ܘܐ݉ܙܝܠ ܠܗ݉ܘܢ ܒܬ݉ܪܗ ܟܢܫ̈ܐ ܪܒܐ: ܘܒܘܣܡ ܠܗ ܠܟܠܝ (ܡܬܝ ܝܒ: 15)

ܟܡܵܐ ܡܲܖ̈ܥܹܐ ܪܵܒܵܐ ܘܬܵܗܵܖܹ̈ܐ ܨܵܘܵܢܹ̈ܐ ܚܙܹܐ ܠܹܗ ܡܫܝܼܚܵܐ! ܐܝܼܢܵܐ ܡܸܢ݉ܕܪܸܫ݉ ܠܹܐ ܝܘܲܚ ܒܸܩܪܵܝܵܐ ܕܟܹܐ ܓܲܢܓܸܨ ܗ݉ܘܵܐ ܡܸܢܵܝ: ܐܸܠܵܐ ܚܡܝܼܠ ܠܹܗ ܒܟܠܵܝ ܡܖ̈ܝܼܥܹܐ ܒܪܵܙܝܼܘܼܬܵܐ. ܕܵܐܟ̣ܝܼ ܓ̰ܘܼܪܖܹ̈ܐ ܓ̰ܘܼܪܖܹ̈ܐ ܕܡܲܖ̈ܥܹܐ ܡܘܼܝܹܬ݉ ܠܗ݉ܘܿܢ ܠܟܸܣܠܘܼܗܝ! ܕܵܐܟ̣ܝܼ ܟ̰ܝܼܒܵܢܹ̈ܐ ܘܕܲܖ̈ܒܵܬܹܐ ܚܖ̈ܝܼܒ̣ܹܐ ܘܓܲܢܓܸܨܵܢܹ̈ܐ! ܐܝܼܢܵܐ ܗ̇ܘ ܗܲܡܵܫܵܐ ܗܵܙܸܪ ܝܼܗ݉ܘܵܐ ܩܵܐ ܟܠ ܟ̰ܲܫܢܝܼ ܦܪܝܼܫܬܵܐ ܕܟܵܖܹ̈ܐ ܨܵܘܵܢܹ̈ܐ ܕܚܛܝܼܬܵܐ: ܘܟܠܵܝ ܓ̣ܠܝܼܒܵܝ ܠܹܗ. ܡ̣ܢ ܟܠ ܓܹܒܵܐ ܕܡܵܚܹܐ ܗ݉ܘܵܐ ܓܹܐܪܵܐ ܕܡܲܪܥܵܐ ܗ̇ܘ ܒܘܼܛܸܠ ܠܹܗ ܚܲܝܠܘܼܗܝ ܢܘܼܪܵܢܵܐ. ܚܸܡܵܐ ܕܚܲܡܚܲܡܬܵܐ ܝܲܢ ܩܲܪܬܵܐ ܕܡܲܪܓܲܕܬܵܐ: ܫܦܝܼܠܘܼܬܵܐ ܝܲܢ ܫܹܐܕܵܢܘܼܬܵܐ: ܛܲܡܐܘܼܬܵܐ ܕܓܸܪܒ̣ܵܐ ܝܲܢ ܚܘܼܒ̣ܝܵܐ ܕܣܸܡܝܘܼܬܵܐ ــ ܟܠܵܝ ܝܕܸܥ ܠܗ݉ܘܿܢ ܠܗܘܼܟܡܵܐ ܕܗܸܡܸܙܡܵܢܘܼܗܝ ܘܥܪܝܼܩ ܠܗ݉ܘܿܢ ܡ̣ܢ ܩܲܕ݉ܡ ܡܲܢܟ̣ܲܣܬܘܼܗܝ. ܒܟܠܵܝ ܣܵܡܹ̈ܐ ܕܡܲܝܕܵܢ ܕܦܠܵܫܵܐ ܓ̣ܠܝܼܒ ܠܹܗ ܠܚܛܝܼܬܵܐ ܕܕܸܫ̃ܡܸܢ. ܐܘܼܦ ܒܐܵܗܵܐ ܩܵܝܕܲܡܬܵܐ ܗܲܕܟ̣ܵܐ ܝܠܵܗ̇: ܟܠ ܕܝܼܠܹܗ ܡܲܪܥܝܼ: ܗܲܟܝܼܡ ܛܵܒ̣ܵܐ ܟܹܐ ܡܵܨܹܐ ܠܒܲܣܘܼܡܝܼ: ܘܟܠ ܕܵܐܟ̣ܝܼ ܕܗܵܘܝܵܐ ܐܲܗܘܵܠ ܕܐ݉ܚܹܖ̈݉ܢܹܐ ܙܹܐ ܕܦܲܪܦܸܠܸܢ ܒܘܼܬ ܕܝܼܵܝ ܒܐܵܗܵܐ ܩܵܝܕܲܡܬܵܐ: ܐܘܼܦ ܒܘܼܬ ܐܵܢܝܼ ܟܹܐ ܡܵܨܝܵܐ ܕܗܵܘܝܵܐ ܠܝܼ ܗܹܒ̣ܝܼ ܕܒܸܬ ܩܲܒܠܝܼ ܡ̣ܢ ܡܫܝܼܚܵܐ ܒܵܣܲܡܬܵܐ ܡ̣ܢ ܚܛܝܼܵܬܵܝ̈. ܐܸܢ ܚܲܕ݉ ܡ̣ܢ ܝܵܠ̈ܝܼ ܝܠܹܗ: ܝܲܢ ܚܲܕ݉ ܡ̣ܢ ܕܵܘܣܬܝܼ̈ ܘܚܸܙܡܝܼ̈: ܝܲܢ ܚܲܕ݉ ܕܝܼܠܹܗ ܟ̰ܸܡ ܣܵܘܓܘܿܠ ܩܵܬܝܼ: ܟܹܐ ܡܵܨܹܝܢ ܦܵܝܫܸܢ ܒܗܹܒ̣ܝܼ ܒܘܼܬ ܟܠ ܚܲܕ݉ ܡܸܢܵܝ: ܟܲܕ ܕܵܟ̣ܪܸܢ ܚܲܝܠܵܐ ܒܵܣܡܵܢܵܐ ܕܐܵܓ̣ܵܝܝܼ. ܐܘܼܦ ܒܘܼܬ ܓܵܢܝܼ: ܙܵܪܵܪ ܠܲܝܬ ܟܡܵܐ ܩܸܫܝܵܐ ܗ݉ܘܝܼܵܐ ܝܠܹܗ ܦܠܵܫܝܼ ܥܲܡ ܚܛܝܼܵܬܝܼ̈ ܘܙܲܒܘܼܢܘܼܝܵܬܝܼ̈: ܡܸܢ݉ܕܪܸܫ݉ ܟܹܐ ܡܵܨܹܝܢ ܗܵܘܹܝܢ ܠܸܒܵܢܵܐ. ܗ̇ܘ ܕܓܵܘ ܕܘܼܢܝܹܐ ܗܲܟܝܼܡ ܝܼܗ݉ܘܵܐ ܩܵܐ ܟܠܵܝ ܐ݉ܢܵܫܹ̈ܐ: ܐܘܼܦ ܐܵܕܝܼܵܐ ܟܹܐ ܝܲܗܒ̣ܸܠ ܕܲܪܡܵܢܵܐ ܕܫܵܦܵܩܲܬܘܼܗܝ ܘܟܹܐ ܦܵܠܸܚ ܥܵܓ̰ܸܒܘܼܝܵܬܹ̈ܐ ܒܐܵܪܵܠܸܓ̣ ܕܒܢܲܝ̈ܢܵܫܵܐ. ܒܲܣ ܐܵܙܹܠ݉ܢ ܠܟܸܣܠܘܼܗܝ ܓ̰ܲܠܕܹܐ ܘܒܢܹܓܵܪܵܢܘܼܬܵܐ.

ܚܘܼܫ ܕܡܝܵܩܪܸܢܹܗ ܒܐܵܗܵܐ ܩܵܝܕܲܡܬܵܐ ܒܘܼܬ ܒܵܣܲܡܬܹܗ ܕܡܲܖ̈ܥܹܐ ܖ̈ܘܼܚܵܢܵܝܹܐ ܕܒܘܼܬ ܕܝܼܵܝ ܒܘܼܫ ܡܲܫܗܘܼܪ ܝܼܠܹܗ. ܒܘܼܣܡܵܐ ܝܠܹܗ ܒܫܩܵܠܬܵܐ ܕܡܲܖ̈ܥܲܢ ܥܲܠ ܓܵܢܘܼܗܝ. ܒܡܚܘܬܘ̈ܗܝ ܦܝܫ ܠܢ ܒܘܣܡܐ. ܥܹܕܬܵܐ ܕܓܵܘ ܕܘܼܢܝܹܐ ܡܠܝܼܬܵܐ ܝܠܵܗ̇ ܡ̣ܢ ܓܵܢܵܬܹ̈ܐ ܕܦܝܼܫ ܠܗ݉ܘܿܢ ܒܘܼܣܡܹܐ ܒܐܝܼܕܵܐ ܕܗܲܟܝܼܡ ܡܘܼܚܸܒܵܐ: ܐܘܼܦ ܥܵܡܖ̈ܵܢܹܐ ܕܫܡܲܝܵܐ ܟܹܐ ܡܵܘܕܝܼ ܕܟܠܵܝ ܡܸܢܘܼܗܝ ܦܝܼܫ ܠܗ݉ܘܿܢ ܒܘܼܣܡܹܐ. ܓܵܢܝܼ: ܗܲܩܝܼ ܒܘܼܬ ܫܵܦܵܩܲܬܘܼܗܝ ܘܚܘܼܫ ܕܗܘܐ ܠܡܪܝܐ ܫܡܐ: ܠܢܝܫܢܩܐ ܕܥܠܡ ܕܠܐ ܦܐܫ ܩܛܝܥܐ.