܚܸܪܒܵܐ: ܘܟܠܵܝ ܟ̰ܵܖܹ̈ܐ ܗܵܒܵܣ ܝܼܗ݉ܘܵܘ: ܐܝܼܢܵܐ ܓ̰ܲܠܕܹܐ ܦܝܼܫ ܠܹܗ ܦܘܼܪܩܵܐ ܡ̣ܢ ܪܘܼܚܵܐ ܒܝܼܫܬܵܐ ܐܝܼܡܵܐ ܕܒܵܒܘܼܗܝ ܒܗܲܝܡܵܢܘܼܬܵܐ ܡܘܼܨܝܸܬ ܠܹܗ ܠܚܲܒܪܵܐ ܕܡܫܝܼܚܵܐ: ــ ܡܲܝܬ݉ܡܘܿܢ ܠܹܗ ܠܟܸܣܠܝܼ. ܝܵܠܹ̈ܐ ܚܲܠܥܲܬ ܡܵܪܹܐ ܛܝܼܡܵܐ ܕܐܲܠܵܗܵܐ ܝܢܵܐ: ܐܝܼܢܵܐ ܪܵܒܵܐ ܚܲܡ ܘܢܸܓܵܪܵܢܘܼܬܵܐ ܟܹܐ ܡܲܝܬ݉ܝܼ ܩܵܐ ܐܲܒ̣ܵܗܵܝ̈. ܟܹܐ ܡܵܨܝܵܐ ܕܗܵܘܝܼ ܒܵܥܸܣ ܕܒܪܝܼܟ̣ܘܼܬܵܐ ܓܘܼܪܬܵܐ ܕܐܲܒ̣ܵܗܹ̈ܐ: ܐܘܼܦ ܡܘܼܡܟܸܢ ܝܼܠܵܗ̇ ܕܗܵܘܝܼ ܒܵܥܸܣ ܕܡܲܪܝܼܪܘܼܬܵܐ ܩܵܐ ܟܠܵܝ ܚܲܝܵܝ̈. ܡܘܼܡܟܸܢ ܝܼܠܵܗ̇ ܕܗܵܘܝܼ ܡܸܠܝܹܐ ܡ̣ܢ ܪܘܼܚܵܐ ܕܐܲܠܵܗܵܐ: ܐܘܼܦ ܡܘܼܡܟܸܢ ܝܼܠܵܗ̇ ܕܥܵܡܪܵܐ ܒܝܼܵܝ ܪܘܼܚܵܐ ܕܒܝܼܫܬܵܐ. ܒܟܠܵܝ ܩܸܨܲܬܹ̈ܐ: ܚܲܒܪܵܐ ܕܡܲܪܵܢ ܡܲܚܙܘܼܝܲܢ ܝܼܠܹܗ ܚܲܕ݉ ܟ̰ܵܪܵܐ ܩܵܐ ܒܵܣܲܡܬܵܐ ܕܟܠܵܝ ܡܲܖ̈ܥܵܝ: ــ ܡܲܝܬ݉ܡܘܿܢ ܠܹܗ ܠܟܸܣܠܝܼ. ܬܲܟܠܵܐ ܕܗܵܘܝܵܐ ܗ݉ܘܵܐ ܒܘܼܫ ܙܵܘܕܵܐ ܨܵܠܵܝܬܵܐ ܕܨܠܘܿܬܵܐ ܢܸܓܵܪܵܢ ܒܘܼܬ ܕܝܼܵܝ ܒܥܕܵܢܵܐ ܕܬܹܦܝܼܠܘܼܬܵܝ! ܚܛܝܼܬܵܐ ܫܲܪܘܿܝܹܐ ܝܠܵܗ̇ ܗܵܐ ܡ̣ܢ ܗ̇ܝ ܥܕܵܢܵܐ: ܒܲܣ ܘܵܓ̰ܸܒ ܝܼܠܵܗ̇ ܕܓܵܪܫܲܚ ܗܸܓ̰ܘܼܡ ܥܲܠܘܼܗ̇ ܒܨܠܵܘܵܬ̈ܲܢ. ܒܙܲܒ̣ܢܵܐ ܕܓ̰ܘܵܢܩܘܼܬܵܝ ܒܸܬ ܚܵܙܲܚ ܢܝܼܫܲܢܩܹ̈ܐ ܡܲܦܫܸܡܵܢܹ̈ܐ ܕܗ̇ܝ ܪܘܼܚܵܐ ܟܲܪܹܐ ܘܠܲܥܠܹܐ ܕܠܹܐ ܫܲܡܥܵܐ ܩܵܠܵܐ ܕܐܲܠܵܗܵܐ ܓܵܘ ܓܵܢܵܐ: ܐܝܼܢܵܐ ܡܫܝܼܚܵܐ ܡܸܢ݉ܕܪܸܫ݉ ܦܲܩܘܿܕܹܐ ܝܠܹܗ: ܡܲܝܬ݉ܡܘܿܢ ܠܹܗ ܠܟܸܣܠܝܼ. ܐܝܼܡܵܐ ܕܓܲܪܘܸܣܝܼ ܒܲܠܟܵܐ ܓܲܪܸܠܝܼ ܓܵܘ ܚܛܝܼܬܵܐ ܘܓܵܕܦܝܼ ܥܲܠ ܐܲܠܵܗܵܐ: ܐܘܼܦ ܗ̇ܝܓܵܗ: ܒܠܸܒܵܘܵܬ̈ܲܢ ܬܒ̣ܝܼܖܹ̈ܐ ܘܵܓ̰ܸܒ ܝܼܠܵܗ̇ ܕܕܵܟ̣ܪܲܚ ܠܚܲܒܖܹ̈ܐ ܕܗܲܟܝܼܡ ܓܘܼܪܵܐ: ܡܲܝܬ݉ܡܘܿܢ ܠܹܗ ܠܟܸܣܠܝܼ. ܗܸܟ̃ ܠܵܐ ܫܵܠܲܚ ܡ̣ܢ ܠܨܲܠܘܿܝܹܐ ܟܡܵܐ ܕܐܝܼܬ ܠܗ݉ܘܿܢ ܚܲܝܹ̈ܐ: ܣܵܒܵܒ ܗܲܡܵܫܵܐ ܐܝܼܬ ܗܹܒ̣ܝܼ ܩܵܬܵܝ ܟܡܵܐ ܕܡܫܝܼܚܵܐ ܚܵܝܵܐ ܝܠܹܗ.

ܡܵܪܝܵܐ ܚܲܕ݉ܟܡܵܐ ܓܵܗܹ̈ܐ ܟܹܐ ܫܵܒ̣ܸܩ ܕܖܹ̈ܓܵܘܵܬܘܼܗܝ ܦܵܝܫܝܼ ܥܘܼܓ̰ܸܙܹܐ ܪܵܒܵܐ ܩܵܐ ܕܪܵܥܫܝܼ ܟܡܵܐ ܣܢܝܼܩܹ̈ܐ ܝܢܵܐ ܥܲܠܘܼܗܝ. ܗܵܕܵܐ ܙܹܐ ܐܝܼܡܵܐ ܕܪܵܥܫܲܚ ܠܙܲܒܘܼܢܘܼܬܲܢ ܒܬܲܓܒܲܪܬܵܐ ܕܝܵܠ̈ܲܢ ܚܲܛܵܝܹ̈ܐ: ܟܹܐ ܗܵܘܲܚ ܢܵܐܟ̰ܵܪܵܐ ܠܹܥܪܵܩܵܐ ܠܟܸܣ ܚܲܝܠܬܵܢܵܐ ܠܩܲܒܘܿܠܹܐ ܗܲܝܲܪܬܵܐ: ܐܝܼܬܵܐ ܐܵܗܵܐ ܚܕܵܐ ܒܘܼܪܟܬܵܐ ܓܘܼܪܬܵܐ ܝܼܠܵܗ̇ ܩܵܬܲܢ. ܟܠ ܣܢܝܼܩܘܼܬܵܐ ܕܐܝܼܬ ܠܲܢ ܒܐܵܗܵܐ ܡܵܘܪܹܫܵܐ: ܫܒ̣ܘܿܩ ܡܲܠܝܸܨܵܐ ܠܲܢ ܠܹܐܙܵܠܵܐ ܠܟܸܣ ܐܹܘܩܝܵܢܘܿܣ ܕܚܘܼܒܵܐ ܐܲܠܵܗܵܝܵܐ. ܡܫܝܼܚܵܐ ܒܸܣܦܵܪܵܐ ܝܠܹܗ ܠܥܲܪܙܲܢ: ܒܲܣ ܡܲܠܝܸܙܲܚ ܠܸܡܛܵܝܵܐ ܠܟܸܣܠܘܼܗܝ.