ܐ݉ܝܪ 26
ܪܦܝ ܥܠ ܡܪܝܐ (ܢܣܝܒ) ܕܩܡ ܝܗܒ̣ܠܘܟ̣: ܘܗ̇ܘ ܒܬ ܣܢܕܠܘܟ̣ (ܡܙܡܘܪܐ ܢܗ: 22)
ܚܲܡ ܡܘܼܦܠܸܚܬܵܐ ܐܘܼܦ ܒܡܸܢܕܝܼܵܢܹ̈ܐ ܕܒܕܲܣܬܘܼܪ ܝܼܢܵܐ: ܐܸܢ ܦܵܝܫܵܐ ܡܘܼܙܝܸܕܬܵܐ ܙܵܘܕܵܐ ܡ̣ܢ ܠܵܙܸܡ: ܐܲܨܠܘܼܗ̇ ܚܛܝܼܬܵܐ ܝܠܹܗ. ܪܵܒܵܐ ܓܵܗܹ̈ܐ ܡܵܪܲܢ ܡܘܼܩܘܹܐ ܠܹܗ ܒܡܵܠܲܦܝܵܬܘܼ̈ܗܝ ܠܡܲܚܦܘܼܠܹܐ ܡ̣ܢ ܥܒ̣ܵܕܬܵܐ ܕܚܲܡ ܙܵܘܕܵܐ ܡ̣ܢ ܠܵܙܸܡ. ܐܘܼܦ ܦܝܼܫܬܵܐ ܝܠܵܗ̇ ܬܢܝܼܬܵܐ ܒܦܘܼܡܵܐ ܕܫܠܝܼܚܹ̈ܐ. ܘܠܵܐ ܢܛܵܪܬܵܐ ܕܐܵܗܵܐ ܩܵܢܘܿܪ ܠܲܒܘܼܠܹܐ ܝܠܵܗ̇ ܟ̰ܸܡ ܠܚܛܝܼܬܵܐ: ܣܵܒܵܒ ܗܲܪ ܡܲܥܢܵܝܵܐ ܕܚܲܡܚܘܵܪܘܼܬܵܐ ܓܘܼܪܬܵܐ ܐܵܗܵܐ ܝܠܵܗ̇: ܕܒܸܚܫܵܒ̣ܵܐ ܝܘܲܚ ܕܒܘܼܫ ܥܵܩܸܠܕܵܪ ܝܼܘܲܚ ܡ̣ܢ ܐܲܠܵܗܵܐ: ܘܡܲܬܘܼܒ̣ܹܐ ܝܘܲܚ ܓܵܢܲܢ ܒܕܘܼܟܬܵܐ ܕܗ̇ܘ: ܠܹܥܒ̣ܵܕܵܐ ܩܵܐ ܓܵܢܲܢ ܗ̇ܘ ܡܸܢܕܝܼ ܕܩܘܼܘܸܠܵܐ ܝܠܹܗ ܕܒܓܵܢܘܼܗܝ ܒܸܬ ܥܵܒ̣ܸܕ ܠܹܗ ܩܵܬܲܢ. ܟܹܐ ܓ̰ܲܪܒܲܚ ܠܬܲܚܡܘܼܢܹܐ ܒܘܼܬ ܗ̇ܘ ܡܸܢܕܝܼ ܕܒܸܚܫܵܒ̣ܵܐ ܝܘܲܚ ܕܗ̇ܘ ܡܘܼܢܫܝܼܘܼܗܝ ܝܠܹܗ. ܟܹܐ ܓ̰ܲܪܒܲܚ ܕܛܵܥܢܲܚ ܟܵܪܬܲܢ ܒܓܵܢܲܢ: ܐܲܝܟ̣ ܕܐܸܢ ܗ̇ܘ ܠܹܐ ܡܵܨܹܐ ܗ݉ܘܵܐ ܝܲܢ ܠܹܐ ܝܗ݉ܘܵܐ ܪܵܙܝܼ ܠܸܛܥܵܢܘܼܗ̇ ܡ̣ܢ ܓܹܒܲܢ. ܐܝܼܬܵܐ ܐܵܗܵܐ ܠܵܐ ܡܲܨܝܲܬܬܵܐ ܠܩܵܢܘܿܪܘܼܗܝ ܐܲܫܟܵܪܵܐ: ܐܵܗܵܐ ܠܵܐ ܗܲܡܲܢܬܵܐ ܒܚܲܒܪܘܼܗܝ: ܐܵܗܵܐ ܩܲܫܕܲܪܬܵܐ ܒܫܩܵܠܬܵܐ ܕܫܘܼܠܵܐ ܕܗ̇ܘ ܥܲܠ ܓܵܢܲܢ: ܟܠܵܗ̇ ܚܛܝܼܬܵܐ ܝܠܵܗ̇. ܗܵܠܵܐ ܙܵܘܕܵܐ ܡ̣ܢ ܐܵܗܵܐ: ܚܲܡܚܘܵܪܘܼܬܵܐ ܓܘܼܪܬܵܐ ܟܹܐ ܠܲܒܠܵܐ ܠܥܵܠܡܹ̈ܐ ܕܒܝܼܫܘܼܬܵܐ. ܗ̇ܘ ܕܠܵܐ ܡܵܨܹܐ ܣܲܦܹܐ ܫܘܼܠܘܼ̈ܗܝ ܒܐܝܼܕܵܐ ܕܐܲܠܵܗܵܐ ܒܪܵܙܝܼܘܼܬܵܐ: ܘܕܒܵܥܹܐ ܛܵܥܹܝܢ ܟܵܪܬܵܐ ܕܓܵܢܘܼܗܝ: ܥܒ̣ܘܿܕ ܒܵܘܵܪ ܕܐܘܼܦ ܒܸܬ ܡܲܦܠܸܚ ܣܵܒܵܒܹ̈ܐ ܚܸܪܒܵܐ ܩܵܐ ܗܲܝܲܪܬܵܐ ܕܓܵܢܘܼܗܝ. ܐܵܗܵܐ ܚܛܝܼܬܵܐ ܟܹܐ ܠܲܒܠܵܐ ܠܲܢ ܠܹܫܒ̣ܵܩܘܼܗܝ ܐܲܠܵܗܵܐ ܐܲܝܟ̣ ܪܵܐܝܝܼܟܵܖ̈ܲܢ: ܘܠܩܲܒܘܿܠܹܐ ܥܵܩܸܠܕܵܪܘܼܬܵܐ ܕܒܲܪܢܵܫܵܐ ܡ̣ܢ ܓܹܒܵܐ ܕܗ̇ܘ. ܐܵܗܵܐ ܝܠܵܗ̇ ܐܲܝܟ̣ ܚܦܵܪܬܵܐ ܕܒܹܖܹ̈ܐ ܫܡܝܼܛܹ̈ܐ ܡ̣ܢ ܓܹܒܵܐ ܕܐ݉ܙܵܠܬܵܐ ܠܟܸܣ ܥܲܝܢܵܐ ܕܡ̈ܝܼܵܐ ܚܵܝܹ̈ܐ: ܕܝܼܗ݉ܘܵܐ ܚܛܝܼܬܵܐ ܕܛܵܝܸܦܵܐ ܕܝܼܣܪܵܝܹܠ ܩܵܕܝܼܡܝܼ. ܚܲܡ ܟܹܐ ܕܵܪܝܵܐ ܫܸܟ ܓܵܘ ܠܸܒܲܢ ܒܘܼܬ ܡܪܲܚܡܵܢܘܼܬܵܐ ܕܐܲܠܵܗܵܐ: ܘܗܲܕܟ̣ܵܐ ܟܹܐ ܡܲܐܩܸܫܵܐ ܚܘܼܒܲܢ ܠܟܸܣܠܘܼܗܝ. ܟܹܐ ܗܵܘܲܚ ܠܵܐ ܣܵܒܖ̈ܵܢܹܐ ܒܐܲܠܵܗܵܐ: ܒܘܼܬ ܐܵܗܵܐ ܟܹܐ ܡܲܦܫܸܡܲܚ ܠܪܘܼܚܘܼܗܝ ܩܲܕܝܼܫܵܐ: ܘܗܲܕܟ̣ܵܐ ܨܠܵܘܵܬ̈ܲܢ ܟܹܐ ܦܵܝܫܝܼ ܡܘܼܟܠܝܹܐ: ܛܘܼܦ̮ܣܲܢ ܟܹܐ ܦܵܐܸܫ ܡܘܼܚܪܸܒ̣ܵܐ: ܘܚܲܝ̈ܲܢ ܟܹܐ ܗܵܘܝܼ ܚܲܝܹ̈ܐ ܕܡܲܚܲܒܬܵܐ ܕܓܵܢܵܐ. ܒܵܨܘܿܪܘܼܬܵܐ ܕܚܵܛܸܪܓ̰ܲܡܥܘܼܬܵܐ ܒܐܲܠܵܗܵܐ ܟܹܐ ܗܵܘܝܵܐ ܒܵܥܸܣ ܕܪܚܵܩܬܲܢ ܡܸܢܘܼܗܝ. ܐܝܼܢܵܐ ܐܸܢ ܒܗܲܝܡܵܢܘܼܬܵܐ ܦܫܝܼܛܬܵܐ ܒܩܵܘܠܘܼܗܝ: ܕܵܪܲܚ ܟܠܵܝ ܟܵܖ̈ܵܬܲܢ ܥܲܠܘܼܗܝ: ܘܠܵܐ ܗܵܘܲܚ ܒܚܲܡ ܒܘܼܬ ܗܸܟ̃ ܡܸܢܕܝܼ: ܒܗ̇ܝ ܕܗ̇ܘ ܒܸܛܥܵܢܘܼܗ̇ ܝܠܹܗ ܚܲܡܲܢ: ܒܸܬ ܦܵܝܫܲܚ ܚܘܼܡܝܹܐ ܩܘܼܪܒܵܐ ܐܸܠܘܼܗܝ: ܘܒܸܬ ܦܵܝܫܲܚ ܚܘܼܠܸܢܹܐ ܩܵܐ ܓ̰ܘܼܪܵܒܵܐ. ܒܸܬ ܢܵܛܪܸܬ ܒܫܠܵܡܵܐ: ܣܵܒܵܒ ܕܒܝܼܘܼܟ̣ ܦܝܼܫܵܐ ܝܠܹܗ ܒܗܹܒ̣ܝܼ.