ܘܐ݉ܡܝܼܪܗ̇ ܣܪܐ: ܓܚܟܬܐ ܥܒ̣ܝܕ ܠܗ ܐܠܝ ܐܠܗܐ: ܟܠ ܕܫܡܥ ܒܬ ܓܚܟ ܒܘܬ ܕܝܝ (ܒܪܝܬܐ ܟܐ: 6)

ܪܵܒܵܐ ܠܥܸܠܸܠ ܝܼܗ݉ܘܵܐ ܡ̣ܢ ܚܲܝܠܵܐ ܕܐܲܨܠܵܐ: ܘܐܘܼܦ ܕܲܪܩܘܼܒ̣ܠ ܝܼܗ݉ܘܵܐ ܠܫܲܖ̈ܥܵܬܘܼܗܝ: ܕܣܲܪܵܐ ܒܣܲܝܒܘܼܬܘܼܗ̇ ܩܲܒܠܵܐ ܗ݉ܘܵܐ ܚܲܕ݉ ܒܪܘܿܢܵܐ: ܘܗܲܕܟ̣ܵܐ ܪܸܚܩܵܐ ܝܠܵܗ̇ ܡ̣ܢ ܟܠܵܝ ܩܵܢܘܿܢܹ̈ܐ ܕܥܵܕܲܬ: ܕܐܵܢܵܐ: ܚܲܕ݉ ܚܲܛܵܝܵܐ ܙܲܒܘܼܢ ܘܡܸܣܟܹܢܵܐ: ܡܲܫ݉ܟ̰ܚܵܢ ܫܵܦܵܩܲܬ ܠܩܲܒܘܿܠܹܐ ܓܵܘ ܓܵܢܝܼ ܥܡܵܪܬܵܐ ܕܪܘܼܚܵܐ ܕܡܵܪܲܢ. ܐܵܢܵܐ ܕܒܚܲܕ݉ ܙܲܒ̣ܢܵܐ ܗܹܒ̣ܝܼܝܼ ܩܛܝܼܥܬܵܐ ܝܗ݉ܘܵܐ: ܣܵܒܵܒ ܐܲܨܠܝܼ ܒܵܪܘܿܙܵܐ ܝܗ݉ܘܵܐ ܘܟ̰ܡܝܼܟ̰ܵܐ ܘܒܲܝܵܪ ܐܲܝܟ̣ ܚܲܕ݉ ܟ̰ܵܘܠ ܒܹܐ ܡܲܗܨܘܼܠ: ܐܵܢܵܐ ܕܦܵܝܫܸܢ ܡܘܼܚܫܸܚܵܐ ܠܡܲܝܬ݉ܘܼܝܹܐ ܛܥܘܼܢܝܵܬܹ̈ܐ ܠܩܲܕܝܼܫܘܼܬܵܐ. ܠܵܚܘܿܡܬܵܐ ܝܠܵܗ̇ ܕܦܘܼܡܝܼ ܦܵܐܸܫ ܡܸܠܝܵܐ ܡ̣ܢ ܓܸܚܟܵܐ ܕܚܵܕܘܼܬܵܐ ܒܘܼܬ ܫܵܦܵܩܲܬ ܦܪܝܼܫܬܵܐ ܘܠܵܐ ܣܦܝܼܪܬܵܐ ܕܩܘܼܒܠܵܐ ܝܘܸܢ ܡ̣ܢ ܡܵܪܝܵܐ. ܣܵܒܵܒ ܡܫܝܼܚܵܐ ܡܘܼܫ݉ܟ̰ܚܘܼܗܝ ܝܘܸܢ: ܙܲܪܥܵܐ ܩܘܼܘܸܠܵܐ: ܘܗ̇ܘ ܕܝܼܝܼ ܝܠܹܗ ܗܲܠ ܐܵܒܵܕ. ܒܐܵܗܵܐ ܝܵܘܡܵܐ ܒܸܬ ܡܲܪܡܸܢ ܫܘܼܒ̣ܚܝܼ ܕܚܵܕܘܼܬܵܐ ܠܡܵܪܝܵܐ ܣܵܒܵܒ ܕܟ̣ܝܼܪܵܐ ܝܠܹܗ ܠܐܲܗܘܵܠܝܼ ܟܘܼܦܬܵܐ: ܣܵܒܵܒ ܒܸܦܨܵܚܵܐ ܝܠܹܗ ܠܸܒܝܼ ܒܡܵܪܝܵܐ: ܒܸܪܝܵܡܵܐ ܝܠܵܗ̇ ܩܲܪ݉ܢܝܼ ܒܡܵܪܝܵܐ: ܪܘܝܼܚܵܐ ܝܠܹܗ ܦܘܼܡܝܼ ܥܲܠ ܕܸܫ̃ܡܸܢܝܼ̈: ܣܵܒܵܒ ܚܕܹܐ ܠܝܼ ܒܦܘܼܪܩܵܢܘܼܟ̣.

ܬܲܟܠܵܐ ܕܟܠܵܝ ܫܲܡܥܵܢܹ̈ܐ ܒܘܼܬ ܦܘܼܨܵܝܝܼ ܓܘܼܪܵܐ ܕܡ̣ܢ ܓܹܗܲܢܵܐ ܘܒܘܼܬ ܣܲܚܒܲܪܬܝܼ ܒܪܝܼܟ̣ܬܵܐ ܕܡ̣ܢ ܪܵܘܡܵܐ: ܓܵܚܟܝܼ ܥܲܡܝܼ ܒܚܵܕܘܼܬܵܐ. ܒܵܥܹܝܢ ܡܲܚܕܹܝܢ ܠܟܸܠܦܲܬܝܼ ܒܫܠܵܡܵܐ ܓܘܼܪܵܐ ܕܐܝܼܬ ܠܝܼ: ܒܵܥܹܝܢ ܡܲܦܨܸܚܸܢ ܠܕܵܘܣܬܝܼ̈ ܙܹܐ ܒܘܼܬ ܚܸܕܝܼܘܼܬܝܼ ܙܵܝܕܵܢܬܵܐ: ܒܵܥܹܝܢ ܕܐܘܼܦ ܒܵܢܹܝܢ ܠܥܹܕܬܵܐ ܒܡܵܘܕܵܝܵܬܝܼ̈ ܕܛܥܵܢܬܵܐ ܕܡܸܢܬܵܐ: ܘܐܘܼܦ ܡܲܕܥܸܢ ܩܵܐ ܕܘܼܢܝܹܐ ܒܘܼܬ ܦܨܵܚܵܐ ܕܐܝܼܬ ܒܗܲܡܙܲܡܬܝܼ ܕܝܵܘܡܵܐ ܒܝܵܘܡܵܐ. ܝܑܼܫܘܿܥ ܡܫܝܼܚܵܐ ܚܕܵܐ ܝܵܡܵܐ ܥܵܡܘܿܩܬܵܐ ܕܚܵܕܘܼܬܵܐ ܝܠܹܗ: ܕܓܵܢܝܼ ܒܸܬ ܣܵܚܝܵܐ ܓܵܘܘܼܗ̇: ܘܒܸܬ ܦܵܝܫܵܐ ܒܠܝܼܥܬܵܐ ܒܚܵܕܘܼܬܵܐ ܘܫܵܘܬܵܦܘܼܬܵܐ ܥܲܡܘܼܗܝ. ܣܲܪܵܐ ܓܘܼܫܸܩ ܠܵܗ̇ ܥܲܠ ܐܝܼܣܚܵܩ ܘܓܚܝܼܟ ܠܵܗ̇ ܒܚܵܕܘܼܬܵܐ ܓܘܼܪܬܵܐ: ܗܲܕܟ̣ܵܐ ܐܘܼܦ ܐܲܢ݉ܬܝ: ܓܵܢܝܼ: ܓܲܫܸܩܝ ܥܲܠ ܡܫܝܼܚܵܐ ܕܝܼܵܟ̣ܝ: ܘܟ̰ܘܼܕܝ ܠܫܡܲܝܵܐ ܘܠܐܲܪܥܵܐ ܕܙܲܘܸܓܝܼ ܒܚܵܕܘܼܬܵܟ̣ܝ ܕܠܹܐ ܐܵܬܝܵܐ ܠܗܲܡܙܘܼܡܹܐ.