ܓܘ ܥܠܡܐ ܒܬ ܗܘܝܐ ܠܘܟ̣ܘܢ ܝܠܨܘܝ (ܝܘܚܢܢ ܝܘ: 33)

ܟܪܸܣܛܝܵܢܵܐ: ܒܲܠܟܵܐ ܒܲܩܘܿܪܹܐ ܝܘܸܬ ܗܲܓ̰ܲܬ ܕܐܵܗܵܐ ܡܘܼܕܝܼ ܝܠܵܗ̇؟ ܚܘܼܪ ܠܥܸܠܸܠ: ܠܒܵܒܘܼܟ̣ ܫܡܲܝܵܢܵܝܵܐ: ܘܚܙܝܼ ܠܹܗ ܒܩܲܕܝܼܫܘܼܬܘܼܗܝ ܘܒܕܸܟ̣ܝܘܼܬܘܼܗܝ. ܗܸܟ̃ ܒܹܝܼܕܵܥܵܐ ܝܘܸܬ ܕܚܲܕ݉ ܝܵܘܡܵܐ ܐܘܼܦ ܐܲܢ݉ܬ ܓܵܪܵܓ ܗܵܘܹܝܬ ܐܲܝܟ̣ ܕܝܼܘܼܗܝ؟ ܒܸܚܫܵܒ̣ܵܐ ܝܘܸܬ ܗܵܣܵܢܵܝܝܼ ܝܠܵܗ̇ ܕܦܵܝܫܸܬ ܡܘܼܕܡܝܼܵܐ ܐܸܠܘܼܗܝ؟ ܠܹܐ ܝܠܵܗ̇ ܠܵܙܸܡ ܩܵܬܘܼܟ̣ ܪܵܒܵܐ ܨܲܪܲܦܬܵܐ ܓܵܘ ܝܲܠܨܘܼܝ ܩܵܐ ܕܵܟ̣ܵܝܬܘܼܟ̣؟ ܒܸܚܫܵܒ̣ܵܐ ܝܘܸܬ ܗܵܣܵܢܵܝܝܼ ܝܠܵܗ̇ ܕܗܵܘܹܝܬ ܪܲܕ ܡ̣ܢ ܟܠܹܗ ܚܪܵܒ̣ܘܼܟ̣ ܘܠܹܗܘܵܝܵܐ ܟܵܡܝܼܠ ܕܵܐܟ̣ܝܼ ܕܒܵܒܘܼܟ̣ ܕܒܸܫܡܲܝܵܐ ܟܵܡܝܼܠ ܝܼܠܹܗ؟ ܗ̇ܝܓܵܗ ܟܪܸܣܛܝܵܢܵܐ: ܡܲܟܸܦ ܥܲܝܢܘܼܟ̣ ܠܐܸܠܬܸܚ. ܟܹܐ ܝܲܕܥܸܬ ܕܵܐܟ̣ܝܼ ܕܸܫ̃ܡܸܢܹ̈ܐ ܐܝܼܬ ܠܘܼܟ̣ ܬܚܘܿܬ ܐܲܩܠܘܼ̈ܟ̣؟ ܒܚܕܵܐ ܥܕܵܢܵܐ ܪܹܓܵܐ ܕܣܵܛܵܢܵܐ ܝܘܸܬ ܗ݉ܘܵܐ: ܐܝܼܬܵܐ ܗܸܟ̃ ܡܲܠܟܵܐ ܒܪܵܙܝܼܘܼܬܵܐ ܠܹܐ ܪܲܦܹܐ ܠܗ݉ܘܿܢ ܖ̈ܲܥܝܲܬܘܼܗܝ. ܒܸܚܫܵܒ̣ܵܐ ܝܘܸܬ ܕܣܵܛܵܢܵܐ ܒܸܬ ܫܵܒ̣ܸܩ ܕܥܵܒ̣ܕܸܬ ܐܲܝܟ̣ ܟܵܝܦܘܼܟ̣؟ ܠܵܐ: ܗ̇ܘ ܗܲܡܵܫܵܐ ܒܸܬ ܗܵܘܹܐ ܒܵܬ݉ܪܘܼܟ̣: ܣܵܒܵܒ ܐܝܟ̣ ܐܪܝܐ ܓܪܓܡܢܐ ܟܐ ܚܕܪ: ܘܟܐ ܛܥܐ ܒܬ݉ܪ ܡܢܝ ܕܒܠܥ. ܒܘܼܬ ܐܵܗܵܐ: ܟܪܸܣܛܝܵܢܵܐ: ܣܦܘܿܪ ܠܓ̰ܘܼܪܵܒܵܐ ܐܝܼܡܵܐ ܕܓܲܫܩܸܬ ܠܵܐܸܠܬܸܚ. ܡܸܢ݉ܕܪܸܫ݉: ܓܲܫܸܩ ܠܐܲܖ̈ܙܝܼܒܵܢܘܼܟ̣. ܐܲܝܟܵܐ ܝܘܸܬ؟ ܓܵܘ ܐܲܬܪܵܐ ܕܕܸܫ̃ܡܸܢ ܝܼܘܸܬ: ܢܘܼܟ̣ܪܵܝܵܐ ܘܣܵܦܵܪܟ̰ܝܼ. ܕܘܼܢܝܹܐ ܠܹܐ ܝܠܵܗ̇ ܕܵܘܣܬ ܕܝܼܘܼܟ̣: ܘܐܸܢ ܝܼܠܵܗ̇: ܒܲܣ ܐܲܢ݉ܬ ܠܹܐ ܝܘܸܬ ܕܵܘܣܬ ܕܐܲܠܵܗܵܐ: ܣܵܒܵܒ ܗ̇ܘ ܕܝܼܠܹܗ ܕܵܘܣܬ ܕܥܵܠܡܵܐ: ܕܸܫ̃ܡܸܢ ܕܐܲܠܵܗܵܐ ܝܠܹܗ. ܗ݉ܘܝܼ ܚܵܛܸܪܓ̰ܲܡܥ ܕܒܸܬ ܡܲܫ݉ܟ̰ܚܸܬ ܕܸܫ̃ܡܸܢܹ̈ܐ ܒܟܠ ܕܘܼܟܵܐ ܐܝܼܡܵܐ ܕܛܵܠܹܝܬ: ܬܲܚܡܸܢ ܕܡܲܢܝܘܼܚܹܐ ܝܘܸܬ ܓܵܘ ܡܲܝܕܵܢ ܕܦܠܵܫܵܐ. ܐܝܼܡܵܐ ܕܚܵܕܪܸܬ: ܙܕܸܥ ܡ̣ܢ ܕܸܫ̃ܡܸܢ ܒܟܠ ܕܘܼܟܵܐ. ܗܲܪ ܐܲܝܟ̣ ܦܝܼܫܬܵܐ ܝܠܵܗ̇ ܐ݉ܡܝܼܪܬܵܐ ܕܒܲܩܝܵܬܹ̈ܐ ܟܹܐ ܢܵܝܨܝܼ ܠܢܘܼܟ̣ܖ̈ܵܝܹܐ ܒܘܼܫ ܡ̣ܢ ܠܝܹܖ̈ܠܘܼܝܹܐ: ܗܲܕܟ̣ܵܐ: ܓ̰ܘܼܖ̈ܵܒܹܐ ܕܕܘܼܢܝܹܐ ܩܵܬܘܼܟ̣ ܒܘܼܫ ܚܵܖ̈ܝܼܦܹܐ ܒܸܬ ܗܵܘܝܼ. ܡܸܢܕܝܼ ܐ݉ܚܵܪܵܝܵܐ: ܓܲܫܸܩ ܓܵܘ ܓܵܢܘܼܟ̣: ܓܵܘ ܠܸܒܵܐ ܕܓܵܢܘܼܟ̣: ܘܦܵܟܸܪ ܡܘܼܕܝܼ ܐܝܼܬ ܬܵܡܵܐ. ܚܛܝܼܬܵܐ ܘܡܲܚܲܒܬܵܐ ܕܓܵܢܵܐ ܗܵܠܵܐ ܬܵܡܵܐ ܝܢܵܐ؟ ܒܲܣ ܣܦܘܿܪ ܠܝܲܠܨܘܼܝ: ܐܝܼܢܵܐ ܠܵܐ ܦܵܝܫܸܬ ܒܹܐ ܠܸܒܵܐ: ܣܵܒܵܒ ܐܲܠܵܗܵܐ ܥܲܡܘܼܟ̣ ܝܼܠܹܗ ܠܚܲܠܘܼܢܘܼܟ̣ ܘܠܗܲܝܘܼܪܘܼܟ̣. ܒܓܵܢܘܼܗܝ ܐ݉ܡܝܼܪܵܐ ܝܠܹܗ: ܥܡܗ ܝܘܢ ܐܢܐ ܒܥܩܘܝ: ܒܬ ܚܠܨܢܗ ܘܒܬ ܥܒ̣ܕܢ ܐܠܗ ܐܝܩܪܐ.