ܕܒܝܼܗ ܒܥܡܪܐ ܝܠܗ̇ ܟܠܗ̇ ܬܡܡܬܘܬܐ ܕܐܠܗܘܬܐ ܒܓܘܫܡܐ: ܘܒܝܼܗ ܐܘܦ ܐܚܬܘܢ ܦܝܫܐ ܝܬܘܢ ܬܡܡ (ܩܘܠܣܝ̈ܐ ܒ: 10)

ܟܠܵܝ ܕܝܼܠܵܝܵܬܹ̈ܐ ܕܡܫܝܼܚܵܐ: ܐܲܝܟ̣ ܐܲܠܵܗܵܐ ܘܐܲܝܟ̣ ܒܲܪܢܵܫܵܐ: ܕܝܼܲܢ ܝܼܢܵܐ. ܟܠܵܗ̇ ܬܲܡܵܡܲܬܘܼܬܵܐ ܕܐܲܠܵܗܘܼܬܵܐ ܒܪܘܝܼܚܘܼܬܘܼܗ̇ ܒܹܐ ܗܲܕ ܕܝܼܲܢ ܝܼܠܵܗ̇: ܩܵܐ ܡܲܟܡܲܠܬܲܢ. ܠܹܐ ܡܵܨܝܵܐ ܕܗ̇ܘ ܥܵܒ̣ܸܕ ܠܲܢ ܡܵܖ̈ܵܘܵܬܹܐ ܕܐܵܢܝܼ ܕܝܼܠܵܝܵܬܹ̈ܐ ܕܐܲܠܵܗܘܼܬܵܐ: ܐܝܼܢܵܐ ܥܒ̣ܝܼܕܵܐ ܝܠܹܗ ܟܡܵܐ ܕܡܘܼܡܟܸܢ: ܝܲܥܢܹܐ: ܚܲܝܠܘܼܗܝ ܘܐܲܠܵܗܘܼܬܘܼܗܝ ܥܒ̣ܝܼܕܵܝ ܝܠܹܗ ܡܲܥܒ̣ܸܕܵܢܹ̈ܐ ܠܦܘܼܪܩܵܢܵܐ ܕܝܼܲܢ. ܕܝܼܠܵܝܵܬܘܼ̈ܗܝ ܐܲܝܟ̣ ܡܨܹܐ ܟܠ: ܝܲܕܵܥ ܟܠ: ܐܲܚܝܼܕ ܟܠ: ܘܠܵܐ ܡܸܫܬܲܚܠܦܵܢܘܼܬܘܼܗܝ: ܟܠܵܝ ܙܘܼܘܸܓܹܐ ܝܢܵܐ ܒܢܵܛܘܿܪܘܼܬܵܐ ܕܝܼܲܢ. ܩܘܼܡ݉ ܗܲܡܸܢܵܢܵܐ: ܘܚܙܝܼ ܕܵܐܟ̣ܝܼ ܐܵܓ̣ܵܝܼܘܼܟ̣ ܒܹܐܣܵܪܘܼܗ̇ ܝܠܹܗ ܟܠܵܗ̇ ܐܲܠܵܗܘܼܬܘܼܗܝ ܒܟܵܠܸܣܟܵܐ ܕܦܘܼܪܩܵܢܘܼܟ̣! ܟܡܵܐ ܓܘܼܪܬܵܐ ܫܵܦܵܩܲܬܘܼܗܝ: ܟܡܵܐ ܩܘܝܼܬܵܐ ܡܗܘܼܡܢܘܼܬܘܼܗܝ: ܟܡܵܐ ܩܲܝܵܡ ܠܵܐ ܡܸܫܬܲܚܠܦܵܢܘܼܬܘܼܗܝ: ܟܡܵܐ ܒܹܐ ܩܲܝܵܣ ܗܘܼܟܡܘܼܗܝ: ܟܡܵܐ ܒܹܐ ܗܲܕ ܥܵܩܸܠܕܵܪܘܼܬܘܼܗܝ! ܡܵܪܲܢ ܟܠܵܝ ܐܲܢܹܐ ܒܹܥܒ̣ܵܕܵܝ ܝܠܹܗ ܣܛܘܼܢܹ̈ܐ ܕܗܲܝܟܠܵܐ ܕܦܘܼܪܩܵܢܲܢ: ܘܟܠܵܝ: ܕܠܵܐ ܡܲܒܨܲܪܬܵܐ ܕܪܘܝܼܚܘܼܬܵܝ: ܦܝܵܫܵܐ ܝܢܵܐ ܩܘܼܘܸܠܹܐ ܩܵܬܲܢ ܐܲܝܟ̣ ܝܵܪܬܘܼܬܲܢ ܐܵܒܵܕܝܼܢܵܝܬܵܐ. ܟܠ ܢܵܛܘܿܦܬܵܐ ܕܐܸܘܩܝܵܢܘܿܣ ܕܚܘܼܒܵܐ ܕܦܵܪܘܿܩܲܢ ܕܝܼܲܢ ܝܼܠܵܗ̇. ܟܠ ܘܵܪܝܼܕܵܐ ܕܓܵܘ ܕܪܲܥܢܵܐ ܕܙܲܪܒ: ܟܠ ܓ̰ܲܘܵܗܝܼܪ ܕܓܵܘ ܒܸܢܦܵܪ ܕܐܝܼܩܵܪܵܐ ܙܲܪܝܼܦ: ܟܠܵܗ̇ ܓܲܢ݉ܒܵܪܘܼܬܵܐ ܕܥܵܩܸܠܕܵܪܘܼܬܵܐ ܐܲܠܵܗܵܝܬܵܐ: ܟܠܵܝ ܕܝܼܲܢ ܝܼܢܵܐ ܘܒܸܬ ܦܵܝܫܝܼ ܡܘܼܦܠܸܚܹܐ ܩܵܐ ܚܵܝܪܲܢ. ܟܠܹܗ ܡܫܝܼܚܵܐ ܒܓܵܢܘܼܗܝ: ܘܒܚܩܝܼܪܘܼܬܘܼܗܝ ܐܲܝܟ̣ ܒܪܘܿܢܵܐ ܕܐܲܠܵܗܵܐ: ܦܝܵܫܵܐ ܝܠܹܗ ܥܒ̣ܝܼܕܵܐ ܗܘܼܒܵܐ ܩܵܬܲܢ ܕܚܵܕܲܚ ܒܕܵܘܠܲܬܡܲܢܕܘܼܬܲܢ ܒܝܼܘܼܗܝ. ܥܵܩܸܠܕܵܪܘܼܬܘܼܗܝ ܝܼܠܵܗ̇ ܒܵܠܲܕܟ̰ܝܼܲܢ: ܝܕܲܥܬܘܼܗܝ ܝܼܠܵܗ̇ ܡܲܠܦܵܢܬܲܢ: ܚܲܝܠܘܼܗܝ ܢܵܛܘܿܪܲܢ: ܟܹܐܢܘܼܬܘܼܗܝ ܙܵܡܝܼܢܘܼܬܲܢ: ܚܘܼܒܘܼܗܝ ܝܲܒ̣ܵܠܬܵܐ ܕܠܸܒܵܐ ܩܵܬܲܢ: ܖ̈ܲܚܡܘܼܗܝ ܚܵܕܘܼܬܲܢ: ܠܵܐ ܡܸܫܬܲܚܠܦܵܢܘܼܬܘܼܗܝ ܣܒܵܪܬܲܢ. ܟܠܵܝ ܕܝܼܵܘܟ̣ܘܿܢ ܝܼܢܵܐ: ܒܹܐܡܵܪܵܐ ܝܠܹܗ: ܣܒ̣ܸܥܡܘܿܢ ܒܛܵܒ̣ܬܵܐ: ܘܦܘܼܫܘܿܢ ܡܸܠܝܹܐ ܡ̣ܢ ܖ̈ܲܚܡܹܐ ܕܡܵܪܝܵܐ. ܐܵܗ: ܟܡܵܐ ܒܲܣܝܼܡܬܵܐ ܝܠܵܗ̇ ܗܲܕܟ̣ܵܐ ܠܸܚܙܵܝܵܐ ܠܡܫܝܼܚܵܐ ܘܠܣܲܚܒܘܼܪܘܼܗܝ ܒܚܵܛܸܪܓ̰ܲܡܥܘܼܬܵܐ ܟ̰ܸܡ ܩܘܝܼܬܵܐ ܕܒܛܠܵܒܬܵܐ ܕܗܲܝܲܪܬܵܐ ܕܚܘܼܒܘܼܗܝ ܘܕܚܲܝܠܘܼܗܝ: ܐܲܚܟ̰ܝܼ ܗ̇ܘ ܡܸܢܕܝܼ ܒܸܛܠܵܒܵܐ ܝܘܲܚ ܕܗܵܙܸܪ ܩܘܼܘܸܠܵܐ ܝܠܹܗ ܠܝܲܗܒ̣ܵܐ ܩܵܬܲܢ.