ܒܪܝܟ̣ܐ ܝܠܗ ܐܠܗܐ ܕܠܐ ܡܘܥܒ̣ܪܗ ܦܪܦܠܬܐ (ܡܙܡܘܪܐ ܣܘ: 20)

ܐܸܢ ܓܲܫܩܲܚ ܠܵܒܵܬ݉ܪܵܐ ܥܲܠ ܬܵܗܵܪ ܕܨܠܵܘܵܬ̈ܲܢ: ܒܸܬ ܥܵܓ̰ܒܲܚ ܕܵܐܟ̣ܝܼ ܐܲܠܵܗܵܐ ܓ̰ܘܼܘܸܒܵܝ ܠܹܗ. ܟܹܐ ܗܵܘܝܵܐ ܕܗܵܘܝܼ ܚܲܕ݉ܟܡܵܐ ܕܟܹܐ ܚܵܫܒ̣ܝܼ ܕܨܠܵܘܵܬܵܝ̈ ܚܫܝܼܚܹܐ ܝܢܵܐ ܠܓ̰ܲܘܲܒܬܵܐ: ܐܲܝܟ̣ ܕܦܪܝܼܫܵܐ ܚܫܝܼܒ̣ ܠܹܗ: ܐܝܼܢܵܐ ܟܪܸܣܛܝܵܢܵܐ ܫܲܪܝܼܪܵܐ: ܟܲܕ ܓܲܫܸܩ ܠܵܒܵܬ݉ܪܘܼܗܝ ܒܠܸܒܵܐ ܒܘܼܗܪܸܢܵܐ: ܒܸܬ ܦܵܫܸܡ ܒܘܼܬ ܒܵܨܘܿܪܘܼܬܵܐ ܕܨܠܵܘܵܬܘܼ̈ܗܝ ܥܒ̣ܝܼܖܹ̈ܐ: ܘܒܸܬ ܫܲܗܘܸܬ ܕܨܵܠܹܐ ܗ݉ܘܵܐ ܠܗ݉ܘܿܢ ܓܵܗܵܐ ܕܬܲܪܬܹܝ ܒܘܼܫ ܒܢܹܓܵܪܵܢܘܼܬܵܐ: ܐܸܢ ܡܘܼܡܟܸܢ ܝܼܗ݉ܘܵܐ. ܟܪܸܣܛܝܵܢܵܐ:  ܕܟ̣ܘܿܪ ܟܡܵܐ ܩܲܝܖܹ̈ܐ ܝܗ݉ܘܵܘ ܨܠܵܘܵܬܘܼ̈ܟ̣. ܐܝܼܡܵܐ ܕܓܵܘ ܟܘܼܚܬܘܼܟ̣ ܝܼܘܸܬ ܝܗ݉ܘܵܐ: ܘܵܓ̰ܸܒ ܝܼܗ݉ܘܵܐ ܕܗܵܘܹܝܬ ܗ݉ܘܵܐ ܕܒ̣ܝܼܩܵܐ ܟܘܼܫܬܝܼ ܥܲܡ ܡܵܪܝܵܐ ܕܵܐܟ̣ܝܼ ܕܝܲܥܩܘܿܒ̣ ܥܒ̣ܝܼܕ ܠܹܗ: ܐܝܼܢܵܐ ܡ̣ܢ ܓܹܒܵܐ ܕܗܵܕܵܐ: ܨܠܵܘܵܬܘܼ̈ܟ̣ ܙܲܒܘܼܢ ܗ݉ܘܝܹܐ ܝܢܵܐ: ܘܚܲܕ݉ܟ̰ܵܐ. ܪܵܒܵܐ ܪܸܚܩܵܐ ܡ̣ܢ ܗ̇ܝ ܗܲܝܡܵܢܘܼܬܵܐ ܡܲܟܝܼܟ̣ܬܵܐ ܘܡܲܩܘܝܼܵܢܬܵܐ ܕܦܵܬܵܐ ܕܟܹܐ ܐܵܡܪܵܐ: ܠܹܐ ܫܵܒ̣ܩܵܢ ܕܐܵܙܸܠ݉ܬ ܡܵܓܲܪ ܕܒܲܪܟ̣ܸܬ ܠܝܼ. ܐܝܼܢܵܐ ܡܸܢ݉ܕܪܸܫ݉: ܫܘܼܠܵܐ ܕܥܵܓ̰ܸܒܘܼܬܵܐ ܝܠܹܗ ܕܐܲܠܵܗܵܐ ܠܵܐ ܐܲܚܟ̰ܝܼ ܫܡܝܼܥܵܝ ܝܠܹܗ ܐܲܢܹܐ ܨܠܵܘܵܬܹ̈ܐ ܩܲܝܖܹ̈ܐ ܕܝܼܘܼܟ̣: ܐܸܠܵܐ ܐܘܼܦ ܓ̰ܘܼܘܸܒܵܝ ܝܠܹܗ. ܐܘܼܦ ܕܟ̣ܘܿܪ ܟܡܵܐ ܕܲܝܠܹ̈ܐ ܗ݉ܘܝܹܐ ܝܢܵܐ ܨܠܵܘܵܬܘܼ̈ܟ̣: ܡܵܓܲܪ ܐܝܼܡܵܐ ܕܢܦܝܼܠܵܐ ܝܘܸܬ ܗ݉ܘܵܐ ܓܵܘ ܝܲܠܨܘܼܝ: ܗ̇ܝܓܵܗ ܐ݉ܙܝܼܠܵܐ ܝܘܸܬ ܩܲܕ݉ܡ ܬܪܘܿܢܘܿܣ ܕܖ̈ܲܚܡܹܐ ܪܵܒܵܐ ܓܵܗܹ̈ܐ. ܐܝܼܢܵܐ ܐܝܼܡܵܐ ܕܩܘܼܒܸܠܘܼܟ̣ ܦܘܼܨܵܝܵܐ: ܐܲܝܟܵܐ ܝܗ݉ܘܵܐ ܦܲܪܦܲܠܬܘܼܟ̣ ܕܵܝܸܡ؟ ܐܝܼܢܵܐ ܐܵܦܸܢ ܐܲܢ݉ܬ ܡܘܼܒܨܸܪܘܼܟ̣ ܨܠܵܘܵܬܘܼ̈ܟ̣: ܐܲܠܵܗܵܐ ܗܸܟ̃ ܠܹܐ ܝܠܹܗ ܡܘܼܒܨܸܪܵܐ ܒܘܼܖ̈ܟܵܬܘܼܗܝ. ܐܝܼܡܵܐ ܕܐܲܢ݉ܬ ܡܘܼܢܫܝܼܵܐ ܠܘܼܟ̣ ܬܪܘܿܢܘܿܣ ܕܖ̈ܲܚܡܹܐ: ܐܲܠܵܗܵܐ ܠܵܐ ܡܘܼܢܫܝܼܵܐ ܠܹܗ: ܠܵܘܓ̰ܵܐ ܕܫܟ̣ܝܼܢܘܼܬܘܼܗܝ ܗܲܡܵܫܵܐ ܟܹܐ ܐܵܬܹܐ ܠܸܚܙܵܝܵܐ ܒܐܵܪܵܠܸܓ̣ ܕܓܘܼܠܦܵܢܹ̈ܐ ܕܟܖ̈ܘܿܒ̣ܹܐ. ܪܵܒܵܐ ܥܵܓ̰ܸܒܘܼܬܵܐ ܝܠܵܗ̇ ܕܐܲܠܵܗܵܐ ܓܲܫܸܩ ܠܙܲܒ̣ܢܹ̈ܐ ܟܸܖ̈ܝܹܐ ܕܦܲܪܦܲܠܬܵܐ ܕܟܹܐ ܗܵܘܝܼ ܠܲܢ ܐܲܚܟ̰ܝܼ ܒܥܕܵܢܵܐ ܕܢܦܵܠܬܲܢ ܓܵܘ ܣܢܝܼܩܘܼܬܵܐ. ܡܸܓ̰ܸܕ: ܥܵܓ̰ܸܒܘܼܬܵܐ ܓܘܼܪܬܵܐ ܝܠܵܗ̇ ܕܐܲܠܵܗܵܐ ܕܒ̣ܝܼܩ ܠܹܗ ܢܵܬܵܐ ܠܐܵܢܝܼ ܨܠܵܘܵܬܹ̈ܐ ܕܲܝܠܹ̈ܐ: ܚܲܕ݉ܟ̰ܵܐ ܒܟܠ ܥܕܵܢܵܐ ܕܣܢܝܼܩܘܼܬܵܐ ܐܲܚܟ̰ܝܼ. ܕܵܐܟ̣ܝܼ ܐܲܠܵܗܵܐ ܝܠܹܗ ܗ̇ܘ ܐܲܠܵܗܵܐ ܕܗܲܕܟ̣ܵܐ ܟܹܐ ܫܵܡܸܥ ܨܠܵܘܵܬܹ̈ܐ ܕܐܵܢܝܼ ܕܟܹܐ ܛܵܠܒܝܼ ܡܸܢܘܼܗܝ ܡܲܪܘܲܚܬܵܐ ܒܥܕܵܢܵܐ ܕܝܲܠܨܘܼܝ: ܘܕܟܹܐ ܫܵܒ̣ܩܝܼ ܠܹܗ ܡ̣ܢ ܒܵܬ݉ܪ ܕܝܲܗ݉ܒ̣ܸܠ ܠܗ݉ܘܿܢ ܒܘܼܪܟܬܵܐ! ܬܲܟܠܵܐ ܕܖ̈ܲܚܡܘܼܗܝ ܘܫܵܦܵܩܲܬܘܼܗܝ ܒܫܡܵܥܬܵܐ ܕܗܲܕܟ̣ܵܐ ܨܠܵܘܵܬܹ̈ܐ ܡܲܪܥܸܫܵܐ ܠܠܸܒܲܢ: ܗܲܕܟ̣ܵܐ ܕܡܐܵܕܝܼܵܐ ܠܒܵܬ݉ܪܹܐ ܦܵܝܫܲܚ ܡܘܼܫ݉ܟ̰ܚܹܐ ܒܟܠܵܝ ܨܠܵܘܵܬܹ̈ܐ ܘܦܲܖ̈ܦܲܠܝܵܬܹܐ ܨܵܠܘܿܝܹܐ ܒܟܠ ܙܲܒ̣ܢܵܐ ܒܪܘܼܚܵܐ.