ܥܓ̰ܝܒܬܐ ܫܦܩܬܘܟ̣ (ܡܙܡܘܪܐ ܝܙ: 7)

ܐܝܼܡܵܐ ܕܝܲܗܒ̣ܲܚ ܠܸܒܲܢ ܥܲܡ ܐܸܪܘܵܢܲܢ ܨܦܵܝܝܼ ܟܹܐ ܥܵܒ̣ܕܲܚ: ܐܝܼܢܵܐ ܓܵܪܵܓ ܕܡܵܘܕܲܚ ܕܪܵܒܵܐ ܓܵܗܹ̈ܐ ܟܹܐ ܢܵܦܠܲܚ ܒܵܨܘܿܖܹ̈ܐ ܡ̣ܢ ܐܵܗܵܐ. ܠܵܐ ܗܲܕܟ̣ܵܐ ܡܵܪܲܢ ܘܐܵܓ̣ܵܝܲܢ. ܫܵܦܵܩܲܬܘܵܬܹ̈ܐ ܕܗ̇ܘ ܟܹܐ ܝܲܗܒ̣ܸܠ ܗܲܡܵܫܵܐ ܒܟܠܹܗ ܠܸܒܘܼܗܝ ܟܹܐ ܝܲܗܒ̣ܸܠ ܠܗ݉ܘܿܢ. ܠܹܐ ܫܲܕܸܪ ܩܵܬܲܢ ܒܸܣܪܵܐ ܩܲܝܪܵܐ ܝܲܢ ܩܸܛܥܵܛܹ̈ܐ ܦܝܼܫܹܐ ܕܣܘܼܦܪܘܼܗܝ: ܐܸܠܵܐ ܟܹܐ ܥܵܒ̣ܸܕ ܠܲܢ ܕܛܵܡܫܲܚ ܬܹܝܟܲܢ ܓܵܘ ܡܵܐܢܵܐ ܕܓܵܢܘܼܗܝ ܘܕܡܲܒܣܸܡܲܚ ܡܹܐܟ̣ܘܼܠܝ̈ܵܬܲܢ ܕܐܲܕܘܹ̈ܐ ܕܚܘܼܒܘܼܗܝ. ܐܝܼܡܵܐ ܕܡܲܬܸܒ̣ ܢܝܼܫܲܢܩܹ̈ܐ ܕܲܗܒ̣ܵܢܵܝܹ̈ܐ ܕܫܵܦܵܩܲܬܘܼܗܝ ܓܵܘ ܐܝܼܕ̈ܲܢ: ܒܝܲܗܒ̣ܵܠܬܵܝ ܟܹܐ ܚܵܠܸܨ ܐܝܼܕܲܢ ܒܚܘܼܒܵܐ ܚܲܝܡܵܐ. ܟܹܐ ܣܲܚܒܸܪܲܢ ܓܵܘ ܒܵܬ̈ܲܢ ܒܡܪܲܚܡܵܢܘܼܬܘܼܗܝ: ܠܵܐ ܐܲܝܟ̣ ܥܒ̣ܵܪܬܵܐ ܕܚܲܕ݉ ܣܲܚܒܸܪܵܢܵܐ ܢܵܓ̰ܝܼܒ ܓܵܘ ܟܘܼܠܘܼܚܬܵܐ ܕܡܸܣܟܹܢܵܐ: ܐܸܠܵܐ ܟܹܐ ܝܵܬܸܒ̣ ܒܕܸܦܢܲܢ: ܠܹܐ ܡܲܣܠܹܐ ܡܸܣܟܹܢܘܼܬܲܢ ܘܠܹܐ ܠܵܝܸܡ ܠܙܲܒܘܼܢܘܼܬܲܢ. ܕܵܐܟ̣ܝܼ ܓ̰ܲܖ̈ܓܹܐ ܕܲܗܒ̣ܵܢܵܝܹ̈ܐ ܟܹܐ ܦܵܠܛܝܼ ܡ̣ܢ ܦܘܼܡܘܼܗܝ! ܒܡܘܼܕܝܼ ܚܦܵܩܝܵܬܹ̈ܐ ܕܚܘܼܒܵܐ ܟܹܐ ܚܵܦܸܩ ܠܲܢ! ܐܸܢ ܫܵܗܝܹ̈ܐ ܗܵܘܝܼ ܗ݉ܘܵܐ ܝܘܼܗܒ̣ܲܢ: ܗܲܪ ܬܵܗܵܪ ܕܝܲܗܒ̣ܲܠܬܵܝ ܟܹܐ ܕܵܩܸܪ ܗ݉ܘܵܐ ܒܕܲܗܒ̣ܹ̈ܐ: ܐܝܼܢܵܐ ܐܲܝܟ̣ ܕܝܼܠܵܗ̇: ܚܲܠܥܲܬܹ̈ܐ ܡܵܪܹܐ ܛܝܼܡܵܐ ܕܘܼ ܝܠܹܗ ܡܲܬܘܼܒ̣ܵܝ ܓܵܐ ܡܵܐܢܹ̈ܐ ܕܕܲܗܒ̣ܵܐ ܒܬܲܓܒܲܪܬܘܼܗܝ ܒܲܣܝܼܡܬܵܐ. ܒܹܐ ܡܘܼܡܟܸܢ ܝܼܠܵܗ̇ ܠܸܦܝܵܫܵܐ ܒܫܸܟ ܒܘܼܬ ܫܲܪܝܼܟܘܼܬܵܐ ܕܚܘܼܒܘܼܗܝ: ܣܵܒܵܒ ܟܹܐ ܚܵܙܲܚ ܨܘܼܪܬܵܐ ܕܚܲܕ݉ ܠܸܒܵܐ ܕܲܡܕܸܡܵܢܵܐ ܚܬܝܼܡܬܵܐ ܥܲܠ ܟܠܵܝ ܛܵܒ̣ܵܬܘܼ̈ܗܝ. ܟܹܐ ܝܲܗܒ̣ܸܠ ܒܐܝܼܕܵܐ ܦܬܘܼܚܬܵܐ ܘܠܹܐ ܚܵܣܸܟ̣: ܗܸܟ̃ ܩܒ̣ܵܠܬܵܐ ܠܲܝܬ ܠܹܗ ܕܐܲܚܢܲܢ ܝܘܼܩܪܵܐ ܝܘܲܚ ܥܲܠܘܼܗܝ. ܗܸܟ̃ ܠܹܐ ܓܲܫܸܩ ܥܲܠܲܢ ܒܩܲܝܪܘܼܬܵܐ: ܟܹܐ ܚܵܕܹܐ ܒܪܲܚܡܘܼܗܝ ܘܟܹܐ ܚܵܠܸܨ ܠܲܢ ܒܘܼܫ ܙܵܘܕܵܐ ܠܥܘܼܒܘܼܗܝ ܟܲܕ ܕܸܡܘܼܗܝ ܬܲܦܘܼܟ̣ܘܼܗܝ ܝܠܹܗ ܡܒܵܕܵܠܲܢ. ܐܝܼܬ ܚܲܕ݉ ܥܸܛܪܵܐ ܒܢܵܪܕܝܼܢܘܼܗܝ ܕܐܲܚܟ̰ܝܼ ܡ̣ܢ ܠܸܒܵܐ ܕܗ̇ܘ ܡܘܼܡܟܸܢ ܝܼܠܵܗ̇ ܕܦܵܠܸܛ: ܘܐܝܼܬ ܚܕܵܐ ܚܸܠܝܘܼܬܵܐ ܒܕܸܒ̣ܫܘܼܗܝ ܕܠܹܐ ܡܵܨܝܵܐ ܝܗ݉ܘܵܐ ܠܹܗ݉ܘܵܝܵܐ ܒܝܼܘܼܗܝ ܡܵܓܵܪ ܓ̰ܲܘܗܵܪ ܕܚܘܼܒܘܼܗܝ ܓܵܘܵܝܵܐ ܗܵܘܹܐ ܚܒ̣ܝܼܛܵܐ ܒܝܼܘܼܗܝ. ܬܲܟܠܵܐ ܕܒܕܵܝܸܡܘܼܬܵܐ ܛܵܥܡܲܚ ܘܪܵܥܫܲܚ ܠܒܪܝܼܟ̣ܘܼܬܵܐ ܕܫܲܪܝܼܟܘܼܬܵܐ ܒܗܲܕܟ̣ܵܐ ܚܘܼܒܵܐ.