ܐ݉ܝܪ 6
ܒܝܗ ܥܪܩܘܠܐ ܝܘܚ (ܐ. ܝܘܚܢܢ ܕ: 13)
ܒܵܥܹܝܬ ܚܲܕ݉ ܒܲܝܬܵܐ ܩܵܐ ܓܵܢܘܼܟ̣؟ ܒܲܩܘܿܪܵܐ ܝܘܸܬ: ܡܘܼܕܝܼ ܝܠܹܗ ܛܝܼܡܘܼܗܝ؟ ܛܝܼܡܘܼܗܝ ܒܵܨܘܿܪܵܐ ܝܠܹܗ ܡ̣ܢ ܕܐܲܨܠܵܐ ܫܲܒ̣ܗܸܪܵܢܵܐ ܕܒܲܪܢܵܫܵܐ ܒܵܥܹܐ. ܕܠܵܐ ܙܘܼܙܹ̈ܐ ܘܕܠܵܐ ܛܝܼܡܵܐ ܝܠܹܗ. ܐܲܢ݉ܬ ܒܵܥܹܝܬ ܝܲܗܒ̣ܸܬ ܚܲܕ݉ ܨܦܵܝܝܼ ܛܝܼܡܵܐ؟ ܒܵܥܹܝܬ ܥܵܒ̣ܕܸܬ ܚܲܕ݉ ܡܸܢܕܝܼ ܓܘܼܪܵܐ ܠܸܩܢܵܝܵܐ ܠܡܫܝܼܚܵܐ؟ ܒܲܣ ܠܹܐ ܡܵܨܹܝܬ ܕܙܵܒ̣ܢܸܬ ܠܹܗ: ܣܵܒܵܒ ܕܠܲܝܬ ܠܹܗ ܛܝܼܡܵܐ. ܪܵܙܝܼ ܝܼܘܸܬ ܕܕܵܒ̣ܩܸܬ ܠܹܗ ܒܲܝܬܵܐ ܕܐܵܓ̣ܵܝܝܼ ܒܐܹܓ̰ܵܪܵܐ ܩܵܐ ܟܠܵܗ̇ ܐܵܒܵܕܘܼܬܵܐ: ܘܠܵܐ ܦܲܪܥܸܬ ܗܸܟ̃ ܡܸܢܕܝܼ ܡܵܓܲܪ ܐܲܚܟ̰ܝܼ ܟܸܪܝܼ ܕܚܘܼܒܵܐ ܘܕܦܘܼܠܚܵܢܵܐ ܩܵܬܘܼܗܝ ܗܲܠ ܐܵܒܵܕ؟ ܪܵܙܝܼ ܝܼܘܸܬ ܕܫܵܩܠܸܬ ܡܫܝܼܚܵܐ ܘܥܵܡܪܸܬ ܒܝܼܹܗ؟ ܚܙܝܼ: ܐܵܗܵܐ ܒܲܝܬܵܐ ܐܝܼܬ ܠܹܗ ܟܠ ܡܸܢܕܝܼ ܕܒܵܥܹܝܬ. ܡܸܠܝܵܐ ܝܠܹܗ ܡ̣ܢ ܕܵܘܸܠܬܵܐ ܙܵܘܕܵܐ ܡ̣ܢ ܣܢܝܼܩܘܼܬܘܼܟ̣ ܒܟܠܵܝ ܚܲܝܘܼ̈ܟ̣. ܠܲܐܟ̣ܵܐ ܟܹܐ ܡܵܨܹܝܬ ܠܹܥܒ̣ܵܕܵܐ ܚܲܒ̣ܪܵܘܵܝܘܼܬܵܐ ܟ̰ܸܡ ܚܠܘܼܨܬܵܐ ܥܲܡ ܡܫܝܼܚܵܐ ܘܠܸܚܕܵܝܵܐ ܒܚܘܼܒܘܼܗܝ. ܠܲܐܟ̣ܵܐ ܐܝܼܬ ܨܘܼܦܖܹ̈ܐ ܡܸܠܝܹ̈ܐ ܡ̣ܢ ܡܹܐܟ̣ܘܼܠܝܵܬܹ̈ܐ ܕܡܵܠܝܼ ܩܵܐ ܬܘܼܪܣܵܝܘܼܟ̣ ܗܲܠ ܐܵܒܵܕ. ܓܵܘ ܐܵܗܵܐ ܒܲܝܬܵܐ ܟܹܐ ܡܲܫ݉ܟ̰ܚܸܬ ܢܝܵܚܬܵܐ ܒܡܫܝܼܚܵܐ ܐܝܼܡܵܐ ܕܗܵܘܹܝܬ ܓ̰ܸܗܝܵܐ: ܘܡܲܐܟ̣ܵܐ ܟܹܐ ܡܵܨܹܝܬ ܓܲܫܩܸܬ ܘܚܵܙܹܝܬ ܠܵܗ̇ ܫܡܲܝܵܐ ܒܓܵܢܘܼܗ̇. ܒܵܥܹܝܬ ܠܹܗ ܐܵܗܵܐ ܒܲܝܬܵܐ؟ ܐܸܢ ܕܠܵܐ ܒܲܝܬܵܐ ܝܘܸܬ: ܒܸܬ ܐܵܡܪܸܬ: ܗܹܐ: ܒܵܥܸܢܹܗ ܗ̇ܘ ܒܲܝܬܵܐ: ܐܝܼܢܵܐ ܡܸܓ̰ܸܕ ܒܸܬ ܦܵܐܸܫ ܝܘܼܗܒ̣ܵܐ ܩܵܬܝܼ؟ ܗܹܐ: ܕܘܼ ܝܠܹܗ ܩܕܝܼܠܵܐ ــ ܬܵܐ ܠܟܸܣ ܝܑܼܫܘܿܥ. ܐܝܼܢܵܐ ܒܲܠܟܵܐ ܒܹܐܡܵܪܵܐ ܝܘܸܬ: ܐܵܢܵܐ ܡܸܣܟܹܢܵܐ ܘܟ̰ܸܢܓܸܪܵܢܵܐ ܝܘܸܢ: ܠܹܐ ܚܵܫܚܸܢ ܩܵܐ ܗ̇ܘ ܒܲܝܬܵܐ: ܐܝܼܢܵܐ ܙܵܪܵܪ ܠܲܝܬ: ܐܝܼܬ ܠܒ̣ܸܫܝܵܬܹ̈ܐ ܓܵܘܘܼܗܝ. ܐܸܢ ܒܸܪܥܵܫܵܐ ܝܘܸܬ ܒܓܘܼܢܵܗܟܵܪܘܼܬܵܐ ܕܚܛܝܼܬܘܼܟ̣: ܡܸܢ݉ܕܪܸܫ݉ ܬܵܐ: ܣܵܒܵܒ ܐܵܦܸܢ ܕܠܹܐ ܚܵܫܚܸܬ ܩܵܐ ܗ̇ܘ ܒܲܝܬܵܐ: ܡܫܝܼܚܵܐ ܒܸܬ ܡܲܚܫܸܚ ܠܘܼܟ̣ ܩܵܬܘܼܗܝ ܒܵܬ݉ܪ ܚܲܕ݉ܟ̰ܵܐ. ܒܸܬ ܚܲܠܸܠ ܠܘܼܟ̣ ܘܒܸܬ ܕܵܟ̣ܹܐ ܠܘܼܟ̣: ܘܗ̇ܝܓܵܗ ܒܸܬ ܡܵܨܹܝܬ ܠܸܙܡܵܪܵܐ: ܒܝܗ ܥܪܩܘܠܐ ܝܘܚ. ܗܲܡܸܢܵܢܵܐ: ܬܠܵܬ݉ ܓܵܗܹ̈ܐ ܛܘܼܒ̣ܵܐ ܐܸܠܘܼܟ ܐܸܢ ܗܵܘܹܐ ܠܘܼܟ̣ ܚܲܕ݉ ܗܲܕܟ̣ܵܐ ܒܲܝܬܵܐ ܡܲܥܡܪܵܐ! ܛܘܼܒ̣ܵܐ ܠܟܠ ܕܥܵܡܸܪ ܓܵܘ ܐܵܗܵܐ ܒܲܝܬܵܐ: ܣܵܒܵܒ ܕܐܵܒܵܕܝܼܢܵܝܵܐ ܝܠܹܗ. ܐܝܼܡܵܐ ܐܵܗܵܐ ܕܘܼܢܝܹܐ ܥܵܒ̣ܪܵܐ ܐܲܝܟ̣ ܚܸܠܡܵܐ: ܒܲܝܬܲܢ ܡܸܢ݉ܕܪܸܫ݉ ܟܵܠܝܵܢܵܐ ܒܸܬ ܗܵܘܹܐ: ܒܘܼܫ ܦܵܝܫܵܢܵܐ ܡ̣ܢ ܡܲܪܡܲܪ ܘܒܘܼܫ ܩܘܼܝܵܐ ܡ̣ܢ ܩܵܝܹ̈ܐ ܕܛܘܼܖ̈ܵܢܹܐ. ܥܵܠܡܝܼܢܵܝܵܐ ܐܲܝܟ̣ ܐܲܠܵܗܵܐ: ܣܵܒܵܒ ܐܲܠܵܗܵܐ ܒܓܵܢܘܼܗܝ ܝܠܹܗ: ܒܝܼܘܼܗܝ ܒܹܥܡܵܪܵܐ ܝܘܲܚ.