ܐܝܠܘܠ 8

ܛܥܘܢܬܘܟ̣ ܦܝܫ ܠܗ̇ ܡܘܫ݉ܟ̰ܚܬܐ (ܗܘܫܥ ܝܕ: 8)

ܛܥܘܼܢܬܵܐ ܕܝܼܲܢ ܦܝܵܫܵܐ ܝܠܵܗ̇ ܡܘܼܫ݉ܟ̰ܸܚܬܵܐ ܡ̣ܢ ܐܲܠܵܗܵܐ ܒܢܸܣܒܲܬ ܠܚܕܵܝܘܼܬܵܐ. ܛܥܘܼܢܬܵܐ ܕܦܲܥܘܵܐ ܟ̰ܸܡ ܕܘܼܙ ܡ̣ܢ ܥܸܩܪܵܐ ܟܹܐ ܐܵܬܝܼܵܐ. ܩܛܸܥ ܠܗ݉ܘܿܢ ܡ̣ܢ ܥܘܼܕܵܠܹܐ: ܦܲܥܘܵܐ ܒܸܬ ܒܵܪܸܙ ܘܛܥܘܼܢܬܵܐ ܠܹܐ ܗܵܘܝܵܐ. ܒܐܘܼܪܚܵܐ ܕܚܕܵܝܘܼܬܲܢ ܥܲܡ ܡܫܝܼܚܵܐ ܐܲܚܢܲܢ ܟܹܐ ܡܲܝܲܬ݉ܚ ܛܥܘܼܢܬܵܐ. ܟܠ ܩܘܼܢܛܵܝܦܵܐ ܕܥܲܢܒ̣ܹ̈ܐ ܩܲܕ݉ܡܵܝܬܵܐ ܓܵܘ ܥܸܩܪܵܐ ܕܓܸܦܬܵܐ ܝܗ݉ܘܵܐ: ܗ̇ܝܓܵܗ ܐ݉ܣܝܼܩ ܠܹܗ ܒܦܲܥܘܵܢܹ̈ܐ ܒܟ̰ܲܫܢܝܼ ܕܫܝܼܪܵܐ: ܘܡܘܼܠܚܸܡܵܐ ܠܹܗ ܓܵܢܘܼܗܝ ܠܒ̣ܲܕܲܪ ܐܲܝܟ̣ ܩܘܼܢܛܵܝܦܵܐ: ܐܝܼܢܵܐ ܩܲܕ݉ܡܵܝܬܵܐ ܡ̣ܢ ܥܸܩܪܵܐ ܐ݉ܬܹܐ ܠܹܗ. ܗܲܕܟ̣ܵܐ ܙܹܐ: ܟܠ ܦܘܼܠܚܵܢܵܐ ܨܦܵܝܝܼ ܕܝܼܲܢ ܩܲܕ݉ܡܵܝܬܵܐ ܒܡܫܝܼܚܵܐ ܝܗ݉ܘܵܐ: ܘܗ̇ܝܓܵܗ ܦܝܼܫ ܠܹܗ ܗܘܼܨܠܵܐ ܒܝܼܲܢ.

ܛܥܘܼܢܬܵܐ ܕܝܼܲܢ ܡ̣ܢ ܐܲܠܵܗܵܐ ܟܹܐ ܐܵܬܝܼܵܐ: ܒܢܸܣܒܲܬ ܠܡܕܲܒܪܵܢܘܼܬܵܐ ܪܘܼܚܵܢܵܝܬܵܐ. ܟܲܕ ܢܵܛܘܿܦܝܵܬܹ̈ܐ ܕܛܠܘܼܠܵܐ ܨܵܠܝܼ ܡ̣ܢ ܫܡܲܝܵܐ: ܟܲܕ ܥܲܝܒ̣ܵܐ ܚܵܝܪܵܐ ܡ̣ܢ ܪܵܘܡܵܐ ܘܡܲܢܛܸܦܵܐ ܡ̈ܝܼܵܐ ܕܐܲܢܒܵܪܘܼܗ̇: ܟܲܕ ܫܸܡܫܵܐ ܫܲܦ̮ܩܵܢܵܐ ܡܲܡܛܹܐ ܠܡܵܥܝܵܬܹ̈ܐ ܕܥܲܢܒ̣ܹ̈ܐ: ܟܠ ܚܕܵܐ ܡ̣ܢ ܐܲܢܹܐ ܒܘܼܖ̈ܟܵܬܹܐ ܫܡܲܝܵܢܵܝܹ̈ܐ ܟܹܐ ܡܵܨܝܵܐ ܐܵܡܪܵܐ ܩܵܐ ܓܘܼܓ̰̣ܵܐ ܕܓܸܦܬܵܐ: ܡܸܢܝܼ ܛܥܘܼܢܬܘܼܟ̣ ܦܝܼܫ ܠܵܗ̇ ܡܘܼܫ݉ܟ̰ܸܚܬܵܐ. ܛܥܘܼܢܬܵܐ ܪܵܒܵܐ ܕܲܝܢܵܢܬܵܐ ܝܠܵܗ̇ ܩܵܐ ܥܸܩܪܵܐ ــ ܐܲܠܒܲܬ ܥܸܩܪܵܐ ܝܠܹܗ ܗ̇ܘ ܡܸܢܕܝܼ ܟ̰ܸܡ ܠܵܙܸܡ ܩܵܐ ܡܲܝܵܬ݉ܝܬܵܐ ܕܛܥܘܼܢܬܵܐ ــ ܐܝܼܢܵܐ ܪܵܒܵܐ ܕܲܝܢܵܢܬܵܐ ܝܠܵܗ̇ ܙܹܐ ܩܵܐ ܟܵܖܹ̈ܐ ܒܲܖ̈ܵܝܹܐ. ܟܡܵܐ ܕܲܝܢܵܢܹ̈ܐ ܝܘܲܚ ܩܵܐ ܚܲܠܥܲܬܹ̈ܐ ܕܫܵܦܵܩܲܬ ܕܐܲܠܵܗܵܐ ܕܒܝܼܵܝ ܟܹܐ ܝܲܗܒ̣ܸܠ ܠܲܢ ܡܲܪܥܲܫܬܵܐ: ܡܲܠܵܦܬܵܐ: ܝܲܗܒ̣ܲܠܬܵܐ ܕܠܸܒܵܐ: ܚܲܝܠܵܐ: ܝܲܢ ܟܠ ܡܸܢܕܝܼ ܐ݉ܚܹܪ݉ܢܵܐ ܕܒܵܥܲܚ.

ܛܥܘܼܢܬܲܢ ܡ̣ܢ ܐܲܠܵܗܵܐ ܒܹܐܬܵܝܵܐ ܝܠܵܗ̇: ܒܢܸܣܒܲܬ ܠܒܵܓ̣ܒܵܢܘܼܬܵܐ ܓ̰ܸܢܣ. ܟܵܣܘܼܚܬܵܐ ܚܲܪܝܼܦܬܵܐ ܕܒܵܓ̣ܒܵܢ ܟܹܐ ܡܲܙܝܸܕܵܐ ܠܛܥܘܼܢܬܵܐ ܕܓܘܼܓ̰ܵܐ. ܟܪܸܣܛܝܵܢܵܐ: ܗܲܪ ܗܲܕܟ̣ܵܐ ܝܠܵܗ̇: ܗ̇ܝ ܟܣܵܚܬܵܐ ܕܐܲܠܵܗܵܐ ܟܹܐ ܡܲܦܠܸܚ ܒܝܼܘܼܟ̣. ܒܵܒܝܼ ܝܠܹܗ ܒܵܓ̣ܒܵܢ. ܟܠ ܨܸܒܥܵܐ ܕܒܝܼܝܼ ܡܲܗܨܘܼܠܹ̈ܐ ܠܵܐ ܝܲܗܒ̣ܵܐ: ܟܹܐ ܫܵܩܸܠ ܠܵܗ̇: ܘܟܠ ܕܝܲܗܒ̣ܵܐ ܡܲܗܨܘܼܠܹ̈ܐ: ܟܹܐ ܕܵܟ̣ܹܐ ܠܵܗ̇: ܕܙܵܘܕܵܐ ܡܲܗܨܘܼܠܹ̈ܐ ܡܲܝܬ݉ܝܵܐ. ܠܗ̇ܘ ܒܵܒܲܢ ܡܪܲܚܡܵܢܵܐ ܝܲܗܒ̣ܲܚ ܟܠܹܗ ܚܸܩܪܵܐ ܕܦܘܼܪܩܵܢܲܢ.