ܐ݉ܝܪ 25

ܠܐ ܫܒ̣ܩܬ ܠܝ ܝܐ ܡܪܝܐ (ܡܙܡܘܪܐ ܠܚ: 21)

ܪܵܒܵܐ ܓܵܗܹ̈ܐ ܟܹܐ ܨܲܠܲܚ ܨܠܘܿܬܵܐ ܠܵܐ ܫܵܒ̣ܩܸܬ ܠܲܢ ܒܥܕܵܢܵܐ ܕܝܲܠܨܘܼܝ ܘܓ̰ܘܼܪܵܒܵܐ: ܐܝܼܢܵܐ ܪܵܒܵܐ ܓܵܗܹ̈ܐ ܙܹܐ ܟܹܐ ܡܲܢܫܲܚ ܕܣܢܝܼܩܹܐ ܝܘܲܚ ܕܗܵܘܲܚ ܨܲܠܘܿܝܹܐ ܐܵܗܵܐ ܨܠܘܿܬܵܐ ܒܟܠܵܝ ܥܕܵܢܵܬܹ̈ܐ. ܠܲܝܬ ܚܲܕ݉ ܕܵܩܝܼܩܵܐ ܒܚܲܝ̈ܲܢ: ܐܵܦܸܢ ܗܵܘܲܚ ܟ̰ܸܡ ܩܲܕܝܼܫܹ̈ܐ ܕܟܹܐ ܡܵܨܲܚ ܕܟܵܠܲܚ ܕܠܵܐ ܣܢܵܕܬܵܐ ܕܐܲܠܵܗܵܐ. ܐܸܢ ܓܵܘ ܒܲܗܪܵܐ ܗܵܘܲܚ: ܝܲܢ ܓܵܘ ܚܘܼܒ̣ܝܵܐ: ܐܸܢ ܒܫܲܪܝܼܟܘܼܬܵܐ ܥܲܡܘܼܗܝ: ܝܲܢ ܒܓ̰ܘܼܪܵܒܵܐ: ܕܵܝܸܡ ܣܢܝܼܩܹܐ ܝܘܲܚ ܠܐܵܗܵܐ ܨܠܘܿܬܵܐ: ܠܵܐ ܫܵܒ̣ܩܸܬ ܠܝܼ: ܝܵܐ ܡܵܪܝܵܐ. ܣܢܘܿܕ ܠܝܼ ܘܦܵܝܫܸܢ ܦܪܝܼܩܵܐ. ܚܲܕ݉ ܝܵܠܵܐ ܙܥܘܿܪܵܐ ܒܥܕܵܢܵܐ ܕܦܬܵܚܬܵܐ ܕܠܹܫܵܢܘܼܗܝ: ܗܲܡܵܫܵܐ ܣܢܝܼܩܵܐ ܝܹܠܗ ܠܗܲܝܲܪܬܵܐ ܕܝܸܡܘܼܗܝ. ܐܲܚܢܲܢ ܙܹܐ ܠܹܐ ܡܵܨܲܚ ܕܦܵܝܫܲܚ ܕܠܵܐ ܗܲܝܲܪܬܵܐ ܕܵܝܸܡ ܕܡ̣ܢ ܪܵܘܡܵܐ. ܒܲܣ: ܐܸܕܝܘܿܡ ܫܒ̣ܘܿܩ ܗܵܘܝܵܐ ܨܠܘܿܬܘܼܟ̣: ܠܵܐ ܫܒ̣ܩܸܬ ܠܝܼ. ܒܵܒܵܐ: ܠܵܐ ܫܵܒ̣ܩܸܬ ܒܪܘܿܢܘܼܟ̣: ܠܵܐ ܗ݉ܘܹܐ ܕܢܵܦܸܠ ܒܐܝܼܕܵܐ ܕܕܸܫ̃ܡܸܢ. ܪܵܥܝܵܐ: ܠܵܐ ܫܵܒ̣ܩܸܬ ܦܹܐܪܘܼܟ̣: ܠܵܐ ܗ݉ܘܹܐ ܕܪܵܚܸܩ ܡ̣ܢ ܕܲܠܕܵܐ ܕܓܘܼܡܵܐ. ܒܲܓ̣ܒܵܢ ܓܘܼܪܵܐ: ܠܵܐ ܫܵܒ̣ܩܸܬ ܠܢܨܸܒ̣ܬܘܼܟ̣: ܠܵܐ ܗ݉ܘܹܐ ܕܟ̰ܵܡܟ̰ܵܐ ܘܒܵܪܙܵܐ. ܠܵܐ ܫܵܒ̣ܩܸܬ ܠܝܼ: ܝܵܐ ܡܵܪܝܵܐ: ܐܵܕܝܼܵܐ: ܘܠܵܐ ܫܵܒ̣ܩܸܬ ܠܝܼ ܒܗܸܟ̃ ܕܵܩܝܼܩܵܐ ܕܚܲܝܝܼ̈. ܠܵܐ ܫܵܒ̣ܩܸܬ ܕܦܵܝܫܸܢ ܫܘܼܕܠܵܐ ܒܚܵܕܘܼܝܵܬܝܼ̈ ܘܡܘܼܪܚܸܩܵܐ ܡܸܢܘܼܟ̣. ܠܵܐ ܫܵܒ̣ܩܸܬ ܠܝܼ ܒܦܵܫܲܡܝܵܬܝܼ̈:  ܠܵܐ ܗ݉ܘܹܐ ܕܛܲܪܛܸܡܸܢ ܥܲܠܘܼܟ̣. ܠܵܐ ܫܵܒ̣ܩܸܬ ܠܝܼ ܒܝܵܘܡܵܐ ܕܬܵܘܒܵܟܵܪܘܼܬܝ: ܠܵܐ ܗ݉ܘܹܐ ܕܬܲܠܩܸܢ ܗܹܒ̣ܝܼ ܕܫܒ̣ܵܩܵܐ ܘܢܵܦܠܸܢ ܒܒܹܐ ܗܹܒ̣ܝܼܘܼܬܵܐ. ܘܐܘܼܦܠܵܐ ܫܵܒ̣ܩܸܬ ܠܝܼ ܒܝܵܘܡܵܐ ܕܗܲܝܡܵܢܘܼܬܝܼ ܟ̰ܸܡ ܚܲܝܠܵܢܬܵܐ: ܠܵܐ ܗ݉ܘܹܐ ܕܗܲܝܡܵܢܘܼܬܝܼ ܦܵܝܫܵܐ ܫܘܼܚܠܸܦܬܵܐ ܠܩܲܫܕܲܪܬܵܐ. ܠܵܐ ܫܵܒ̣ܩܸܬ ܠܝܼ: ܣܵܒܵܒ ܕܠܵܐ ܕܝܼܘܼܟ̣ ܙܲܒܘܼܢ ܝܼܘܸܢ ܐܵܢܵܐ: ܐܝܼܢܵܐ ܥܲܡܘܼܟ̣ ܚܲܝܠܵܢܵܐ ܝܘܸܢ. ܠܵܐ ܫܵܒ̣ܩܸܬ ܠܝܼ ܣܵܒܵܒ ܐܘܼܪܚܝܼ ܡܠܝܼܬܵܐ ܝܠܵܗ̇ ܡ̣ܢ ܟ̰ܘܼܖܸ̈ܬܡܹܐ ܘܩܹܘܵܢܕܹܢܘܿܣܹ̈ܐ ܘܠܹܐ ܡܵܨܹܝܢ ܠܹܐܙܵܠܵܐ ܒܝܼܘܼܗ̇ ܕܠܵܐ ܒܵܠܵܕܟ̰ܝܼܘܼܬܵܐ ܕܝܼܘܼܟ̣. ܠܵܐ ܪܵܚܩܸܬ ܡܸܢܝܼ: ܣܵܒܵܒ ܥܹܩܘܼܝ ܩܘܼܪܒܵܐ ܝܠܵܗ̇: ܣܵܒܵܒ ܠܲܝܬ ܗܲܝܸܪܵܢܵܐ.

ܝܵܐ ܡܵܪܝܵܐ ܡܪܲܚܡܵܢܵܐ ܚܘܿܪ

ܚܙܝܼ ܝܲܠܨܘܼܝܹ̈ܐ ܕܓܵܢܝܼ

ܠܟܸܣ ܪܹܓܘܼܟ̣ ܓܘܼܢܵܗܟܵܪ ܕܘܿܪ

ܘܗ݉ܘܝܼ ܐܲܢ݉ܬ ܗܲܝܸܪܵܢܝܼ