ܚܙܝܪܢ 1
ܘܗ݉ܘܐ ܠܗ ܪܡܫܐ: ܘܗ݉ܘܐ ܠܗ̇ ܡܗ̇ܘܪܫܐ: ܝܘܡܐ ܕܚܕ݉ (ܒܪܝܬܐ ܐ: 5)
ܡܸܓ̰ܸܕ ܐܘܼܦ ܒܫܘܼܪܵܝܵܐ ܗܲܕܟ̣ܵܐ ܝܗ݉ܘܵܐ؟ ܐܘܼܦ ܗ̇ܝܓܵܗ ܙܲܒ̣ܢܵܐ ܦܝܼܫܵܐ ܝܗ݉ܘܵܐ ܦܘܼܠܥܵܐ ܒܒܲܗܪܵܐ ܘܒܚܘܼܒ̣ܝܵܐ؟ ܒܲܣ ܠܲܝܬ ܪܵܒܵܐ ܥܵܓ̰ܸܒܘܼܬܵܐ ܕܐܘܼܦ ܐܲܗܘܵܠܲܬܹ̈ܐ ܕܝܼܝܼ ܫܲܚܠܸܦܝܼ ܡ̣ܢ ܟܵܘܸܬܪܵܐ ܕܡܲܢܬܵܝܬܵܐ ܠܦܲܠܓܵܐ ܕܠܲܝܠܹܐ ܕܝܲܠܨܘܼܝܼ. ܗܲܡܵܫܵܐ ܠܹܐ ܗܵܘܹܐ ܠܵܘܓ̰ܵܐ ܟܵܡܝܼܠ ܐܘܼܦ ܒܝܲܕ ܫܘܼܠܵܢܹ̈ܐ ܕܓܵܢܝܼ ܠܵܐ ܡܵܝܘܿܬܬܵܐ: ܚܲܕ݉ܟܡܵܐ ܓܵܗܹ̈ܐ ܒܸܬ ܗܵܘܹܝܢ ܢܵܐܟ̰ܵܪܵܐ ܠܹܥܒ̣ܵܕܵܐ ܬܲܥܙܝܼ ܒܘܼܬ ܚܵܕܘܼܝܵܬܝܼ̈ ܬܠܝܼܩܹ̈ܐ: ܘܠܸܛܥܵܝܵܐ ܠܡܘܼܚܸܒܝܼ ܒܠܲܝܠܹܐ. ܠܹܐ ܝܘܸܢ ܙܹܐ ܐܵܢܵܐ ܒܢܲܦ̮ܫܝܼ ܡܵܪܵܐ ܕܐܵܗܵܐ ܐܲܗܘܵܠ: ܣܵܒܵܒ ܦܸܫܟܵܐ ܕܟܠܵܝ ܡܘܼ̈ܚܸܒܹܐ ܕܡܵܪܝܵܐ ܢܦܝܼܠܵܐ ܝܠܹܗ ܠܸܙܡܵܪܵܐ ܙܡܵܪܬܵܐ ܚܒ̣ܝܼܛܬܵܐ ܕܕܝܼܘܵܢ ܘܕܖ̈ܲܚܡܹܐ: ܕܥܹܩܘܼܝ ܘܕܦܘܼܨܵܝܵܐ: ܕܬܲܥܙܝܼ ܘܕܚܵܕܘܼܬܵܐ. ܚܲܕ݉ ܡ̣ܢ ܩܵܢܘܿܢܹ̈ܐ ܕܡܕܲܒܪܵܢܘܼܬܵܐ ܐܲܠܵܗܵܝܬܵܐ ܝܠܹܗ: ܕܝܵܘܡܵܐ ܘܠܲܝܠܹܐ ܠܹܐ ܫܵܠܝܼ: ܠܵܐ ܒܒܪܝܼܬܵܐ ܟܝܵܢܵܝܬܵܐ ܘܠܵܐ ܒܪܘܼܚܵܢܵܝܬܵܐ: ܗܲܠ ܕܡܵܛܲܚ ܠܗ̇ܝ ܐܲܪܥܵܐ ܕܒܘܼܬ ܕܝܼܘܼܗ̇ ܟܬܝܼܒ̣ܵܐ ܝܠܹܗ: ܠܲܝܬ ܠܲܝܠܹܐ ܬܵܡܵܐ. ܨܦܵܝܝܼ ܝܠܹܗ ܡܸܢܕܝܼ ܕܒܵܒܲܢ ܫܡܲܝܵܢܵܝܵܐ ܡܘܼܪܝܸܙܵܐ ܝܠܹܗ.
ܒܲܣ: ܓܵܢܝܼ: ܩܵܬܵܟ̣ܝ ܡܘܼܕܝܼ ܝܠܵܗ̇ ܨܦܵܝܝܼ ܠܹܥܒ̣ܵܕܵܐ؟ ܝܠܘܿܦܝ ܩܲܕ݉ܡܵܝܬܵܐ ܠܹܗܘܵܝܵܐ ܪܵܙܝܼ ܒܐܵܗܵܐ ܪܹܐܙܵܐ ܐܲܠܵܗܵܝܵܐ. ܘܗ݉ܘܝܼ ܪܵܙܝܼ: ܥܲܡ ܐܝܼܘܿܒ: ܠܩܲܒܘܿܠܹܐ ܠܵܐ ܐܲܚܟ̰ܝܼ ܛܵܒ̣ܬܵܐ ܡ̣ܢ ܐܝܼܕܵܐ ܕܡܵܪܝܵܐ: ܐܸܠܵܐ ܐܘܼܦ ܝܲܠܨܘܼܝ. ܗ̇ܝܓܵܗ ܝܠܘܿܦܝ ܠܸܚܕܵܝܵܐ ܒܨܲܦܪܵܐ ܘܒܪܲܡܫܵܐ: ܫܲܒܸܚܝ ܠܡܵܪܝܵܐ ܒܙܪܵܩܬܵܐ ܕܫܸܡܫܵܐ ܕܚܵܕܘܼܬܵܐ: ܘܐܘܼܦ ܫܲܒܸܚܝ ܠܹܗ ܒܘܼܬ ܚܘܼܒ̣ܝܵܐ ܕܠܲܝܠܹܐ. ܐܝܼܬ ܫܘܼܦܪܵܐ ܗܲܡ ܒܙܪܵܩܬܵܐ ܕܫܸܡܫܵܐ ܘܗܲܡ ܒܓܢܵܝܬܘܼܗܝ: ܙܡܘܿܪܝ ܒܘܼܬ ܕܝܼܘܼܗܝ: ܚܩܘܿܪܝ ܠܡܵܪܝܵܐ. ܐܲܝܟ̣ ܒܘܼܠܒܘܼܠ: ܙܡܘܿܪ ܗܵܘܵܙܘܼ̈ܟ̣ ܒܟܠܵܝ ܙܲܒ̣ܢܹ̈ܐ. ܗܲܡܸܢ ܕܠܲܝܠܹܐ ܙܹܐ ܐܲܝܟ̣ ܝܵܘܡܵܐ ܡܲܗܢܝܵܢܵܐ ܝܠܹܗ. ܛܠܘܼܠܵܐ ܕܫܵܦܵܩܲܬ ܟܹܐ ܢܵܦܸܠ ܒܦܸܪܝܘܼܬܵܐ ܒܠܲܝܠܹܐ ܕܦܵܫܲܡܬܵܐ. ܟܵܘ̈ܟ̣ܒ̣ܹܐ ܕܩܵܘܠܵܐ ܟܹܐ ܠܲܓ̰ܠܸܓ̰ܝܼ ܒܚܸܩܪܵܐ ܓܵܘ ܚܘܼܒ̣ܝܵܢܘܼܬܵܐ ܕܚܲܫܵܐ. ܠܵܐ ܪܲܦܸܬ ܐܝܼܕܵܐ ܡ̣ܢ ܚܸܠܡܲܬܘܼܟ̣ ܒܟܠܵܝ ܫܲܚܠܵܦܝܵܬܹ̈ܐ. ܟܠ ܣܵܥܲܬ ܐܝܼܬ ܠܵܗ̇ ܘܵܓ̰ܸܒܘܼܬܵܐ ܕܓܵܢܘܼܗ̇: ܒܲܣ ܥܲܪܩܸܠ ܒܩܪܵܝܬܘܼܟ̣ ܐܲܝܟ̣ ܪܹܓܵܐ ܕܡܵܪܝܵܐ ܗܲܠ ܕܗ̇ܘ ܡܲܒܝܸܢ ܒܚܸܩܪܘܼܗܝ. ܓܵܢܝܼ: ܪܲܡܫܵܟ̣ܝ ܕܣܲܝܒܘܼܬܵܐ ܘܕܡܵܘܬܵܐ ܩܲܪܒܘܼܢܹܐ ܝܠܹܗ: ܐܝܼܢܵܐ ܠܵܐ ܙܵܕܥܲܬܝ: ܣܵܒܵܒ ܣܵܡܵܐ ܕܝܵܘܡܵܐ ܝܠܹܗ ܘܡܵܪܝܵܐ ܥܲܡܵܟ̣ܝ ܝܼܠܹܗ ܒܟܠܹܗ ܝܵܘܡܵܐ.