ܚܙܝܪܢ 11
ܐܚܢܢ ܡܚܒܚ ܠܗ ܣܒܒ ܗ̇ܘ ܩܕ݉ܡܝܬܐ ܩܡ ܡܚܒ ܠܢ (ܐ ܝܘܚܢܢ ܕ: 19)
ܠܲܝܬ ܒܲܗܪܵܐ ܒܝܲܕ ܦܲܠܝܼܛܵܐ: ܡܵܓܵܪ ܗ̇ܘ ܕܒܸܦܠܵܛܵܐ ܝܠܹܗ ܡ̣ܢ ܫܸܡܫܵܐ: ܐܘܼܦ ܠܲܝܬ ܚܘܼܒܵܐ ܣܲܪܲܣܬ ܓܵܘ ܚܲܕ݉ ܠܸܒܵܐ ܠܟܸܣ ܡܫܝܼܚܵܐ: ܡܵܓܵܪ ܗ̇ܘ ܚܘܼܒܵܐ ܗܲܪ ܡ̣ܢ ܡܫܝܼܚܵܐ ܩܲܕ݉ܡܵܝܬܵܐ ܦܠܝܼܛܵܐ ܝܠܹܗ. ܟܠܹܗ ܚܘܿܒܲܢ ܕܠܟܸܣ ܐܲܠܵܗܵܐ ܓܵܪܵܓ ܕܢܲܒ̣ܸܥ ܡ̣ܢ ܡܲܒܘܼܥܵܐ ܫܵܦܟ̣ܵܢܵܐ ܕܚܘܼܒܵܐ ܒܹܐ ܩܲܝܵܣ ܕܓܵܢܘܼܗܝ. ܐܵܗܵܐ ܣܲܪܲܣܬܘܼܬܵܐ ܗܲܠ ܐܵܒܵܕ ܦܵܝܫܵܢܬܵܐ ܝܠܵܗ̇: ܕܐܲܚܢܲܢ ܟܹܐ ܡܲܚܸܒܲܚ ܠܹܗ ܠܵܐ ܒܘܼܬ ܗܸܟ̃ ܗܲܓ̰ܵܬ ܡܵܓܵܪ ܕܩܲܕ݉ܡܵܝܬܵܐ ܗ̇ܘ ܩܵܡ ܡܲܚܸܒ ܠܲܢ. ܚܘܼܒܲܢ ܕܠܟܸܣܠܘܼܗܝ ܝܼܠܹܗ ܗܲܪ ܗܵܨܲܠܬܵܐ ܕܚܘܼܒܵܐ ܕܗ̇ܘ ܠܟܸܣܠܲܢ. ܟܠ ܕܬܲܚܡܸܢ ܥܲܠ ܦܘܼܠܚܵܢܹ̈ܐ ܕܐܲܠܵܗܵܐ ܟܹܐ ܡܵܨܝܵܐ ܕܪܵܕܹܐ ܠܗ݉ܘܿܢ ܘܕܥܲܓ̰ܸܒ ܒܝܼܵܝ ܒܩܲܝܪܘܼܬܵܐ: ܐܝܼܢܵܐ ܚܲܝܡܘܼܬܵܐ ܕܚܘܼܒܵܐ ܐܲܚܟ̰ܝܼ ܡܘܼܡܟܸܢ ܝܼܠܵܗ̇ ܕܦܵܝܫܵܐ ܡܘܼܠܗܝܼܬܵܐ ܓܵܘ ܠܸܒܵܐ ܗܲܪ ܒܪܘܼܚܵܐ ܕܐܲܠܵܗܵܐ. ܟܡܵܐ ܓܘܼܪܬܵܐ ܝܠܵܗ̇ ܥܵܓ̰ܸܒܘܼܬܵܐ ܕܐ݉ܢܵܫܹ̈ܐ ܕܐܲܝܟ̣ ܕܝܼܲܢ ܗܸܟ̃ ܦܝܼܫ ܠܗ݉ܘܿܢ ܡܘܼܝܬ݉ܝܹܐ ܠܡܲܚܘܼܒܹܐ ܠܡܫܝܼܚܵܐ! ܕܵܐܟ̣ܝܼ ܣܸܪ ܓܘܼܪܬܵܐ ܝܠܵܗ̇: ܕܟܲܕ ܐܲܚܢܲܢ ܥܒ̣ܝܼܕܹܐ ܝܘܲܚ ܗ݉ܘܵܘ ܝܵܓ̣ܝܼܘܼܬܵܐ ܥܲܠܘܼܗܝ: ܗ̇ܘ: ܒܡܲܚܙܵܝܬܵܐ ܕܚܲܕ݉ ܚܘܼܒܵܐ ܐܘܼܚܟ̰ܵܐ ܥܓ̰ܝܼܒܵܐ: ܓ̰ܵܪܸܒ ܗ݉ܘܵܐ ܠܡܲܕܘܼܪܲܢ ܠܟܸܣܠܘܼܗܝ! ܠܵܐ: ܐܘܼܦ ܚܕܵܐ ܕܲܢܕܸܟܬܵܐ ܕܚܘܼܒܵܐ ܠܹܐ ܗܵܘܝܵܐ ܗ݉ܘܵܐ ܠܲܢ ܠܟܸܣ ܐܲܠܵܗܵܐ ܐܸܢ ܗ̇ܘ ܚܘܼܒܵܐ ܩܲܕ݉ܡܵܝܬܵܐ ܒܓܵܢܘܼܗܝ ܠܹܐ ܝܗ݉ܘܵܐ ܢܨܝܼܒ̣ܘܼܗܝ ܒܝܼܲܢ. ܒܲܣ ܚܘܼܒܵܐ ܕܝܼܲܢ ܦܝܼܫܵܐ ܝܠܹܗ ܗܘܼܨܠܵܐ ܡ̣ܢ ܚܘܼܒܵܐ ܕܐܲܠܵܗܵܐ ܡܘܼܫܦܸܟ̣ܵܐ ܒܦܸܪܝܼܘܼܬܵܐ ܓܵܘ ܠܸܒܵܐ ܕܝܼܲܢ. ܐܝܼܢܵܐ ܡ̣ܢ ܒܵܬ݉ܪ ܕܗܲܕܟ̣ܵܐ ܦܝܼܫܵܐ ܝܠܹܗ ܙܪܝܼܥܵܐ ܒܐܝܼܕܵܐ ܕܐܲܠܵܗܵܐ: ܘܵܓ̰ܸܒ ܝܼܠܵܗ̇ ܕܦܵܐܸܫ ܬܘܼܪܣܝܼܵܐ ܙܹܐ ܒܐܝܼܕܵܐ ܕܐܲܠܵܗܵܐ. ܚܘܼܒܵܐ ܠܹܐ ܝܠܹܗ ܚܕܵܐ ܢܨܝܼܒ̣ܬܵܐ ܝܸܪܠܘܼ ܕܒܸܬ ܒܲܓ̰ܪܵܐ ܓܵܘ ܠܸܒܵܐ ܕܒܲܪܢܵܫܵܐ ܐܲܨܠܵܢܵܐܝܼܬ: ܒܚܲܝܠܵܐ ܕܓܵܢܘܼܗ̇: ܓܵܪܵܓ ܦܵܝܫܵܐ ܡܘܼܫܬܝܼܬܵܐ ܡ̣ܢ ܪܵܘܡܵܐ. ܚܘܼܒܵܐ ܚܲܕ݉ ܟ̰ܘܼܟ̰ܵܓܵܐ ܢܵܙܸܟ ܝܼܠܹܗ: ܘܐܸܢ ܠܵܐ ܩܲܒܸܠ ܗ݉ܘܵܐ ܬܘܼܪܣܵܝܵܐ ܙܵܘܕܵܐ ܡ̣ܢ ܗ̇ܘ ܕܦܝܵܫܵܐ ܝܠܹܗ ܓܪܝܼܫܵܐ ܡ̣ܢ ܩܵܝܵܐ ܕܠܸܒܲܢ: ܓ̰ܲܠܕܹܐ ܒܸܬ ܟ̰ܵܡܸܟ̃ ܗ݉ܘܵܐ. ܟ̰ܘܼܢܟܹܐ ܕܚܘܼܒܵܐ ܟܹܐ ܐܵܬܹܐ ܡ̣ܢ ܫܡܲܝܵܐ: ܓܵܪܵܓ ܕܗܵܘܹܐ ܬܘܼܪܣܝܼܵܐ ܒܡܹܐܟ̣ܘܼܠܬܵܐ ܫܡܲܝܵܢܵܝܬܵܐ.
ܟܹܐ ܡܲܚܸܒܸܢܘܼܟ̣ ܡܵܪܝܵܐ: ܐܝܼܢܵܐ ܒܚܘܼܒܵܐ ܕܓܵܢܝܼ ܠܹܐ ܝܠܹܗ: ܠܲܝܬ ܠܝܼ ܚܘܼܒܵܐ ܐܵܢܵܐ.
ܟܹܐ ܡܲܚܸܒܸܢܘܼܟ̣ ܡܵܪܝܵܐ: ܐܝܼܢܵܐ ܡܸܢܘܼܟ̣ ܚܘܼܒܝܼ ܟܠܹܗ: ܣܵܒܵܒ ܒܝܼܘܼܟ̣ ܐܲܚܟ̰ܝܼ ܟܹܐ ܚܲܝܸܢ ܝܢܵܐ.
ܠܵܐ ܡܸܢܕܝܼ ܝܘܸܢ: ܘܬܲܟܠܵܐ ܕܗܵܘܹܝܢ ܗ݉ܘܵܐ ܣܘܼܦܩܵܐ: ܘܢܝܼܣܬ: ܩܲܕ݉ܡ ܐܲܩܠܘܼ̈ܟ̣ ܢܵܦܠܸܢ ܗ݉ܘܵܐ.