ܘܕܠܐ ܡܨܐ ܠܗ݉ܘܢ ܠܩܪܒܘܢܐ ܠܟܣܠܗ ܣܒܒ ܕܟܢܫܐ: ܡܘܪܡ ܠܗ݉ܘܢ ܫܟܘܪܐ ܕܐܝܟܐ ܕܝܗ݉ܘܐ ܘܟܕ ܣܬܝܪܗ݉ܘܢ: ܟ̰ܘܢܒܠܗ݉ܘܢ ܫܘܝܬܐ ܕܕܪܝܐ ܝܗ݉ܘܐ ܒܝܘܗ̇ ܗ̇ܘ ܫܦܝܠܐ (ܡܪܩܘܣ ܒ: 4)

ܗܲܝܡܵܢܘܼܬܵܐ ܟܹܐ ܦܲܠܛܵܐ ܐܘܼܖ̈ܚܵܬܹܐ ܚܵܕ݉ܬܹ̈ܐ. ܒܲܝܬܵܐ ܡܸܠܝܵܐ ܝܗ݉ܘܵܐ: ܟܸܢܫܵܐ ܕܒ̣ܝܼܩܵܐ ܝܗ݉ܘܵܐ ܠܬܲܪܥܵܐ ܕܒܲܝܬܵܐ: ܐܝܼܢܵܐ ܗܲܝܡܵܢܘܼܬܵܐ ܡܘܼܫ݉ܟ̰ܸܚ ܠܵܗ̇ ܚܕܵܐ ܐܘܼܪܚܵܐ ܠܸܡܛܵܝܵܐ ܠܟܸܣ ܡܵܪܲܢ ܘܠܡܲܬܘܼܒ̣ܹܐ ܠܫܦܝܼܠܵܐ ܩܲܕ݉ܡܘܼܗܝ. ܐܸܢ ܐܲܚܢܲܢ ܠܵܐ ܡܵܨܲܚ ܠܡܲܡܛܘܼܝܵܝ ܚܲܛܵܝܹ̈ܐ ܠܟܸܣ ܡܫܝܼܚܵܐ ܒܣܵܒܵܒܹ̈ܐ ܕܥܵܕܲܬ: ܓܵܪܵܓ ܕܡܲܦܠܸܚܲܚ ܐܘܼܖ̈ܚܵܬܹܐ ܦܖ̈ܝܼܫܹܐ. ܡܲܒܝܘܼܢܹܐ ܝܠܵܗ̇ ܕܣܬܵܪܬܵܐ ܕܐ݉ܓܵܪܹܐ ܒܸܬ ܥܵܒ̣ܕܵܐ ܗ݉ܘܵܐ ܪܵܒܵܐ ܬܵܘܙ ܘܡܲܟܪܸܒܵܐ ܗ݉ܘܵܐ ܠܡܵܖ̈ܵܘܵܬܹܐ ܕܒܲܝܬܵܐ: ܐܝܼܢܵܐ ܐܝܼܡܵܐ ܕܩܸܨܲܬ ܪܵܒܵܐ ܚܵܠܨܵܐ ܠܲܢ: ܙܵܪܵܪ ܠܲܝܬ ܐܸܢ ܬܵܦܩܲܚ ܒܩܹܘܲܢܕܹܢܘܿܣ ܝܲܢ ܡܲܟܪܸܒܲܚ ܠܚܲܕ݉ܟܡܵܐ ܐ݉ܢܵܫܹ̈ܐ. ܡܫܝܼܚܵܐ ܐ݉ܬܝܼܵܐ ܝܗ݉ܘܵܐ ܠܬܵܡܵܐ ܩܵܐ ܢܝܲܬ ܕܒܵܣܲܡܬܵܐ: ܒܘܼܬ ܐܵܗܵܐ: ܙܵܪܵܪ ܠܲܝܬ ܡܘܼܕܝܼ ܒܸܬ ܩܲܘܸܡ ܗ݉ܘܵܐ: ܗܲܝܡܵܢܘܼܬܵܐ ܩܘܼܫ̃ܕܸܪܵܐ ܠܕܲܪܩܘܼܒ̣ܠ ܕܟܠܵܝ ܐܲܗܘܵܠܵܬܹ̈ܐ: ܩܵܐ ܕܫܦܝܼܠܵܐ ܩܲܒܸܠ ܗ݉ܘܵܐ ܫܒ̣ܵܩܵܐ ܕܚܛܝܼܵܬܹ̈ܐ. ܬܲܟܠܵܐ ܕܗܵܘܝܵܐ ܗ݉ܘܵܐ ܚܲܕ݉ܟ̰ܵܐ ܩܲܫ̃ܕܲܪܬܵܐ ܕܗܲܝܡܵܢܘܼܬܵܐ ܒܝܼܲܢ! ܩܵܪܝܵܢܵܐ ܣܵܘܓܘܿܠ: ܠܹܐ ܡܵܨܲܚ ܩܵܢܲܚ ܠܵܗ̇ ܐܸܕܝܘܿܡ: ܘܓ̰ܲܪܒܲܚ ܠܹܥܒ̣ܵܕܵܐ ܚܲܕ݉ ܫܘܼܠܵܐ ܕܡܲܪܕܘܼܬܵܐ ܒܘܼܬ ܚܘܼܒܵܐ ܕܓܵܢܵܬܹ̈ܐ ܘܒܘܼܬ ܐܝܼܩܵܪܵܐ ܕܡܵܪܲܢ ܦܵܪܘܿܩܲܢ؟

ܥܵܠܡܵܐ ܗܲܡܵܫܵܐ ܦܲܠܘܿܛܹܐ ܝܠܹܗ ܡܸܢܕܝܼܵܢܹ̈ܐ ܚܵܕ݉ܬܹ̈ܐ ܩܵܐ ܟܠܵܝ ܢܝܲܬܹ̈ܐ ܕܒܲܪܢܵܫܵܐ. ܠܹܐ ܝܠܵܗ̇ ܠܵܙܸܡ ܕܐܘܼܦ ܗܲܝܡܵܢܘܼܬܵܐ ܦܲܠܛܵܐ ܚܲܕ݉ܟܡܵܐ ܐܘܼܖ̈ܚܵܬܹܐ ܚܵܕ݉ܬܹ̈ܐ ܩܵܐ ܡܛܵܝܬܵܐ ܠܪܵܒܵܐ ܓܵܢܵܬܹ̈ܐ ܕܒܸܬܠܵܩܵܐ ܝܢܵܐ ܠܚܵܕܸܖ̈ܘܵܢܲܢ؟ ܐܵܢܝܼ ܐܲܪܒܥܵܐ ܛܵܥܢܵܢܹ̈ܐ ܕܫܘܝܼܬܵܐ ܕܫܦܝܼܠܵܐ ܫܩܝܼܠ ܠܗ݉ܘܿܢ ܓ̰ܘܼܪܐܲܬ ܣܵܒܵܒ ܡܫܝܼܚܵܐ ܬܵܡܵܐ ܝܗ݉ܘܵܐ. ܡܫܝܼܚܵܐ ܠܹܐ ܝܠܹܗ ܥܲܡܲܢ ܙܹܐ؟ ܚܸܙܝܹܐ ܝܘܲܚ ܦܵܬܘܼܗܝ ܩܲܕ݉ܡܲܢ ܒܐܵܗܵܐ ܡܵܘܪܹܫܵܐ؟ ܪܥܝܼܫܹܐ ܝܘܲܚ ܒܚܲܝܠܘܼܗܝ ܒܵܣܡܵܢܵܐ ܓܵܘ ܓܵܢܵܐ ܕܓܵܢܲܢ؟ ܐܸܢ ܗܲܕܟ̣ܵܐ: ܒܲܣ ܫܵܡܛܲܚ ܠܟܠܵܝ ܡܲܟܠܵܝܵܬܹ̈ܐ: ܒܬܲܪܥܵܐ: ܒܦܲܢܓ̰ܵܪܵܐ: ܒܫܟܘܼܪܹܐ: ܡܲܝܲܬ݉ܚ ܓܵܢܵܬܹ̈ܐ ܠܟܸܣ ܡܫܝܼܚܵܐ. ܝܵܐ ܡܵܪܝܵܐ: ܥܒ̣ܘܿܕ ܠܲܢ ܩܵܠܘܿܠܹ̈ܐ ܠܡܲܫ݉ܟ̰ܘܿܚܹܐ ܐܘܼܖ̈ܚܵܬܹܐ ܠܸܡܛܵܝܵܐ ܠܟܸܣ ܡܖ̈ܝܼܥܘܼܟ̣: ܘܡܲܖ̈ܕܹܐ ܠܬܲܡܘܼܡܵܝ ܒܚܵܦܵܛܘܼܬܵܐ.