ܚܙܐ ܠܝܼ ܖ̈ܓܘܬܐ ܥܠ ܣܘܣܘ̈ܬܐ: ܘܓܘܖ̈ܢܐ ܒܚܕܪܐ ܐܝܟ̣ ܖ̈ܓܘܬܐ ܥܠ ܐܪܥܐ (ܩܘܗܠܬ ܝ: 7)

ܪܵܒܵܐ ܓܵܗܹ̈ܐ ܐ݉ܢܵܫܹ̈ܐ ܡܸܢܫܸܠܬܵܢܹܐ ܒܸܪܝܵܡܵܐ ܝܢܵܐ ܡ̣ܢ ܚܕܵܐ ܐܲܗܘܵܠ ܟܘܼܦܬܵܐ ܘܒܸܫܩܵܠܵܐ ܕܘܼܟܵܢܹ̈ܐ ܟ̰ܸܡ ܖ̈ܵܡܹܐ: ܟܲܕ ܐ݉ܢܵܫܹ̈ܐ ܕܡ̣ܢ ܐܲܨܠܵܝ ܖ̈ܵܡܹܐ ܝܢܵܐ ܪܵܒܵܐ ܓܵܗܹ̈ܐ ܟܹܐ ܚܲܝܝܼ ܐܲܝܟ̣ ܠܵܐ ܝܕܝܼ̈ܥܹܐ ܡ̣ܢ ܐ݉ܢܵܫܹ̈ܐ. ܐܵܗܵܐ ܝܠܹܗ ܚܲܕ݉ ܟܸܬܪܵܐ ܕܒܡܕܲܒܪܵܢܘܼܬܵܐ ܕܐܲܠܵܗܵܐ: ܕܒܚܲܕ݉ ܝܵܘܡܵܐ ܫܪܵܝܬܘܼܗܝ ܒܸܬ ܡܲܚܕܝܼܵܐ ܠܠܸܒܵܘܵܬܹ̈ܐ ܕܙܲܕܝܼܩܹ̈ܐ. ܐܝܼܢܵܐ ܚܕܵܐ ܩܸܨܲܬ ܐܘܼܚܟ̰ܵܐ ܟܠܵܢܵܝܬܵܐ ܝܠܵܗ̇ ܕܗܸܟ̃ ܚܲܕ݉ ܡܸܢܲܢ ܓܵܪܵܓ ܕܠܵܐ ܛܲܪܛܸܡܲܚ ܐܸܢ ܢܵܦܠܲܚ ܓܵܘܘܼܗ̇. ܐܝܼܡܵܐ ܕܡܵܪܲܢ ܓܵܘ ܕܘܼܢܝܹܐ ܝܗ݉ܘܵܐ: ܐܵܦܸܢ ܗ̇ܘ ܝܼܗ݉ܘܵܐ ܡܲܠܟܵܐ ܕܡܲܠܟܹ̈ܐ ܕܐܲܪܥܵܐ: ܡܸܢ݉ܕܪܸܫ݉ ܚܕܝܼܪܹܗ ܒܓ̰ܵܕܵܐ ܕܓ̰ܵܦܵܐ ܘܕܚܸܠܡܲܬܟܵܪܘܼܬܵܐ ܐܲܝܟ̣ ܪܹܓܵܐ ܕܖܹ̈ܓܵܘܵܬܹܐ. ܒܲܣ ܡܘܼܕܝܼ ܥܵܓ̰ܸܒܘܼܬܵܐ ܐܸܢ ܬܲܠܡܝܼܕܘܼ̈ܗܝ ܦܵܝܫܝܼ ܚܫܝܼܒ̣ܹܐ ܟܘܼܦܹ̈ܐ ܘܒܵܨܘܿܖܹ̈ܐ؟ ܕܘܼܢܝܹܐ ܬܲܪܣܵܐ ܝܠܵܗ̇: ܒܘܼܬ ܐܵܗܵܐ: ܩܲܕ݉ܡܵܝܹ̈ܐ ܐ݉ܚܵܖ̈ܵܝܹܐ ܝܢܵܐ ܘܐ݉ܚܵܖ̈ܵܝܹܐ ܩܲܕ݉ܡܵܝܹ̈ܐ. ܚܙܝܼ ܥܲܠ ܡܘܼܕܝܼ ܣܘܼܣܹܐ ܪܵܡܵܐ ܪܟܝܼܒ̣ܹܐ ܝܢܵܐ! ܕܵܐܟ̣ܝܼ ܡܲܪܘܿܡܹܐ ܝܢܵܐ ܩܵܪ݉ܢܵܝ ܠܥܸܠܸܠ! ܗܵܡܵܢ ܓܵܘ ܕܵܪܬܵܐ ܕܡܲܠܟܵܐ ܝܠܹܗ ܟܲܕ ܡܘܼܪܕܟ̣ܲܝ ܩܲܕ݉ܡ ܬܲܪܥܵܐ ܝܠܹܗ. ܕܵܘܝܼܕ ܒܸܚܕܵܪܵܐ ܝܠܹܗ ܓܵܘ ܛܘܼܖ̈ܵܢܹܐ ܟܲܕ ܫܵܐܘܿܠ ܒܹܥܒ̣ܵܕܵܐ ܝܠܹܗ ܡܲܠܟܘܼܬܵܐ ܒܐܝܼܩܵܪܵܐ. ܐܹܠܝܼܵܐ ܒܸܩܒ̣ܵܠܵܐ ܝܠܹܗ ܓܵܘ ܓܸܦܝܼܬܵܐ ܟܲܕ ܐܝܼܙܒ̣ܸܠ ܒܸܚܬܵܪܵܐ ܝܠܵܗ̇ ܓܵܘ ܥܵܡܵܪܲܬܘܼܗ̇. ܐܝܼܢܵܐ ܡܸܢ݉ܕܪܸܫ݉: ܡܵܢܝܼ ܒܸܬ ܫܲܗܘܸܬ ܠܕܘܼܟܬܵܐ ܕܥܵܨܝܹ̈ܐ ܙܵܝܵܖܹ̈ܐ؟ ܘܠܓܹܒܵܐ ܐ݉ܚܸܪ݉ܢܵܐ: ܡܵܢܝܼ ܠܹܐ ܒܲܚܸܠ ܒܩܲܕܝܼܫܹ̈ܐ ܡܘܼܣܠܝܹ̈ܐ؟ ܐܝܼܡܵܐ ܕܓܝܼܓ̣ܠܵܐ ܚܵܕܸܪ: ܟܘܼܦܹ̈ܐ ܒܸܬ ܪܵܝܡܝܼ ܘܖ̈ܵܡܹܐ ܒܸܬ ܟܵܝܦܝܼ. ܒܲܣ ܚܡܘܿܠ: ܗܲܡܸܢܵܢܵܐ: ܐܵܒܵܕܘܼܬܵܐ ܒܸܬ ܥܵܒ̣ܕܵܐ ܥܵܘܵܙ ܩܵܐ ܢܵܐܗܲܩܘܼܝܵܬܹ̈ܐ ܕܙܲܒ̣ܢܵܐ.

ܠܵܐ ܢܵܦܠܲܚ ܓܵܘ ܓ̰ܘܼܪܵܒܵܐ ܕܡܲܪܲܡܬܵܐ ܕܡܵܝ̈ܠܲܢ ܒܸܣܖ̈ܵܢܵܝܹܐ ܒܫܘܼܒ̣ܗܵܪܵܐ ܟܲܕ ܡܨܵܝ̈ܵܬܲܢ ܒܘܼܫ ܚܫܝܼܚܹ̈ܐ ܗܵܘܝܼ ܓܲܪܘܼܠܹܐ ܓܵܘ ܬܵܘܙ. ܪܘܼܚܵܐ ܩܲܕܝܼܫܵܐ ܟܹܐ ܒܵܣܡܲܐ ܠܹܗ ܒܪܹܐܙܵܐ: ܒܘܼܬ ܐܵܗܵܐ ܟܹܐ ܚܵܪܸܙ ܚܲܝ̈ܠܲܢ ܘܡܨܵܝ̈ܵܬܲܢ ܒܖܹ̈ܐܙܹܐ ܘܒܕܵܖ̈ܵܓ̰ܹܐ ܠܵܚܘܿܡܹ̈ܐ: ܟܲܕ ܕܲܪܓ̣ܵܐ ܪܹܫܵܝܵܐ ܟܹܐ ܝܲܗܒ̣ܸܠ ܠܹܗ ܩܵܐ ܕܐܵܢܝܼ ܡܨܵܝ̈ܵܬܲܢ ܕܟܹܐ ܙܲܘܸܓܝܼ ܠܲܢ ܥܲܡ ܡܲܠܟܵܐ. ܒܲܣ ܠܵܐ ܦܲܪܦܸܣܲܚ ܠܐܵܗܵܐ ܡܲܪܝܲܙܬܵܐ ܐܲܠܵܗܵܝܬܵܐ: ܐܸܠܵܐ ܛܵܠܒܲܚ ܫܵܦܵܩܲܬ ܕܦܵܝܫܲܚ ܡܘܼܡܨܝܹܐ ܠܙܲܒܛܘܼܢܹܐ ܠܦܲܓ̣ܖ̈ܲܢ ܘܠܚܵܡܘܿܝܘܼܗܝ ܟܘܼܦܵܐ. ܠܵܐ ܦܝܼܫ ܠܲܢ ܒܸܪܝܹܐ ܩܵܐ ܕܫܵܒ̣ܩܲܚ ܕܙܵܘ̈ܥܲܢ ܗܵܟܡܝܼ ܥܲܠܲܢ: ܐܸܠܵܐ ܕܐܲܚܢܲܢ: ܐܲܝܟ̣ ܡܲܠܟܹ̈ܐ: ܥܵܒ̣ܕܲܚ ܗܘܼܟܡܵܐ ܒܝܑܼܫܘܿܥ ܡܫܝܼܚܵܐ ܥܲܠ ܡܲܠܟܘܼܬܵܐ ܬܠܵܬ݉ܐ ܬܵܩܹ̈ܐ ܕܪܘܼܚܲܢ: ܕܓܵܢܲܢ: ܘܕܦܲܓ̣ܖ̈ܲܢ: ܩܵܐ ܚܸܩܪܵܐ ܕܐܲܠܵܗܵܐ ܒܵܒܵܐ.