ܘܡܠܟܐ ܒܥܒ̣ܪܐ ܝܗ݉ܘܐ ܒܪܘܘܠܐ ܕܩܕܪܘܢ (ܒ. ܫܡܘܐܝܠ ܝܗ: 23)

ܕܵܘܝܼܕ ܡܲܠܟܵܐ ܥܒ̣ܝܼܪܹܗ ܒܗ̇ܘ ܪܵܘܘܼܠܵܐ ܟܲܕ ܒܹܥܪܵܩܵܐ ܝܗ݉ܘܵܐ ܡ̣ܢ ܒܪܘܿܢܘܼܗܝ ܝܵܓ̣ܝܼ. ܗ̇ܘ ܐ݉ܢܵܫܵܐ ܕܝܼܗ݉ܘܵܐ ܐܲܝܟ̣ ܠܸܒܵܐ ܕܡܵܪܝܵܐ: ܠܹܐ ܝܗ݉ܘܵܐ ܪܲܕ ܡ̣ܢ ܙܲܗܡܲܬܹ̈ܐ: ܚܲܝܘܼ̈ܗܝ ܡܸܠܝܹܐ ܝܗ݉ܘܵܘ ܡܸܢܵܝ. ܗ̇ܘ ܝܼܗ݉ܘܵܐ ܗܲܡ ܡܫܝܼܚܵܐ ܕܡܵܪܝܵܐ: ܗܲܡ ܡܘܼܠܝܸܨܵܐ ܕܡܵܪܝܵܐ: ܒܲܣ ܐܲܚܢܲܢ ܩܵܡܘܿܕܝܼ ܣܵܦܪܲܚ ܠܹܗܘܵܝܵܐ ܪܲܕ ܡ̣ܢ ܝܲܠܨܘܼܝ؟ ܐ݉ܢܵܫܹ̈ܐ ܒܘܼܫ ܡܲܫܗܘܼܪ ܕܓܸܢܣܲܢ ܩܲܕ݉ܡ ܕܲܖ̈ܘܵܙܹܐ ܕܦܵܫܲܡܬܵܐ ܟܹܠܝܹܐ ܝܢܵܐ: ܒܩܸܛܡܵܐ ܘܒܣܲܩܹ̈ܐ: ܒܲܣ ܐܲܚܢܲܢ ܩܵܡܘܿܕܝܼ ܛܲܪܛܸܡܲܚ ܐܲܝܟ̣ ܐܸܢ ܚܲܕ݉ ܡܸܢܕܝܼ ܩܵܪܝܼܒܵܝܵܐ ܩܘܼܘܸܡܵܐ ܝܠܹܗ ܥܲܠܲܢ؟

ܡܲܠܟܵܐ ܕܡܲܠܟܹ̈ܐ ܒܓܵܢܘܼܗܝ ܙܹܐ ܚܕܝܼܪܹܗ ܒܚܕܵܐ ܐܘܼܪܚܵܐ ܠܵܐ ܒܘܼܫ ܒܲܣܝܼܡܬܵܐ ܘܡܝܘܼܩܸܪܬܵܐ ܡ̣ܢ ܗ̇ܝ ܕܐܵܢܝܼ. ܗ̇ܘ ܥܒ̣ܝܼܪܹܗ ܒܫܵܩܝܼܬܵܐ ܫܸܚܬܵܢܬܵܐ ܕܩܸܕܪܘܿܢ ܕܒܝܼܘܼܗ̇ ܒܸܓ̰ܪܵܝܵܐ ܝܗ݉ܘܵܐ ܛܲܡܐܘܼܬܵܐ ܕܐܘܿܪܸܫܠܸܡ. ܗܲܓ̰ܲܬ ܓܘܼܪܬܵܐ ܕܚܵܕܘܼܬܵܐ ܝܠܵܗ̇ ܩܵܬܲܢ ܠܗܲܡܘܼܢܹܐ ܕܡܫܝܼܚܵܐ ܦܝܼܫ ܠܹܗ ܓ̰ܘܼܪܒܵܐ ܒܟܠ ܡܸܢܕܝܼ ܐܲܝܟ̣ ܕܝܼܲܢ. ܩܸܕܪܘܿܢ ܕܝܼܲܢ ܡܘܼܕܝܼ ܝܠܵܗ̇ ܒܐܵܗܵܐ ܩܲܝܕܵܡܬܵܐ؟ ܒܲܠܟܵܐ ܚܲܕ݉ ܕܵܘܣܬ ܠܵܐ ܡܗܘܼܡܢܵܐ: ܚܕܵܐ ܚܘܼܣܵܪܲܬ ܡܲܦܫܸܡܵܢܬܵܐ: ܚܲܕ݉ ܠܵܘܡܵܐ ܢܵܐܗܲܩ: ܚܕܵܐ ܩܹܘܲܢܕܹܢܘܿܣ ܡܲܙܕܸܥܵܢܬܵܐ. ܡܲܠܟܵܐ ܬܦܝܼܩ ܠܹܗ ܒܐܲܢܹܐ ܟܠܵܝ. ܒܲܠܟܵܐ ܨܲܢܓ̰ܘܼܝ ܦܲܓ̣ܪܵܢܵܝܬܵܐ ܝܠܵܗ̇: ܡܸܣܟܹܢܘܼܬܵܐ: ܟܵܡܲܪܬܵܐ: ܝܲܢ ܣܢܵܝܬܵܐ ܕܐ݉ܢܵܫܹ̈ܐ. ܟܠܵܝ ܐܲܢܹܐ ܩܸܕܖ̈ܘܿܢܹܐ ܥܒ̣ܝܼܪܵܝ ܝܠܹܗ ܡܲܠܟܵܐ ܡ̣ܢ ܩܲܕ݉ܡ ܕܝܼܲܢ. ܒܟܠܵܗ̇ ܥܹܩܘܼܝܲܢ ܐܸܠܹܗ ܥܝܼܩ ܠܵܗ̇. ܓܵܪܵܓ ܗܸܟ̃ ܠܵܐ ܚܵܫܒ̣ܲܚ ܠܵܙܸܡ ܝܼܠܵܗ̇ ܕܥܹܩܘܼܝܹ̈ܐ ܗܵܘܝܼ ܢܘܼܟ̣ܖ̈ܵܝܹܐ ܡܸܢܲܢ: ܣܵܒܵܒ ܗ̇ܘ ܕܝܼܠܹܗ ܪܹܫܵܐ ܕܟܠܵܝ ܩܲܕܝܼܫܹ̈ܐ ܩܘܼܒܠܵܝ ܝܠܹܗ ܟܠܵܝ ܐܲܢܹܐ ܝܲܠܨܘܼܝܹ̈ܐ.

ܐܵܦܸܢ ܕܵܘܝܼܕ ܦܝܼܫ ܠܹܗ ܡܘܼܟܸܦܵܐ ܘܡܘܼܦܫܸܡܵܐ: ܒܵܬ݉ܪ ܗܵܕܵܐ ܡܸܢ݉ܕܪܸܫ݉ ܕܝܼܪܹܗ ܠܡܕܝܼܢ݉ܬܘܼܗܝ ܒܓ̣ܵܠܸܒܘܼܬܵܐ: ܘܗܵܕܵܐ ܙܹܐ: ܡܵܪܵܐ ܕܕܵܘܝܼܕ ܩܝܼܡ ܠܹܗ ܡ̣ܢ ܩܲܒ̣ܪܵܐ ܒܓ̣ܵܠܸܒܘܼܬܵܐ: ܒܲܣ ܐܘܼܦ ܐܲܚܢܲܢ ܫܒ̣ܘܿܩ ܫܵܩܠܲܚ ܠܸܒܵܐ: ܣܵܒܵܒ ܐܝܼܬ ܩܲܕ݉ܡܲܢ ܓ̣ܵܠܸܒܘܼܬܵܐ. ܒܚܵܕܘܼܬܵܐ ܒܸܬ ܓܵܪܫܲܚ ܡ̈ܝܼܵܐ ܡ̣ܢ ܒܹܪܵܐ ܕܦܘܼܪܩܵܢܵܐ: ܐܵܦܸܢ ܐܵܕܝܼܵܐ ܩܵܐ ܚܲܕ݉ ܙܲܒ̣ܢܵܐ ܠܵܙܸܡ ܝܼܠܵܗ̇ ܕܥܵܒ̣ܪܲܚ ܒܫܵܩܝܼܵܬܹ̈ܐ ܛܲܡ̈ܐܹܐ ܕܚܛܝܼܬܵܐ ܘܦܵܫܲܡܬܵܐ. ܫܩܘܿܠܘܿܢ ܠܸܒܵܐ: ܣܲܖ̈ܒܵܙܹܐ ܕܙܩܝܼܦܵܐ: ܣܵܒܵܒ ܕܡܲܠܟܵܐ ܒܓܵܢܘܼܗܝ ܓ̣ܠܝܼܒ ܠܹܗ ܒܵܬ݉ܪ ܕܥܒ̣ܝܪܹܗ ܒܫܵܩܝܼܬܵܐ ܕܩܸܕܪܘܿܢ: ܘܗܵܕܵܐ ܐܘܼܦ ܐܲܚܬܘܿܢ.