ܐܝܠܘܠ 18
ܐܢ ܚܝܚ ܒܪܘܚܐ: ܒܪܘܚܐ ܐܘܦ ܚܕܪܚ (ܶܓܠܛܝ̈ܐ ܗ: 25)
ܬܪܹܝ ܡܸܢܕܝܼܵܢܹ̈ܐ ܖܹ̈ܫܵܝܹܐ ܒܬܵܘܕܝܼܬܲܢ ܩܲܕܝܼܫܬܵܐ ܐܲܢܹܐ ܝܢܵܐ: ــ ܚܲܝܹ̈ܐ ܕܗܲܝܡܵܢܘܼܬܵܐ: ܘܚܕܵܖܹ̈ܐ ܕܗܲܝܡܵܢܘܼܬܵܐ. ܗ̇ܘ ܕܒܕܘܼܙܘܼܬܵܐ ܦܲܪܡܹܐ ܠܗ݉ܘܿܢ ܐܲܢܹܐ: ܠܹܐ ܝܠܹܗ ܪܸܚܩܵܐ ܡ̣ܢ ܟܵܡܝܼܠܘܼܬܵܐ ܒܬܹܐܘܿܠܘܿܓ̣ܝܼܵܐ: ܣܵܒܵܒ ܐܲܢܹܐ ܝܢܵܐ ܡܸܢܕܝܼܵܢܹ̈ܐ ܠܵܙܸܡ ܩܵܐ ܟܪܸܣܛܝܵܢܵܐ. ܠܹܐ ܡܲܫ݉ܟ̰ܚܸܬ ܗܸܟ̃ ܗܲܝܡܵܢܘܼܬܵܐ ܫܲܪܝܼܪܬܵܐ ܕܥܲܡܘܼܗ̇ ܠܹܐ ܝܠܵܗ̇ ܙܘܼܘܸܓܬܵܐ ܕܸܚܠܲܬ ܐܲܠܵܗܵܐ ܫܲܪܝܼܪܬܵܐ. ܘܒܓܹܒܵܐ ܐ݉ܚܹܪ݉ܢܵܐ: ܒܗܸܟ̃ ܕܘܼܟܵܐ ܠܹܐ ܡܲܫ݉ܟ̰ܚܸܬ ܚܲܝܹ̈ܐ ܫܲܪܝܼܖܹ̈ܐ ܒܕܸܚܠܲܬ ܐܲܠܵܗܵܐ ܕܠܹܐ ܝܢܵܐ ܫܘܼܬܐܸܣܹܐ ܥܲܠ ܚܕܵܐ ܗܲܝܡܵܢܘܼܬܵܐ ܚܵܝܬܵܐ ܒܙܲܕܝܼܩܘܼܬܵܐ ܕܡܫܝܼܚܵܐ. ܘܵܝ ܠܐܵܢܝܼ ܕܟܹܐ ܛܵܥܝܼ ܠܚܕܵܐ ܡ̣ܢ ܐܲܢܹܐ ܕܠܵܐ ܗ̇ܝ ܐ݉ܚܹܪ݉ܬܵܐ! ܐܝܼܬ ܚܲܕ݉ܟܡܵܐ ܕܟܹܐ ܒܲܓ̰ܪܝܼ ܠܗܲܝܡܵܢܘܼܬܵܐ ܐܝܼܢܵܐ ܟܹܐ ܡܲܢܫܝܼ ܠܩܲܕܝܼܫܘܼܬܵܐ. ܐܲܢܹܐ ܟܹܐ ܗܵܘܝܵܐ ܕܗܵܘܝܼ ܪܵܒܵܐ ܖ̈ܵܡܹܐ ܒܝܘܼܠܦܵܢܹ̈ܐ ܕܟܬܵܒ̣ܹ̈ܐ ܩܲܕܝܼܫܹ̈ܐ: ܐܝܼܢܵܐ ܒܸܬ ܗܵܘܝܼ ܛܡܝܼܪܹܐ ܒܓܘܼܢܵܗܟܵܪܘܼܬܵܐ: ܣܵܒܵܒ ܣܲܪܲܣܬܘܼܬܵܐ ܒܸܕܒ̣ܵܩܘܼܗ̇ ܝܢܵܐ ܒܠܵܐ ܙܲܕܝܼܩܘܼܬܵܐ. ܡܸܢ݉ܕܪܸܫ݉: ܐܝܼܬ ܐ݉ܚܹܖ̈݉ܢܹܐ ܕܡܸܚܝܹܐ ܝܢܵܐ ܚܲܝܠܵܐ ܠܸܩܢܵܝܵܐ ܩܲܕܝܼܫܘܼܬܵܐ ܟܲܕ ܫܒ̣ܝܼܩܘܼܗ̇ ܝܢܵܐ ܗܲܝܡܵܢܘܼܬܵܐ: ܗܲܪ ܐܲܝܟ̣ ܦܖ̈ܝܼܫܹܐ ܩܵܕܝܼܡܝܼ: ܐܵܢܝܼ ܕܡܵܪܲܢ ܒܵܗܣܵܝ ܐ݉ܡܝܼܪܹܗ: ܕܩܲܒ̣ܖ̈ܵܘܵܬܹܐ ܡܘܼܚܘܸܖܹ̈ܐ ܝܢܵܐ. ܓܵܪܵܓ ܗܵܘܝܵܐ ܠܲܢ ܗܲܝܡܵܢܘܼܬܵܐ: ܣܵܒܵܒ ܐܵܗܵܐ ܝܠܵܗ̇ ܒܸܢܝܲܬ. ܐܘܼܦ ܠܵܙܸܡ ܝܼܠܵܗ̇ ܕܗܵܘܝܵܐ ܠܲܢ ܩܲܕܝܼܫܘܼܬܵܐ: ܣܵܒܵܒ ܗ̇ܝ ܝܠܵܗ̇ ܒܸܢܝܵܢܵܐ ܕܒܸܢܝܵܐ ܝܠܹܗ ܥܲܠ ܫܲܬܐܸܣܬܵܐ ܕܗܲܝܡܵܢܘܼܬܵܐ. ܡܘܼܕܝܼ ܦܵܝܕܵܐ ܩܵܐ ܚܲܕ݉ ܐ݉ܢܵܫܵܐ ܒܝܵܘܡܵܐ ܕܒܘܼܪܵܢ: ܐܸܢ ܐܝܼܬ ܠܹܗ ܚܲܕ݉ ܒܸܢܵܘܪܵܐ: ܐܝܼܢܵܐ ܠܲܝܬ ܒܲܝܬܵܐ ܥܲܠܘܼܗ̇؟ ܟܹܐ ܡܵܨܹܐ ܕܲܠܕܸܢ ܓܵܢܘܼܗܝ ܓܵܘ ܒܸܢܵܘܪܵܐ؟ ܣܢܝܼܩܵܐ ܝܠܹܗ ܠܚܲܕ݉ ܒܲܝܬܵܐ ܩܵܐ ܕܲܠܕܲܢܬܘܼܗܝ: ܘܐܘܼܦ ܠܚܕܵܐ ܒܸܢܝܲܬ ܩܵܐ ܗ̇ܘ ܒܲܝܬܵܐ. ܗܲܪ ܗܲܕܟ̣ܵܐ ܣܢܝܼܩܹܐ ܝܘܲܚ ܠܒܸܢܝܵܢܵܐ ܕܚܲܝܹ̈ܐ ܖ̈ܘܼܚܵܢܵܝܹܐ ܐܸܢ ܒܵܥܲܚ ܕܗܵܘܝܵܐ ܠܲܢ ܝܲܗܒ̣ܲܠܬܵܐ ܕܠܸܒܵܐ ܒܝܵܘܡܵܐ ܕܫܥܵܫܬܵܐ. ܐܝܼܢܵܐ ܠܵܐ ܓ̰ܲܪܒܸܬ ܠܸܩܢܵܝܵܐ ܚܲܝܹ̈ܐ ܩܲܕܝܼܫܹ̈ܐ ܕܠܵܐ ܗܲܝܡܵܢܘܼܬܵܐ: ܣܵܒܵܒ ܐܵܗܵܐ ܒܸܬ ܗܵܘܝܵܐ ܗ݉ܘܵܐ ܐܲܝܟ̣ ܒܢܵܝܬܵܐ ܕܚܲܕ݉ ܒܲܝܬܵܐ ܠܵܐ ܦܵܝܫܵܢܵܐ ܣܵܒܵܒ ܠܲܝܬ ܠܹܗ ܒܸܢܝܲܬ ܥܲܠ ܩܵܝܵܐ. ܐܝܼܡܵܐ ܕܬܸܪܘܵܝ ܦܵܝܫܝܼ ܩܕܝܼܚܹܐ ܒܥܘܼܕܵܠܹܐ: ܐܲܝܟ̣ ܬܪܹܝ ܓܹܒܵܢܹ̈ܐ ܕܚܲܕ݉ ܩܲܛܪܵܐ: ܗ̇ܝܓܵܗ ܚܲܝ̈ܲܢ ܒܸܬ ܗܵܘܝܼ ܩܘܼܝܹ̈ܐ ܘܦܵܝܫܵܢܹ̈ܐ: ܘܗ̇ܝܓܵܗ ܐܲܢܹܐ ܬܪܹܝ ܡܸܢܕܝܼܵܢܹ̈ܐ ܒܸܬ ܗܵܘܝܼ ܐܲܝܟ̣ ܠܲܡܦܝܼܕܹ̈ܐ ܬܘܼܦܝܹܐ ܒܢܘܼܪܵܐ ܕܡ̣ܢ ܫܡܲܝܵܐ: ܐܲܝܟ̣ ܬܪܹܝ ܐܝܼܠܵܢܹ̈ܐ ܕܙܲܝܬܵܐ ܡܘܼܫܬܝܹ̈ܐ ܒܚܲܡܚܘܵܪܘܼܬܵܐ ܕܫܡܲܝܵܐ. ܝܵܐ ܡܵܪܝܵܐ: ܗܲܒ̣ܠ ܠܲܢ ܐܸܕܝܘܿܡ ܚܲܝܹ̈ܐ ܓܵܘܵܝܹ̈ܐ ܘܒܸܬ ܦܵܝܫܝܼ ܓܸܠܝܹܐ ܒܝܼܲܢ ܒܲܪܵܐܝܼܬ ܩܵܐ ܚܸܩܪܵܐ ܕܫܸܡܘܼܟ̣.