ܐܝܠܘܠ 5
ܫ̃ܪܐ ܐܠܝ ܕܥܡܝܪܝ ܓܘ ܡܫܟ: ܫܪܐ ܠܝ ܠܟܣ ܟ̰ܕܖ̈ܐ ܕܩܕܪ (ܡܙܡܘܪܐ ܩܟ: 5)
ܐܲܝܟ̣ ܚܲܕ݉ ܟܪܸܣܛܝܵܢܵܐ: ܓܵܪܵܓ ܚܲܝܹܝܬ ܓܵܘ ܚܕܵܐ ܕܘܼܢܝܹܐ ܪܚܝܼܩܬܵܐ ܡ̣ܢ ܐܲܠܵܗܵܐ: ܘܠܲܝܬ ܪܵܒܵܐ ܦܵܝܕܵܐ ܡ̣ܢ ܡܲܩܘܲܚܬܵܐ: ܫ̃ܵܪܹܐ ܐܸܠܝܼ. ܡܫܝܼܚܵܐ ܠܵܐ ܨܘܼܠܹܐ ܠܹܗ ܕܐܲܢ݉ܬ ܦܵܝܫܸܬ ܗ݉ܘܵܐ ܫܩܝܼܠܵܐ ܡ̣ܢ ܓܵܘ ܥܵܠܡܵܐ: ܒܘܼܬ ܐܵܗܵܐ ܠܹܐ ܝܠܵܗ̇ ܠܵܙܸܡ ܕܫܲܗܘܸܬܸܬ ܠܗ̇ܘ ܡܸܢܕܝܼ ܕܗ̇ܘ ܠܵܐ ܒܥܹܐ ܠܹܗ. ܪܵܒܵܐ ܒܘܼܫ ܨܦܵܝܝܼ ܝܠܵܗ̇ ܠܩܲܒܘܿܠܹܐ ܟ̰ܵܬܘܿܢܘܼܝܵܬܹ̈ܐ ܒܚܲܝܠܵܐ ܕܡܵܪܝܵܐ: ܘܠܸܚܩܵܪܘܼܗܝ ܒܝܼܵܝ. ܕܸܫ̃ܡܵܢ ܗܲܡܵܫܵܐ ܒܸܢܛܵܪܵܐ ܝܠܹܗ ܕܚܵܙܹܐ ܦܟ̰ܝܼܠܘܼܬܵܐ ܒܚܕܵܪܘܼܟ̣: ܒܘܼܬ ܐܵܗܵܐ: ܗ݉ܘܝܼ ܪܵܒܵܐ ܩܲܕܝܼܫܵܐ. ܕܟ̣ܘܿܪ: ܥܲܝܢܵܐ ܕܟܠܵܝ ܐ݉ܢܵܫܹ̈ܐ ܥܲܠܘܼܟ̣ ܝܼܠܵܗ̇: ܘܕܦܝܼܫܬܵܐ ܝܠܵܗ̇ ܣܦܝܼܪܬܵܐ ܕܐܲܢ݉ܬ ܒܸܬ ܡܲܚܙܹܝܬ ܩܲܕܝܼܫܘܼܬܵܐ ܙܵܘܕܵܐ ܡ̣ܢ ܐ݉ܢܵܫܹ̈ܐ ܐ݉ܚܹܖ̈݉ܢܹܐ. ܡܚܝܼ ܚܲܝܠܵܐ ܕܠܵܐ ܝܲܗܒ̣ܸܬ ܣܵܒܵܒ ܩܵܐ ܠܵܘܡܵܐ ܕܐ݉ܢܵܫܹ̈ܐ. ܫܒ̣ܘܿܩ ܠܵܐ ܡܲܫ݉ܟ̰ܚܝܼ ܒܝܼܘܼܟ̣ ܗܸܟ̃ ܓܢܵܗܵܐ ܡܵܓܲܪ ܨܦܵܝܘܼܬܵܐ ــ ܐܲܝܟ̣ ܕܵܢܝܼܐܹܝܠ: ܐܘܼܦ ܐܲܢ݉ܬ ܗܵܕܵܐ ܥܒ̣ܘܿܕ ܕܒܸܬ ܐܵܡܪܝܼ: ܠܹܐ ܡܵܨܲܚ ܠܡܲܫ݉ܟ̰ܘܿܚܹܐ ܗܲܓ̰ܲܬ ܠܕܲܪܩܘܼܒ̣ܠ ܕܐܵܗܵܐ ܕܵܢܝܼܐܹܝܠ ܡܵܓܲܪ ܕܡܲܫ݉ܟ̰ܚܲܚ ܠܕܲܪܩܘܼܒ̣ܠܘܼܗܝ ܒܘܼܬ ܫܲܪܥܲܬ ܕܐܲܠܵܗܘܼܗܝ. ܓ̰ܲܪܸܒ ܠܹܗܘܵܝܵܐ ܠܵܐ ܐܲܚܟ̰ܝܼ ܕܘܼܙ: ܐܝܼܢܵܐ ܐܘܼܦ ܡܵܪܹܐ ܡܲܨܪܵܦ. ܒܲܠܟܵܐ ܒܸܚܫܵܒ̣ܵܐ ܝܘܸܬ: ܐܸܢ ܐܲܗܘܵܠܝܼ ܗܵܘܝܵܐ ܗ݉ܘܵܐ ܒܲܣܝܼܡܬܵܐ ܒܸܬ ܡܵܨܹܝܢ ܗ݉ܘܵܐ ܠܹܥܒ̣ܵܕܵܐ ܚܸܠܡܲܬ ܠܐܲܠܵܗܝܼ: ܐܝܼܢܵܐ ܒܕܘܼܟܵܐ ܕܝܼܘܵܢ ܠܹܐ ܡܵܨܹܝܢ ܥܵܒ̣ܕܸܢ ܛܵܒ̣ܬܵܐ. ܐܝܼܢܵܐ ܟܡܵܐ ܕܚܸܪܒܵܐ ܗܵܘܝܼ ܐ݉ܢܵܫܹ̈ܐ ܠܚܵܕܸܖ̈ܘܵܢܘܼܟ̣: ܚܲܕ݉ ܗܵܕܵܐ ܙܵܘܕܵܐ ܣܢܝܼܩܹܐ ܝܢܵܐ ܠܨܦܵܝܘܼܬܵܐ ܕܝܼܘܼܟ̣. ܐܸܢ ܐܵܢܝܼ ܦܟ̰ܝܼܠܹ̈ܐ ܝܢܵܐ: ܒܘܼܫ ܠܵܙܸܡ ܝܼܠܵܗ̇ ܕܥܵܒ̣ܕܸܬ ܠܗ݉ܘܿܢ ܕܘܼܙ. ܘܐܸܢ ܥܵܨܝܼ ܝܼܢܵܐ: ܒܘܼܫ ܠܵܙܸܡ ܝܼܠܵܗ̇ ܕܡܲܕܸܪܸܬ ܠܸܒܵܘܵܬܵܝ̈ ܠܣܲܪܲܣܬܘܼܬܵܐ. ܗܲܟܝܼܡ ܐܲܝܟܵܐ ܘܵܓ̰ܸܒ ܝܼܠܵܗ̇ ܕܗܵܘܹܐ؟ ܡܵܓܲܪ ܒܗ̇ܝ ܕܘܼܟܬܵܐ ܕܐܝܼܬ ܪܵܒܵܐ ܡܖ̈ܝܼܥܹܐ. ܣܲܪܒܵܙ ܐܲܝܟܵܐ ܒܸܬ ܩܵܢܹܐ ܚܸܩܪܵܐ ܓܘܼܪܵܐ؟ ܡܵܓܲܪ ܓܵܘ ܣܵܡܵܐ ܒܘܼܫ ܬܘܼܢܕ ܕܦܠܵܫܵܐ. ܐܝܼܡܵܐ ܣܩܝܼܕܵܐ ܝܘܸܬ ܡ̣ܢ ܦܠܵܫܵܐ ܘܡ̣ܢ ܚܛܝܼܬܵܐ ܕܒܸܬܦܵܩܵܐ ܝܘܸܬ ܒܝܼܵܝ ܒܟܠ ܓܹܒܵܐ: ܕܟ̣ܘܿܪ ܕܟܠܵܝ ܩܲܕܝܼܫܹ̈ܐ ܕܐܝܼܬ ܠܗ݉ܘܿܢ ܐܵܗܵܐ ܓ̰ܘܼܪܵܒܵܐ ܓܵܪܵܓ ܚܵܡܠܝܼ ܒܝܼܘܼܗܝ. ܐܵܢܝܼ ܕܡ̣ܢ ܩܲܕ݉ܡ ܕܝܼܘܼܟ̣ ܠܵܐ ܦܝܼܫ ܠܗ݉ܘܿܢ ܠܘܼܒܠܹܐ ܠܫܡܲܝܵܐ ܥܲܠ ܫܘܝܼܵܬܹ̈ܐ ܕܬܸܦܬܸܓ: ܐܘܼܦ ܐܲܢ݉ܬ ܠܹܐ ܝܠܵܗ̇ ܠܵܙܸܡ ܕܣܵܦܪܸܬ ܕܐܘܼܪܚܘܼܟ̣ ܗܵܘܝܵܐ ܒܘܼܫ ܪܵܗܲܬ ܡ̣ܢ ܐܘܼܪܚܵܐ ܕܐܵܢܝܼ. ܐܵܢܝܼ ܡܘܼܬܸܒ̣ ܠܗ݉ܘܿܢ ܚܲܝܵܝ̈ ܓܵܘ ܦܠܵܫܵܐ ܕܐܵܓ̣ܵܝܵܝ: ܘܗ̇ܝ ܝܼܠܵܗ̇ ܘܵܓ̰ܸܒܘܼܬܵܐ ܕܝܼܘܼܟ̣ ܙܹܐ.