ܐ݉ܝܪ 14
ܚܒ̣ܖ̈ܘܬܐ ܡܝܪܬܓܪܘܬܗ ܕܡܫܝܚܐ (ܖ̈ܗ݉ܘܡܝܐ ܚ: 17)
ܥܵܠܡܹ̈ܐ ܒܹܐ ܬܸܚܘܼܒ ܕܒܪܝܼܬܵܐ ܕܐܲܠܵܗܵܐ ܕܡܫܝܼܚܵܐ ܝܢܵܐ ܒܗܲܩ ܕܓܵܢܘܼܗܝ. ܐܲܝܟ̣ ܝܵܪܘܿܬܵܐ ܕܟܠܵܝ ܡܸܢܕܝܼܵܢܹ̈ܐ: ܡܵܪܵܐ ܝܠܹܗ ܥܲܠ ܟܠܵܗ̇ ܒܪܝܼܬܵܐ ܪܘܝܼܚܬܵܐ ܕܐܲܠܵܗܵܐ: ܘܐܘܼܦ ܐܸܠܲܢ ܝܘܼܗܒ̣ܵܐ ܝܠܹܗ ܗܲܩ ܕܡܵܪܘܼܬܵܐ ܒܐܘܼܪܚܵܐ ܕܗ̇ܘ ܩܵܘܠܵܐ ܕܫܲܪܝܼܟܘܼܬܵܐ ܕܡܵܪܝܵܐ ܥܒ̣ܝܼܕܵܐ ܝܠܹܗ ܥܲܡ ܛܵܝܸܦܘܼܗܝ. ܥܵܠܘܿܠܵܢܹ̈ܐ ܕܲܗܒ̣ܵܢܵܝܹ̈ܐ ܕܫܡܲܝܵܐ: ܕܲܖ̈ܘܵܙܘܼܗ̇ ܕܡܲܪܓܵܢܝܼܬܵܐ: ܢܲܗܪܵܐ ܕܚܲܝܹ̈ܐ: ܒܪܝܼܟ̣ܘܼܬܵܐ ܘܐܝܼܩܵܪܵܐ ܕܠܹܐ ܐܵܬܝܼ ܠܡܲܕܘܼܥܹܐ: ܟܠܵܝ ܐܲܢܹܐ ܡܵܪܲܢ ܥܒ̣ܝܼܕܵܝ ܠܹܗ ܗܘܼܒܵܐ ܩܵܬܲܢ ܐܲܝܟ̣ ܝܵܪܬܘܼܬܲܢ ܐܵܒܵܕܝܼܢܵܝܬܵܐ. ܛܵܝܸܦܘܼܗܝ ܟܹܐ ܥܵܒ̣ܸܕ ܠܹܗ ܫܲܪܝܼܟܵܐ ܒܟܠ ܕܐܝܼܬ ܠܹܗ. ܒܸܢܦܵܪ ܕܡܲܠܟܘܼܬܵܐ ܡܘܼܬܒ̣ܘܼܗ̇ ܝܠܹܗ ܥܲܠ ܪܹܫܵܐ ܕܥܹܕܬܘܼܗܝ ܕܩܵܬܘܼܗ̇ ܝܘܼܗܒ̣ܵܐ ܝܠܹܗ ܗܘܼܟܡܵܐ: ܘܒܢܘܿܢܘܼ̈ܗ̇ ܒܸܩܪܵܝܵܝ ܝܠܹܗ ܐܘܼܓ̰ܵܓ̣ ܕܡܲܠܟܹ̈ܐ ܘܟܵܗܢܹ̈ܐ. ܨܠܹܐ ܠܹܗ ܡ̣ܢ ܬܪܘܿܢܘܿܣܘܼܗܝ ܩܵܐ ܕܦܵܐܸܫ ܗ݉ܘܵܐ ܒܘܼܢܦܸܪܵܐ ܒܚܸܩܪܵܐ. ܠܵܐ ܝܬܝܼܒ̣ ܠܹܗ ܥܲܠ ܬܪܘܿܢܘܿܣ ܕܓܵܢܘܼܗܝ ܗܲܠ ܥܒ̣ܝܼܕ ܠܹܗ ܗܵܙܸܪ ܚܕܵܐ ܕܘܼܟܬܵܐ ܥܲܠܘܼܗ̇ ܩܵܐ ܟܠܵܝ ܐܵܢܝܼ ܕܓ̣ܵܠܒܵܢܹ̈ܐ ܝܢܵܐ ܒܕܸܡܘܼܗܝ. ܐܸܢ ܪܹܫܵܐ ܦܵܐܸܫ ܒܘܼܢܦܸܪܵܐ: ܟܠܹܗ ܦܲܓ̣ܪܵܐ ܟܹܐ ܩܲܒܸܠ ܐܝܼܩܵܪܵܐ. ܚܙܝܼ ܠܲܐܟ̣ܵܐ ܦܪܵܥܵܐ ܕܟܠ ܓ̣ܵܠܒܵܢܵܐ ܟܪܸܣܛܝܵܢܵܐ! ܬܪܘܿܢܘܿܣ ܕܡܫܝܼܚܵܐ: ܒܸܢܦܵܪܘܼܗܝ: ܩܵܛܝܼܘܼܗܝ: ܥܵܡܵܪܲܬܘܼܗܝ: ܚܲܙܝܼܢܘܼܗܝ: ܐܸܣܛܠܘܼܗܝ: ܘܟܠܵܗ̇ ܡܝܼܪܲܬܓܵܪܘܼܬܘܼܗܝ ܕܝܼܘܼܟ̣ ܝܼܢܵܐ. ܡܫܝܼܚܵܐ ܟܹܐ ܚܵܫܸܒ̣ ܕܚܵܕܘܼܬܘܼܗܝ ܟܹܐ ܦܵܝܫܵܐ ܡܘܼܟܡܸܠܬܵܐ ܐܝܼܡܵܐ ܕܛܵܝܸܦܘܼܗܝ ܗܵܘܝܼ ܫܲܖ̈ܝܼܟܹܐ ܥܲܡܘܼܗܝ. ܚܸܩܪܵܐ ܕܝܘܼܗܒ̣ܠ ܠܘܼܟ̣ ܩܵܬܝܼ: ܝܘܼܗܒ̣ܵܐ ܝܘܸܢ ܐܸܠܵܝ. ܐܲܢܹܐ ܗܘܼܡܙܸܡ ܠܝܼ ܥܲܡܵܘܟ̣ܘܿܢ: ܕܚܵܕܘܼܬܝܼ ܥܲܪܩܸܠܵܐ ܒܝܼܵܘܟ̣ܘܿܢ: ܘܕܦܵܝܫܵܐ ܬܘܼܡܸܡܬܵܐ ܚܵܕܘܼܬܵܘܟ̣ܘܿܢ. ܒܲܣܝܼܡܘܼܬܵܐ ܕܒܵܒܘܼܗܝ ܗܵܠܵܐ ܒܘܼܫ ܚܠܝܼܬܵܐ ܝܠܵܗ̇ ܩܵܬܘܼܗܝ ܣܵܒܵܒ ܛܵܝܸܦܘܼܗܝ ܫܘܼܪܟܵܐ ܝܠܹܗ ܥܲܡܘܼܗܝ. ܐܝܼܩܵܖܹ̈ܐ ܕܡܲܠܟܘܼܬܘܼܗܝ ܒܘܼܫ ܒܲܣܝܼܡܹ̈ܐ ܝܢܵܐ ܣܵܒܵܒ ܛܵܝܸܦܘܼܗܝ ܥܲܡܘܼܗܝ ܒܸܬ ܡܲܒܝܸܢ ܒܐܝܼܩܵܪܵܐ: ܓ̣ܵܠܸܒܘܼܝܵܬܘܼ̈ܗܝ ܙܹܐ ܒܘܼܫ ܡܵܪܹܐ ܩܲܕܪܵܐ ܝܢܵܐ ܩܵܬܘܼܗܝ ܣܵܒܵܒ ܒܝܼܵܝ ܡܘܼܠܦܵܐ ܝܠܹܗ ܠܛܵܝܸܦܘܼܗܝ ܠܸܓ̣ܠܵܒܵܐ. ܒܸܦܨܵܚܵܐ ܝܠܹܗ ܒܬܪܘܿܢܘܿܣܘܼܗܝ ܣܵܒܵܒ ܐܝܼܬ ܠܵܗ̇ ܕܘܼܟܬܵܐ ܩܵܬܵܝ. ܒܸܚܕܵܝܵܐ ܝܠܹܗ ܒܠܒ̣ܸܫܝܵܬܘܼ̈ܗܝ ܡܲܠܟܵܝܹ̈ܐ ܣܵܒܵܒ ܥܲܠܵܝ ܟܹܐ ܦܵܪܸܣ ܫܸܦܘܼܠܵܠܘܼ̈ܗܝ. ܟܹܐ ܚܵܕܹܐ ܒܘܼܫ ܙܵܘܕܵܐ ܒܚܵܕܘܼܬܘܼܗܝ ܣܵܒܵܒ ܒܸܩܪܵܝܵܝ ܝܠܹܗ ܥܲܠܘܼܗ̇.