ܐ݉ܝܪ 28
ܘܠܐܢܝ ܕܡܘܟܫܛ ܠܗ: ܚܩܝܪܝ ܠܗ (ܖ̈ܗ݉ܘܡܝܐ ܚ: 30)
ܕܘܼ ܝܠܵܗ̇ ܚܕܵܐ ܣܲܪܲܣܬܘܼܬܵܐ ܡܵܪܹܐ ܛܝܼܡܵܐ ܩܵܬܘܼܟ̣: ܗܲܡܸܢܵܢܵܐ. ܒܲܠܟܵܐ ܡܸܣܟܹܢܵܐ ܝܘܸܬ ܝܲܢ ܡܘܼܥܝܸܩܵܐ: ܝܲܢ ܠܵܐ ܝܕܝܼܥܵܐ: ܐܝܼܢܵܐ ܩܵܐ ܝܲܗܒ̣ܲܠܬܵܐ ܕܠܸܒܵܐ: ܦܵܟܸܪ ܥܲܠ ܩܪܵܝܬܘܼܟ̣ ܕܦܝܼܫܵܐ ܝܘܸܬ ܩܸܪܝܵܐ: ܘܠܟܠܵܝ ܦܠܵܛܹ̈ܐ ܕܗܵܨܘܿܠܹܐ ܝܠܵܗ̇ ܩܵܬܘܼܟ̣: ܐܸܠܵܐܟܹܐ ܗ̇ܘ ܦܠܵܛܵܐ ܥܲܠܗܲܕܵܐ ܕܠܲܐܟ̣ܵܐ ܦܝܵܫܵܐ ܝܠܹܗ ܡܘܼܕܟ̣ܸܪܵܐ. ܕܵܐܟ̣ܝܼ ܕܝܼܠܵܗ̇ ܝܵܩܝܼܢ ܕܐܲܢ݉ܬ ܒܪܘܿܢܵܐ ܕܐܲܠܵܗܵܐ ܝܘܸܬ ܐܸܕܝܘܿܡ: ܗܲܪ ܗܵܕܵܐ ܝܵܩܝܼܢ ܝܼܠܵܗ̇ ܕܟܠܵܝ ܝܲܠܨܘܼܝܘܼ̈ܟ̣ ܓ̰ܲܠܕܹܐ ܒܸܬ ܬܵܝܡܝܼ ܘܒܸܬ ܗܵܘܹܝܬ ܕܵܘܠܲܬܡܲܢܕ ܒܟܠܵܗ̇ ܒܪܝܼܟ̣ܘܼܬܵܐ. ܚܲܕܟ̰ܵܐ ܐ݉ܚܹܪ݉ܢܵܐ ܚܡܘܿܠ: ܗ̇ܝܓܵܗ ܪܹܫܘܼܟ̣ ܓ̰ܹܗܝܵܐ ܒܸܬ ܩܲܒܸܠ ܒܸܢܦܵܪ ܕܚܸܩܪܵܐ: ܘܐܝܼܕܘܼܟ̣ ܡܠܝܼܬܵܐ ܡ̣ܢ ܓ̰ܵܦܵܐ ܒܸܬ ܫܵܩܠܵܐ ܦܲܥܘܵܐ ܕܚܘܼܪܡܵܐ ܕܓ̣ܵܠܸܒܘܼܬܵܐ. ܠܵܐ ܥܵܒ̣ܕܸܬ ܬܵܥܙܝܼ ܒܘܼܬ ܙܲܗܡܲܬܘܼ̈ܟ̣: ܐܝܼܢܵܐ ܚܕܝܼ ܕܒܵܬ݉ܪ ܚܲܕ݉ܟ̰ܵܐ ܒܸܬ ܡܵܛܹܝܬ ܠܐܲܝܟܵܐ ܕܡܵܘܬܵܐ ܠܹܐ ܗܵܘܹܐ ܡܸܢ݉ܕܪܸܫ݉: ܘܠܵܐ ܬܵܥܙܝܼ: ܘܠܵܐ ܡܲܩܘܲܚܬܵܐ: ܘܗܸܟ̃ ܕܲܪܕ ܠܹܐ ܗܵܘܹܐ ܡܸܢ݉ܕܪܸܫ݉. ܟܵܠܸܣܟܹ̈ܐ ܕܢܘܼܪܵܐ ܩܲܕ݉ܡ ܬܲܪܥܘܼܟ̣ ܝܼܢܵܐ: ܘܒܚܲܕ݉ ܕܵܩܝܼܩܵܐ ܒܸܬ ܦܵܝܫܸܬ ܠܘܼܒܠܵܐ ܠܐܲܬܪܵܐ ܕܚܩܝܼܖܹ̈ܐ. ܙܡܵܪܬܵܐ ܐܵܒܵܕܝܼܢܵܝܬܵܐ ܚܲܕܟ̰ܵܐ ܦܝܼܫ ܠܵܗ̇ ܕܫܵܪܝܵܐ ܒܦܘܼܡܘܼܟ̣. ܕܲܖ̈ܘܵܙܹܐ ܕܫܡܲܝܵܐ ܗܵܐ ܦܬܝܼܚܹܐ ܝܢܵܐ ܩܵܬܘܼܟ̣. ܠܵܐ ܚܵܫܒ̣ܸܬ ܕܡܘܼܡܟܸܢ ܝܼܠܵܗ̇ ܕܠܵܐ ܡܵܛܹܝܬ ܠܢܝܵܚܬܘܼܟ̣. ܐܸܢ ܗ̇ܘ ܩܸܪܝܘܼܟ̣ ܝܼܠܹܗ: ܠܲܝܬ ܡܸܢܕܝܼ ܕܡܵܨܹܐ ܠܸܦܪܵܫܘܼܟ̣ ܡ̣ܢ ܚܘܼܒܘܼܗܝ. ܥܹܩܘܼܝ ܠܹܐ ܡܵܨܝܵܐ ܠܸܩܛܵܥܘܼܗܝ ܝܸܣܘܼܪܵܐ: ܢܘܼܪܵܐ ܕܝܲܠܨܘܼܝ ܠܹܐ ܡܵܨܹܐ ܠܡܵܩܘܿܕܘܼܗ̇ ܗ̇ܝ ܫܸܫܸܠܬܵܐ. ܟ̰ܸܡ ܣܵܠܵܡܲܬ ܝܼܘܸܬ. ܗ̇ܘ ܩܵܠܵܐ ܕܩܵܡ ܩܵܪܹܐ ܠܘܼܟ̣ ܒܩܲܕ݉ܡܵܝܬܵܐ: ܡܸܢ݉ܕܪܸܫ݉ ܒܸܬ ܩܵܪܹܐ ܠܘܼܟ̣ ܠܹܐܣܵܩܵܐ ܡ̣ܢ ܐܲܪܥܵܐ ܠܫܡܲܝܵܐ: ܡ̣ܢ ܚܘܼܒ̣ܝܵܢܘܼܬܵܐ ܡܘܼܫܲܡܝܼܪ ܕܐܲܪܥܵܐ ܠܐܝܼܩܵܖܹ̈ܐ ܕܠܵܐ ܡܵܝܘܿܬܘܼܬܵܐ ܕܠܹܐ ܐܵܬܹܐ ܠܡܲܕܘܼܥܹܐ. ܠܲܐܟ̣ܵܐ ܐܲܚܟ̰ܝܼ ܥܲܪܩܘܼܠܹܐ ܝܘܸܬ ܕܦܵܝܫܸܬ ܗܘܼܕܪܵܐ ܩܵܐ ܝܵܪܬܘܼܬܘܼܟ̣: ܘܗ̇ܝܓܵܗ ܓܘܼܠܦܵܢܹ̈ܐ ܕܡܲܠܲܐܟ̣ܹ̈ܐ ܒܸܬ ܡܲܦܪܸܚܝܼ ܠܘܼܟ̣ ܪܸܚܩܵܐ ܠܛܘܼܪܵܐ ܕܫܠܵܡܵܐ ܘܕܚܵܕܘܼܬܵܐ ܘܕܒܪܝܼܟ̣ܘܼܬܵܐ: ܐܲܝܟܵܐ ܕ ـــ
ܪܸܚܩܵܐ ܡܕܘܼܢܝܹܐ ܕܚܲܫܵܐ ܘܓܢܵܗܵܐ
ܗܵܘܹܝܬ ܠܐܵܒܵܕ ܥܲܡ ܐܲܠܵܗܵܐ