ܗ̇ܘ ܕܝܘܗܒ̣ܠ ܠܗ ܩܬܝ ܟܠ ܒܕܘܠܬܡܢܕܘܬܐ ܩܐ ܪܗܬܘܬܢ (ܐ. ܛܝܡܬܐܘܣ ܘ: 17)

ܡܵܪܲܢ ܝܑܼܫܘܿܥ ܒܕܵܝܸܡܘܼܬܵܐ ܒܝܼܵܗܒ̣ܵܐ ܝܠܹܗ: ܘܐܘܼܦ ܩܵܐ ܚܲܕ݉ ܪܦܵܦܵܐ ܠܹܐ ܚܵܣܸܟ̣ ܐܝܼܕܘܼܗܝ. ܟܡܵܐ ܕܐܝܼܬ ܚܲܕ݉ ܡܵܐܢܵܐ ܕܫܵܦܵܩܲܬ ܕܗܵܠܵܐ ܠܹܐ ܝܠܹܗ ܩܘܼܒܠܵܐ ܠܡܠܵܝܬܘܼܗܝ: ܡܸܫܚܵܐ ܠܹܐ ܦܵܐܸܫ ܡܘܼܟܠܝܼܵܐ. ܚܲܕ݉ ܫܸܡܫܵܐ ܝܠܹܗ ܕܕܵܝܸܡ ܙܪܝܼܩܵܐ: ܡܲܢܢܵܐ ܕܵܝܸܡ ܒܸܪܥܵܝܵܐ ܓܵܘ ܐܘܼܪܕܘܼܝ: ܚܲܕ݉ ܩܵܝܵܐ ܓܵܘ ܒܲܪܝܼܵܐ: ܒܕܵܝܸܡܘܼܬܵܐ ܡܲܓ̰ܪܘܼܝܹܐ ܫܵܩܝܼܵܬܹ̈ܐ ܕܚܲܝܹ̈ܐ ܡ̣ܢ ܕܸܦܢܘܼܗܝ ܟ̰ܪܝܼܙܬܵܐ. ܡܸܛܪܵܐ ܕܫܵܦܵܩܲܬܘܼܗܝ ܒܸܥܪܵܝܵܐ ܝܠܵܗ̇ ܗܲܡܵܫܵܐ: ܢܲܗܪܵܐ ܕܟܵܪܲܡܘܼܗܝ ܕܵܝܸܡ ܒܹܐܬܵܝܵܐ: ܘܡܲܒܘܼܥܵܐ ܕܚܘܼܒܘܼܗܝ ܕܵܝܸܡ ܫܦܝܼܟ̣ܵܐ. ܕܵܐܟ̣ܝܼ ܕܡܲܠܟܵܐ ܒܓܵܢܘܼܗܝ ܠܹܐ ܡܵܨܹܐ ܕܡܵܝܸܬ: ܗܲܕܟ̣ܵܐ ܙܹܐ ܫܵܦܵܩܲܬܘܼܗܝ ܗܸܟ̃ ܠܹܐ ܬܵܝܡܵܐ. ܟܹܐ ܓܲܒܲܚ ܡ̣ܢ ܛܥܘܼܢܬܘܼܗܝ ܝܵܘܡܵܐ ܒܝܵܘܡܵܐ: ܘܟܠ ܝܘܿܡ ܦܲܥܘܵܢܘܼ̈ܗܝ ܟܹܐ ܛܵܥܦܝܼ ܩܲܕ݉ܡ ܐܝܼܕ̈ܲܢ ܟܲܕ ܛܥܝܼܢܹܐ ܖ̈ܲܚܡܹܐ ܚܵܕ݉ܬܹ̈ܐ. ܫܲܒ̣ܥܵܐ ܝܵܘܡܵܢܹ̈ܐ ܕܥܹܐܕܵܐ ܐܝܼܬ ܒܫܲܒܬܘܼܗܝ: ܘܐܲܝܟ̣ ܡܸܢܝܵܢܵܐ ܕܝܵܘܡܵܢܹ̈ܐ: ܗܵܕܵܐ ܝܠܹܗ ܡܸܢܝܵܢܵܐ ܕܩܵܘܢܵܚܠܹܓ̣ܘܼ̈ܗܝ ܒܫܹܢ݉ܬܵܐ. ܡܵܢܝܼ ܕܝܼܪܵܐ ܝܠܹܗ ܡ̣ܢ ܬܲܪܥܘܼܗܝ ܕܠܵܐ ܒܘܼܪܟܬܵܐ؟ ܡܵܢܝܼ ܩܝܼܡܵܐ ܝܠܹܗ ܡ̣ܢ ܨܘܼܦܪܘܼܗܝ ܠܵܐ ܣܒ̣ܝܼܥܵܐ؟ ܖ̈ܲܚܡܘܼܗܝ ܚܵܕ݉ܬܹ̈ܐ ܝܢܵܐ ܒܟܠ ܡܗ̇ܘܪܹܫܵܐ ܘܬܵܙܹ̈ܐ ܒܟܠ ܪܲܡܫܵܐ. ܡܵܢܝܼ ܟܹܐ ܝܲܕܸܥ ܚܸܫܒܘܼܢܵܐ ܕܛܵܒ̣ܵܬܘܼ̈ܗܝ ܝܲܢ ܡܵܨܹܐ ܠܗܲܩܘܿܝܹܐ ܒܘܼܬ ܦܸܪܝܘܼܬܵܐ ܕܟܵܪܲܡܘܼܗܝ؟ ܟܠ ܪܦܵܦܵܐ ܥܵܒ̣ܪܵܢܵܐ ܡ̣ܢ ܙܲܒ̣ܢܵܐ ܟܹܐ ܡܲܕܸܥ ܒܘܼܬ ܐܲܠܦܹ̈ܐ ܕܒܘܼܖ̈ܟܵܬܹܐ ܩܘܼܒܠܹ̈ܐ: ܓܘܼܠܦܵܢܹ̈ܐ ܕܣܵܥܲܬ̈ܲܢ ܩܪܝܼܡܹܐ ܝܢܵܐ ܒܣܹܐܡܵܐ ܕܡܪܲܚܡܵܢܘܼܬܘܼܗܝ: ܘܙܲܪܕܘܼܢܹܐ ܝܢܵܐ ܒܕܲܗܒ̣ܵܐ ܕܚܘܼܒܘܼܗܝ. ܢܲܗܪܵܐ ܕܙܲܒ̣ܢܵܐ ܟܹܐ ܡܲܨܠܹܐ ܡ̣ܢ ܛܘܼܖ̈ܵܢܹܐ ܕܐܵܒܵܕܘܼܬܵܐ ܣܹܠܵܐ ܕܲܗܒ̣ܵܢܵܝܵܐ ܕܫܵܦܵܩܲܬܘܼܗܝ. ܟܵܘܟ̣ܒ̣ܹ̈ܐ ܒܹܐ ܡܸܢܝܵܢܵܐ ܐܲܚܟ̰ܝܼ ܐܲܝܟ̣ ܛܵܥܢܵܢܹ̈ܐ ܕܒܲܝܕܵܓ̣ܹ̈ܐ ܝܢܵܐ ܕܥܲܣܟܵܖ̈ܘܵܬܹܐ ܒܘܼܫ ܓܘܼܖܹ̈ܐ ܕܒܘܼܖ̈ܟܵܬܹܐ. ܕܵܐܟ̣ܝܼ ܡܲܪܡܵܐ ܓܵܢܝܼ ܠܫܸܡܵܐ ܕܗ̇ܘ ܕܝܵܘܡܵܐ ܒܝܵܘܡܵܐ ܟܹܐ ܡܲܛܥܸܢܲܢ ܒܡܸܢܝܵܬܹ̈ܐ: ܘܕܟܹܐ ܒܲܢܦܸܪ ܐܸܠܲܢ ܒܫܵܦܵܩܲܬܘܼܗܝ؟ ܬܲܟܠܵܐ ܕܠܹܫܵܢܝܼ ܗܵܘܹܐ ܗ݉ܘܵܐ ܠܵܐ ܫܵܠܝܵܢܵܐ ܐܲܝܟ̣ ܡܲܒܘܼܥܵܐ ܕܫܵܦܵܩܲܬܘܼܗܝ ܠܹܐ ܒܵܪܸܙ! ܠܹܫܵܢܝܼ ܫܲܩܝܼ: ܕܵܐܟ̣ܝܼ ܫܵܬܩܸܬ؟ ܪܥܘܿܫ ܣܲܡܬܘܼܪ ܘܟܸܢܵܪܵܐ: ܒܸܬ ܪܵܥܫܸܢ ܒܡܗ̇ܘܪܹܫܵܐ.