ܩܡܘ: ܟܐ ܥܒ̣ܕ ܩܬܘܗܝ ܒܪܢܫܐ ܐܠܗ̈ܐ: ܘܐܢܝ ܠܐ ܝܢܐ ܐܠܗ̈ܐ؟ (ܐܪܡܝܐ ܝܘ: 20)

ܚܕܵܐ ܚܛܝܼܬܵܐ ܪܹܫܵܝܬܵܐ ܕܒܢܲܝ̈ ܝܼܣܪܵܝܹܠ ܣܓ̣ܵܕܬܵܐ ܕܨܵܢܲܡܹ̈ܐ ܝܗ݉ܘܵܐ: ܘܐܘܼܦ ܝܼܣܪܵܝܹܠ ܪܘܼܚܵܢܵܝܵܐ ܟܹܐ ܦܵܐܸܫ ܓܪܝܼܫܵܐ ܠܗ̇ܘ ܡܵܝܠ. ܟܵܘܟ̣ܒ̣ܹܗ ܕܪܦܵܢ ܐ݉ܚܹܪ݉ܢܵܐ ܠܹܐ ܙܵܪܸܩ: ܒܲܟ̣ܬܵܬܹ̈ܐ ܐܵܕܝܼܵܐ ܠܹܐ ܒܵܟ̣ܝܼ ܠܬܲܡܘܼܙ: ܐܝܼܢܵܐ ܡܵܡܘܿܢܵܐ ܐܘܼܦ ܐܵܕܝܼܵܐ ܟܹܐ ܡܲܩܸܡ ܠܡܘܼܓ̰ܘܼܗܝ ܕܕܲܗܒ̣ܵܐ: ܘܡܲܕܒܚܹ̈ܐ ܕܫܘܼܒ̣ܗܵܪܵܐ ܗܵܠܵܐ ܠܹܐ ܝܢܵܐ ܡܘܼܣܠܝܹܐ. ܡܲܚܲܒܬܵܐ ܕܓܵܢܵܐ ܒܟ̰ܲܫܢܝܼܘܼ̈ܗ̇ ܦܖ̈ܝܼܫܹܐ ܒܸܦܠܵܫܵܐ ܝܠܵܗ̇ ܩܵܐ ܕܙܲܒܛܸܢܵܐ ܠܓܘܼܒܝܹ̈ܐ ܠܗܘܼܟܡܘܼܗ̇: ܘܒܸܣܪܵܐ ܟܹܐ ܡܲܩܸܡ ܡܲܕܒܚܘܼ̈ܗܝ ܟܠ ܐܲܝܟܵܐ ܕܡܲܫ݉ܟ̰ܘܼܚܵܐ ܝܠܹܗ ܕܘܼܟܵܐ ܩܵܬܵܝ. ܝܵܠܹ̈ܐ ܡܘܼܚܸܒܹ̈ܐ ܪܵܒܵܐ ܓܵܗܹ̈ܐ ܒܹܗܘܵܝܵܐ ܝܢܵܐ ܒܵܥܸܣ ܕܪܵܒܵܐ ܚܛܝܼܬܵܐ ܒܗܲܡܸܢܵܢܹ̈ܐ. ܡܵܪܝܵܐ ܟܹܐ ܦܵܫܸܡ ܐܝܼܡܵܐ ܕܚܵܙܹܐ ܠܲܢ ܡܲܚܘܼܒܵܝ ܙܵܘܕܵܐ ܡ̣ܢ ܠܵܙܸܡ. ܝܲܢ ܒܸܬ ܗܵܘܝܼ ܐܸܠܲܢ ܚܕܵܐ ܠܵܘܛܬܵܐ ܓܘܼܪܬܵܐ ܐܲܝܟ̣ ܕܐܲܒ̣ܫܵܠܘܿܡ ܗ݉ܘܹܐ ܠܹܗ ܠܕܵܘܝܼܕ: ܝܲܢ ܒܸܬ ܦܵܝܫܝܼ ܫܩܝܼܠܹܐ ܡܸܢܲܢ ܠܸܫܒ̣ܵܩܘܼܗܝ ܒܲܝܬܲܢ ܡܘܼܫܲܡܝܼܪ.

ܣܲܪܲܣܬ ܝܼܠܵܗ̇ ܗ̇ܝ ܗܸܡܸܙܡܵܢ: ܘܐܢܝ ܠܐ ܝܢܐ ܐܠܗ̈ܐ: ܣܵܒܵܒ ܕܐܵܢܝܼ ܡܸܢܕܝܼܵܢܹ̈ܐ ܕܥܲܠܵܝ ܟܹܐ ܡܲܬܒ̣ܲܚ ܚܘܼܒܲܢ ܠܲܐܟ̣ܵܐ ܡܸܢܕܝܼܵܢܹ̈ܐ ܠܵܐ ܦܵܝܫܵܢܹ̈ܐ ܝܢܵܐ: ܘܗ̇ܝ ܚܵܕܘܼܬܵܐ ܕܒܝܼܵܗܒ̣ܲܢ ܝܢܵܐ ܙܹܐ ܡܵܪܹܐ ܩܹܘܲܢܕܹܢܘܿܣ ܝܼܠܵܗ̇ ܩܵܬܲܢ: ܐܘܼܦ ܠܹܐ ܡܵܨܝܼ ܝܲܗܒ̣ܝܼ ܠܲܢ ܪܵܒܵܐ ܗܲܝܲܪܬܵܐ ܒܥܕܵܢܵܐ ܕܟ̰ܵܬܘܿܢܘܼܬܵܐ. ܒܲܣ ܩܵܡܘܿܕܝܼ ܦܵܝܫܲܚ ܫܘܼܕܸܢܹܐ ܒܗܵܒܵܣܘܼܝܵܬܹ̈ܐ؟ ܐܲܚܢܲܢ ܟܹܐ ܡܲܣܠܲܚ ܠܚܲܢܦܹ̈ܐ ܡܸܣܟܹܢܹ̈ܐ ܐܵܢܝܼ ܕܟܹܐ ܣܵܓ̣ܕܝܼ ܠܐܲܠܵܗܵܐ ܕܟܹܐܦܵܐ: ܐܝܼܢܵܐ ܒܓܵܢܲܢ ܠܐܲܠܵܗܵܐ ܕܕܲܗܒ̣ܵܐ ܟܹܐ ܣܵܓ̰ܕܲܚ. ܢܝܼܲܬ ܚܸܪܒܵܐ: ܘܚܛܝܼܬܵܐ: ܘܢܲܙܵܢܘܼܬܵܐ ܒܬܸܪܘܵܝ ܒܵܪܵܒܵܪ ܝܼܢܵܐ: ܘܗܵܠܵܐ ܚܛܝܼܬܵܐ ܕܝܼܲܢ ܒܘܼܫ ܓܘܼܪܬܵܐ ܝܠܵܗ̇ ܣܵܒܵܒ ܩܘܼܒܠܹܐ ܝܘܲܚ ܒܲܗܪܵܐ ܘܒܸܚܛܵܝܵܐ ܝܘܲܚ ܓܵܘ ܒܲܗܪܵܐ. ܚܲܢܦܵܐ ܟܹܐ ܣܵܓ̣ܸܕ ܠܐܲܠܵܗܵܐ ܕܲܓܵܠܵܐ: ܟܲܕ ܠܹܐ ܝܠܹܗ ܝܕܝܼܥܵܐ ܠܐܲܠܵܗܵܐ ܫܲܪܝܼܪܵܐ. ܐܲܚܢܲܢ ܚܛܝܼܬܵܐ ܕܬܪܹܝ ܬܵܩܹ̈ܐ ܟܹܐ ܥܵܒ̣ܕܲܚ: ܒܗ̇ܝ ܕܟܹܐ ܩܲܒܠܲܚ ܡ̣ܢ ܐܲܠܵܗܵܐ ܚܵܝܵܐ ܘܣܵܓ̣ܕܲܚ ܠܨܵܢܲܡܹ̈ܐ. ܡܵܪܝܵܐ ܕܵܟ̣ܹܐ ܠܲܢ ܟܠܲܢ ܡ̣ܢ ܐܵܗܵܐ ܥܵܘܠܵܐ ܨܵܘܵܢܵܐ!

ܠܨܵܢܲܡܹ̈ܐ ܣܵܘܓܘܿܠ ܕܩܘܼܒܠܵܐ ܝܘܸܢ

ܐܵܦܸܢ ܕܚܸܠܝܹ̈ܐ ܗܵܘܝܼ

ܗܲܝܸܪܝܼ ܕܡ̣ܢ ܠܸܒܝܼ ܦܲܠܛܸܢ

ܘܗܵܘܹܝܢ ܕܝܼܘܼܟ̣ ܐܲܚܟ̰ܝܼ.