ܗܘ ܕܩܡ ܒܪܟ̣ ܠܢ ܒܟܠܝ ܒܘܖ̈ܟܬܐ ܕܪܘܚܐ (ܐܦܣܝ̈ܐ ܐ: 3)

ܟܠܵܗ̇ ܛܵܒ̣ܘܼܬܵܐ ܕܲܥܒ̣ܲܪ: ܕܩܲܐܸܡ: ܘܕܲܥܬܝܼܕ ܐܲܠܵܗܵܐ ܒܝܼܲܗܒ̣ܘܼܗ̇ ܝܠܹܗ ܩܵܐ ܛܵܝܸܦܘܼܗܝ. ܒܕܵܘܖܹ̈ܐ ܥܒ̣ܝܼܖܹ̈ܐ ܡܵܪܹܐ ܣܸܪ ܡܫܝܼܚܵܐ ܝܗ݉ܘܵܐ ܓܘܼܒܝܵܐ ܕܒܵܒܘܼܗܝ: ܘܒܓܵܒܵܝܬܵܐ ܕܗ̇ܘ ܐܘܼܦ ܐܲܚܢܲܢ ܩܘܼܒܸܠ ܠܲܢ ܛܵܒ̣ܬܵܐ ܒܗ̇ܝ ܕܒܝܼܘܼܗܝ ܦܝܼܫ ܠܲܢ ܓܘܼܒܝܹܐ ܡ̣ܢ ܩܲܕ݉ܡ ܒܸܢܝܲܬܹ̈ܐ ܕܥܵܠܡܵܐ. ܗܵܐ ܡ̣ܢ ܐܵܒܵܕ ܐܝܼܬ ܗ݉ܘܵܐ ܠܹܗ ܗܲܩ ܟܵܡܝܼܠ ܕܒܪܘܿܢܘܼܬܵܐ ܐܲܝܟ̣ ܒܘܼܟ̣ܪܵܐ ܝܼܚܝܼܕܵܝܵܐ ܕܒܵܒܘܼܗܝ: ܐܝܼܬܵܐ ܗ̇ܘ ܒܕܵܘܸܠܬܵܐ ܕܫܵܦܵܩܲܬܘܼܗܝ ܐܘܼܦ ܐܸܠܲܢ ܡܘܼܪܡܵܐ ܝܠܹܗ ܠܒܪܘܿܢܘܼܬܵܐ ܒܚܘܼܕܵܬܵܐ ܘܒܡܲܬܲܒ̣ܬܵܐ ܕܒܢܘܿܢܹ̈ܐ: ܗܲܕܟ̣ܵܐ ܕܐܸܠܲܢ ܝܘܼܗܒ̣ܵܐ ܠܹܗ ܗܘܼܟܡܵܐ ܠܹܗܘܵܝܵܐ ܒܢܘܿܢܹ̈ܐ ܕܐܲܠܵܗܵܐ. ܩܵܘܠܵܐ ܥܵܠܡܝܼܢܵܝܵܐ: ܫܘܼܬܐܸܣܵܐ ܒܙܵܡܝܼܢܘܼܬܵܐ ܘܡܘܼܩܘܝܼܵܐ ܒܡܵܘ̈ܡܵܬܵܐ ܥܲܡܲܢ ܦܝܼܫܵܐ ܝܠܹܗ ܥܒ̣ܝܼܕܵܐ: ܩܵܐ ܝܲܗܒ̣ܲܠܬܲܢ ܠܸܒܵܐ ܘܡܲܩܘܵܝܬܲܢ.  ܒܡܲܖ̈ܝܲܙܝܵܬܹܐ ܐܵܒܵܕܝܼܢܵܝܹ̈ܐ ܕܥܵܩܸܠܕܵܪܘܼܬܵܐ ܕܡܕܲܒܪܵܢܘܼܬܵܐ ܐܲܠܵܗܵܝܬܵܐ ܥܲܝܢܵܐ ܕܡܵܪܲܢ ܝܑܼܫܘܿܥ ܒܕܵܝܸܡܘܼܬܵܐ ܥܲܠܲܢ ܬܝܼܟܬܵܐ ܝܗ݉ܘܵܐ: ܘܟܹܐ ܡܵܨܲܚ ܗܵܘܲܚ ܟ̰ܸܡ ܚܵܛܸܪܓ̰ܲܡܥ ܕܓܵܘ ܟܠܹܗ ܟܸܪܟ̣ܵܐ ܕܫܲܚܠܲܦܝܵܬܹ̈ܐ ܕܙܲܒ̣ܢܵܐ ܠܲܝܬ ܐܘܼܦ ܚܲܕ݉ ܓ̰ܲܪܓܵܐ ܕܝܼܠܹܗ ܠܕܲܪܩܘܼܒ̣ܠ ܕܚܵܝܪ ܕܙܒ̣ܝܼܢܘܼ̈ܗܝ. ܛܵܠܵܒܘܼܬܵܐ ܓܘܼܪܬܵܐ ܕܫܵܗܙܵܕܵܐ ܕܐܝܼܩܵܪܵܐ ܕܝܼܲܢ ܝܼܠܵܗ̇: ܣܵܒܵܒ ܐܲܚܢܲܢ ܦܝܼܫܵܐ ܝܘܲܚ ܛܠܝܼܒܹܐ ܩܵܬܘܼܗܝ ܕܵܐܟ̣ܝܼ ܕܒܸܬ ܗܵܘܝܵܐ ܡܲܥܠܘܼܡ ܒܚܠܘܼܠܘܼܗܝ ܩܲܕܝܼܫܵܐ ܕܒܸܬ ܗܵܘܹܐ ܒܵܬ݉ܪ ܚܲܕ݉ܟ̰ܵܐ. ܡܸܬܒܲܪܢܵܫܘܼܬܵܐ ܥܓ̰ܝܼܒܬܵܐ ܕܐܲܠܵܗܵܐ ܕܫܡܲܝܵܐ ܥܲܡ ܟܠܵܗ̇ ܡܲܡܟܲܟ̣ܬܵܐ ܘܡܲܟܲܦܬܵܐ ܕܓܵܢܘܼܗܝ ܡܲܥܓ̰ܸܒܵܢܬܵܐ ܩܵܬܲܢ ܦܝܼܫ ܠܗ݉ܘܿܢ ܥܒ̣ܝܼܕܹܐ. ܩܲܡܟ̰ܝܼ: ܕܲܥܬܵܐ ܕܕܸܡܵܐ: ܘܙܩܝܼܦܵܐ: ܗܲܠ ܐܵܒܵܕ ܕܝܼܲܢ ܝܼܢܵܐ. ܟܠܵܝ ܦܠܵܛܹ̈ܐ ܡܸܠܝܹ̈ܐ ܡ̣ܢ ܒܘܼܪܟܬܵܐ ܕܗ݉ܘܹܐ ܠܗ݉ܘܿܢ ܡ̣ܢ ܡܲܨܝܲܬܬܵܐ ܟܵܡܝܼܠ: ܡ̣ܢ ܦܘܼܚܵܠܵܐ ܬܘܼܡܸܡܵܐ: ܡ̣ܢ ܩܝܵܡܬܵܐ: ܐ݉ܣܵܩܬܵܐ: ܘܢܵܘܸܢܓ̰ܝܼܘܼܬܵܐ: ܟܠܵܝ ܕܝܼܲܢ ܝܼܢܵܐ ܒܚܲܠܥܲܬ ܕܓܵܢܘܼܗܝ. ܫܸܡܵܢ̈ܲܢ ܐܵܕܝܼܵܐ ܥܲܠ ܒܪܵܬ݉ ـ ܨܲܕܪܘܼܗܝ ܝܢܵܐ: ܘܒܥܲܖ̈ܙܘܼܗܝ ܚܲܝܠܵܢܹ̈ܐ ܕܩܲܕ݉ܡ ܬܪܘܿܢܘܿܣ ܟܹܐ ܕܵܟ̣ܸܪ ܠܟܠ ܚܲܕ݉ ܡܸܢܲܢ ܘܟܹܐ ܡܲܩܪܸܒ̣ ܒܵܥܘܼܝܵܬܹ̈ܐ ܒܡܵܕܵܠܲܢ. ܗܘܼܟܡܵܐ ܕܐܝܼܬ ܠܹܗ ܥܲܠ ܡܲܠܟܘܵܬܹ̈ܐ ܘܫܘܼܠܛܵܢܹ̈ܐ ܘܙܲܪܝܼܦܘܼܬܘܼܗܝ ܟܵܡܝܼܠ ܕܓܵܘ ܫܡܲܝܵܐ ܟܹܐ ܡܲܦܠܸܚ ܠܗ݉ܘܿܢ ܩܵܐ ܚܵܝܪ ܕܐܵܢܝܼ ܕܣܵܒܪܝܼ ܒܝܼܹܗ. ܗܲܕܟ̣ܵܐ: ܗܸܟ̃ ܡܸܢܕܝܼ ܠܹܐ ܚܵܣܸܟ̣ ܡܸܢܲܢ ܡܐܵܕܝܼܵܐ ܠܒܵܬ݉ܪܹܐ: ܕܵܐܟ̣ܝܼ ܕܐܘܼܦ ܠܹܐ ܝܠܹܗ ܚܣܝܼܟ̣ܵܐ ܗܲܠ ܐܵܕܝܼܵܐ.